UZOU AVỌ 8

Ẹvẹ Mẹ Sai ro Wo Emamọ Egbẹnyusu?

“Nọ oware jọ o tẹ be dha omẹ eva, mẹ rẹ gwọlọ tae kẹ ohwo jọ. Nọ eva e gbẹ be were omẹ hẹ, mẹ rẹ gwọlọ nọ ohwo jọ ọ vuẹ omẹ nọ, ‘Who bru udu hu, eware i ti woma.’ Nọ eva e tẹ be were omẹ, mẹ rẹ gwọlọ nọ ohwo jọ o lele omẹ ghọghọ. Mẹ ruẹ nọ u fo re ohwo o wo egbẹnyusu.”​—Brittany.

AHWO a rẹ ta nọ emaha eboba a gwọlọ emaha ibe rai nọ a re lele zaharo, rekọ izoge a gwọlọ egbẹnyusu. Ohẹriẹ vẹ o rrọ ivẹ na?

Ohwo nọ who re lele zaharo yọ ohwo nọ ọ rẹ jọ kugbe owhẹ.

Ogbẹnyusu, orọnikọ ọ rẹ jọ kugbe owhẹ ọvo ho, rekọ whẹ avọ iẹe wha re rri eware oghẹrẹ ovona.

U te no ere no, Ebaibol ọ ta nọ “emamọ ogbẹnyusu o re dhesẹ uyoyou ẹsikpobi ọ tẹ jẹ rrọ oniọvo nọ a yẹ fiki oke idhọvẹ.” (Itẹ 17:17) Who te rri ẹme na ziezi whọ rẹ ruẹ nọ orọnikọ ọmaha ibe ra nọ whọ jẹ hai lele zaharo a be ta kpahe na ha. Ogbẹnyusu o re dikihẹ kẹ ohwo.

Uzẹme ẹme na: Nọ whọ be rro ze na, u fo nọ egbẹnyusu ra e rẹ jọ

1. Enọ i wo emamọ iruemu

2. Enọ i bi yeri uzuazọ nọ o rrọ kpatiẹ

3. Enọ e rẹ sai fiobọhọ kẹ owhẹ wo emamọ uruemu

Onọ: Ẹvẹ whọ sai ro wo egbẹnyusu itieye? Joma ta kpahe eware esa na ọvuọvo.

Oware Ọsosuọ nọ Whọ rẹ rọ Riẹ Emamọ Ogbẹnyusu​Emamọ Iruemu

Oware nọ u fo nọ whọ rẹ riẹ. Orọnikọ ohwo kpobi nọ who se ogbẹnyusu, ọye ọ rẹ jọ emamọ ogbẹnyusu hu. Ebaibol na dede ọ ta nọ “u wo egbẹnyusu jọ nọ e ruẹrẹ oma kpahe inọ a rẹ guọghọ ohwohwo fihọ otọ.” (Itẹ 18:24) Ẹsejọhọ who ti roro nọ ohwo ọvo ọ sae nwani ru owhẹ oware utioye he. Rekọ roro kpahe onana: Kọ u wo ohwo jọ nọ who roro nọ ogbẹnyusu ra, nọ ọ jẹ hae re mi owhẹ ọvo, hayo nọ o je gu owhẹ? Kọ ohwo jọ nọ whọ ta eva kẹ o je gogo owhẹ? Uruemu utioye na o sae whae ze nọ who gbe ro fievahọ ogbẹnyusu yena ha. * Hae kareghẹhọ ẹsikpobi nọ o tẹ make rọnọ ogbẹnyusu ọvo who wo nọ o wo emamọ uruemu, u woma vi ibuobu nọ i wotọ họ!

Oware nọ whọ rẹ sai ru. Mu usu kugbe ahwo nọ a wo emamọ uruemu nọ whọ rẹ sae rọ aro kele.

