Ebaibol O re Nwene Uzuazọ Ohwo

EME ọzae jọ nọ ọ rrọ ohwo Scotland ọ ruẹ nọ o mae kẹe evawere vi emamọ iruo nọ o je ru? Eme u fiobọhọ kẹ ohwo Brazil jọ nọ ọ sae rọ siọ uzuazọ ọfariẹ-ogbe ba, jẹ siọ ikokeni ba evovo? Ẹvẹ ọzae jọ nọ ọ rrọ ohwo Slovenia ọ sae rọ siọ udi ba ẹda vrẹta? Se kpahe iku rai re whọ ruẹ ẹme nọ a ta.

“Me je Roro nọ Akpọ Mẹ O Woma.”​—JOHN RICKETTS

UKPE NỌ A YẸ OMẸ: 1958

ORẸWHO MẸ: SCOTLAND

IKU MẸ: ỌTHUEKI NỌ EWARE I WOMA KẸ

UZUAZỌ MẸ EVAỌ OKE NỌ U KPEMU: A yọrọ omẹ evaọ uwou nọ eware e jọ kiehọ kẹ omai gaga. Ọsẹ mẹ ọ jọ oletu ogbaẹmo Britian fikiere ma jẹ hae kwa no oria ruọ oria gaga. Ma rria orẹwho Scotland, England, Germany, Kenya, Malaysia, Ireland, gbe Cyprus. No umuo ikpe eree vrẹ, me je kpohọ boarding school evaọ Scotland. Kẹsena me te ti nwrotọ no yunivasiti Cambridge.

Nọ mẹ jọ ikpe 20, me te mu eki ọyẹle họ ẹtho, yọ mẹ thueki na evaọ ikpe eree soso. Mẹ kake thueki nana evaọ obọ South America, kẹsena evaọ Africa, yọ uwhremu na kọ Western Australia. Evaọ oke nọ mẹ kwa kpobọ Australia no, me te rovie ekọmpene obọmẹ, onọ mẹ zẹ no uwhremu na.

Ugho nọ me wo no ekọmpene nọ mẹ zẹ na ze u bu wumuo ho, fikiere mẹ tẹ retaya no ekiọthuọ evaọ okenọ mẹ jọ ikpe 40. Fikinọ me gbe bi ru iruo ho, mẹ jẹ hai kpohọ erẹ gaga. Mẹ rehọ imotosaikoro dhẹ orẹwho Australia wariẹ isiava soso, yọ mẹ nya akpọ na wariẹ ẹsiẹvo. Me je roro nọ akpọ mẹ o woma.

EPANỌ EBAIBOL NA O RO NWENE UZUAZỌ MẸ: Taure mẹ tẹ te retaya, mẹ jẹ gwọlọ epanọ me re ro yere Ọghẹnẹ fiki epanọ eware i je woma kẹ omẹ te evaọ uzuazọ. Fikiere me te je kpohọ ichọche Anglican, yọ ichọche nana mẹ nya evaọ oke nọ mẹ jẹ rro ze. Rekọ a je wuhrẹ emamọ oware ovo evaọ Ebaibol na ha. Kẹsena me te mu ichọche ọfa nọ a re se Mormon họ ẹnya, rekọ ichọche na i no omẹ oma keme a fievahọ Ebaibol na ha.

Evaọ ẹdẹjọ, Isẹri Jihova a te kporo ẹthẹ mẹ jẹ ta usi uwoma kẹ omẹ. Nọ a be ta usi uwoma kẹ omẹ na, me muẹrohọ nọ a je se eware nọ a je wuhrẹ omẹ na no Ebaibol ze. Oria Ebaibol jọ nọ a se kẹ omẹ họ, 1 Timoti 2:3, 4. Eria nana e ta nọ o rrọ oreva Ọghẹnẹ re “oghẹrẹ ahwo kpobi a wo esiwo je wo eriariẹ egbagba uzẹme na.” Eva e were omẹ gaga inọ Isẹri Jihova a ta kpahe epanọ u wuzou te re ohwo o wo eriariẹ egbagba Ebaibol na orọnikọ eriariẹ gheghe he.

