Uzou Avọ 46

Ame Ọ Raha Akpọ Jọ—Kọ O Te Wariẹ Via?

KỌ WHO yo nọ ohwo jọ ọ ta ẹme kpahe ekuhọ akpọ na no ẹdẹjọ?— Nẹnẹ ahwo buobu a be ta kpahe iẹe. Ahwo jọ a roro nọ akpọ o ti kuhọ evaọ ẹmo nọ ahwo a te rọ ebọmbo fi. Kọ who roro nọ Ọghẹnẹ ọ te kẹ ahwo-akpọ uvẹ re a raha otọakpọ owowoma mai gbe idhiwu erru mai na avọ isi riẹ nọ i bi lo na no?—

Wọhọ epanọ ma wuhrẹ vrẹ no, Ebaibol na e ta kpahe ekuhọ akpọ na. Ebaibol na e ta nọ: ‘Akpọ na ọ rẹ te vrẹ.’ (1 Jọn 2:17) Kọ who roro nọ ekuhọ akpọ na ọ te jọ ekuhọ otọakpọ na?— Ijo, Ebaibol na e ta nọ  Ọghẹnẹ ọ ma otọakpọ na “re a ria ae,” re ahwo a rria ae jẹ reawere riẹ. (Aizaya 45:18) Olezi 37:29 o ta nọ: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.” Oye jabọ nọ Ebaibol na e rọ ta re nọ otọakpọ na o te jọ bẹdẹ bẹdẹ.—Olezi 104:5; Ọtausiwoma Na 1:4.

Fikiere otẹrọnọ ekuhọ akpọ na họ ekuhọ otọakpọ na ha, kọ eme u dhesẹ?— Ma rẹ sae ruẹ uyo na ma tẹ roma totọ rri oware nọ o via evaọ edẹ Noa. Ebaibol na e ta nọ: ‘Fikiere ẹvo nọ o ku akpọ oke yena ọ tẹ raha iẹe.’—2 Pita 3:6.

Kọ ohwo jọ ọ zọ vrẹ ekuhọ akpọ na evaọ oke Ẹvo ọyena, evaọ edẹ Noa?— Ebaibol na e ta nọ “Noa, ọnọ ọ jọ [ọtausiuwoma] ẹrẹreokie na, jekugbe imahrẹ efa eye [Ọghẹnẹ] o siwi okenọ ọ rehọ [ẹvo] ze akpọ ahwo omuomu.”—2 Pita 2:5.

Fikiere, eme họ akpọ nọ o kuhọ na? Kọ otọakpọ na, manikọ ahwo yoma?— Ebaibol na e ta nọ “akpọ ahwo omuomu.” Mu ẹro họ nọ, a se Noa “ọtausiuwoma.” Eme who roro nọ ọ jẹ vuẹ ahwo kpahe?— Noa ọ jẹ vẹvẹ ahwo unu kpahe ekuhọ ‘akpọ oke yena.’

Okenọ Jesu ọ ta kpahe Ẹvo ologbo na, ọ ta oware nọ ahwo na a je ru taure urere na o tẹ te ze kẹ ilele riẹ. Enẹ ọ ta kẹ ae: ‘Wọhọ epanọ edẹ yena e jọ, ahwo a jẹ re, a jẹ da, a jẹ rọo, a jẹ rehọ kẹ rọo, rite ẹdẹ nọ Noa ọ ruọ eva okọ na, a riẹ hẹ bẹsenọ ẹvo ọ rọ ze, ọ jẹ rehọ ai kpobi vrẹ.’ Kẹsena Jesu ọ tẹ ta nọ ere ọvona ahwo a ti ru re taure akpọ nana o te ti kuhọ.—Matiu 24:37-39.

Eme nọ Jesu ọ ta na i dhesẹ kẹ omai inọ ma rẹ sai wuhrẹ eware buobu no oware nọ ahwo na a je ru taure Ẹvo na o te  ti ku ze. Okenọ who se Uzou avọ 10 ọrọ obe nana, kọ whọ kareghẹhọ oware nọ ahwo yena a ru?— Ezae jọ a je kienyẹ amọfa je ru eware ozighi. Rekọ efa jọ, wọhọ epanọ Jesu ọ ta, a tehe ezọ di okenọ Ọghẹnẹ o vi Noa re ọ ta usiuwoma kẹ ae.

