• UKPE NỌ A YẸ OMẸ: 1941

• ORẸWHO MẸ: BENIN

• IKU MẸ: ME WO EYAE BUOBU, ME TE JE MUKPAHE ISẸRI JIHOVA

UZUAZỌ MẸ EVAỌ OKE NỌ U KPEMU:

Mẹ yọ ohwo Cotonou, ẹwho ologbo jọ evaọ Benin. Ichọche Katọlik ma nya no emaha ze. Rekọ nọ u te oke jọ no, me gbe je kpohọ ichọche tere he. Evaọ oria mai na, ahwo ichọche Katọlik buobu a wo eyae buobu. Evaọ oke yena uzi egọmeti o ta nọ ohwo ọ sai wo unu eyae kpobi nọ ọ gwọlọ. Eyae mẹ i te ti te ene.

Nọ ukpe 1970 o vrẹ no, ahwo jọ evaọ orẹwho mai a te mu egọmeti họ ẹwọso inọ a gwọlọ nwene egọmeti orẹwho na. Yọ o jọ omẹ oma inọ a te gine nwene egọmeti orẹwho mai na, eware i ti woma. Fikiere, me te kuomagbe ai. Ere me ro duomahọ eware isuẹsu. Ahwo nọ a jẹ wọso egọmeti orẹwho mai na a mukpahe Isẹri Jihova, keme Isẹri Jihova a rẹ rọwo votu hu. Mẹ jọ usu ahwo nọ a je kpokpo Isẹri Jihova evaọ oke yena. Ukpe 1976, a te le imishọnare nọ e rrọ Isẹri Jihova no orẹwho mai. Mẹ tẹ jọ udu mẹ ta nọ obọ u te rai no, inọ a rẹ gbẹ jọ orẹwho mai na dowọ muotọ ofa ha.

EPANỌ EBAIBOL NA O RO NWENE UZUAZỌ MẸ:

Ukpe 1990 ẹbẹbẹ nọ ọ jọ egọmeti orẹwho mai na o te kuhọ. U kri hi, imishọnare nọ e rrọ Isẹri Jihova a te zihe ziọ orẹwho mai. U gbe omẹ unu gaga. Mẹ tẹ be jọ udu mẹ ta nọ o wọhọ nọ Ọghẹnẹ ọ rrọ kugbe ahwo nana. Enwenọ oke ovo yena, me te no iruo nọ mẹ jọ, me te mu iruo efa họ. Ohwo iruo mai jọ Osẹri Jihova. U kri hi, o te mu usi uwoma họ ẹta kẹ omẹ. O dhesẹ eria sa-sa kẹ omẹ evaọ Ebaibol nọ i dhesẹ nọ Jihova yọ Ọghẹnẹ oyoyou nọ o re kienyẹ ohwo ọvo ho. (Iziewariẹ 32:4; 1 Jọn 4:⁠8) Eware nana nọ me wuhrẹ kpahe Jihova na e were omẹ gaga. Mẹ tẹ gwọlọ nọ me re gbe wuhrẹ kpahe Jihova. Fikiere nọ Isẹri Jihova a ta nọ a re wuhrẹ Ebaibol kugbe omẹ, mẹ tẹ rọwo.

U kri hi, me te mu iwuhrẹ Isẹri Jihova họ ẹnya. Mẹ ruẹ nọ Isẹri Jihova a you ohwohwo gaga. A re siomano ohwo ọvo ho fiki oria nọ o no ze, fikinọ ohwo na oyogbe hayo o kpohọ isukulu hu. Nọ me bi kpohọ iwuhrẹ Isẹri Jihova na, mẹ tẹ te ruẹ nọ ahwo nana ginọ uvi ilele Jesu.​—Jọn 13:35.

Mẹ ruẹ nọ mẹ tẹ ginẹ gwọlọ gọ Jihova, me re no ichọche Katọlik. Oyena o lọhọ vievie he, keme mẹ jẹ ruawa nọ ahwo a ti rri omẹ oghẹrẹ jọ. Nọ u kri no omojọ, Jihova o te ti fiobọhọ kẹ omẹ. Mẹ tẹ gbaudu no ichọche na.

