UZOU AVỌ 25

Ẹvẹ Mẹ Sai ro Siobọno Uruemu Obọ nọ Mẹ rẹ rọ Whrawhra Ẹba Obọmẹ?

“Ikpe eree mẹ jọ nọ me mu obọ họ ẹrọ whrawhra ẹba obọmẹ. Uwhremu na mẹ tẹ te riẹ nọ uruemu na o rẹ dha Ọghẹnẹ eva. Fikiere, ẹdẹ kpobi nọ me ru rie, udu u re brukpe omẹ gaga. Me je rri omamẹ nọ Ọghẹnẹ ọ sai you ohwo kerọ omẹ na ha.”​—Luiz.

NỌ WHỌ tẹ be rro te ohwo no, isiuru owezẹ e sae jọ gaga. Onana o sae whae ze nọ who re ro mu obọ họ ẹrọ whrawhra ẹba obọra. * Ahwo buobu a re roro nọ oware ovo o jariẹ thọ họ. Ejọ e rẹ tubẹ ta nọ: “O rẹ raha oware ovo ho.” Rekọ obọ nọ ohwo ọ rẹ rọ whrawhra ẹba obọriẹ u woma vievie he. Fikieme? Pọl ukọ na o kere nọ: “Wha kpe isiuru ugboma rai . . . no, . . . isiuru egaga kẹ owezẹ ọzae-avọ-aye nọ e vrẹta.” (Ahwo Kọlọsi 3:5) Obọ nọ ohwo ọ rẹ rọ whrawhra ẹba riẹ u re kpe isiuru owezẹ hẹ. O rẹ lẹliẹ isiuru na ga. U te no ere no, u wo eware efa nọ e lẹliẹ uruemu nana thọ. Joma ta kpahe ae.

● Uruemu nana o rẹ lẹliẹ ohwo roro kpahe omobọ riẹ ọvo. Wọhọ oriruo, nọ ohwo ọ tẹ be rọ obọ whrawhra ẹba obọriẹ, epanọ o re ro ru oma were omobọ riẹ ọvo oye o rẹ jariẹ iroro.

● Nọ ọmọzae nọ o wo uruemu nana ọ tẹ ruẹ ọmọtẹ, omaweromẹ nọ o ti wo nọ o te lele iei wezẹ ọvo o re roro kpahe. Epọvo na o rẹ jọ kẹ ọmọtẹ nọ o wo uruemu nana re nọ ọ tẹ ruẹ ọmọzae.

● Nọ ohwo nọ uruemu nana o reria oma no ọ tẹ rọo, avọ ọzae hayo aye riẹ a sai wo ẹbẹbẹ evaọ abọ owezẹ keme epanọ o re ro ru oma were omobọ riẹ ọvo o rẹ jariẹ oja.

Ukpenọ whọ rẹ rọ abọ whrawhra ẹba obọra re isiuru owezẹ nọ e rrọ owhẹ oma e ruẹsi kpotọ, daoma hae gba oma ra. (1 Ahwo Tẹsalonika 4:​4, 5) Oware jọ nọ Ebaibol ọ ta nọ o sai fiobọhọ kẹ owhẹ gba oma ra họ, nọ whọ tẹ kẹnoma kẹ eria hayo eware nọ i re fi isiuru owezẹ họ owhẹ oma. (Itẹ 5:​8, 9) Kọ otẹrọnọ uruemu na o reria owhẹ oma no, eme who re ru? Ẹsejọhọ whọ daoma bẹ no re who siobọno uruemu na rekọ u bi ro no owhẹ obọ họ. O tẹ rrọ ere, whọ sai roro nọ uruemu na o reria owhẹ azẹ no, inọ whọ sae gbẹ siọ iẹe ba ha. Hayo whọ sai roro nọ whọ sai koko izi Ọghẹnẹ hẹ. Ere ọmọzae jọ nọ a re se Pedro o je roro. Ọ ta nọ: “Ẹsikpobi nọ o va omẹ abọ, o rẹ da omẹ gaga. O jọ omẹ oma nọ Ọghẹnẹ ọ sae rọvrẹ omẹ hẹ. Mẹ gbẹ jẹ sae lẹ dede he.”

Otẹrọnọ ere o rrọ kẹ owhẹ, jọ udu u bru owhẹ hẹ. Whọ sai kurẹriẹ. Izoge buobu, te ekpako dede nọ i wo uruemu nana vẹre, a se riẹ ba no. Whọ sae se iẹe ba re!

