Ebaibol na O re Nwene Uzuazọ Ohwo

ẸVẸ uvovo-aye jọ nọ uye o bẹ gaga evaọ oke emaha o ro mu evawere họ ewo? Ẹvẹ ọzae jọ nọ o re mu ofu gaga, nọ ọ jẹ wọso egọmeti o ro zihe ruọ ohwo odhedhẹ nọ ọ be ta usi uwoma Uvie Ọghẹnẹ? Se iku nana re whọ ruẹ iyo enọ yena.

“Mẹ jẹ gwọlọ ahwo nọ a re se omẹ gboma.”​—INNA LEZHNINA

UKPE NỌ A YẸ OMẸ: 1981

ORẸWHO MẸ: RUSSIA

IKU MẸ: MẸ REOJA GAGA EVAỌ OKE EMAHA

UZUAZỌ MẸ EVAỌ OKE NỌ U KPEMU: Ọsẹgboni mẹ a diezọ, yọ mẹ omamẹ, me diezọ re. Ere a ro yẹ omẹ. Eware e jẹ riẹ nya bẹsenọ me ro te ikpe ezeza. Kẹsena ọsẹgboni mẹ a tẹ fa orọo. Dede nọ mẹ gbẹ maha oke yena, mẹ ruẹ nọ orọo-ofa u woma ha. Orọo nọ a fa na o kẹ omẹ uye gaga. Nọ ọsẹgboni mẹ a fa orọo no, ọsẹ mẹ avọ oniọvo mẹ ọmọzae nọ a yẹ omẹ tu a tẹ jẹ rria Troitsk. Oni mẹ ọ tẹ wha omẹ kpobọ Chelyabinsk, kọ obei ma jẹ rria. Nọ oke jọ o vrẹ no, oni mẹ o te wo ọzae ọfa. Ọzae oni mẹ ọ jẹ hae da idi vrẹ oma. Kẹse kẹse ọ jẹ hai kpe omẹ avọ oni mẹ.

Ukpe 1993, oniọvo mẹ ọmọzae nọ a yẹ omẹ tu ọ tẹ da ame whu. Nọ ma yo kpahe uwhu riẹ, o kẹ omai uye gaga. Oni mẹ o te mu idi họ ẹda thomawa. O te mu omẹ họ ẹlahiẹ wọhọ epanọ ọzae riẹ o je ru. Mẹ tẹ jẹ gwọlọ oghẹrẹ kpobi nọ akpọ mẹ o re ro woma. Mẹ jẹ gwọlọ ahwo nọ a re se omẹ gboma. Me je no ichọche ruọ ichọche sọ mẹ sae ruẹ ahwo nọ a rẹ sasa omẹ oma, rekọ mẹ ruẹ ahwo otiọye vievie he.

EPANỌ EBAIBOL NA O RO NWENE UZUAZỌ MẸ: Nọ mẹ jọ ikpe ikpegbesa, ọmọ eklase mai jọ nọ ọ rrọ Osẹri Jihova ọ tẹ jẹ hai gbiku Ebaibol kẹ omẹ. Iku ahwo wọhọ Noa gbe Job e jẹ hae were omẹ gaga. Ahwo nana a jẹ gọ Ọghẹnẹ dede nọ a wo ebẹbẹ. U kri hi, Isẹri Jihova a te mu omẹ Ebaibol họ ewuhrẹ. Me te mu iwuhrẹ rai họ ẹnya.

Ebaibol nọ a je wuhrẹ omẹ na o lẹliẹ omẹ riẹ emamọ eware buobu. Eva e were omẹ gaga nọ me wuhrẹ nọ Ọghẹnẹ o wo odẹ. (Olezi 83:18) U gbe omẹ unu gaga nọ mẹ ruẹ nọ eware nọ Ebaibol ọ ta inọ e te via evaọ “edẹ urere na” e be ginẹ via. (2 Timoti 3:1-5) U te no ere no, eva e were omẹ gaga nọ mẹ jọ Ebaibol wuhrẹ kpahe ẹkparomatha. Koyehọ mẹ te wariẹ ruẹ oniọvo mẹ!​—Jọn 5:28, 29.

Orọnikọ ohwo kpobi eva e jẹ were he inọ me bi wuhrẹ Ebaibol. Oni mẹ gbe ọzae oni mẹ a mukpahe Isẹri Jihova. A jẹ gwọlọ nọ a gbẹ nyaze ti wuhrẹ omẹ hẹ. Rekọ eware nọ a je wuhrẹ omẹ na e were omẹ gaga. Mẹ gwọlọ nọ oware ovo o rẹ whaha omẹ uwuhrẹ na ha.