Rekọ u wo oware ofa jọ nọ o jọ bẹbẹ gaga nọ u fo nọ me re ru. Mẹ jọ Ebaibol wuhrẹ nọ Ọghẹnẹ ọ gwọlọ nọ aye ọvo ọzae o re wo. (Emuhọ 2:18-24; Matiu 19:4-6) Evaọ aro Jihova, aye ọsosuọ mẹ na họ uzedhe aye mẹ. Fikiere, mẹ avọ iẹe ma te ru obe orọo. Me te le eyae nọ i kiọkọ kpo. Mẹ tẹ kẹ ae oware nọ a rẹ rọ rẹrote omarai. Uwhremu na, imava evaọ usu eyae nana a kurẹriẹ ziọ ukoko Isẹri Jihova.

IRERE NỌ ME WO NO:

Dede nọ aye mẹ ọ gbẹ rrọ ichọche Katọlik, o bi kpokpo omẹ hẹ inọ mẹ yọ Osẹri Jihova. Enẹna, me bi tete aye mẹ ziezi. Yọ whọ tẹ nọ aye mẹ, epọvo na ọ te ta.

Evaọ oke ọsosuọ me je roro nọ me te dhomahọ isuẹsu, ẹwho mai o ti woma. Rekọ omamẹ gheghe mẹ jẹ lahiẹ. Obọnana mẹ ruẹ nọ Uvie Ọghẹnẹ ọvo o rẹ sai ku ẹbẹbẹ ohwo-akpọ họ. (Matiu 6:9, 10) Me yere Jihova gaga, keme o wuhrẹ omẹ eware nọ e be lẹliẹ omẹ wo evawere evaọ uzuazọ.

• UKPE NỌ A YẸ OMẸ: 1977

• ORẸWHO MẸ: BRAZIL

• IKU MẸ: EPASTỌ ICHỌCHE PẸNTIKOSTAL

UZUAZỌ MẸ EVAỌ OKE NỌ U KPEMU:

Ughe ẹwho nọ a re se Itu, evaọ ubrotọ São Paulo a jọ yọrọ omẹ. Ikpehre ahwo a jọ oria nọ ma jẹ rria na gaga.

Mẹ omamẹ, mẹ jẹ hai ru ozighi je gbe-ọfariẹ gaga. Yọ mẹ jẹ hae zẹ imu egaga. Nọ u te oke jọ no mẹ tẹ ruẹ nọ mẹ gbẹ siọ uzuazọ nana nọ me bi yeri na ba ha, o sae wha omẹ kpohọ uwou-odi hayo si uwhu kpe omẹ. Fikiere, me te siobọno eware yena. Kẹsena me te mu ichọche Pẹntikostal họ, uwhremu na, me te zihe ruọ epastọ.

Me je roro nọ mẹ sae rọ ichọche na fiobọhọ kẹ ahwo buobu. Mẹ jẹ hae tubẹ jọ iredio ru ichọche, a tẹ te riẹ omẹ gaga evaọ ẹwho na. Rekọ nọ oke o be nyaharo na mẹ tẹ ruẹ nọ oware nọ o rrọ ichọche na oja, orọnikọ epanọ a re ro fiobọhọ kẹ ohwohwo hayo ru oware nọ o rẹ were Ọghẹnẹ hẹ. Ugho ọvo họ oware nọ o rrọ ae oja. Fikiere, mẹ tẹ jiroro nọ me re no ichọche na.

EPANỌ EBAIBOL NA O RO NWENE UZUAZỌ MẸ:

Nọ Isẹri Jihova a nwani mu Ebaibol họ ewuhrẹ kugbe omẹ, mẹ tẹ ruẹ nọ a wo ohẹriẹ gaga no egagọ nọ i kiọkọ. Eware ivẹ eye e jọ oma rai mae were omẹ. Orọ ọsosuọ, orọnikọ Isẹri Jihova a rẹ ta ọvo nọ a you Ọghẹnẹ gbe erivẹ hẹ, a re ru eware nọ i dhesẹ nọ a gine wo uyoyou. Orọ avọ ivẹ, a re dhomahọ eware ivotu hayo ẹmo ho. (Aizaya 2:4) Eware ivẹ nana i ru omẹ riẹ nọ, egagọ uzẹme na ọna, edhere ọhwahwa nọ o bi su kpohọ uzuazọ ebẹdẹ bẹdẹ na.​—Matiu 7:13, 14.

