Rut 1:1-22
1 Whaọ evaọ okenọ ibruoziẹ+ na i je su,* ohọo u te je mu evaọ ẹkwotọ na; ọzae jọ o te no Bẹtlẹhẹm+ evaọ Juda kpohọ ukane evaọ ẹkwotọ* Moab,+ tei te aye gbe emezae ivẹ riẹ.
2 Odẹ ọzae na Ẹlimẹlẹk,* odẹ aye riẹ Naomi,* edẹ emezae ivẹ riẹ kọ Malọn* gbe Kiliọn.* Ahwo nana ahwo Efrata nọ a no Bẹtlẹhẹm evaọ Juda ze. A kwa kpohọ ẹkwotọ Moab, a tẹ jẹ rria obei.
3 Nọ oke jọ o vrẹ no, Ẹlimẹlẹk, ọzae Naomi o te whu, u te kiọkọ ọyomariẹ avọ emezae ivẹ riẹ.
4 Uwhremu na, emezae ivẹ riẹ na a te ti wo eyae nọ e rrọ ahwo Moab; odẹ ọjọ Ọpa, odẹ ọdekọ kọ Rut.+ A jọ etẹe oware wọhọ ikpe ikpe.
5 Kẹsena emezae ivẹ na, Malọn avọ Kiliọn, a te ti whu re, ere emọ ivẹ nọ aye na o wo gbe ọzae riẹ a ro whu se iẹe ba.
6 Fikiere ọ tẹ ruọ edhere bi no ẹkwotọ Moab zihe kpo avọ eyae emọ riẹ, keme ọ jọ Moab yo nọ Jihova ọ be rẹrote ahwo riẹ enẹna ẹkwoma emu* nọ ọ be kẹ ae.
7 O te no oria nọ ọ jẹ rria na avọ eyae emezae ivẹ riẹ. Nọ a jọ edhere be nya zihe kpohọ ẹkwotọ Juda na,
8 Naomi ọ tẹ ta kẹ eyae emezae ivẹ riẹ na nọ: “Wha kpo, wha zihe kpohọ ọvuọ uwou oni riẹ. Jọ Jihova o dhesẹ uyoyou nọ o rẹ hiẹ hẹ kẹ owhai,+ nwane wọhọ epanọ wha dhesẹ kẹ ezae nọ i whu no na gbe omẹ.
9 Jọ Jihova o ru* re wha wo omofọwẹ* evaọ ọvuọ uwou ọzae riẹ.”+ Kẹsena ọ tẹ viọlọ ae, a te kuenu oviẹ.
10 A tẹ be ta kẹe nọ: “Ijo, ma re lele owhẹ kpo bru ahwo ra.”
11 Rekọ Naomi ọ tẹ ta nọ: “Wha zihe kpo, emetẹ mẹ. Fikieme wha je lele omẹ kpo? Kọ mẹ rẹ gbẹ sai yẹ emezae nọ e rẹ sae jọ ezae rai?+
12 Wha zihe kpo, emetẹ mẹ. Wha kpo, keme mẹ kpako vrẹ epanọ me re ro wo ọzae no. O tẹ make rọnọ me wo ẹruore inọ mẹ sai wo ọzae aso nana jẹ sai yẹ emezae dede,
13 kọ wha te hẹrẹ ae bẹsenọ a rẹ rro te ahwo no? Kọ wha te siọ ezae ba ẹwariẹ wo fiki rai? Ijo, emetẹ mẹ, o be da omẹ kẹ owhai gaga, keme obọ Jihova o rọsuọ omẹ no.”+
14 A tẹ wariẹ kuenu oviẹ, kẹsena Ọpa ọ tẹ viọlọ oniọrọo riẹ, o te zihe kpo. Rekọ Rut ọ talamu ei.
15 Fikiere Naomi ọ tẹ ta nọ: “Rri! Ogbeli* ra nọ ọ rrọ aye-uku re o zihe bru ahwo riẹ gbe eghẹnẹ riẹ no. Lele ogbeli ra zihe kpo.”
16 Rekọ Rut ọ tẹ ta nọ: “Whọ tẹzẹ omẹ hẹ re mẹ nyasiọ owhẹ ba, re mẹ siọ owhẹ ba elele; keme oria nọ whọ nya mẹ te nya, yọ oria nọ whọ te jọ evaọ aso mẹ te jọ. Ahwo ra a te jọ ahwo mẹ, yọ Ọghẹnẹ ra ọ te jọ Ọghẹnẹ mẹ.+
17 Oria nọ whọ jọ whu mẹ te jọ whu, yọ etẹe a ti ki omẹ fihọ. Jọ Jihova ọ kẹ omẹ uye* je fibae otẹrọnọ oware jọ o rẹ hẹriẹ omẹ avọ owhẹ ajokpaọ uwhu.”
18 Nọ Naomi ọ ruẹ nọ Rut o bi si ikẹ nọ o re lele iei kpo, ọ tẹ se iẹe ba ẹtẹzẹ.
19 Aimava a tẹ ruabọhọ onya rai bẹsenọ a ro te Bẹtlẹhẹm. Nọ a nwane ruọ eva Bẹtlẹhẹm,+ okpẹwho na soso o te duwuku fiki rai, eyae na a tẹ be ta nọ: “Kinọ Naomi?”
20 Ọ vẹ ta kẹ eyae na nọ: “Wha se omẹ Naomi* hi. Wha se omẹ Mara,* keme Erumeru na o ru uzuazọ yare kẹ omẹ gaga no.+
21 Mẹ vọ evaọ okenọ mẹ nyavrẹ, rekọ Jihova o ru omẹ zihe ze ababọ. Fikieme wha re ro se omẹ Naomi, kpakiyọ Jihova họ ọnọ ọ wọso omẹ, yọ Erumeru na họ ọnọ ọ wha uye se omẹ?”+
22 Enẹ Naomi o ro zihe no ẹkwotọ Moab ze,+ avọ aye ọmọzae riẹ, Rut, nọ ọ rrọ ohwo Moab. A ziọ Bẹtlẹhẹm evaọ emuhọ ezi nọ a re ro bru ebali.+
Eme-Obotọ
^ Evaọ Hibru, “i je bruoziẹ.”
^ Hayo “etọ.”
^ Otofa riẹ họ “Ọghẹnẹ Mẹ Ovie.”
^ Otofa riẹ họ “Omaweromẹ Mẹ.”
^ O sae jọ nọ o no ẹme Hibru ze nọ otofa riẹ o rrọ “ọnọ oma o be lọhọ; kie ẹyao.”
^ Otofa riẹ họ “Ọnọ Ọ Rrọ Kwẹkwẹkwẹ; Ọnọ O bi Whu.”
^ Evaọ Hibru, “ebrẹdi.”
^ Hayo “ọ kẹ owhai okẹ.”
^ Evaọ Hibru, “oria eriosehọ.”
^ Koyehọ, “imava nọ e jọ uwou ovona wo ọzae hayo aye.”
^ Evaọ Hibru, “o ru omẹ ere.”
^ Otofa riẹ họ “Omaweromẹ Mẹ.”
^ Otofa riẹ họ “Ẹyayare.”