Ahwo uviuwou mẹ a je kpokpo omẹ gaga. U kri hi, oware idabolo ọfa o tẹ via. Oniọvo mẹ ọrọ ọmọzae nọ a yẹ tu omẹ nọ ọ jẹ hai lele omẹ kpohọ iwuhrẹ, ọ tẹ jẹ da ame whu. Rekọ Isẹri Jihova a dhẹ siọ omẹ ba ha. A jẹ hae tuduhọ omẹ awọ je se omẹ gboma ẹsikpobi. Oware nọ mẹ gwọlọ evaọ uzuazọ mẹ kpobi oye. Onana u te ru omẹ riẹ nọ egagọ uzẹme na mẹ rrọ na. Kẹsena evaọ ukpe 1996, mẹ tẹ họ-ame evaọ ukoko Isẹri Jihova.

IRERE NỌ ME WO NO: Anwọ ikpe ezeza ena nọ mẹ rọ rehọ ọzae oyoyou mẹ na nọ a re se Dmitry. Mẹ avọ iẹe ma bi ru iruo evaọ uwou ogha Isẹri Jihova nọ o rrọ St. Petersburg. Enẹna ọsẹgboni mẹ a gbe bi kpokpo omẹ hẹ inọ mẹ rrọ Osẹri Jihova keleme.

Eva e were omẹ gaga nọ mẹ rọ riẹ Jihova. Anwẹnọ mẹ be rọ gọe na, eva ọvo e be were omẹ.

“Me wo enọ buobu nọ i je kpokpo omẹ udu.”​—RAUDEL RODRÍGUEZ RODRÍGUEZ

UKPE NỌ A YẸ OMẸ: 1959

ORẸWHO MẸ: CUBA

IKU MẸ: MẸ JẸ WỌSO EGỌMETI

UZUAZỌ MẸ EVAỌ OKE NỌ U KPEMU: Obọ Havana evaọ Cuba a jo yẹ omẹ. Oke nọ mẹ jọ ọmaha, oria nọ ma jẹ rria na, oria nọ ahwo nọ a fe he a rrọ. Ahwo a rẹ jariẹ gwọlọ ẹme gaga, yọ a rẹ jọ iyẹrẹ họre kẹse kẹse. Nọ mẹ be kpako ze na, erozaha nọ a rẹ jọ muabọ e tẹ jẹ were omẹ gaga. Me te wuhrẹ ohọre jọ nọ a re se judo gbe itieye na efa.

Mẹ riẹ obe gaga evaọ oke nọ mẹ jọ ọmaha. Fikiere ọsẹgboni mẹ a tẹ ta nọ mẹ rẹ daoma re me kpohọ iyunivasiti. Oke nọ mẹ jọ iyunivasiti, me rri nọ egọmeti orẹwho mai a be riẹ omai su vievie he. Me roro nọ u fo nọ a re nwene egọmeti na. Fikiere, me te mu egọmeti họ ẹwọso. Ẹdẹ jọ mẹ avọ ọmọ eklase mai jọ ma te mu iporisi jọ họ ẹhọre. Ma gwọlọ nọ ma re mi ei ugbeke riẹ. Ukuhọ riẹ kpobi iporisi na ọ tẹ nwoma gaga evaọ uzou. A te fi omẹ avọ ọmọ eklase mai na họ uwou-odi. Nọ a gu ẹdhọ mai, a te bruoziẹ nọ a rẹ sa omai kpe. Ikpe udhe ọvo mẹ jọ oke yena.

Nọ mẹ jọ uwou-odi na, me je roro epanọ me ti ru ẹdẹ nọ a te rọ sa omẹ kpe na. Mẹ gwọlọ dhesẹ nọ mẹ gudu, inọ oware ovo u bi mu omẹ ozọ họ. Ghele na, enọ buobu i je kpokpo omẹ udu. Mẹ jẹ jọ udu mẹ nọ inọ: ‘Kọ fikieme okienyẹ o rọ vọ akpọ na enẹ? Kọ ohwo o te whu no, yọ u re no?’

EPANỌ EBAIBOL NA O RO NWENE UZUAZỌ MẸ: Uwhremu na, a te ku oziẹ uwhu nọ a brukpe omai na rẹriẹ inọ ma jọ uwou-odi ikpe ọgba. Oke nana Isẹri Jihova jọ a jọ uwou-odi na re, nọ a mu ze fiki egagọ rai. Uruemu rai o were omẹ gaga keme a wo udu, ghele na a rẹ gwọlọ ẹme he. Dede nọ a rehọ e rai ziọ uwou-odi na ekueku, a je mu ofu kẹ ohwo ọvo ho.

