Ẹme Ọgbọ Idẹn na O Te Owhẹ

U WO ẹme jọ nọ o gbunu gaga nọ egba-eriariẹ a rẹ ta kpahe iku ọgbọ Idẹn na. A rẹ ta nọ a jọ eria efa Ebaibol na ta kpahe iku na ha. Wọhọ oriruo, Prọfẹsọ jọ nọ a re se Paul Morris nọ o wuhrẹ kpahe egagọ sa-sa o kere nọ: “A jọ eria efa Ebaibol na ta kpahe iku ọgbọ Idẹn na ha.” Ahwo buobu nọ a se omarai egba-eriariẹ a rọwo fihọ ẹme nọ ọ ta na inọ uzẹme. Rekọ who te rri Ebaibol na, whọ rẹ ruẹ nọ ere o rrọ vievie he.

Uzẹme riẹ họ eria sa-sa evaọ Ebaibol na e ta kpahe ọgbọ Idẹn, Adamu, Ivi, gbe araomuomu na. * Dede nọ orithọ oye u ru nọ egba-eriariẹ jọ a be rọ vro eme obe Emuhọ na inọ iku na e rrọ oria ofa evaọ Ebaibol ho, u wo ahwo jọ nọ a bi kekaro fihọ vro iku na, jẹ be rọ ere vro Ebaibol na soso. Isu egagọ gbe ahwo nọ a rẹ vro eme Ebaibol a be ta nọ iku ọgbọ Idẹn nọ e rrọ obe Emuhọ na uzẹme he. Oyena u dhesẹ nọ oma Ebaibol na soso a be vro na. Ẹvẹ ma rọ ta ere?

Ma tẹ riẹ otọ ẹme nọ Ebaibol ọ ta kpahe ọgbọ Idẹn na, ẹsiẹe ma rẹ riẹ otọ eware efa nọ Ebaibol na ọ ta. Wọhọ oriruo, ma rẹ jọ Ebaibol na ruẹ iyo enọ jọ nọ i wuzou gaga nọ ahwo a be hae nọ. Ẹsibuobu nọ ahwo a tẹ nọ enọ itienana, oware nọ o via evaọ ọgbọ Idẹn na u re fiobọhọ kẹ ae riẹ iyo enọ na. Joma ta kpahe ejọ rai.

● Fikieme ma be rọ who je whu? O hae jọ nọ Adamu avọ Ivi a yoẹme kẹ Jihova a hae te jọ uzuazọ bẹdẹ bẹdẹ. Rekọ fikinọ a thọ uzi Ọghẹnẹ, a te whu. Ẹdẹ nọ a rọ thọ uzi na uzuazọ rai u ro muhọ ẹraha ri bọo ẹdẹ nọ a ro whu. (Emuhọ 2:16, 17; 3:19) Nọ a raha uzi no, a gbẹ jọ ahwo ọgbagba nọ a jọ vẹre he. Fikiere emọ kpobi nọ a yẹ a tẹ reuku uzioraha nọ o rrọ ae oma na. Oyejabọ nọ Ebaibol ọ rọ ta nọ: “Wọhọ epanọ uzioraha o rọ ẹkwoma omọvo ruọ akpọ na, uwhu u je no uzioraha ze na, ere uwhu u ro te ahwo kpobi oma keme aikpobi a raha uzi no.”—Ahwo Rom 5:12.

● Fikieme Ọghẹnẹ ọ rọ kuvẹ re ma ruẹ uye? Setan ọ jọ ọgbọ Idẹn se Ọghẹnẹ ọtọrue, inọ Ọghẹnẹ o bi si eware jọ no họ emama riẹ. (Emuhọ 3:3-5) O wọhọ ẹsenọ ọ be ta nọ oghẹrẹ nọ Jihova o bi ro su u woma ha. Adamu avọ Ivi a kuomagbe Ẹdhọ wọso Ọghẹnẹ. Oyena u dhesẹ nọ a gwọlọ nọ Jihova o su ai hi. O wọhọ ẹsenọ ae omarai a be ta nọ ae ọvo a sae riẹ oware nọ u woma gbe onọ u yoma. Jihova Ọghẹnẹ nọ o re bru uvioziẹ o te je wo areghẹ gaga na ọ riẹ nọ edhere ọvuọvo a sai ro ku ẹme nọ ọ rrọ otọ na họ. Ọ riẹ nọ u fo re ọ kẹ ahwo-akpọ oke lelehie re ae ọvo a su omarai, re ohwo kpobi ọ ruẹ otọ ẹme na. Uye ọvo u no isuẹsu ahwo-akpọ ze no. Oware jọ nọ o wha riẹ ze họ, Ẹdhọ họ ọnọ ọ be kpọ isuẹsu na, yọ o gbe bi ru ere rite enẹna. Ebẹbẹ nọ esuo ohwo-akpọ ọ wha ze no u dhesẹ nọ ohwo-akpọ ọ sai su omariẹ hẹ. Ajokpanọ Ọghẹnẹ o su ohwo-akpọ oma o rẹ rọ fọe.—Jerimaya 10:23.