Oware nọ Who re Ru nọ Udu U te bi Brukpe Owhẹ

Wọhọ epanọ ma ta no vẹre na, udu u re brukpe ahwo nọ a rẹ rọ obọ whrawhra ẹba obọrai. Nọ whọ tẹ rrọ “ọkora” fikinọ o rrọ bẹbẹ kẹ owhẹ re who ru oware nọ o “rọwokugbe oreva Ọghẹnẹ,” u re fiobọhọ kẹ owhẹ siobọno ekpehre uruemu na. (2 Ahwo Kọrint 7:11) Rekọ nọ udu u te bi brukpe owhẹ vrẹta, u re ru eware yoma ga. O sai ru owhẹ roro nọ whọ te sai gbe nwene he, whọ vẹ ruabọhọ uruemu na.​—Itẹ 24:10.

Fikiere, rri uruemu na oghẹrẹ nọ u fo nọ who rri rie. Uruemu obọ nọ ohwo ọ rẹ rọ whrawhra ẹba obọriẹ na yọ uruemu ugbegbe. O sai ru ohwo jọ ‘ọrigbo kẹ isiuru gbe omaweromẹ sa-sa,’ je gbe iroro ohwo ku. (Taitọs 3:3) Rekọ uruemu nana o nwani yoma te “ọfariẹ-ogbe” hayo iruemu etọtọ itieye na efa ha. (Jud 7) Otẹrọnọ whọ be hae rọ obọ whrawhra ẹba obọra, whọ nwani roro ho inọ whọ raha uzi nọ Ọghẹnẹ ọ sae gbẹ rọvrẹ owhẹ hẹ no. Oware nọ u ti fiobọhọ kẹ owhẹ họ, daoma kpobi re whọ siọ uruemu na ba. Yọ o tẹ make va owhẹ abọ, gbẹ daoma, jọ o bẹ owhẹ no ho.

Nọ whọ tẹ gwọlọ siọ uruemu na ba, who je ti rri omara ha who je kieruọ ẹe no, o rẹ sae da owhẹ te ẹzi. Rekọ o tẹ va owhẹ abọ, o nwani dhesẹ nọ whẹ yọ ekpehre ohwo ho. Fikiere, jọ oma o lọhọ owhẹ hẹ. Riẹ oware nọ o lẹliẹ owhẹ zihe kpohọ uruemu na, re whọ daoma kẹnoma kẹe oke ofa.

Hai roro didi kpahe epanọ Ọghẹnẹ o wo uyoyou gbe ohrọ-oriọ te. Devidi ọso-ilezi na yọ ohwo jọ nọ eware e thọ obọ. Ọ ta nọ: “Wọhọ epanọ ọsẹ ọ rẹ re ohrọ emọ riẹ na, ere Jihova ọ be re ohrọ enọ e be dhozọ riẹ. Keme ọ riẹ vevẹ oghẹrẹ nọ a rọ ma omai, be kareghẹhọ nọ mai yọ ovu.” (Olezi 103:​13, 14) Ẹme nọ Devidi ọ be ta na họ, Jihova ọ riẹ nọ ma gba ha. Fikiere, ọ ‘ruẹrẹ oma kpahe re ọ rọvrẹ’ omai. (Olezi 86:5) O make rrọ ere na, ọ gwọlọ nọ ma daoma kpobi re ma siọ uruemu uyoma ba. Kọ eme whọ rẹ sai ru re whọ siọ ekpehre uruemu na ba?

Kẹnoma kẹ ekpehre ifimu, ifoto, gbe eware itieye na efa. Kọ who re rri ifimu, ighe etẹlẹvisiọno, hayo kpohọ eria itanẹte nọ a rẹ jọ dhesẹ eware nọ e rẹ lẹliẹ ohwo wo isiuru ọfariẹ-ogbe? O tẹ rrọ ere, u ti woma re whọ rọ aro kele ọso-ilezi na nọ ọ lẹ se Ọghẹnẹ nọ: “Si ibiaro mẹ no eware nọ i fioka ha nọ me re rri.” *​—Olezi 119:37.

Gba omara họ roro kpahe eware efa. U wo ohrẹ jọ nọ oniọvo-ọmọzae nọ a re se William ọ kẹ, inọ: “Taure who te ti kiẹzẹ, se oria Ebaibol hayo obe ukoko na jọ. U re fiobọhọ gaga nọ ẹme Ọghẹnẹ ọ tẹ rrọ oware urere nọ who roro kpahe no taure who te ti kiẹzẹ.”​—Ahwo Filipai 4:8.

