A yẹ omẹ evaọ Acul, ẹwho jọ nọ o siomano evaọ ofẹ ukiediwo-ọre Guatemala nọ igbehru e rrọ. Mai yọ ahwo Ixil, utu jọ evaọ uyẹ Maya. Mẹ rẹ ta ẹvẹrẹ Spanish, mẹ tẹ jẹ riẹ ẹvẹrẹ ẹwho mai ẹta. Nọ a yẹ omẹ, yọ ẹmo nọ a jọ Guatemala fi evaọ ikpe ọgbagbezeza soso na ọ rrọ otọ. Ahwo Ixil buobu a whu evaọ oke ẹmo na.

Nọ mẹ jọ ikpe ene, oniọvo mẹ ọrọ ọmọzae nọ ọ jọ ikpe ihrẹ ọ tẹ jẹ rọ ọgbaudu ọsese jọ zaharo yọ mẹ rrọ etẹe. Ẹsiẹvo na, ọgbaudu na ọ tẹ sa. O te kpe oniọvo mẹ na, je tu omẹ aro. Onana u ru nọ me ro kpohọ isukulu ahwo nọ i tuaro evaọ okpẹwho Guatemala. Kọ obei me jo wuhrẹ epanọ a rẹ rọ obọ rara obe se. Ahwo nọ a jẹ jọ isukulu na ru iruo a rẹ rọwo nọ me lele emaha efa ta ẹme vievie he, yọ emọ nọ ma gbẹ jọ isukulu na a rẹ rọwo kẹle omẹ hẹ. Mẹ riẹ oware nọ o wha onana ze he. Ẹsikpobi mẹ rẹ jọ goli, yọ mẹ rẹ gwọlọ nọ emerae ivẹ nọ me re ro kpo bru oni mẹ kukpe kukpe na i te vẹrẹ. Oni mẹ o you omẹ gaga, yọ ọ jẹ hae rẹrote omẹ ziezi. Nọ mẹ jọ ikpe ikpe, oni mẹ o te je whu siọ omẹ ba. O da omẹ gaga keme ọye ọvo me wo nọ ọ jẹ rẹrote omẹ. O tẹ wọhọ nọ omẹ u re no.

Nọ mẹ jọ ikpe ikpegbọvo, me te zihe kpobọ ẹwho mai nyai lele ọsọvo mẹ avọ uviuwou riẹ rria. A jẹ kuọ omẹ, rekọ ohwo ọvo ọ jẹ sa-sa omẹ oma ha. Ẹsejọ me re bo se Ọghẹnẹ inọ: “Fikieme whọ rọ kuvẹ re oni mẹ o whu siọ omẹ ba? Fikieme me ro tuaro?” Ahwo a jẹ hae ta kẹ omẹ nọ eware iyoma nana nọ e via kẹ omẹ na, Ọghẹnẹ o kere i rai no anwẹdẹ. Onana o tẹ jẹ lẹliẹ omẹ rri Ọghẹnẹ inọ ọ rrọ eva gaga, inọ o re kienyẹ ahwo jọ. Mẹ jẹ gwọlọ thuru whu dede, rekọ mẹ riẹ oghẹrẹ nọ mẹ te sai ro ru ei hi.

Fikinọ me tuaro, ahwo a jẹ hai ru omẹ eware edada. Nọ mẹ gbẹ maha, ahwo a lele omẹ wezẹ unuẹse buobu. Mẹ sae ta kẹ ohwo ọvo ho keme me je roro nọ ohwo ọvo o ti se ẹme na gb’oware ovo ho. Ahwo a rẹ kaki lele omẹ ta ẹme he, yọ me re lele ohwo ọvo gbiku hu. Me re kuomagbe ahwo ho, yọ me fievahọ ohwo ọvo ho. Mẹ rẹ jọ ọkọkora.

Nọ mẹ jọ oware wọhọ ikpe ikpegbesa, ọzae-avọ-aye jọ nọ a rrọ Isẹri Jihova a tẹ nyabru omẹ ze evaọ oke nọ ma jọ ibreki evaọ obọ isukulu. Iticha mai jọ nọ ọ re ohrọ mẹ ọye ọ ta kẹ Isẹri Jihova na inọ a nyabru omẹ ze. A jọ Ebaibol na dhesẹ kẹ omẹ nọ Ọghẹnẹ ọ te kpare ahwo nọ a whu no ze, gbe nọ oke o be tha nọ ahwo nọ i tuaro a te ruẹ ude. (Aizaya 35:5; Jọn 5:28, 29) Eware nọ me wuhrẹ na e were omẹ, rekọ o jọ bẹbẹ re me lele ai ta ẹme keme me re lele ahwo ta ẹme tere he. Ghele na, a kpairoro vrẹ omẹ hẹ. A jẹ hae dhe ẹnyẹnyaze ti wuhrẹ omẹ Ebaibol. Oria nọ u thabọ vrẹ emaele ezeza oye ọzae-avọ-aye nana a rẹ nya, a vẹ jẹ gadiẹ igbehru re a te ti te ẹwho mai.

Ọsọvo mẹ ọ ta nọ Isẹri Jihova nọ e be hae nyaze na a rẹ gọ ẹgọ nọ ọ rrọ kpatiẹ ziezi, rekọ a fe he. Ghele na, a jẹ hae riẹ omẹ ru ziezi, a rẹ rọ eware ru omẹ ọghọ. Mẹ tẹ jọ eva mẹ ta nọ uvi Ileleikristi ọvo a rẹ sai ru oware nọ ahwo nana a bi ru na.