● Ẹvẹ Ọghẹnẹ ọ gwọlọ nọ otọakpọ na ọ jọ? Jihova ọ ma ọgbọ Idẹn na wowoma gaga, yọ ọ gwọlọ nọ ẹmẹrera na, akpọ na kpobi ọ rẹ jọ wowoma wọhọ epanọ ọgbọ na ọ jọ. Ọ ta kẹ Adamu avọ Ivi nọ a yẹ re a vọ akpọ na, “je woi.” Jihova ọ gwọlọ nọ, nọ oke o be nyaharo na, te ai te emọ rai a re ru akpọ na kpobi fihọ wowoma gaga wọhọ epanọ ọgbọ na ọ jọ. (Emuhọ 1:28) Fikiere, Ọghẹnẹ ọ gwọlọ nọ akpọ na kpobi ọ rẹ jọ aparadase nọ ahwo nọ a rrọ gbagba a rẹ rria. A rẹ riẹ yeri wọhọ uviuwou ovo nọ u no oma Adamu avọ Ivi ze. Eria buobu evaọ Ebaibol na e ta kpahe oghẹrẹ nọ Ọghẹnẹ o ti ro ru akpọ na fihọ ere.

● Fikieme Jesu Kristi ọ rọ ziọ otọakpọ? Nọ Adamu avọ Ivi a raha uzi no evaọ ọgbọ Idẹn, Ọghẹnẹ o te bruoziẹ uwhu kpe ai avọ emọ rai kpobi nọ a ti yẹ. Rekọ fikinọ Ọghẹnẹ o you omai, o te ru nọ ma ro wo ẹruore inọ eware i ti nwene evaọ obaro. O vi Ọmọ riẹ ziọ otọakpọ na re o whu kẹ omai. Onana Ebaibol o se ẹtanigbo na. (Matiu 20:28) Ẹvẹ uwhu Jesu o rọ lẹliẹ omai wo ẹruore? Jesu họ “Adamu urere na.” O ru oware nọ Adamu ọsosuọ na ọ sai ru hu. Oke nọ Jesu ọ jọ otọakpọ, o yoẹme kẹ Jihova, ọ wọso Jihova ẹdẹvo ho. Ukuhọ riẹ, ọ tẹ rọ uzuazọ riẹ dhe idhe rọ ta omai no igbo re Ọghẹnẹ ọ sae rọ izieraha ahwo nọ a yoẹme kẹe rọvrẹ rai. Uwhu Jesu na u ti je ru nọ ahwo nọ a yoẹme kẹ Ọghẹnẹ a ti ro yeri uzuazọ nọ Adamu avọ Ivi a je yeri evaọ ọgbọ Idẹn taure a tẹ te raha uzi. (1 Ahwo Kọrint 15:22, 45; Jọn 3:16) Fiki uwhu Jesu na, ma wo ẹruore nọ Jihova o ti zihe akpọ na ruọ aparadase wọhọ epanọ ọgbọ Idẹn ọ jọ na. *

Oghẹrẹ nọ Ọghẹnẹ ọ gwọlọ nọ akpọ na ọ jọ o rrọ vevẹ. Onana o rrọ oware udidi jọ nọ a rẹ sae riẹ otọ riẹ hẹ hẹ. Akpọ na ọ te ginẹ jọ oghẹrẹ nọ ọ gwọlọ e riẹ na, oware ovo o te whaha iẹe he. Epanọ ọgbọ Idẹn ọ ginẹ jọ otọakpọ na gbe ahwo avọ erao nọ e ginẹ jariẹ eva na, ere Ọghẹnẹ ọ ya eyaa nọ akpọ na ọ te jọ evaọ obaro. Yọ eyaa nana i ti rugba kẹle. Kọ whọ te jariẹ oke yena? Obọ ra ẹme na ọ mae rrọ. Jihova ọ gwọlọ nọ ohwo kpobi ọ rria aparadase nọ ọ be tha na, makọ enọ eware buobu e thọ obọ no evaọ uzuazọ.—1 Timoti 2:3, 4.

