Uzou Avọ 39

Ọghẹnẹ Ọ Kareghẹhọ Ọmọ Riẹ

JESU ọ viẹ okenọ Lazarọs ogbẹnyusu riẹ o whu. Kọ who roro nnọ o da Jihova okenọ Jesu ọ ruẹ uye je whu?— Ebaibol na e ta nọ a rẹ sai ‘ru oware da’ Ọghẹnẹ, yọ eware nọ e via e rẹ sae ‘dae.’—Olezi 78:40, 41; Jọn 11:35.

Kọ whọ sai roro epanọ o da Jihova te okenọ Ọmọ ọghaghae riẹ o whu?— U mu Jesu ẹro inọ ọ te thọrọ Ọghẹnẹ ẹro ho. Oye jabọ nọ ọ rọ ta eme urere nana taure o te ti whu: “Ọsẹ, mẹ rehọ [uzuazọ] mẹ họ obọ ra!”—Luk 23:46.

U mu Jesu ẹro inọ a te kpare iẹe, inọ a ti vu ei wa ‘uki’ hi. Okenọ a kpare Jesu no uki ze no, Pita ukọ na ọ wariẹ eme nọ a kere fihọ Ebaibol na kpahe Jesu, inọ: ‘A vu rie wa uki hi, yọ iwo riẹ e ruẹ egbogbo ho.’ (Iruẹru 2:31; Olezi 16:10) Ijo, ugboma Jesu o rria uki kri te epanọ o ro gbo ho.

 Okenọ Jesu ọ jọ otọakpọ, ọ tubẹ ta kẹ ilele riẹ nnọ o bi ti whu kri hi. Ọ ta kẹ ae nnọ ‘a ti kpei, evaọ ẹdẹ avesa a vẹ kpare iẹe ze.’ (Luk 9:22) Fikiere, o hai gbe ilele na unu hu inọ Jesu ọ kpare oma ze. Kọ u gbe rai unu ghele?— Joma ruẹ.

O jọ oware wọhọ ighọjọ esa uvo Edisoi-Oka nọ Owuhrẹ Ologbo na o ro whu evaọ ehru ure oja na. Josẹf, ọdafe nọ ọ jọ omọvo Sanhẹdrin na, ọ jọ idhere fi ẹrọwọ họ Jesu. Nọ o yo nọ Jesu o whu no, ọ tẹ nya bru Pailet, ọba Rom na. Ọ yare nnọ a kẹe uvẹ re o si ugboma Jesu no ure na ze re o ki ei. Koyehọ Josẹf ọ wọ ugboma Jesu kpohọ ogege nọ uki o rrọ, oria nọ a re ki ahwo fihọ.

Nọ a wọ Jesu fihọ uki na no, a te ghelie utho ulogbo fihọ unu uki na. Koyehọ a si uki na gbe no. Whaọ ẹdẹ avọ esa o te no, onọ o jọ Ẹdoka. Ọre ọ re va ze he, fikiere oria kpobi o gbẹ rrọ biebi. Ahwo a rrọ etẹe bi rowu uki na. Ilori izerẹ na a vi rai re a rowu uki na. Kọ whọ riẹ oware nọ o so riẹ ze?—

Izerẹ na oma rai a yo nnọ Jesu ọ ta nọ ọ rẹ te kpare oma. Fikinọ a gwọlọ ru re ilele riẹ e siọ ugboma riẹ ba etho re a ta nnọ Jesu ọ kpare oma ze no, izerẹ na a te fi ahwo họ re a rowu uki na. Idudhe na otọ u te mu họ enuhu. Evaọ ebi na elo o te lo ze. Ẹnjẹle Jihova ọ rehọ oma via na! Ozọ u mu isoja na te epanọ a ro mudhe oria ovo. Ẹnjẹle na o te kpobọ uki na o te ghelie utho na no. Uki na o rrọ ufofe!

Ẹhẹ, nwane wọhọ epanọ Pita ukọ na ọ jọ obaro ta na, inọ: ‘Jesu ọnana nọ Ọghẹnẹ ọ kpare na.’ (Iruẹru 2:32) Ọghẹnẹ ọ rehọ Jesu ziọ uzuazọ evaọ ugboma nọ Jesu o wo vẹre taure ọ tẹ te ziọ otọakpọ. A kpare riẹ avọ ugboma ẹzi wọhọ orọ enjẹle na.  (1 Pita 3:18) Fikiere re ahwo a tẹ te ruẹ Jesu, o re nwene kpohọ oma iwo tao. Kọ o ru ere?— Joma ruẹ.

Ọre o muhọ ẹvaze no. Isoja na i kpo no. Meri Magdalini avọ eyae efa nọ e rrọ ilele Jesu a rrọ edhere bi kpohọ obọ uki na. A be ta kẹ ohwohwo nnọ: ‘Ono o ti ghelie utho ogbẹgbẹdẹ na no kẹ omai?’ (Mak 16:3) Rekọ nọ a te uki na, yọ a ghelie utho na no. Rri, uki na o rrọ ufofe! Ugboma iwo Jesu nọ o ro whu na o riẹ hẹ! Meri Magdalini ọ tẹ nwane dhẹ nyae gwọlọ ikọ Jesu jọ.