Nọ me bi wuhrẹ Ebaibol na, mẹ tẹ ruẹ nọ re mẹ sai ru Ọghẹnẹ eva were, mẹ rẹ siọ eware jọ nọ me ru no otọ ze ba. Mẹ rẹ daoma rẹrote uviuwou mẹ ziezi, me ve je wo omaurokpotọ. O jọ bẹbẹ kẹ omẹ gaga re me nwene. Rekọ Jihova o fiobọhọ kẹ omẹ, me te ti nwene uwhremu na. Eva e were aye mẹ ziezi inọ mẹ sai nwene. Isẹri Jihova a mu Ebaibol họ ewuhrẹ kugbe aye mẹ no taure a te ti mu omẹ họ ewuhrẹ. Nọ ọ ruẹ epanọ eware nọ me bi wuhrẹ na i fiobọhọ kẹ omẹ te, o te se uwuhrẹ riẹ na gboja vi epaọ ọsosuọ. U kri hi, ma tẹ ruẹ vevẹ nọ u fo nọ ma re kuomagbe Isẹri Jihova. Mai imava ma tẹ họ-ame ẹdẹvo.

IRERE NỌ ME WO NO:

Mẹ avọ aye mẹ ma wuhrẹ Ebaibol kugbe emọ esa mai, nọ u fiobọhọ kẹ ae be gọ Jihova. Yọ onana o be lẹliẹ eva were omai gaga. Mai kpobi evaọ uviuwou na ma be wereva. Me yere Jihova nọ o ro fiobọhọ kẹ omai riẹ uzẹme na. Ẹme Ebaibol o re gine nwene uzuazọ ohwo. O nwene uzuazọ mẹ.

• UKPE NỌ A YẸ OMẸ: 1957

• ORẸWHO MẸ: AUSTRALIA

• IKU MẸ: MẸ REOJA GAGA EVAỌ OKE EMAHA

UZUAZỌ MẸ EVAỌ OKE NỌ U KPEMU:

Ẹwho nọ a re se Newcastle, evaọ New South Wales a jọ yọrọ omẹ. Mẹ họ ọmọ ọkpako evaọ usu emọ ihrẹ nọ ọsẹgboni mẹ a yẹ. Ọsẹ mẹ ọ jẹ hai kpe omai gaga, yọ ọ rẹ da idi gaga re. Oni mẹ omariẹ ọ jẹ hai kpe omai gaga. Oye ọvo ho, ọ jẹ hai ku eka họ omẹ oma. Ẹsikpobi ọ jẹ hae vuẹ omẹ nọ mẹ yọ ekpehre ọmọ, gbe nọ mẹ te jọ erae ehẹle to. Eme yena e jẹ hai mu omẹ ozọ gaga.

Ẹsibuobu, oni mẹ ọ jẹ hae nwa omẹ oma, onọ u re ru omẹ siọ isukulu ba. Nọ mẹ jọ ikpe ikpegbọvo, egọmeti ọ tẹ wọ omẹ siọ ọsẹgboni mẹ ba fiki oja nọ a je gbe kẹ omẹ. Egọmeti ọ tẹ be rẹrote omẹ. Uwhremu na, a te fi omẹ họ uwou ichọche nọ eyae ichọche na efa a be rria, kọ etẹe mẹ jọ. Nọ mẹ jọ ikpe ikpegbene, mẹ tẹ dhẹ no uwou ichọche na. Fikinọ mẹ gwọlọ zihe kpobọ uwou hu, kọ iyẹrẹ mẹ jẹ rria evaọ oria nọ a re se Kings Cross evaọ ofẹ jọ Sydney.