Oke nọ a kare Jesu fihọ ure-oja, o lele ọzae jọ nọ o ru eware iyoma gaga ta ẹme. Ọzae na yọ ogbulegbu nọ a kare kẹle Jesu. Ọ riẹ nọ o fo uwhu. Ọ tẹ ta kẹ Jesu nọ ọ kareghẹhọ iẹe re ọ sae wariẹ wo uzuazọ evaọ obaro. Kọ eme Jesu ọ ta kẹe? Ọ vuẹ riẹ nọ: “Who ti lele omẹ jọ Aparadase.” (Luk 23:43) Onana u dhesẹ nọ Jesu ọ gwọlọ nọ ọ rẹ kpare ọzae nana nọ ọ jọ ogbulegbu vẹre na ze re ọ rria aparadase nọ ọ wọhọ ọgbọ Idẹn bẹdẹ bẹdẹ. Otẹrọnọ Jesu ọ ya eyaa nana kẹ ogbulegbu, kọ ọ gbẹ gwọlọ nọ whẹ omara whọ jọ aparadase na re? Oware nọ ọ gwọlọ kpobi oye. Ọsẹ riẹ ọ gwọlọ nọ whọ jọ aparadase na re. Whọ tẹ gwọlọ jariẹ, daoma kpobi re who wuhrẹ kpahe Ọghẹnẹ nọ ọ kọ ọgbọ Idẹn na.

[Eme-Obotọ]

[Ẹkpẹti hayo Uwoho]

ERUẸARUẸ JỌ NỌ Ọ NYA EBAIBOL NA SOSO DUWU

“Me ti fi egrẹ họ udevie ra [araomuomu na] avọ aye na gbe udevie ọmọ ra avọ ọmọ riẹ. Ọ te whọlọ uzou ra, yọ whọ te rowo iẹe ethihrowọ.”​—Emuhọ 3:15.

Onana họ eruẹaruẹ ọsosuọ nọ a kere fihọ Ebaibol na. Ọghẹnẹ ọ ta ẹme nana evaọ ọgbọ Idẹn. Ọ jọ eruẹaruẹ na fodẹ imane jọ. Eye họ, aye na, ọmọ aye na, araomuomu na, gbe ọmọ araomuomu na. Amono ọye? Kọ egrẹ vẹ ọ jọ udevie rai?

ARAOMUOMU NA

Setan Ẹdhọ na.​—Eviavia 12:9.

AYE NA

Emama Jihova nọ e rrọ obọ odhiwu. (Ahwo Galesha 4:26, 27) Aizaya ọ ruẹaro nọ “aye” na o ti yẹ emọ buobu evaọ obaro nọ i ti zihe ruọ orẹwho.​—Aizaya 54:1; 66:8.

ỌMỌ ARAOMUOMU NA

Enọ i bi ru oware nọ Setan ọ gwọlọ.​—Jọn 8:44.

ỌMỌ AYE NA

Jesu Kristi họ ohwo ọsosuọ nọ ọ rrọ ubi aye na. Uviuwou Jihova nọ ọ rrọ obọ odhiwu o no ze. Inievo Jesu nọ i ti lele iei su evaọ obọ odhiwu a rrọ usu “ọmọ” aye na re. Ileleikristi yena nọ a salọ nọ a ti kpobọ odhiwu na yọ orẹwho nọ a jọ Ebaibol na se “Izrẹl Ọghẹnẹ.”​—Ahwo Galesha 3:16, 29; 6:16; Emuhọ 22:18.

A ROWO RIẸ ETHIHROWỌ

Ẹvẹ o rọ via? Nọ Jesu ọ ziọ otọakpọ, Setan o ru nọ a ro kpei. Rekọ Ọghẹnẹ ọ tẹ kpare iẹe ze, onọ u dhesẹ nọ oma nọ a nwa Mesaya na u kpo.

A WHỌLỌ E RIẸ UZOU

Ẹvẹ o te rọ via? Jesu o ti kpe Setan no. Ọ gbẹ te jọ ofa ha. Taure Jesu o te ti kpei no, o ti si ebẹbẹ kpobi nọ Setan ọ wha ze notọ.​—1 Jọn 3:8; Eviavia 20:10.

Re whọ ruẹ ẹme jọ nọ ọ dhẹ Ebaibol na soso duwu, se ibroshọ na Ebaibol Na​—Ovuẹ Vẹ O Riẹ Eva? onọ Isẹri Jihova a kere.

[Uwoho]

Adamu avọ Ivi a reoja gaga fikinọ a raha uzi Ọghẹnẹ