Ebe ukoko na nọ a ru kẹ ahwo nọ i tuaro me je ro wuhrẹ ẹme Ọghẹnẹ. Me je wo otoriẹ eware nọ me je wuhrẹ na rekọ o jọ bẹbẹ kẹ omẹ re mẹ rọwo eware jọ. Wọhọ oriruo, o jọ bẹbẹ kẹ omẹ re mẹ rọwo nọ Ọghẹnẹ o you omẹ, gbe nọ ahwo-akpọ a sai you omẹ re. Nọ me wuhrẹ oware nọ Jihova ọ rọ kuvẹ evaọ omoke jọ re ahwo-akpọ a reoja, u vẹ omẹ ẹro. Rekọ o jọ bẹbẹ kẹ omẹ re mẹ rọwo nọ Jihova ginọ Ọsẹ oyoyou. *

Ẹmẹrera na, eware nọ mẹ be jọ Ebaibol wuhrẹ i te ti fiobọhọ kẹ omẹ ruẹ nọ Jihova o gine you omẹ. Wọhọ oriruo, mẹ ruẹ nọ o rẹ da Ọghẹnẹ gaga nọ ahwo a tẹ be reoja. Oke nọ a je gboja kẹ idibo riẹ, ọ ta nọ: “Mẹ ruẹ oja nọ ahwo mẹ . . . a be re no, . . . mẹ riẹ edada nọ a be ruẹ uye rai vevẹ.” (Ọnyano 3:7) Nọ mẹ ruẹ oghẹrẹ Ọghẹnẹ nọ Jihova ọ rrọ gbe epanọ o you omẹ te, onana u ru nọ mẹ rọ roma mudhe kẹe. Kẹsena evaọ 1998, mẹ tẹ họ-ame evaọ ukoko Isẹri Jihova.

Nọ mẹ họ-ame no, ẹgbukpe ọ jẹ ruọ emu no, me te kpohọ uwuhrẹ jọ nọ egọmeti o ru kẹ ahwo nọ i tuaro evaọ ẹwho nọ a re se Escuintla. Ọkpako ukoko jọ evaọ ẹwho nana ọ ruẹ nọ okolo uye mẹ be hae ruẹ hẹ re mẹ sai no obọ ẹwho mẹ hai kpohọ iwuhrẹ ukoko na. Re mẹ sai te ewuhrẹ, mẹ rẹ gadiẹ igbehru evona nọ inievo nọ i je wuhrẹ Ebaibol kugbe omẹ na a jẹ hae gadiẹ re a te ti te ẹwho mai na. O jọ bẹbẹ kẹ omẹ re me kpohọ ewuhrẹ. Ọkpako ukoko na o fiobọhọ kẹ omẹ ta kẹ ahwo uviuwou jọ nọ a rrọ Isẹri Jihova evaọ Escuintla re me lele ai rria, re mẹ hae sai kpohọ iwuhrẹ ukoko. Rite inẹnẹ, a gbẹ be rẹrote omẹ wọhọ ẹsenọ mẹ rrọ ohwo uviuwou na.

U te no uviuwou nana no, inievo efa buobu evaọ ukoko na a dhesẹ uvi uyoyou kẹ omẹ. Enana kpobi i ru omẹ ruẹ vevẹ nọ Isẹri Jihova yọ uvi Ileleikristi.—Jọn 13:34, 35.

Me gbe bi rri omamẹ inọ me fioka ha ha, yọ enẹna me wo uvi ẹruore. Eva e be were omẹ ẹsikpobi. Enẹna mẹ yọ ọkobaro oke-kpobi. Ebaibol na nọ mẹ be hai ro wuhrẹ ahwo na u ru nọ mẹ gbẹ be rọ tẹrovi ẹbẹbẹ mẹ hẹ. Mẹ tẹ jẹ rrọ ọkpako ukoko, yọ mẹ rẹ jọ ikoko sa-sa kẹ ovuẹ ogbotu no oke te oke. Mẹ rẹ tubẹ kẹ ovuẹ evaọ ikokohọ ilogbo nọ idu ahwo buobu e rẹ nyaze.

Evaọ 2010, me nwrotọ no Isukulu Ewuhrẹ Odibọgba (onọ a bi se Isukulu Rọkẹ Etausiuwoma Uvie Na enẹna). Obọ El Salvador me jo kpohọ isukulu na. A jọ isukulu nana wuhrẹ omẹ oghẹrẹ nọ mẹ sai ro fiobọhọ kẹ inievo na ziezi evaọ ukoko na jẹ ta usi uwoma ziezi. Isukulu nana i ru omẹ riẹ nọ Jihova Ọghẹnẹ o gine you omẹ gaga, yọ ọ rẹ sae rọ ohwo kpobi ru iruo riẹ, makọ omẹ dede.

Jesu ọ ta nọ: “Ẹkẹ evawere e mae rrọ vi emio.” (Iruẹru Ikọ 20:35) Eva e be were omẹ gaga enẹna. Evaọ oke nọ u kpemu, me je rri omamẹ nọ me wo iruo kẹ ohwo ọvo ho, rekọ obọnana mẹ riẹ nọ mẹ sai fiobọhọ kẹ amọfa.