Ebaibol nọ Isẹri Jihova a je wuhrẹ omẹ na u ru nọ mẹ sai ro wo eriariẹ egbagba Ebaibol na. Wọhọ oriruo, me wuhrẹ nọ Ọghẹnẹ avọ Jesu a rrọ abọjọ eghẹnẹ esanerọvo ho, ukpoye aimava na a wo ohẹriẹ. (Jọn 14:28; 1 Ahwo Kọrint 11:⁠3) Eva e were omẹ nọ me ro wuhrẹ uzẹme yena. Rekọ o kẹ omẹ uye gaga inọ mẹ raha oke mẹ kufiẹ jẹ daoma wo otoriẹ uwuhrẹ esanerọvo na evaọ oke nọ u kpemu.

O raha oke he, me te mu iwuhrẹ Isẹri Jihova họ ẹnya. Oware jọ nọ me muẹrohọ nọ u duobọte omẹ udu gaga họ, a jọ whẹtiẹ whẹtiẹ, yọ a jẹ daoma koko izi Ọghẹnẹ. Uvi uyoyou nọ a je dhesẹ u ru omẹ riẹ nọ egagọ uzẹme mẹ ruẹ no na.​—Jọn 13:35.

IRERE NỌ ME WO NO: Nọ mẹ họ-ame no, mẹ tẹ nyaku emamọ aye jọ nọ a re se Diane. Ukoko Isẹri a jọ yọrọ iẹe, yọ uruemu riẹ o were omẹ gaga. Nọ oke o be nyaharo na, ma tẹ rọo. Jihova ọ rọ Diane ghale omẹ keme mẹ avọ iẹe ma kpekpe gaga, yọ ọ rẹ tha omẹ uke.

O jọ omẹ avọ Diane iroro nọ ma rẹ kwa kpohọ oria nọ a jọ gwọlọ ahwo nọ a rẹ ta usi uwoma na. Evaọ ukpe 2010, ma tẹ kwa kpohọ orẹwho Belize, nọ o rrọ Central America. Orẹwho nana ma be jọ ta usi uwoma kẹ ahwo nọ a you Ọghẹnẹ, enọ e gwọlọ nọ a re wo eriariẹ egbagba Ebaibol na.

Eva e were omẹ gaga nọ enẹna, mẹ riẹ uzẹme na kpahe Ọghẹnẹ gbe Ẹme riẹ Ebaibol na. Me wo uvẹ nọ me bi ro wuhrẹ ahwo buobu Ebaibol na, yọ onana o be kẹ omẹ evawere. A rẹ ruẹ epanọ u woma te he re whọ ruẹ epanọ Ebaibol na o bi ro nwene uzuazọ ahwo, wọhọ epanọ Ebaibol na o nwene uzuazọ mẹ na. Mẹ ruẹ emamọ edhere nọ me re ro yere Ọghẹnẹ no rọkẹ eware iwoma kpobi nọ o ru kẹ omẹ evaọ uzuazọ.

“A Jọ Wowou Kẹ Omẹ Gaga.”​—MAURÍCIO ARAÚJO

UKPE NỌ A YẸ OMẸ: 1967

ORẸWHO MẸ: BRAZIL

IKU MẸ: UZUAZỌ ỌFARIẸ-OGBE

UZUAZỌ MẸ EVAỌ OKE NỌ U KPEMU: Mẹ whẹro evaọ ẹwho ọsese jọ nọ a re se Avaré, evaọ ubrotọ São Paulo. Ahwo buobu nọ a be rria ẹwho na a wo ọvuọ iruo rai nọ a bi ru.

Ọsẹ mẹ o whu evaọ oke nọ oni mẹ o ro di eva mẹ họ. Nọ mẹ gbẹ jọ uzoge, me re ku iwu oni mẹ họ nọ ọ gbẹ rrọ uwou hu. Me te mu epanọ ọmọtẹ o re ru họ eru, yọ ahwo a je rri omẹ wọhọ ọzae nọ o re lele ọzae ibe riẹ wezẹ. Nọ oke o be nyaharo na, me te mu emezae gbe ezae họ elele wezẹ.