Vuẹ ohwo jọ ẹbẹbẹ na. Ẹsejọhọ omovuọ o te jọ owhẹ ta eva kẹ ohwo ọvo ho. Rekọ whọ tẹ vuẹ ohwo jọ nọ whẹ avọ iẹe wha kpekpe, u ti fiobọhọ kẹ owhẹ siobọno uruemu na. Ere oniọvo jọ nọ a re se David o ru. Ọ ta nọ: “Mẹ vuẹ ọsẹ mẹ. O mu ofu kẹ omẹ hẹ, yọ ẹme nọ ọ ta o rẹ thọrọ omẹ ẹro ho. Ọ ta nọ, ‘Whọ daoma kẹhẹ nọ whọ rọ vuẹ omẹ.’ Ọ riẹ nọ re mẹ sae ta ẹme na kẹe na, o lọhọ vievie he. Ẹme nọ ọ ta kẹ omẹ u ru udu mẹ ziọ otọ, mẹ tẹ jẹ gbaemu nọ mẹ rẹ daoma siọ uruemu na ba.”

Eme ọfa ọsẹ riẹ o ru? David ọ ta nọ: “Ọsẹ mẹ o se eria Ebaibol jọ kẹ omẹ rọ tuduhọ omẹ awọ inọ mẹ re nya thabọ hrọ họ. O te je se eria efa kẹ omẹ re mẹ riẹ nọ uruemu na u gine yoma. O te fi oke họ nọ ma te rọ wariẹ ta ẹme na, jẹ vuẹ omẹ nọ bọwo oke yena jomẹ daoma re mẹ siọ uruemu na ba ekieruọ. Ọ tẹ jẹ ta kẹ omẹ nọ o tẹ make va omẹ abọ, jọ mẹ rọ eviaviẹ fa omamẹ hẹ. Rekọ inọ mẹ daoma gba oma mẹ oke lelehie.” Eme o no rie ze? David ọ ta nọ: “Ẹbẹbẹ na nọ mẹ ta via, gbe ẹme nọ ọsẹ mẹ o lele omẹ ta na, i fiobọhọ kẹ omẹ vi oware ofa kpobi.” *

OWARE NỌ MA TE TA KPAHE EVAỌ UZOẸME NỌ O KẸLE RIẸ NA

Re ohwo ọ hai lele amọfa wezẹ odode yọ oware aroza vievie he. Se uzoẹme na re whọ riẹ oware nọ o rọ rrọ ere.

[Eme-Obotọ]

ORIA IKERE ỌSOSUỌ

“Dhẹ siọ isiuru uzoge ba, rekọ le ẹrẹreokie, ẹrọwọ, uyoyou, udhedhẹ, kugbe enọ e be rọ udu ofuafo se Olori na.”​—2 Timoti 2:22.

OWARE JỌ NỌ U RE FIOBỌHỌ

Lẹ taure isiuru na e tẹ te ga hrọ. Lẹ se Jihova Ọghẹnẹ re ọ kẹ owhẹ “ogaga nọ u vi ogaga,” re whọ sae siọ uruemu na ba.​—2 Ahwo Kọrint 4:7.

KỌ WHỌ RIẸ . . . 

Ohwo nọ ọ ga ha, ọye o re nwo rri ofẹ kpobi nọ isiuru owezẹ e wọ riẹ rri. Rekọ ohwo nọ ọ rẹ gba oma riẹ makọ evaọ oke nọ ohwo ọvo ọ rrọ etẹe he, yọ ohwo nọ ọ ga udu dẹẹ.

OWARE NỌ ME TI RU!

Me ti roro kpahe eware nọ e rrọ fuafo otẹrọnọ me I ․․․․․

Nọ isiuru na e tẹ ze, ukpenọ me re ru uruemu nana, me re ․․․․․

Oware nọ mẹ te gwọlọ nọ ọsẹ mẹ hayo oni mẹ kpahe ẹme nana họ ․․․․․

ẸVẸ WHO RORO?

● Fikieme u ro wuzou gaga re ma kareghẹhọ nọ u no Jihova eva ze inọ ọ rẹ “rọvrẹ”?​—Olezi 86:5.

● Ọghẹnẹ họ ọnọ ọ ma ohwo-akpọ re o wo isiuru owezẹ, yọ ọye ọvona ọ ta kẹ owhẹ nọ whọ gba oma ra. Kọ u gbe dhesẹ nọ o fievahọ owhẹ nọ whọ sai ru ere?

[Ẹme nọ a fi ẹgba họ]

Anwẹnọ mẹ rọ siọ uruemu na ba na, udu mẹ u gbe bi brukpe omẹ hẹ. Mẹ ruẹ nọ oware ovo o riẹ nọ o sae kẹ omẹ evawere te Jihova nọ me re ru eva were he!​—Sarah

[Uwoho]

Ohwo nọ ọ be dhẹ ohrẹ o te kie, ọ rẹ kpama ọ vẹ ruabọhọ ohrẹ na. Ere ọvona, ekpehre uruemu na o tẹ make va owhẹ abọ, u ri ku owhẹ hẹ, gbẹ daoma