“Ahwo kpobi a rẹ ta ẹme ezi Fiona ogbẹnyusu mẹ. Mẹ gwọlọ nọ a ta ẹme ezi mẹ ere re. Uruemu riẹ o were omẹ gaga. Mẹ gwọlọ jọ oghẹrẹ ohwo otiọye na.”​—Yvette, 17.

Ru oware nana.

1. Se Ahwo Galesha 5:22, 23.

2. Nọ omara nọ, ‘Kọ egbẹnyusu mẹ a wo iruemu nọ a jọ oria Ebaibol nana se “ubi ẹzi na”?’

3. Kere edẹ egbẹnyusu ra nọ e mae kpekpe owhẹ oma. Kere uruemu nọ a mae rọ riẹ omomọvo kẹle odẹ riẹ.

Odẹ

․․․․․

Uruemu

․․․․․

Riẹ onana: Otẹrọnọ ekpehre uruemu ọvo who kere fihotọ, kiyọ who ri wo emamọ egbẹnyusu hu!

Oware avọ Ivẹ nọ Whọ rẹ rọ Riẹ Emamọ Ogbẹnyusu​—O re Yeri Uzuazọ nọ O Rrọ Kpatiẹ

Oware nọ u fo nọ whọ rẹ riẹ. Who te rri omara nọ who wo egbẹnyusu hu fikiere whọ gwọlọ rọ oghẹrẹ kpobi wo egbẹnyusu, obọ ra u ti kie ikpehre egbẹnyusu. Ebaibol ọ ta nọ: “Ọnọ o ku usu gbe ahwo ogheghẹ o re kie ruọ ẹbẹbẹ.” (Itẹ 13:20) “Ahwo ogheghẹ” nọ a jọ etenẹ ta na, orọnikọ ahwo nọ a re feli evaọ eklase he. Yọ orọnikọ ahwo nọ a wo areghẹ tere he gbe he. Ukpoye oria Ebaibol na o be ta kpahe ahwo nọ a bi yeri uzuazọ owhọwhọhọ, yọ whọ tẹ make kẹ ae emamọ ohrẹ dede, a re yo ho. Whọ tẹ ruẹ oghẹrẹ ahwo otiọye na, dhẹ ga!

Oware nọ whọ rẹ sai ru. Rri otọ mu. Orọnikọ ohwo kpobi nọ whọ ruẹ who re mu usu kugbe he. (Olezi 26:4) Ghele na, orọnikọ who re mukpahe ahwo jọ họ. Ẹme nọ ma be ta na họ, who te rri otọ mu ziezi, whọ te “ruẹ ohẹriẹ nọ o rrọ udevie ohwo okiẹrẹe avọ ohwo omuomu, gbe ohẹriẹ nọ o rrọ udevie ohwo nọ ọ be gọ Ọghẹnẹ avọ ọnọ ọ be gọe he.”​—Malakae 3:18.

“Ọsẹgboni mẹ a riẹ ru gaga nọ a ro fiobọhọ kẹ omẹ wo emamọ egbẹnyusu, egbẹnyusu nọ e rrọ ewha mẹ nọ i bi ru eware nọ e rẹ were Jihova.”​—Christopher, 13.

Kẹ uyo enọ nana:

Kọ mẹ tẹ rrọ kugbe egbẹnyusu mẹ, ozọ u re mu omẹ inọ a te gwọlọ tunye omẹ ru oware jọ nọ mẹ riẹ nọ o thọ?

□ Ee

□ Ijo

Kọ me wo eghẹrẹ egbẹnyusu jọ nọ mẹ be sai dhesẹ kẹ ọsẹgboni mẹ hẹ, fikinọ ozọ u bi mu omẹ inọ e te were ọsẹgboni mẹ hẹ?

□ Ee

□ Ijo

Riẹ onana: Otẹrọnọ Ee who yo rọkẹ enọ yena, gwọlọ egbẹnyusu nọ uruemu rai o rrọ kpatiẹ ziezi, enọ i bi yeri uzuazọ nọ u fo nọ Oleleikristi o re yeri.

