UZOU AVỌ 37

Fikieme Mẹ jẹ Họ-Ame?

Kpoka họ eme nọ e rrọ obotọ na sọ uzẹme hayo ọrue:

O gba Ileleikristi họ nọ a rẹ họ-ame.

□ Uzẹme

□ Ọrue

Ugogo ẹjiroro nọ ohwo ọ rẹ rọ họ-ame họ re u fiobọhọ kẹe siọ uzioraha ba ekiero.

□ Uzẹme

□ Ọrue

Ame-ọhọ o re ru owhẹ wo esiwo.

□ Uzẹme

□ Ọrue

Whọ gbẹ re họ-ame he, Ọghẹnẹ o re kru owhẹ fiki eware iyoma nọ who ru hu.

□ Uzẹme

□ Ọrue

Otẹrọnọ egbẹnyusu ra a be họ-ame, kiyọ u te epanọ whọ rẹ rọ họ-ame no re.

□ Uzẹme

□ Ọrue

WHỌ sai roro kpahe ame-ọhọ otẹrọnọ who bi koko izi Ọghẹnẹ, who wo emamọ usu kugbei, whọ tẹ jẹ be ta eware nọ whọ rọwo kẹ amọfa. Rekọ ẹvẹ whọ sae rọ riẹ sọ who te ohwo nọ ọ rẹ họ-ame no? Re ma kẹ uyo onọ yena, joma ta kpahe eme nọ e rrọ obehru nọ a re yo uzẹme hayo ọrue fihọ na.

● O gba Ileleikristi họ nọ a rẹ họ-ame.

Uzẹme. Jesu ọ ta nọ ilele riẹ a rẹ họ-ame. (Matiu 28:19, 20) Makọ Jesu omariẹ dede ọ họ-ame. Re whọ sae jọ olele Kristi, o gwọlọ nọ whọ rẹ họ-ame nọ who te te ohwo nọ ọ rẹ sae jiroro na no, u te je no owhẹ eva ze nọ who re ru ere.

● Ugogo ẹjiroro nọ ohwo ọ rẹ rọ họ-ame họ re u fiobọhọ kẹe siọ uzioraha ba ekiero.

Ọrue. Ame-ọhọ yọ oware nọ whọ rẹ rọ jọ ẹgbede dhesẹ via nọ whọ rọ oma ra mudhe kẹ Jihova no. Oma nọ who ro mudhe kẹ Jihova yọ usu evere jọ gheghe he, nọ o rẹ thọ owhẹ no eware nọ whọ hae te gwọlọ lẹlẹ ru. Ukpoye, whọ roma mudhe kẹ Jihova fikinọ whọ gwọlọ nọ izi riẹ e kpọ owhẹ.

● Ame-ọhọ o re ru owhẹ wo esiwo.

Uzẹme. Ebaibol na ọ ta nọ ame-ọhọ o wuzou gaga otẹrọnọ ohwo ọ gwọlọ wo esiwo. (1 Pita 3:21) Rekọ orọnọ onana o nwani dhesẹ nọ ohwo ọ tẹ họ-ame no o re wo esiwo hrọ họ. Fikiere orọnọ fikinọ whọ gwọlọ wo esiwo whọ rẹ rọ họ-ame he, whọ rẹ họ-ame fikinọ who you Jihova, whọ tẹ jẹ gwọlọ rọ udu ra kpobi gọe bẹdẹ bẹdẹ.​​—⁠Mak 12:​29, 30.

● Whọ gbẹ re họ-ame he, Ọghẹnẹ o re kru owhẹ fiki eware iyoma nọ who ru hu.

Ọrue. Jemis 4:17 o ta nọ: “Otẹrọnọ ohwo jọ ọ riẹ epanọ o re ru oware nọ u kiehọ rekọ o bi ru ei hi, yọ uzioraha rọ kẹe,” te ohwo na ọ họ-ame no hayo ọ re họ-ame he. Fikiere otẹrọnọ whọ riẹ oware nọ u kiehọ, who te je te epanọ whọ sae rọ jiroro kẹ omobọ ra no, o sae jọnọ u te okenọ who re ro lele ọsẹgboni ra hayo Oleleikristi ọfa nọ o kri ukoko na no ta ẹme kpahe iroro ra. Who te ru ere, u ti fiobọhọ kẹ owhẹ riẹ epanọ whọ sae rọ daoma te kẹ ame-ọhọ.

● Otẹrọnọ egbẹnyusu ra a be họ-ame, kiyọ u te epanọ whọ rẹ rọ họ-ame no re.

Ọrue. Udu obọra u re no ze nọ whọ gwọlọ họ-ame. (Olezi 110:3) Okenọ u fo nọ whọ rẹ rọ họ-ame họ, nọ whọ tẹ riẹ oware nọ u dhesẹ re a jọ omọvo Isẹri Jihova vevẹ no, yọ whọ ruẹrẹ oma kpahe kẹ onana.​—Ọtausiuwoma Na 5:4, 5.