Nọ me je ghoro evaọ iyẹrẹ na, me te mu imu egaga họ ẹrehọ, mẹ jẹ da idi thomawa, rri ifoto ẹbẹba, je gbe-ọfariẹ. U wo oware jọ nọ o via ẹdẹ jọ nọ o lẹliẹ ozọ mu omẹ gaga. Oke yena mẹ jẹ rria uwou ọzae jọ nọ o wo oria nọ a re jo ru epati evaọ aso. Owọwọ ẹdẹ jọ, ezae ivẹ jọ e tẹ nyabru ei ze. Ọzae nọ mẹ rrọ uwou riẹ na ọ tẹ ta kẹ omẹ nọ me kpohọ obọ ukpẹ. Rekọ nọ mẹ rrọ obọ ukpẹ na yọ me bi yo ẹme nọ a be ta. Ọzae nọ mẹ jọ uwou riẹ na ọ be gba ẹgwae epanọ ọ rẹ rọ zẹ omẹ kẹ ezae ivẹ na. Ezae ivẹ na a ta nọ a ti si omẹ no họ okọ jọ nọ a rẹ rọ wọ ewha, a vẹ wọ omẹ kpobọ Japan re mẹ nyai ru iruo evaọ oria nọ a rẹ jọ zẹ idi. Ozọ u mu omẹ gaga, mẹ tẹ la no unwido fihọ otọ. Mẹ tẹ dhẹ.

Mẹ dhẹ ku ọzae jọ nọ ọ ziọ erẹ evaọ Sydney. Me te gbe oware kpobi nọ o via kẹe. Me je roro nọ ọ te kẹ omẹ umugho jọ. Rekọ ọzae na ọ tẹ vuẹ omẹ nọ me lele iei kpohọ oria nọ o wohọ re mẹ họ jẹ re ememu. Ere me ro lele iei. Me gbe no uwou riẹ ofa ha. Nọ ẹgbukpe ọ vrẹ no, mai imava ma tẹ ruọ orọo.

EPANỌ EBAIBOL NA O RO NWENE UZUAZỌ MẸ:

Nọ Isẹri Jihova a mu Ebaibol họ ewuhrẹ kugbe omẹ, eware buobu i ru eva were omẹ, yọ eware jọ i ru eva dha omẹ re. Eva e dha omẹ nọ me wuhrẹ nọ Setan họ ọnọ ọ wha ebẹbẹ kpobi nọ e rrọ akpọ na ze. No emaha ze, a wuhrẹ omẹ nọ Ọghẹnẹ ọye ọ be lẹliẹ omai reoja. Yọ eva e were omẹ nọ me wuhrẹ nọ Ọghẹnẹ o re fi ahwo họ erae ehẹle he. Oware yena nọ o mu omẹ ozọ no emaha ze na, kpakọ ọrue.

Eva e were omẹ gaga re inọ oware kpobi nọ Isẹri Jihova a bi ru, a re lele uzi Ebaibol. Eware nọ a bi ru i gine dhesẹ nọ a wo ẹrọwọ. Mẹ jẹ hai mu ru ẹsejọ. Rekọ mẹ tẹ maki ru oware jọ nọ o thọ hayo ta ẹme nọ o fo ho, Isẹri Jihova a jẹ rọ ekpehre ubiẹro rri omẹ hẹ. A jẹ rọ unu kpotọ ta ẹme kẹ omẹ.

Oware nọ o mae jẹ kẹ omẹ uye kpobi họ, me je rri omamẹ nọ me fioka ha. Omobọ mẹ o vẹso omẹ. Yọ mẹ make họ-ame no evaọ ukoko Isẹri Jihova, me gbe je rri omamẹ ere. Mẹ riẹ nọ me you Jihova, rekọ o jọ omẹ oma nọ Jihova ọ sai you ohwo kerọ omẹ na vievie he.