Fikiere ẹdẹjọ Jihova ọ tẹ ta kẹ Noa nnọ Ọ be te rehọ Ẹvo raha ahwo yoma no. Ame na o ti ruru otọakpọ na soso, tube ruru igbehru na dede. Jihova ọ ta kẹ Noa re o ku okọ ulogbo jọ. O jọ wọhọ etehe othethei ologbo, wọhọ epanọ whọ rẹ ruẹ evaọ uwoho nọ o rrọ ẹwẹ-obe avọ 238 na.

Ọghẹnẹ ọ ta kẹ Noa re o ku okọ na rro te epanọ tei te uviuwou riẹ gbe erao buobu a sae rọ jọ eva riẹ oma kọkọ. Noa avọ uviuwou riẹ a ru iruo gaga. A ko ire ilogbo fihọ otọ, a tẹ jọ ire na bẹre ewẹ ekpala nọ a ro ku okọ na. Onana o rehọ ikpe buobu gaga keme okọ na o jọ ruaro.

Kọ whọ kareghẹhọ oware ofa nọ Noa o je ru evaọ ikpe yena kpobi nọ o je ku okọ na?— Ọ jẹ ta usiuwoma, jẹ vẹvẹ ahwo na unu kpahe Ẹvo nọ ọ be tha na. Kọ ejọ rai a gaviezọ? Uvumọ ohwo ọ gaviezọ họ ajokpa uviuwou Noa ọvo. Enọ i kiọkọ a wo uvẹ hẹ fiki eware efa nọ a je ru. Kọ whọ kareghẹhọ oware nọ Jesu ọ ta nọ a je ru?— A jẹ re jẹ da jẹ rọo. A du roro nọ a yoma tere he, fikiere a du lahiẹ oma gaviezọ kẹ Noa ha. Joma ruẹ oware nọ o via kẹ ae.

Nọ Noa avọ uviuwou riẹ a ruọ evaọ okọ na no, Jihova o te si ẹthẹ na gbe. Ahwo nọ a rrọ obọ otafe na a re rọwo ghele he inọ Ẹvo ọ te ze. Rekọ idudhe na ame o te muhọ ehwẹ no ehru ze! Orọnikọ epaọ oso gheghe nọ ọ be rrọ họ. O je hwẹ ze!  Ame na o te ti zihe ruọ ethẹ ologbo, bi ru edo ologbo. O vurie ire ilogbo kie je ghelie itho ilogbo wọhọ ibitho esese. Kọ ẹvẹ kpahe ahwo nọ a rrọ otafe okọ na?— Jesu ọ ta nọ: ‘Ẹvo na ọ ze, ọ tẹ rehọ ai kpobi vrẹ.’ Ahwo nọ a jọ otafe okọ na kpobi a whu. Fikieme?— Wọhọ epanọ Jesu ọ ta na, “a riẹ hẹ.” A gaviezọ họ.—Matiu 24:39; Emuhọ 6:5-7.

Whaọ, kareghẹhọ, Jesu ọ ta nọ oware nọ o via kẹ ahwo yena o rrọ uwuhrẹ kẹ omai nẹnẹ re. Didi oware ma rẹ sai wuhrẹ noi ze?— A raha ahwo na orọnikọ fiki epanọ a yoma ọvo ho rekọ fikinọ iruo i bu rai abọ hrọ te epanọ a ro wo uvẹ nọ a re ro wuhrẹ kpahe Ọghẹnẹ gbe oware nọ o bi ti ru hu. Ma rẹ yọrọ oma re ma siọ ere ba ẹjọ, ogbẹrọ ere?—

Kọ who roro nọ Ọghẹnẹ ọ te wariẹ rehọ ẹvo raha akpọ na?— Ijo, Ọghẹnẹ ọ yaa eyaa nọ o gbe ti ru ei hi. Ọ ta nọ: “Me fi oka usi-ame họ obọ ehru, re o jọ oka.” Jihova ọ ta nọ usi-ame na o te jọ oka inọ “ame o re ti kuẹ re ọ gbẹ raha iwo kpobi hi.”—Emuhọ 9:11-17.