Ame-Ọhọ U re Nwene Uzuazọ Ra

Ame-ọhọ yọ oware nọ u re nwene uzuazọ ohwo, yọ eghale buobu i re noi ze. O tẹ jẹ rrọ oware nọ o gwọlọ nọ a rẹ daoma fihọ gaga, keme o gwọlọ nọ ohwo o re ro ru eyaa nọ ọ ya kẹ Jihova gba.

Kọ whọ ruẹrẹ oma kpahe no re whọ roma mudhe? O tẹ rrọ ere, jọ eva e were owhẹ. Keme who ti wo uvẹ-ọghọ nọ o mae rro kpaobọ, uvẹ nọ whọ te rọ rehọ udu ra kpobi gọ Jihova je yeri uzuazọ nọ u dhesẹ nọ whọ ginẹ roma mudhe kẹe no.​—Matiu 22:36, 37

EVAỌ UZOU NỌ O RRỌ OBARO NA

Who ti wuhrẹ epanọ who re ro fi itee họ re whọ sai yeri emamọ uzuazọ.

ORIA IKERE ỌSOSUỌ

“Wha rehọ ugboma rai dhe idhe nọ e rrọ uzuazọ, ọrẹri, onọ Ọghẹnẹ ọ rẹ jẹrehọ, re wha rọ ẹgba iroro rai ru iruo ọrẹri kẹe.”​—Ahwo Rom 12:1.

OWARE JỌ NỌ U RE FIOBỌHỌ

Ta kẹ ọsẹgboni ra re a fiobọhọ kẹ owhẹ gwọlọ ohwo jọ evaọ ukoko na nọ ọ sai fiobọhọ kẹ owhẹ re whọ nyaharo te ame-ọhọ.​—Iruẹru Ikọ 16:1-3.

KỌ WHỌ RIẸ . . . ?

Ame-ọhọ yọ abọjọ “oka” nọ u wuzou gaga nọ u re dhesẹ nọ who ti wo esiwo.​—Izikiẹl 9:4-6.

OWARE NỌ ME TI RU!

Re mẹ sae họ-ame, mẹ te daoma re mẹ riẹ iwuhrẹ Ebaibol nana ziezi: ․․․․․

Onọ nọ mẹ be te nọ ọsẹ hayo oni mẹ kpahe ẹme nana họ ․․․․․

ẸVẸ WHO RORO?

● Fikieme ame-ọhọ o ro wuzou gaga?

● Eme ọ rẹ sae lẹliẹ uzoge họrọ nyae họ-ame?

● Eme ọ rẹ sae whaha uzoge nọ ọ gbẹ rọ gwọlọ roma mudhe kẹ Jihova jẹ họ-ame he?

[Ẹme nọ a fi ẹgba họ nọ ọ rrọ ẹwẹ-obe avọ 306]

Fikinọ mẹ jẹ hae kareghẹhọ nọ mẹ họ-ame no, u je fiobọhọ kẹ omẹ jẹ emamọ iroro, u te je ru nọ me gbe ro ru oghẹrẹ eware jọ họ nọ mẹ hae te vioja rai.​—Holly

[Ẹkpẹti hayo Uwoho nọ o rrọ ẹwẹ-obe avọ 307]

Enọ nọ Ahwo A rẹ nọ Kpahe Ame-ọhọ Gaga

Eme ame-ọhọ o dhesẹ? Nọ a te duwu owhẹ họ ame le no jẹ kpare owhẹ no ame na ze no, u dhesẹ nọ who whu kẹ uzuazọ nọ who je jo ru oreva obọra no, rekọ no enẹna vrẹ, who bi ti yeri uzuazọ okpokpọ nọ who re jo ru oreva Ọghẹnẹ.

Eme u dhesẹ re whọ rọ uzuazọ ra mudhe kẹ Jihova? Whọ rẹ ya eyaa kẹ Jihova nọ oreva riẹ whọ te rọ karo evaọ uzuazọ ra, onọ u dhesẹ nọ whẹ who gbe wo omara ha. (Matiu 16:24) Whọ rẹ roma ra mudhe kẹ Jihova evaọ olẹ evaọ omoke jọ no taure whọ tẹ te họ-ame.

Eme whọ rẹ rọ uzuazọ ra ru taure whọ tẹ te họ-ame? Who re ru lele eware nọ who bi wuhrẹ evaọ Ẹme Ọghẹnẹ jẹ ta eware nọ whọ rọwo kẹ amọfa. Whọ rẹ hae lẹ je se Ebaibol na ziezi re whọ sai wo usu okpekpe kugbe Ọghẹnẹ. Whọ rẹ gọ Jihova fikinọ whọ gwọlọ gọe, orọnikọ fikinọ amọfa a be gba owhẹ họ họ.