Rekọ nọ mẹ họ-ame no nọ ikpe ikpegbisoi e jẹ vrẹ no, a tẹ kẹ ovuẹ jọ evaọ obọ Ọgwa Uvie nọ o lẹliẹ omẹ riẹ nọ kpakọ me bi roro thọ anwẹdẹ. Oniọvo nọ ọ jẹ kẹ ovuẹ na ọ ta ẹme kpahe obe Jemis 1:23, 24. A jọ oria Ebaibol yena ta nọ Ẹme Ọghẹnẹ ọ wọhọ ughẹgbe nọ ohwo o re ro rri omariẹ, ọ vẹ sae ruẹ omariẹ epanọ Jihova ọ be ruẹ e riẹ. Mẹ tẹ be jọ udu mẹ roro sọ oghẹrẹ nọ me bi rri omamẹ na u wo ohẹriẹ no oghẹrẹ nọ Jihova o rri omẹ. O jẹ kaki mu omẹ ẹro ho inọ Jihova o se omẹ gb’ohwo. Mẹ jẹ jọ udu mẹ ta nọ, kọ mẹ yọ ohwo jọ nọ Jihova o re gine you?

Nọ emedẹ jọ e vrẹ no, me se oria jọ evaọ Ebaibol nọ u duobọte omẹ gaga. Oria na họ Aizaya 1:18, nọ Jihova ọ jọ ta nọ: “Wha nyaze enẹna, re ma kpọ eware vi evaọ udevie mai. . . . Dede nọ izieraha rai e rrọ wawae, a ti ru ai jọ fuafo wọhọ ekpalekpa-ame.” Nọ me se oria Ebaibol yena, o tẹ wọhọ ẹsenọ Jihova ọ be ta kẹ omẹ nọ: “Nyaze Vicky, re ma kpọ eware vi evaọ udevie mai. Mẹ riẹ oghẹrẹ ohwo nọ whọ rrọ. Mẹ riẹ nọ whọ ginẹ raha izi jọ evaọ oke nọ u kpemu. Rekọ mẹ riẹ nọ eva ra e rrọ vevẹ. Yọ me you owhẹ.”

Aso ẹdẹ yena mẹ sae wezẹ hẹ. Mẹ gbẹ jẹ vro sọ Jihova o gine you omẹ. Me te muhọ eroro kpahe idhe ẹtanigbo Jesu na. Ẹsiẹvo na, mẹ tẹ ruẹ nọ Jihova o bi thihakọ kẹ omẹ anwẹdẹ. O bi ru eware buobu nọ i dhesẹ nọ o you omẹ. Ghele na, o wọhọ ẹsenọ mẹ be ta kẹe nọ: “Whọ sai you ohwo kerọ omẹ hẹ. Idhe Ọmọ ra e sai si izieraha mẹ no ho.” Idhe ẹtanigbo na yọ okẹ oghaghae nọ Jihova ọ kẹ omẹ. Rekọ o wọhọ ẹsenọ me bi gbolo iei zihe kẹe. Nọ me roro didi kpahe uwhu nọ Jesu o whu kẹ omẹ na, mẹ tẹ ruẹ nọ Jihova o gine you omẹ.

IRERE NỌ ME WO NO:

Obọnana me bi yeri emamọ uzuazọ, udu u gbe bi brukpe omẹ hẹ. Me bi wo evawere evaọ orọo mẹ. Eva e tẹ be jẹ were omẹ gaga inọ eware nọ me wuhrẹ no, mẹ be rehọ ai fiobọhọ kẹ amọfa. Mẹ avọ Jihova ma kpekpe gaga no obọnana.

• UKPE NỌ A YẸ OMẸ: 1974

• ORẸWHO MẸ: RUSSIA

• IKU MẸ: ILE OHERI AVỌ IKPORAKPORO EGAGA E JẸ HAE WERE OMẸ

UZUAZỌ MẸ EVAỌ OKE NỌ U KPEMU:

A yẹ omẹ evaọ ẹwho jọ nọ a re se Votkinsk. Ẹwho yena ọvona a jo yẹ ọzae jọ nọ a riẹ odẹ gaga nọ a re se Pyotr Ilich Tchaikovsky nọ ọ jẹ hai kere ile. Ma jọ iyogbe. Ọsẹ mẹ o wo emamọ iruemu buobu, rekọ ọ jẹ hae da idi vrẹ oma. Fikiere udu o jẹ hai te ohwo ọvo otọ họ evaọ uwou na.

