Uzou Avọ 48

Akpọ Ọkpokpọ Udhedhẹ Ọghẹnẹ—Whọ Sae Jariẹ

ỌGHẸNẸ o fi Adamu avọ Ivi họ ọgbọ Idẹn. Dede nọ a ghẹmeeyo je whu, Ọghẹnẹ o ru rie lọhọ kẹ emọ rai, kugbe omai nẹnẹ, re ma rria bẹdẹ bẹdẹ evaọ Aparadase. Ebaibol na e yaa eyaa nọ: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:29.

Ebaibol na e ta kpahe “idhiwu ekpokpọ” gbe “akpọ ọkpokpọ.” (Aizaya 65:17; 2 Pita 3:13) Egọmeti ahwo-akpọ inẹnẹ na họ “idhiwu” oke nana, rekọ Jesu Kristi gbe enọ i ti lele iei su evaọ obọ odhiwu họ “idhiwu ekpokpọ” na. Ẹvẹ u ti gbunu te okenọ idhiwu ekpokpọ nana, onọ o rrọ egọmeti okiẹrẹe udhedhẹ Ọghẹnẹ, o ti su otọakpọ na soso!

Kọ eme họ “akpọ ọkpokpọ” na?— Akpọ ọkpokpọ nọ ọ be tha na họ ahwo woma nọ a you Jihova. Uzẹme riẹ họ, okenọ Ebaibol na e tẹ ta kpahe “akpọ” na, ẹsejọ u re dhesẹ ahwo nọ a be rria otọakpọ na, orọnikọ otọ na ha. (Emuhọ 11:1; Olezi 66:4; 96:1) Fikiere ahwo nọ a ru akpọ ọkpokpọ via na a te rria obọ otọakpọ obonẹ.

Akpọ ahwo omuomu ọrọ oke nana ọ te vrẹ no. Kareghẹhọ, Ẹvo ọ edẹ Noa na ọ raha akpọ ahwo omuomu. Yọ, wọhọ epanọ ma wuhrẹ no na, a te raha akpọ omuomu nana no eva Amagẹdọn. Enẹna joma ruẹ epanọ o te jọ re a rria akpọ ọkpokpọ Ọghẹnẹ evaọ okenọ Amagẹdọn o te fi vrẹ no.

 Kọ whọ gwọlọ rria bẹdẹ bẹdẹ evaọ Aparadase evaọ akpọ ọkpokpọ udhedhẹ Ọghẹnẹ?— Uvumọ edọkita ọ sai ru omai rria bẹdẹ bẹdẹ hẹ. Uvumọ umu o riẹ hẹ nọ o rẹ whaha omai ewhu. Edhere ọvuọvo nọ ma sae rọ rria bẹdẹ bẹdẹ họ ẹkwoma esikẹle Ọghẹnẹ. Yọ Owuhrẹ Ologbo na ọ ta kẹ omai epanọ ma sai ro ru ere.

Joma tọlọ Ebaibol mai re ma rovie kpohọ Jọn uzou avọ 17, owọ avọ 3. Ma jọ etenẹ ruẹ eme ọ Owuhrẹ Ologbo na: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.”

Eme Jesu ọ ta nọ u fo nọ ma re ru re ma rria bẹdẹ bẹdẹ?— Orọ ọsosuọ, ma re wo eriariẹ kpahe Ọsẹ obọ odhiwu mai, Jihova, gbe Ọmọ riẹ, ọnọ o si obọ no uzuazọ riẹ fiki mai. Onana u dhesẹ nọ u fo re ma wuhrẹ Ebaibol na. Obe nana, Wuhrẹ Mi Owuhrẹ Ologbo Na, u bi fi obọ họ kẹ omai ru ere.

Rekọ ẹvẹ ewuhrẹ kpahe Jihova u re ro fi obọ họ kẹ omai rria bẹdẹ bẹdẹ?— Whaọ, wọhọ epanọ ma gwọlọ emuore kẹdẹ kẹdẹ na, ere u fo re ma wuhrẹ kpahe Jihova kẹdẹ kẹdẹ re. Ebaibol na e ta nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.”—Matiu 4:4.

U fo nọ ma re wo eriariẹ kpahe Jesu Kristi re, keme Ọghẹnẹ o vi Ọmọ riẹ ze ti si izieraha mai no. Ebaibol na e ta nọ: “Usiwo o rọ obọ omọfa ha.” Ebaibol na e tẹ jẹ ta re nọ: “Ọnọ ọ rọwo Ọmọ na o wo uzuazọ ebẹdẹ bẹdẹ.” (Iruẹru 4:12; Jọn 3:36) Kọ, eme u dhesẹ re a “rọwo” Jesu?— U dhesẹ nọ ma re ghine fi ẹrọwọ họ Jesu jẹ riẹ nọ ma rẹ sae rria bẹdẹ bẹdẹ hẹ ababọ riẹ. Kọ whọ rọwo ere?— Ma tẹ rọwo ere, ma ti gbe wuhrẹ mi Owuhrẹ Ologbo na kẹdẹ kẹdẹ, je ru oware nọ ọ ta.

