Usi Uwoma Mak 16:1-8
-
A kpare Jesu no uwhu ze (1-8)
16 Fikiere nọ Ẹdijala+ na ọ vrẹ no, Meri Magdalini, Meri+ oni Jemis, gbe Salomi a tẹ dẹ eware nọ i re gbo ore awere re a nyae rehọ ae wholo ori Jesu.+
2 Evaọ irioke ẹdẹ ọsosuọ oka na* nọ ọre ọ va ze no, a te te obọ uki* na.+
3 A tẹ jẹ ta kẹ ohwohwo nọ: “Kọ ono o ti ghelie utho na no unu uki na kẹ omai?”
4 Rekọ nọ a rri, a tẹ ruẹ nọ a ghelie utho na no, dede nọ o jọ ruaro gaga.+
5 Nọ a ruọ eva uki na, a tẹ ruẹ ọmoha jọ nọ ọ keria ofẹ obọze na, nọ o ku ewu othethei ọfuafo họ, u te gbe ai unu thesiwa.
6 Ọ tẹ ta kẹ ae nọ: “U gbe owhai unu hu.+ Jesu ohwo Nazarẹt nọ a kare fihọ ure kpe na wha be gwọlọ na. A kpare riẹ no.+ Ọ rrọ etenẹ hẹ. Rri, oria nọ a wọ riẹ fihọ ọna.+
7 Rekọ wha nya, wha ta kẹ ilele riẹ gbe Pita nọ, ‘O bi kpobọ Galili nyae hẹrẹ owhai.+ Wha te jọ obei ruẹ e riẹ, nwane wọhọ epanọ ọ ta kẹ owhai.’”+
8 Fikiere nọ a no eva uki na ze, a tẹ dhẹ vrẹ, bi nuhu avọ ọwhewhe nọ ọ da rai oma fia. A ta oware ovo kẹ ohwo ọvo ho, keme ozọ u je mu ae.*+
Eme-Obotọ
^ Ẹdẹ nana ma bi se Ẹdoka nẹnẹ na. Rọkẹ ahwo Ju, ẹdẹ yena ọ jọ ẹdẹ ọsosuọ oka na.
^ Hayo “uki ekareghẹhọ.”
^ Eme nọ e rrọ owọ avọ 8 na Usi Uwoma Mak o jọ kuhọ, wọhọ epanọ o rrọ ikulu-ebe nọ a rọ obọ kere nọ e mai kri no nọ a fievahọ. Rri Ẹme-Ofiba A3.
