A Duku Oware Ofa nọ O Mai Woma
ILELEIKRISTI buobu gbidi gbidi a salọ nọ a re ru ehaa Kresimesi hi. Rekọ ẹvẹ Kresimesi nọ a bi ru hu na o rrọ e rai oma? Kọ o be hae kẹ ae uye nọ oware jọ u bi vru mi ae? Kọ emọ rai a be hai roro nọ esẹgbini rai a be whaha ae oware jọ? Joma ruẹ eme nọ Isẹri Jihova nọ e rrọ eria sa-sa evaọ akpọ na a ta kpahe ẹme nana.
Eve
Epanọ a rẹ rọ kareghẹhọ Jesu Kristi: “Taure me te ti kurẹriẹ ruọ ukoko Isẹri Jihova, ọthobọ me re ro kpohọ ichọche. Yọ oke Kresimesi hayo Isita ọvo mẹ jẹ hae nya. Rekọ makọ evaọ oke yena dede, me re roro kpahe Jesu vievie he. Enẹna me gbe bi ru ehaa Kresimesi hi, rekọ mẹ be hai kpohọ iwuhrẹ Isẹri Jihova isiava ẹkpoka, yọ mẹ be hai wuhrẹ amọfa kpahe oware nọ Ebaibol na ọ ta kpahe Jesu.”—EVE, AUSTRALIA.
Reuben
Oghọghọ nọ u re no ọghọruo ze: “Eva e rẹ were omẹ gaga nọ ahwo a tẹ kẹ omẹ okẹ nọ me rẹro riẹ hẹ. O rẹ jẹ were omẹ re me kere ẹme fihọ ẹmẹwẹ-obe jẹ drọ iwoho nọ mẹ rẹ rọ kẹ ahwo, keme o rẹ lẹliẹ eva were ai, yọ o rẹ lẹliẹ eva were omẹ re.”—REUBEN, NORTHERN IRELAND.
Emily
Obọ nọ a re fihọ kẹ ahwo nọ a gwọlọ obufihọ: “O rẹ were omai re ma there emu kẹ ahwo nọ oma rai o ga tere he. Ẹsejọ ma rẹ kẹ ae ododo, ikeki, hayo okẹ nọ u re ru eva were ai. O rẹ were omai re ma ru eware nana keme ma sai weze bru ae oke kpobi.”—EMILY, AUSTRALIA.
Wendy
Ahwo uviuwou nọ a re kokohọ: “Nọ ahwo uviuwou mai a te kokohọ, u re ru nọ emọ mai a rẹ rọ riẹ inievo ọsẹ rai gbe inievo oni rai, ọsẹ-ologbo gbe oni-ologbo rai, gbe imoni rai. Yọ ma riẹ nọ ma sai kokohọ oke kpobi evaọ ukpe na, orọnikọ evaọ etoke ehaa ọvo ho. Ahwo uviuwou mai a riẹ nọ ma you rai, yọ oye o wha riẹ ze nọ ma be hai ro weze bru ae.”—WENDY, CAYMAN ISLANDS.
Sandra
Udhedhẹ: “Evaọ oke Kresimesi, ahwo a rẹ rọ ovariẹ ru oware kpobi keme eware e vọ otọ kẹ ae nọ a re ru, fikiere ohwo ọvo o re roro kpahe udhedhẹ hẹ. Rekọ enẹna nọ me wuhrẹ kpahe oware nọ Ọghẹnẹ ọ jọ Ebaibol na ya eyaa kẹ ahwo-akpọ no na, udu u te omẹ otọ no. Mẹ riẹ nọ emọ mẹ a te rria bẹdẹ bẹdẹ jẹ wereva evaọ obaro.”—SANDRA, SPAIN.