Oware avọ Esa nọ Whọ rẹ rọ Riẹ Emamọ Ogbẹnyusu​—O re Fiobọhọ kẹ Owhẹ Wo Emamọ Uruemu

Oware nọ u fo nọ whọ rẹ riẹ. Ebaibol ọ ta nọ: “Usu uyoma o rẹ raha uruemu ezi.” (1 Ahwo Kọrint 15:33) Uzoge jọ nọ a re se Lauren ọ ta nọ: “Nọ me te bi ru eware nọ emọ isukulu mẹ a gwọlọ nọ me ru, ẹsiẹe eva mẹ e rẹ were ae. Mẹ ọvo mẹ gwọlọ mu unu họ họ, fikiere mẹ tẹ tubẹ ta nọ me re ru oware kpobi nọ a gwọlọ re mẹ sae jọ usu rai.” Lauren ọ ruẹ uwhremu na inọ, who te bi ru oware kpobi nọ amọfa a gwọlọ nọ who ru, whọ wọhọ ubi apele nọ a re te oghẹrẹ kpobi nọ u je rai. Kiyọ oware nọ who re gine fi omara họ?

Oware nọ whọ rẹ sai ru. Bru usu no ahwo nọ a rẹ gwọlọ nọ who yeri oghẹrẹ uzuazọ nọ ae omarai a bi yeri. Who te bru usu no ai, ẹsejọhọ who gbe ti wo egbẹnyusu bu tere he. Rekọ eva e te were owhẹ inọ emamọ oware who ru na, yọ uvẹ u ti rovie nọ who ti ro mu usu kugbe emamọ ahwo nọ i re fiobọhọ kẹ owhẹ wo emamọ uruemu.​—Ahwo Rom 12:2.

“Ogbẹnyusu ọkpekpe mẹ nọ a re se Clint o wo areghẹ ziezi, o te je wo ohrọ gaga. Fiki emamọ iruemu nana nọ o wo na, o fiobọhọ kẹ omẹ gaga no.”​—Jason, 21.

Nọ omara enọ nana:

Kọ mẹ be hae sẹ osẹ nọ u fo ho, ta eme nọ i fo ho, je ru uruemu nọ u fo ho fikinọ oye o te were egbẹnyusu mẹ?

□ Ee

□ Ijo

Kọ egbẹnyusu mẹ a be hae wha omẹ kpohọ eria jọ nọ i fo ho, nọ mẹ rẹ nya vẹre he?

□ Ee

□ Ijo

Riẹ onana: Otẹrọnọ Ee who yo rọkẹ enọ yena, nyabru ọsẹgboni ra hayo omọfa jọ nọ ọ kpako no re a kẹ owhẹ ohrẹ. Otẹrọnọ whẹ yọ Osẹri Jihova, whọ sae nyabru ọkpako ukoko re whọ vuẹe inọ whọ gwọlọ riẹ epanọ who re ro wo egbẹnyusu nọ i re fiobọhọ kẹ owhẹ wo emamọ uruemu.

GBE SE KPAHE ONANA EVAỌ UKO 2, UZOU AVỌ 9

OWARE NỌ MA TE TA KPAHE EVAỌ UZOẸME NỌ O KẸLE RIẸ NA

Kọ ekpehre ogbẹnyusu jọ ọ be gwọlọ tunye owhẹ ru oware uyoma? Hayo udu ra o be gwọlọ su owhẹ ru oware nọ o thọ? Se uzoẹme na re whọ riẹ epanọ whọ sae rọ se!

[Ẹme-Obotọ]

ORIA IKERE ỌSOSUỌ

“U wo ogbẹnyusu jọ nọ ọ rẹ kẹle ohwo vi oniọvo.”​—Itẹ 18:24.

OWARE JỌ NỌ U RE FIOBỌHỌ

Yeri uzuazọ nọ o rrọ kpatiẹ. Ahwo nọ a be daoma yeri uzuazọ utioye na a te gwọlọ mu usu kugbe owhẹ. Ahwo yena họ emamọ ahwo nọ who re lele nya usu.