Kọ u wo unuikpe jọ nọ ohwo o re te re ọ tẹ họ-ame? Orọnikọ unuikpe jọ nọ ohwo o re te họ ugogo oware na ha. Rekọ o gwọlọ nọ whọ rẹ kpako je wo areghẹ te epanọ whọ rẹ rọ riẹ otọ oware nọ omauromudhe kẹ Ọghẹnẹ u dhesẹ.

Kọ eme who re ru otẹrọnọ whọ gwọlọ họ-ame rekọ ọsẹgboni ra a tẹ ta nọ whọ hẹrẹ tao? ­O sae jọnọ a gwọlọ nọ whọ gbẹ riẹ oware nọ u dhesẹ re ohwo o yeri oghẹrẹ uzuazọ nọ u fo Oleleikristi. Gaviezọ kẹ ohrẹ rai na, re whọ rọ oke nana ru usu ra kugbe Jihova ga ziezi.​—1 Samuẹle 2:26.

[Ẹkpẹti nọ o rrọ ẹwẹ-obe avọ 308, 309]

Onọ A re Kere Eme Fihọ

Kọ Who bi Roro nọ Who te Ohwo nọ Ọ rẹ Họ-ame No?

Rehọ enọ gbe eme nọ e rrọ obotọ na kiẹ omara riwi. Se eria Ebaibol na taure who te ti kere iyo ra fihotọ.

Oghẹrẹ vẹ who bi ro dhesẹ nọ who fievahọ Jihova obọnana?​—Olezi 71:5. ․․․․․

Oghẹrẹ vẹ who ro dhesẹ via no nọ who wuhrẹ ẹgba orimuo ra no re whọ sai vuhu oware uwoma gbe uyoma?​—Ahwo Hibru 5:14. ․․․․․

Brẹse whọ be hae lẹ? ․․․․․

Ugogo eware vẹ whọ be hae lẹ kpahe? Kọ elẹ ra i bi dhesẹ nọ who you Jihova?​—Olezi 17:6. ․․․․․

Kere eware jọ nọ whẹ gwọlọ nọ who re ru kpahe elẹ ra fihọ obotọ na. ․․․․․

Ẹvẹ whọ be hai ru uwuhrẹ omobọ ra kpekpe te?​—Joshua 1:8. ․․․․․

Eme whọ be hae jọ uwuhrẹ omobọ ra wuhrẹ? ․․․․․

Kere eware jọ nọ whọ gwọlọ nọ who re ru kpahe uwuhrẹ omobọ ra fihọ obotọ na. ․․․․․

Kọ whọ be ta usi uwoma ziezi? (Wọhọ oriruo: Kọ whọ be sai ru iwuhrẹ elọlọhọ nọ e rrọ Ebaibol na vẹ kẹ amọfa? Kọ whọ be hai zihe bru ahwo nọ a a gwọlọ wuhrẹ Ebaibol na? Kọ whọ be daoma re who wo ohwo jọ nọ who re wuhrẹ Ebaibol na?)

□ Ee □ Ijo

Kọ whọ be hai kpohọ usi uwoma nọ ọsẹgboni ra a gbẹ make nya ha?​—Iruẹru Ikọ 5:42.

□ Ee □ Ijo

Kere eware jọ nọ whọ gwọlọ nọ who re ru kpahe usi uwoma ota ra.​—2 Timoti 2:15. ․․․․․

Kọ whọ sae ta nọ whọ be hai kpohọ ewuhrẹ ẹsikpobi manikọ omotiẹse?​​—Ahwo Hibru 10:25. ․․․․․

Oghẹrẹ vẹ whọ be hai ro wobọ evaọ obọ iwuhrẹ? ․․․․․

Kọ whọ be hai kpohọ ewuhrẹ okenọ ọsẹgboni ra a gbẹ sae nya ha (otẹrọnọ a kẹ owhẹ uvẹ nọ whọ nya)?

□ Ee □ Ijo

Kọ whọ sae ginẹ ta nọ o were owhẹ re who ru oreva Ọghẹnẹ?​—Olezi 40:8.

□ Ee □ Ijo

Kọ whọ sae fodẹ ikpehre eware jọ nọ amọfa a jẹ te lẹliẹ owhẹ ru nọ whọ rọwo ru hu?​—Ahwo Rom 12:2. ․․․․․

Eme whọ te hai ru re uyoyou nọ who wo kẹ Jihova o gbẹ jọ gaga?​—Jud 20, 21. ․․․․․

Kọ whọ te gbẹ gọ Jihova ghele otẹrọnọ ọsẹgboni ra hayo egbẹnyusu ra a siọ Jihova ba ẹgọ?​—Matiu 10:36, 37.

□ Ee □ Ijo

[Uwoho nọ o rrọ ẹwẹ-obe avọ 310]

Wọhọ epanọ orọo u re nwene uzuazọ ohwo na, ere ame-ọhọ u re nwene uzuazọ ohwo re, fikiere a re mu laruọ ẹe he