Nọ me te enwenọ ikpe udhe no, mẹ jẹ gwọlọ ahwo nọ me re lele wezẹ (te emetẹ te emezae) evaọ oria kpobi nọ mẹ rẹ sae jọ ruẹ e rai, wọhọ ehọtẹle, eria nọ a rẹ jọ da idi evaọ aso gbe ichọche. Evaọ oke nọ a te bi ru ehaa nọ a re se carnival, mẹ rẹ sẹ osẹ wọhọ aye je gbile lele ahwo nọ a re kporo igede nya ẹwho wariẹ. Ahwo kpobi a riẹ omẹ evaọ oke yena.

Ahwo jọ nọ a jọ egbẹnyusu mẹ họ, ezae nọ i re lele ezae wezẹ, igberẹ gbe ahwo nọ a rẹ lọ imu egaga. Ejọ e jẹ tuduhọ omẹ awọ re me vovo ikokeni, yọ o raha oke he me te gine muhọ. Ẹsejọ mẹ avọ egbẹnyusu mẹ ma re vovo asohẹrioke. Yọ evaọ oke ofa, mẹ ọvo me re vovo ikokeni no ohiohiẹ rite owọwọ. Fikiere mẹ tẹ te dọ fihọ gadu te epanọ ahwo a je ro roro nọ me wo ẹyao AIDS, yọ a je gu omẹ evaọ ẹwho na.

EPANỌ EBAIBOL NA O RO NWENE UZUAZỌ MẸ: Evaọ oke nana mẹ rọ nyaku Isẹri Jihova. A jọ wowou kẹ omẹ gaga. Oria Ebaibol jọ nọ a se kẹ omẹ họ Ahwo Rom 10:​13, onọ o ta nọ: “Ohwo kpobi nọ o bi se odẹ Jihova a ti siwi ei.” Eme nana i fiobọhọ kẹ omẹ ruẹ nọ u wuzou gaga re mẹ hai se odẹ Jihova. Ẹsibuobu nọ me te vovo ikokeni bẹ no evaọ aso, me ve rovie unwido, rri kpobọ odhiwu, jẹ lẹ se Jihova re o fiobọhọ kẹ omẹ avọ irui-oviẹ nọ i bi su no omẹ aro ze.

Mẹ jẹ ruawa kpahe oni mẹ. O jẹ kẹe uye gaga, yọ o je roro iroro keme ọ ruẹ nọ imu egaga nọ mẹ be lọ na e jẹ raha uzuazọ mẹ kuotọ. Fiki onana mẹ tẹ gbaemu nọ mẹ rẹ siọ imu egaga ba ẹlọ. O raha oke he, mẹ tẹ rọwo nọ Isẹri Jihova a wuhrẹ omẹ Ebaibol na. A vuẹ omẹ nọ Ebaibol na nọ me bi wuhrẹ na, o te kẹ omẹ ẹgba nọ me ti ro ru lele utee mẹ re mẹ sae siọ imu egaga ba ẹlọ, yọ ere o ginẹ via.

Nọ mẹ ruabọhọ bi wuhrẹ Ebaibol na, mẹ tẹ ruẹ nọ u fo nọ mẹ rẹ siọ eware buobu ba. O mae jọ bẹbẹ kẹ omẹ re mẹ siọ uzuazọ ọfariẹ-ogbe ba, onọ ọzae o re jo lele ọzae wezẹ, keme no emaha ze me bi ro yeri oghẹrẹ uzuazọ nana. Oware jọ nọ u fiobọhọ kẹ omẹ họ, me siomano ahwo nọ a jẹ tuduhọ omẹ awọ re me yeri ekpehre uzuazọ yena. Mẹ fa usu no egbẹnyusu mẹ vẹre, yọ mẹ siọ ehọtẹle gbe eria nọ a rẹ jọ da idi evaọ aso ba ẹnya.

Dede nọ o lọhọ kẹ omẹ re mẹ siọ eware nana ba ha, eva e were omẹ nọ mẹ nyasiọ eware nana ba keme mẹ riẹ nọ Jihova ọ be daezọ mẹ yọ ọ riẹ ebẹbẹ mẹ. (1 Jọn 3:19, 20) Evaọ oware wọhọ ukpe 2002, yọ mẹ siọ eware kpobi nọ i wobọ kugbe owezẹ ọzae avọ ọzae ba no, yọ evaọ ukpe yena mẹ rọ họ-ame evaọ ukoko Isẹri Jihova.