Isẹri Jihova a wuhrẹ omẹ nọ u wo obọdẹ oware jọ nọ Ọghẹnẹ o ti ru kẹ ahwo-akpọ evaọ obaro. A jọ Ebaibol na dhesẹ kẹ omẹ nọ Ọghẹnẹ o ti ru akpọ na kpobi fihọ aparadase. Ohwo ọvo o gbe ti ru oware uyoma hayo kienyẹ ọrivẹ riẹ hẹ. A wuhrẹ omẹ nọ ahwo owoma ọvo a te jọ akpọ na. A te rria bẹdẹ bẹdẹ, yọ a ti wo ẹbẹbẹ ọvuọvo ho.​—Olezi 37:29.

Eware nọ Isẹri Jihova a je wuhrẹ omẹ e were omẹ gaga. Rekọ uruemu mẹ avọ ọrai o wọhọ aso gbe uvo. O jọ omẹ oma inọ mẹ te sae jọ wọhọ Isẹri Jihova ẹdẹvo ho nọ a re dhomahọ esuo ho. Yọ ohwo ọ tẹ tehe omẹ agba jọ, mẹ te sae rehọ agba nọ o kiọkọ kẹe vievie he. Fikiere mẹ tẹ ta nọ mẹ ọvo me re se Ebaibol na. Nọ me se Ebaibol na re no, mẹ tẹ ruẹ nọ Isẹri Jihova ọvo họ ahwo nọ a wo uruemu Ileleikristi ọsosuọ.

Nọ me bi wuhrẹ Ebaibol na, mẹ tẹ ruẹ nọ me re nwene iruemu jọ nọ me wo. U fo nọ mẹ rẹ siọ eka ba ẹla, keme ẹsikpobi mẹ rẹ la ahwo eka je duwu iyei. O tẹ jẹ gwọlọ nọ mẹ rẹ siọ isigareti ba evovo. Oware ọfa jọ nọ u fo nọ me re nwene họ, mẹ rẹ jọ abọ ọvuọvo ho evaọ ẹme egọmeti. Re mẹ sai nwene eware nana kpobi evaọ uzuazọ mẹ, o lọhọ tere he. Rekọ Jihova o fiobọhọ kẹ omẹ. Ẹmẹrera na, me te ti nwene.

Uruemu jọ nọ o bẹ omẹ enwene gaga họ ofu nọ mẹ jẹ hai mu. Rite enẹna mẹ gbẹ be lẹ inọ Ọghẹnẹ o fiobọhọ kẹ omẹ hae gba ofu mẹ. Eria sa-sa evaọ Ebaibol i fiobọhọ kẹ omẹ gaga. Ojọ họ Itẹ 16:32, nọ o ta nọ: “Ohwo nọ ọ rẹ kaki mu ofu hu o woma vi ọgba, yọ ọnọ ọ be kpọ ofu riẹ o woma vi ọnọ o bi fi okpẹwho kparobọ.”

Ukpe 1991, mẹ tẹ họ-ame evaọ ukoko Isẹri Jihova. Edrọmo jọ nọ ame ọ jọ evaọ uwou-odi na a jọ họ omẹ ame. Ukpe nọ u lele i rie, a te siobọno omai ahwo jọ nọ a jọ uwou-odi na, a te vi omai kpobọ Spain, keme ma wo imoni evaọ obei. Nọ mẹ nwani te obọ Spain, o raha oke he, me te kpohọ iwuhrẹ Isẹri Jihova. Isẹri Jihova nọ e rrọ obei a dede omẹ rehọ wọhọ ẹsenọ a riẹ omẹ kri no. Ae a fiobọhọ kẹ omẹ wariẹ mu akpọ họ.

IRERE NỌ ME WO NO: Obọnana eva e be were omẹ gaga inọ mẹ avọ aye mẹ gbe emetẹ mai, ma be gọ Ọghẹnẹ. Mẹ tẹ jẹ be hae nyai wuhrẹ ahwo Ebaibol na kẹse kẹse. Ẹsejọ nọ mẹ tẹ kareghẹhọ oke nọ a ro bruoziẹ uwhu kpe omẹ nọ a jẹ te rọ sa omẹ kpe no, eva e rẹ were omẹ inọ a nwene oziẹ na keme anwọ oke yena ze na, me wuhrẹ eware buobu no. Ọghẹnẹ o ru inọ me gbe whu hu. Oye ọvo ho, enẹna me wo uvi ẹruore. Me bi rẹro oke nọ akpọ na kpobi ọ te rọ jọ aparadase nọ Ọghẹnẹ ọ ya eyaa riẹ na. Evaọ oke yena, okienyẹ ọvuọvo ọ gbẹ te jọ akpọ na ha, yọ “uwhu o gbẹ te jọ ofa ha.”​—Eviavia 21:3, 4.

[Ẹme nọ a fi ẹgba họ]

“Eva e were omẹ gaga nọ me wuhrẹ nọ Ọghẹnẹ o wo odẹ”

[Uwoho]

Mẹ avọ ọzae mẹ ma re dhesẹ ividio ẹvẹrẹ obọ rọ t’ẹme kẹ ahwo nọ a diezọ