KỌ WHỌ RIẸ . . . ?

Ọghẹnẹ o mukpahe ohwo ọvo ho, rekọ u wo oghẹrẹ ahwo jọ nọ ọ rẹ kuvẹ re a ‘kpahe uwou-udhu riẹ’ hẹ.​—Olezi 15:1-5.

OWARE NỌ ME TI RU!

Re mẹ sae ruẹ emamọ ahwo nọ me re mu usu kugbe, me ti ․․․․․

Ahwo jọ nọ a kpako vi omẹ nọ mẹ gwọlọ si kẹle họ ․․․․․

Enọ jọ nọ mẹ te gwọlọ nọ ọsẹ mẹ hayo oni mẹ kpahe ẹme nana họ ․․․․․

ẸVẸ WHO RORO?

● Iruemu vẹ e mae rrọ owhẹ oja nọ whọ gwọlọ nọ ogbẹnyusu ra o re wo, kọ fikieme?

● Iruemu vẹ whọ gwọlọ nọ who re gbe wo re whọ jọ emamọ ogbẹnyusu kẹ ohwo nọ who ti mu usu kugbe?

[Ẹme nọ a fi ẹgba họ]

Nọ ọsẹgboni mẹ a je si omẹ ozọ inọ mẹ kẹnoma kẹ egbẹnyusu mẹ jọ, mẹ jẹ jọ udu mẹ roro nọ ahwo yena ọvo mẹ rẹ sai mu usu kugbe. Rekọ ohrẹ nọ ọsẹgboni mẹ a kẹ omẹ na u fiobọhọ kẹ omẹ gaga. Nọ mẹ romatotọ rri ẹme na mẹ tẹ ruẹ nọ emamọ ahwo a vọ, nọ mẹ rẹ sae mu usu kugbe.​—Cole

[Ẹkpẹti]

dao eware nana

Lele ọsẹgboni ra ta ẹme kpahe egbẹnyusu. Nọ ae oghẹrẹ egbẹnyusu nọ a wo oke nọ a jọ uzoge. Kọ ahwo jọ nọ a nya usu kugbe a fi rai họ ẹbẹbẹ? Eme ọ wha riẹ ze? Nọ ae oware nọ who re ru re whọ siọ ebẹbẹ itieye na ba ekie ruọ.

Dhesẹ egbẹnyusu ra kẹ ọsẹgboni ra. Otẹrọnọ whọ be sai dhesẹ egbẹnyusu ra kẹ ae he, nọ omara nọ, ‘Eme ọ wha riẹ ze?’ Kọ egbẹnyusu ra a wo uruemu jọ nọ o te were ọsẹgboni ra ha? O tẹ rrọ ere, kiyọ whọ te gwọlọ amọfa nọ uruemu rai o mai woma.

Hae gaviezọ ziezi. Daoma riẹ oghẹrẹ nọ eware e rrọ kẹ egbẹnyusu ra.​—Ahwo Filipai 2:4.

Hae rọvrẹ. Riẹ nọ egbẹnyusu ra a sai ru owhẹ thọ ẹsejọ. “Mai kpobi ma re zoruẹ unuẹse buobu.”​—Jemis 3:2.

Whọ kọkọ gba ogbẹnyusu ra ga hrọ họ. Hae kẹ ogbẹnyusu ra uvẹ omojọ. Emamọ ogbẹnyusu ọ rẹ dhẹ siọ owhẹ ba ha, ọ te jọ kugbe owhẹ nọ uye u te te owhẹ oma.​—Ọtausiuwoma Na 4:9, 10.

[Uwoho]

Who te bi ru oware kpobi nọ amọfa a gwọlọ nọ who ru re a rọ emamọ ubiẹro rri owhẹ, whọ wọhọ ubi apele nọ a re te oghẹrẹ kpobi nọ u je rai