IRERE NỌ ME WO NO: Eva e were oni mẹ gaga rọkẹ inwene nọ me ru na te epanọ ọ rọ rọwo nọ a wuhrẹ Ebaibol na kugbei. Rekọ o kẹ omẹ uye gaga nọ evaọ oke yena yọ ẹyao okie o kie oni mẹ kri no. Ghele na, eware nọ o je wuhrẹ evaọ Ebaibol na e were riẹ gaga, yọ o you Jihova gaga.

Anwọ ikpe eree na nọ mẹ rọ rrọ iruo odibọgba oke-kpobi na, be rehọ oke mẹ kpobi ta usi uwoma je wuhrẹ ahwo Ebaibol na. Dede na, ekpehre isiuru e rẹ ruọ omẹ udu ẹsejọ, rekọ mẹ rẹ gba oma mẹ. Oware nọ o be tuduhọ omẹ awọ họ, mẹ be sae gba oma mẹ, yọ mẹ riẹ nọ mẹ be rọ enẹ ru eva were Jihova.

Fikinọ me si kẹle Jihova je bi yeri uzuazọ nọ o rẹ were iẹe, u ru nọ me bi ro rri oma mẹ evaọ edhere nọ u fo. Enẹna eva e be were omẹ.

“Mẹ Jọ Othẹ nọ Ọ rẹ Kake Vọ Họ.”​—LUKA ŠUC

UKPE NỌ A YẸ OMẸ: 1975

ORẸWHO MẸ: SLOVENIA

IKU MẸ: MẸ RẸ DA UDI GAGA

UZUAZỌ MẸ EVAỌ OKE NỌ U KPEMU: A yẹ omẹ evaọ Ljubljana, nọ ọ rrọ okpẹwho esuo Slovenia. Eware e jẹ riẹ nya ziezi evaọ uwou mai, taure me te ti te ikpe ene. Kẹsena ọsẹ mẹ o te thuru whu. Nọ oware nana o via no, oni mẹ họ ohwo nọ o je ru iruo re ọ sae rẹrote omẹ avọ oniọvo-ọmọzae ọkpako mẹ.

Nọ mẹ jọ ikpe 15, mẹ tẹ kwa bru oni-ologbo mẹ. Mẹ gwọlọ nọ me re lele iei rria keme egbẹnyusu mẹ a jẹ rria okegbe yena. Yọ evaọ obọ uwou oni-ologbo mẹ na, me wo ufuoma nọ mẹ sai ro ru oware nọ u je omẹ vi ẹsenọ mẹ jọ obọ uwou mai. Nọ mẹ jọ ikpe 16, me te mu usu kugbe ahwo nọ a rẹ da idi evaọ urere oka. Mẹ tẹ kuvẹ re eto mẹ i di fihọ thethei, me te mu ekpehre osẹ họ ẹsẹ, yọ uwhremu na me te mu ivovavovo họ.

Dede nọ mẹ jẹ lọ oghẹrẹ imu egaga sa-sa, udi họ oware nọ mẹ talamu keme oye o mae were omẹ. Vẹre vẹre, mẹ rẹ da eglase ivẹ hayo esa, rekọ u te epanọ mẹ jẹ rọ da vrẹ ọgọ udi ọvo evaọ ẹkeriotọ. Nọ mẹ tẹ make da udi buobu nọ o bi mu omẹ dede, ohwo ọvuọvo ọ rẹ riẹ hẹ. Ẹsibuobu, oware nọ amọfa a rẹ rọ riẹ nọ mẹ da udi no họ, ore udi nọ o re gbo no unu mẹ ze. Ghele na, a rẹ riẹ hẹ inọ mẹ da udi nọ u bu te ilita ene hayo isoi no, onọ a gua udi ogaga kugbe.

Evaọ ẹsibuobu nọ ma te gbe ile jẹ da idi bẹ no evaọ oria nọ a rẹ jọ ru epati evaọ aso, mẹ họ ohwo nọ o re kru egbẹnyusu mẹ nọ ma te bi kpo fikinọ udi u mu rai no dede nọ mẹ da vrẹ rai akuava. Evaọ ẹdẹjọ, me te yo nọ ogbẹnyusu mẹ jọ ọ jẹ ta nọ mẹ yọ othẹ nọ ọ rẹ kake vọ họ. A rẹ rọ ẹme nana wọviẹ ohwo evaọ orẹwho Slovenian nọ ọ tẹ be da udi vrẹ ohwo kpobi. Ẹme na ọ da omẹ gaga.