Mẹ riẹ obe tere he evaọ isukulu. Fikiere nọ oke o be nyaharo na, me te je rri omamẹ nọ me fioka ohwo ho. Me gbe je kuomagbe ahwo tere he, yọ me fievahọ ohwo ọvuọvo ho. Isukulu e jẹ hai mu omẹ ozọ gaga. Me te wo asaemẹnte nọ mẹ rẹ rọ ta ẹme evaọ aro eklase, oware nọ mẹ rẹ sae ta evaọ oke ofa, mẹ rẹ gbẹ sae tae he. Ẹme ọ vẹ kare dhe omẹ udu. Nọ me je no eklase jọ kpohọ eklase ọfa, a te kere fihọ erepọt kade mẹ nọ: “Ẹme ọ rẹ bẹe ẹta, ọ rẹ sae ta ẹme he evaọ aro eklase.” U te je ru omẹ rri omamẹ nọ me gine fioka ohwo ho. Me te muhọ eroro nọ, ‘Eme mẹ tubẹ ziọ akpọ na ti ru?’

Oke nọ mẹ jọ ikpe ikpegbọ, me te mu idi họ ẹda. Evaọ oke ọsosuọ, idi na e jẹ hae sasa omẹ oma. Rekọ mẹ tẹ da bu hrọ, udu mẹ u ve je mu omẹ họ ebrukpe. Uzuazọ mẹ u gbe fioka ha. Mẹ jọ ọkọkora. Ẹsejọ dede, me re no uwou ze evaọ edẹ buobu hu. Mẹ tẹ jiroro nọ me re thuru whu.

Nọ me te ikpe udhe no, mẹ tẹ ruẹ oware ofa nọ me roro nọ o te kẹ omẹ evawere. Oye họ ile oheri avọ ikporakporo egaga. Ile yena i re ru omẹ oma jaja. Me te mu usu kugbe amọfa nọ ile itieye e rẹ were re. Mẹ nyasiọ eto mẹ ba re i theri ziezi. Mẹ tẹ jẹ zayẹ ighogho fihọ ezọ mẹ, yọ mẹ jẹ hae gọ oghẹrẹ ẹgọ nọ egba-ile jọ nọ e rẹ were omẹ a rẹ gọ. Ẹmẹrera na, me te ti zihe ruọ ohwo nọ ọ sasa oma vrẹta. Ẹwhọ ọ rẹ were omẹ yọ ẹsibuobu me re lele ahwo uviuwou mẹ vro avro.

Me je roro nọ mẹ tẹ be hae gaviezọ kẹ ile oheri avọ ikporakporo egaga na, me ti wo evawere. Rekọ o via ere he. Ile na e raha omẹ muotọ. Nọ me yo kpahe ikpehre eware nọ ahwo nọ a so ile nọ e be were omẹ na a bi ru, mẹ tẹ whabọ họ uzou.

Me te je mu epanọ mẹ sai ro thuru whu họ eroro kpahe gaga. Oware nọ o whaha omẹ kpobi họ, me je roro kpahe epanọ o te da oni mẹ te. Oni mẹ o you omẹ gaga, yọ o fiobọhọ kẹ omẹ gaga no. Mẹ gbẹ riẹ onọ me re ru hu. Uzuazọ o vẹso omẹ no, rekọ mẹ te sai thuru whu hu.