Eyae edekọ e daji akotọ uki na. U bi gbe ai unu nọ: ‘Diẹse ugboma Jesu o rrọ?’ Idudhe na ezae ivẹ nọ i ku iwu enwranwra họ a tẹ rehọ oma via. Enana yọ enjẹle! A tẹ ta kẹ eyae na nnọ: ‘Fikieme wha jẹ be gwọlọ Jesu evaọ etenẹ? A kpare riẹ no. Wha nya vẹrẹ vẹrẹ re wha vuẹ ilele riẹ.’ Whọ sae jọ udu ra roro epanọ eyae na e te dhẹ si awọ te! Ọzae jọ o te zere ai evaọ edhere. Kọ whọ riẹ ohwo na?—

Ohwo na họ Jesu, ọnọ o nwene kpohọ oma iwo! Ọ tẹ jẹ ta kẹ eyae na nọ: ‘Nya wha ta kẹ ilele mẹ.’ Oma u mu eyae na gaga. A ruẹ ilele na a tẹ ta kẹ ae nọ: ‘Jesu ọ rrọ uzuazọ! Ma rue riẹ!’ Meri ọ ta kẹ Pita gbe Jọn kpahe uki ufofe na no. A tẹ nya ze obọ uki na, wọhọ epanọ o rrọ uwoho na. A rri emehọ nọ a rọ variẹ Jesu, rekọ oware nọ o be via u ri vẹ ai ẹro ho. O hae were ae re a rọwo nnọ Jesu o zihe ziọ uzuazọ no, rekọ usi na u gbe unu vrẹta.

Evaọ Ẹdoka yena, Jesu ọ rehọ oma via kẹ ilele ivẹ riẹ nọ e jọ edhere je kpohọ iwhre ọ Emeọs. Jesu o bi lele ai nya je lele ai ta ẹme, rekọ a vuhu i rie he keme o wo ugboma iwo ovo nọ o wo vẹre na ha. Okenọ Jesu o lele ai jẹ re emu nọ ọ rọ lẹ a ro vuhu iei. Oma u mu ilele na te epanọ a rọ dhẹ ikilomita buobu  zihe kpohọ Jerusalẹm! O wọhọ nọ okenọ onana o nwane vrẹ no Jesu ọ rọ rehọ oma via kẹ Pita re o dhesẹ kẹe nnọ Ọ rrọ uzuazọ.

Eva owọwọ Ẹdoka ọvona, ilele na buobu i koko họ ubrukpẹ jọ. A kare ethẹ na. Idudhe na Jesu ọ tẹ ruọ udevie rai evaọ ubrukpẹ na! U mu rai ẹro no inọ Owuhrẹ Ologbo na ọ wariẹ zihe ziọ uzuazọ no. Dai roro epanọ eva e were rai te!—Matiu 28:1-15; Luk 24:1-49; Jọn 19:38–20:21.

Evaọ edẹ 40 Jesu ọ rehọ oma iwo sa-sa via ro dhesẹ kẹ ilele riẹ nnọ ọ rrọ uzuazọ. Kẹsena o te no otọakpọ na zihe bru Ọsẹ  riẹ evaọ obọ odhiwu. (Iruẹru 1:9-11) U kri hi ilele na i te mu ahwo kpobi họ ẹta kẹ nnọ Ọghẹnẹ ọ kpare Jesu no uwhu ze no. Makọ okenọ izerẹ na a fa ae je kpe ejọ rai, a ruẹ abọ họ usiuwoma ota. A riẹ nnọ a te whu, Ọghẹnẹ ọ te kareghẹhọ ae wọhọ epanọ ọ kareghẹhọ Ọmọ riẹ na.

Ẹvẹ ilele Jesu ọsosuọ eyena i wo ohẹriẹ no ahwo buobu nẹnẹ te! Nọ ezi nọ Jesu ọ rọ kparoma evaọ ukpe na u te te, iruemu ehaa Isita na ọvo ahwo nana a re roro kpahe. Rekọ Ebaibol na e ta uvumọ ẹme kpahe ehaa Isita ha. Re a gọ Ọghẹnẹ Ebaibol na e ta kpahe.

Ma rẹ sae jọ wọhọ ilele Jesu ẹkwoma ahwo nọ ma rẹ ta kẹ nnọ Ọghẹnẹ o ru oware ugbunu evaọ okenọ ọ kpare Ọmọ riẹ ze. Ahwo a tẹ make ta nnọ a re kpe omai, ozọ u re du mu omai hi. Ma tẹ maki whu, Jihova ọ te kareghẹhọ omai jẹ kpare omai ze, wọhọ epanọ ọ kpare Jesu na.

Kọ eva e gbẹ be were omai inọ Ọghẹnẹ ọ be kareghẹhọ enọ e gọ riẹ jẹ te tubẹ kpare ae no uwhu ze?— Ẹriẹ eware nana u re ru omai gwọlọ riẹ epanọ ma re ro ru Ọghẹnẹ eva were. Kọ whọ riẹ nọ ma sai ghine ru ei eva were?— Joma ta ẹme kpahe onana.

Orọwọ fihọ ẹkparomatha Jesu u re ru ẹruore gbe ẹrọwọ mai ga. Iviena se Iruẹru 2:22-36; gbe 4:18-20; gbe 1 Ahwo Kọrint 15:3-8, 20-23.

[Uwoho nọ o rrọ ẹwẹ-obe avọ 202]

Fikieme uki na o rọ rrọ ufofe? Eme ọ via?

[Uwoho nọ o rrọ ẹwẹ-obe avọ 205]

Ẹsejọhọ eme Pita gbe Jọn a bi roro na?

[Uwoho nọ o rrọ ẹwẹ-obe avọ 206]

Nọ ezi nọ Jesu ọ rọ kparoma evaọ ukpe na o te te, eme ahwo buobu a re roro kpahe? Rekọ eme who re roro kpahe?