Me te muhọ eroro kpahe oware nọ mẹ be rrọ uzuazọ mẹ ru. Me te je rri omamẹ nọ me fioka ha. Yọ o jọ wọhọ nọ eware nọ me je ru kpobi i wo ovao ha.

EPANỌ EBAIBOL NA O RO NWENE UZUAZỌ MẸ: Evaọ etoke nana, me te muẹrohọ nọ ibe ọmọ-eklase mẹ jọ o nwene gaga no; o gbe bi dhuaro wọhọ epaọ ọsosuọ họ. Fikinọ mẹ gwọlọ riẹ epanọ ọ sai ro nwene, me te zizie iei kpohọ oria jọ re mẹ avọ iẹe ma gbe gbiku. Nọ ma je gbiku, ọ ta nọ Isẹri Jihova a bi wuhrẹ Ebaibol kugbei enẹna. Ọ vuẹ omẹ kpahe eware jọ nọ o bi wuhrẹ, rekọ eware na kpobi e jọ eware ekpokpọ kẹ omẹ keme me kpohọ ichọche notọ ze he. Me te mu iwuhrẹ Isẹri Jihova họ ẹnya je mu Ebaibol na họ ewuhrẹ.

Ebaibol na nọ me je wuhrẹ u ru nọ mẹ rọ riẹ uzẹme na kpahe eware buobu. Wọhọ oriruo, me wuhrẹ nọ ma be rria etoke nọ Ebaibol na o se “edẹ urere na.” (2 Timoti 3:1-5) Me te je wuhrẹ nọ Ọghẹnẹ ọ te raha ahwo omuomu no otọakpọ na no kẹle, jẹ kẹ ahwo owoma uvẹ re a rria otọakpọ na bẹdẹ bẹdẹ evaọ aparadase. (Olezi 37:29) Fikinọ mẹ gwọlọ jọ usu ahwo owoma nọ a te rria otọakpọ na, mẹ tẹ gbaemu nọ mẹ rẹ siọ ekpehre eware nọ me bi ru ba.

Fikiere mẹ tẹ jẹ vuẹ egbẹnyusu mẹ kpahe eware nọ me bi wuhrẹ evaọ Ebaibol na. Ejọ a je se omẹ ẹkoko fiki eware nọ mẹ jẹ ta kẹ ae na, rekọ uruemu nana nọ a dhesẹ na u fiobọhọ kẹ omẹ evaọ edhere nọ me rẹro riẹ hẹ. Mẹ ruẹ vevẹ nọ emamọ egbẹnyusu a rrọ họ. Me te je vuhumu nọ, ekpehre egbẹnyusu nana nọ me bi lele nyusu na, oye o be whae ze nọ mẹ be rọ da idi na. A rẹ gwọlọ nọ urere oka u te vẹrẹ re a sae da idi vrẹ oma.

Mẹ fa usu no egbẹnyusu yena je mu usu kugbe emamọ ahwo evaọ ukoko Isẹri Jihova. Egbẹnyusu ekpokpọ nọ me mu usu kugbe na a rẹ tuduhọ omẹ awọ ẹsikpobi nọ mẹ tẹ rrọ usu rai keme a gine you Ọghẹnẹ, yọ a be daoma koko izi riẹ. Ẹmẹrera na, mẹ tẹ siọ udi ba ẹda vrẹta.

IRERE NỌ ME WO NO: Me yere Jihova inọ enẹna mẹ be were eva ababọ udi nọ mẹ rẹ da tao. O hae jọnọ me gbe bi yeri oghẹrẹ uzuazọ nọ me je yeri vẹrẹ na, mẹ riẹ epanọ akpọ mẹ ọ hai ti ro kuhọ họ. Mẹ riẹ nọ enẹna uzuazọ mẹ o mai woma.

Anwọ ikpe ihrẹ nọ e vrẹ na, me wo uvẹ nọ me bi ro ru iruo evaọ uwou ogha Isẹri Jihova nọ o rrọ Slovenia. Jihova nọ mẹ riẹ jẹ be gọ enẹna, u ru nọ uzuazọ mẹ u ro woma.