Me te mu ebe anwae Russia họ ese re mẹ sae kpairoro vrẹ ebẹbẹ mẹ. Me se iku ohwo jọ nọ ọ jẹ jọ ichọche ru iruo, nọ o siwi ahwo buobu. Ẹsiẹvo na, mẹ tẹ gwọlọ nọ me re ru oware jọ nọ o rẹ were Ọghẹnẹ, je fiobọhọ kẹ amọfa. Mẹ tẹ lẹ se Ọghẹnẹ no udu mẹ kpobi ze. Anwẹnọ a ro yẹ omẹ na, mẹ re lẹ ẹdẹvo ho. Mẹ lẹ Ọghẹnẹ nọ o fiobọhọ kẹ omẹ riẹ epanọ mẹ sai ro wo evawere. Nọ mẹ jẹ lẹ na, oware jọ o via nọ u gbe omẹ unu gaga. Udu u te omẹ otọ wọhọ ẹsenọ a wọ owha ogbẹgbẹdẹ no omẹ uzou. Rekọ oware nọ o mai tube gbe omẹ unu họ, nọ mẹ lẹ no, o vrẹ euwa ivẹ hẹ, Osẹri Jihova jọ ọ tẹ nyaze ti kporo ẹthẹ mẹ. Ọ vuẹ omẹ nọ ọ gwọlọ wuhrẹ Ebaibol kugbe omẹ. Mẹ tẹ nwane riẹ nọ Ọghẹnẹ o yo olẹ mẹ no. No umuo ẹdẹ yena vrẹ, me te mu evawere họ ewo.

EPANỌ EBAIBOL NA O RO NWENE UZUAZỌ MẸ:

Dede nọ o jọ bẹbẹ kẹ omẹ, me ku oware kpobi nọ u wo obọ kugbe ile oheri nọ mẹ jẹ hai kporo na kufiẹ. Ghele na, ile na e gbẹ jọ omẹ uzou oke lelehie. Ẹsikpobi nọ mẹ tẹ be nya oria nọ a be jọ kporo ile na vrẹ, mẹ rẹ kareghẹhọ eware nọ me je ru evaọ oke nọ u kpemu. Mẹ gwọlọ zihe kpohọ ekpehre uzuazọ nọ me je yeri vẹre na ha keme eware nọ me bi wuhrẹ obọnana e were omẹ gaga. Fikiere, me gbe je fou kẹle oria nọ a bi jo kporo oghẹrẹ ile itieye na ha. Yọ ẹsikpobi nọ eware yena e tẹ be ziọ omẹ iroro, mẹ rẹ lẹ se Jihova gaga re o fiobọhọ kẹ omẹ. Nọ mẹ tẹ lẹ no, “udhedhẹ Ọghẹnẹ nọ u vi otoriẹ kpobi” na o vẹ lẹliẹ udu te omẹ otọ.​—Ahwo Filipai 4:7.

Nọ me bi wuhrẹ Ebaibol na, mẹ tẹ ruẹ nọ Oleleikristi ọ rẹ vuẹ amọfa eware nọ o bi wuhrẹ. (Matiu 28:19, 20) Me je roro nọ mẹ te sae ta usi uwoma ẹdẹvo ho. Rekọ eware nọ me bi wuhrẹ na e be lẹliẹ omẹ wereva gaga, je bi ru nọ mẹ gbẹ be rọ ruawa ha. Mẹ riẹ nọ eware nana i ti fiobọhọ kẹ amọfa re. Fikiere, dede nọ ozọ o jọ omẹ ẹro, me te mu eware nọ me bi wuhrẹ na họ ẹta kẹ amọfa. U gbe omẹ unu gaga inọ, nọ mẹ be vuẹ amọfa eware nọ mẹ jọ Ebaibol wuhrẹ na, ozọ u te mu omẹ ẹro họ eno. Usi uwoma nọ mẹ be ta na u te je ru nọ eware nọ me wuhrẹ i ro te omẹ udu ziezi.

IRERE NỌ ME WO NO:

Me wo aye no enẹna, yọ mẹ be wereva evaọ orọo mẹ. Me te je fiobọhọ kẹ ahwo buobu mu Jihova họ ẹgọ no. Oniọvo mẹ ọmọtẹ gbe oni mẹ a rrọ usu ahwo nana. Onana o be kẹ omẹ evawere gaga. Ọghẹnẹ nọ mẹ be gọ na, gbe amọfa nọ me bi fiobọhọ kẹ wuhrẹ kpahe Ọghẹnẹ na o lẹliẹ uzuazọ mẹ kokohọ ziezi no.