Edhere jọ nọ ma re ro wuhrẹ mi Owuhrẹ Ologbo na họ  ẹkwoma ese obe nana ẹsikpobi, rri iwoho na kpobi, je roro kpahe iwoho na. Dao oma sọ whọ sae kẹ iyo enọ nọ e kẹle iwoho na. Ofariẹ, who re lele ọsẹ hayo oni ra se obe na. Otẹrọnọ ọsẹgboni ra a rrọ gbowhẹ hẹ, sei kugbe ekpako efa, hayo kugbe emaha efa. Kọ u gbe ti woma re whọ sai fi obọ họ kẹ amọfa wuhrẹ mi Owuhrẹ Ologbo na oware nọ u fo nọ a re ru re a rria bẹdẹ bẹdẹ evaọ akpọ ọkpokpọ Ọghẹnẹ?—

Ebaibol na e ta kẹ omai nọ: ‘Akpọ na ọ rẹ te vrẹ.’ Kẹsena Ebaibol na i te dhesẹ epanọ ma sae rọ rria bẹdẹ bẹdẹ evaọ akpọ ọkpokpọ Ọghẹnẹ. E ta nọ: “Ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:17) Fikiere, ẹvẹ ma sae rọ rria bẹdẹ bẹdẹ evaọ akpọ ọkpokpọ Ọghẹnẹ?— Ẹhẹ, ẹkwoma ẹrehọ eriariẹ Jihova gbe ọrọ Ọmọ ọghaghae riẹ, Jesu. Rekọ u te je fo nọ ma re ru oware nọ ma bi wuhrẹ na. Ajọ ewuhrẹ ra ọrọ obe nana u fi obọ họ kẹ owhẹ ru eware nana.

 [Ẹkpẹti/Uwoho nọ e rrọ ẹwẹ-obe avọ 251]

Who te se Aizaya 11:6-9 gbe Aizaya 65:25, who re se kpahe erao nọ e be rria evaọ udhedhẹ. Rri iwoho nana. Rri omogodẹ na, ọmọ ẹwe na, ẹkpẹ na, ọmọ eruẹ na, okpohrokpo ologbo na, gbe emaha nọ e rrọ kugbe ae na. Kọ whọ sae fodẹ erao edekọ nọ e rrọ etenẹ nọ Ebaibol e ta kpahe na?— Rri ọmọzae yena nọ o bi lele araomuomu zaro na! Ozọ u ti du mu uvumọ ohwo nọ ọ te rria akpọ ọkpokpọ na ha. (Hosia 2:18) Eme who roro kpahe oyena?—

 [Ẹkpẹti/Uwoho nọ o rrọ ẹwẹ-obe avọ 252, 253]

Who rri udhedhẹ nọ o rrọ udevie oghoghẹrẹ ahwo kpobi. Aikpobi a you ohwohwo, wọhọ epanọ Jesu ọ ta nọ ilele riẹ a re ru na. (Jọn 13:34, 35) A be rẹriẹ ekwakwa ẹmo kpohọ ekwakwa nọ a te rọ rẹro te otọakpọ na. Ebaibol na e ta kpahe udhedhẹ gbe omofọwẹ igbunu nọ ahwo a te reawere riẹ evaọ akpọ ọkpokpọ Ọghẹnẹ. Ma rẹ sai se kpahe onana evaọ ikere wọhọ Olezi 72:7; Aizaya 2:4; 32:16-18; gbe Izikiẹl 34:25.

  Rri ahwo nọ a rrọ ẹwẹ-obe nana. A be rẹro te otọakpọ na, be ruẹrẹ iẹe fihọ wowoma. Rri emamọ uwou nọ a be bọ na gbe ibi-ire gbe ẹbe nọ e rrọ etenẹ na. Ahwo a be nabe ruẹrẹ otọakpọ na, fikiere u zihe ruọ aparadase no wọhọ ọgbọ Idẹn. Ma rẹ sai se kpahe eware igbunu enana eva Olezi 67:6; 72:16; Aizaya 25:6; gbe 65:21-24; gbe Izikiẹl 36:35.

 [Ẹkpẹti/Uwoho nọ e rrọ ẹwẹ-obe avọ 254]

Wọhọ epanọ whọ be jọ etenẹ ruẹ na, ohwo kpobi ọ rrọ sasasa avọ evawere. Ahwo a rẹ sai duola kpehru wọhọ uyo. Uvumọ ohwo ọ ko, tuaro, hayo be mọ họ. Je rri ahwo yena nọ a kpare no uwhu ze no na! Ebaibol na e ta kpahe eware enana eva Aizaya 25:8; 33:24; 35:5, 6; Iruẹru 24:15; gbe Eviavia 21:3, 4.