Fikiere o rẹ sai mu omai ẹro inọ Ọghẹnẹ ọ gbẹ te rọ ẹvo raha akpọ na ha. Ghele na, wọhọ epanọ ma ruẹ no na, Ebaibol na e ta kpahe ekuhọ akpọ na. Okenọ Ọghẹnẹ ọ tẹ wha ọraha akpọ nana ze, amono o re ti siwi?— Kọ o te jọ ahwo  nọ a wo isiuru kpahe eware efa te epanọ a gbe ro wuhrẹ kpahe Ọghẹnẹ hẹ? Kọ ahwo nọ a wo uvẹ kẹ ewuhrẹ Ebaibol ho? Eme who roro?—

Ma gwọlọ jọ usu ahwo nọ Ọghẹnẹ o re ti siwi, ogbẹrọ ere?— Kọ u gbe ti woma otẹrọnọ uviuwou mai o rẹ jọ wọhọ orọ Noa re Ọghẹnẹ o siwi omai kpobi?— Ma tẹ gwọlọ zọ vrẹ urere akpọ na, u fo re ma riẹ epanọ Ọghẹnẹ ọ te rọ raha iẹe jẹ rehọ akpọ ọkpokpọ okiẹrẹe riẹ ze. Joma ruẹ epanọ o ti ro ru ei.

Ebaibol na e kẹ omai uyo na eva Daniẹl uzou avọ 2, owọ avọ 44. Ikere nana e be ta kpahe edẹ mai na nọ e ta nọ: “Evaọ ezi ivie eyena, Ọghẹnẹ obọ odhiwu na ọ rẹte rehọ uvie nọ a rẹ raha ha muẹ, hayo a rẹte se isuẹsu riẹ ba kẹ amọfa ha. Ọ rẹte whọlọ ivie na kpobi ọ vẹte rehọ ai ze oba, ọ vẹte jọ bẹdẹ.”

Kọ ẹme na o vẹ owhẹ ẹro?— Ebaibol na e ta nọ egọmeti Ọghẹnẹ ọ rẹ te raha egọmeti otọakpọ na kpobi no. Fikieme?— Keme a wo adhẹẹ kẹ Ọnọ Ọghẹnẹ o ru Ovie he. Kọ ono ye?— Jesu Kristi!

Jihova Ọghẹnẹ o wo udu nọ ọ rẹ rọ salọ oghẹrẹ egọmeti nọ o re su, yọ ọ salọ Ọmọ riẹ no, Jesu, re ọ jọ Ovie. Kẹle na Osu nọ Ọghẹnẹ ọ salọ na, Jesu Kristi, ọ te karo evaọ ẹraha egọmeti akpọ nana kpobi. Ebaibol na, eva Eviavia uzou avọ 19, owọ avọ 11 rite 16, o dhesẹ epanọ ọ te rọ raha egọmeti na kpobi, wọhọ epanọ uwoho nana u dhesẹ na. Evaọ Ebaibol na, a se ẹmo Ọghẹnẹ nọ ọ te rọ raha egọmeti akpọ na kpobi nnọ Amagẹdọn.

 Whaọ, Ọghẹnẹ ọ ta nọ Uvie na o te raha egọmeti ahwo. Kọ ọ ta kẹ omai nọ ma raha ae?— Ijo, evaọ Ebaibol na, a se Amagẹdọn “ẹdẹ ẹmo ologbo Ọghẹnẹ Erumeru na.” (Eviavia 16:14, 16) Ẹhẹ, Amagẹdọn yọ ẹmo Ọghẹnẹ, yọ ọ be rọ Jesu Kristi su egbaẹmo obọ odhiwu evaọ ohọre na. Kọ ẹmo Amagẹdọn ọ kẹle ino? Joma ruẹ epanọ ma sae rọ riẹ.

Joma gbe se kpahe okenọ Ọghẹnẹ ọ te rọ raha emuemu kpobi je siwi enọ e gọ riẹ, eva Itẹ 2:21, 22; Aizaya 26:20, 21; Jerimaya 25:31-33; gbe Matiu 24:21, 22.

[Uwoho nọ o rrọ ẹwẹ-obe avọ 238]

Eme họ akpọ nọ a raha evaọ edẹ Noa na?

[Uwoho nọ o rrọ ẹwẹ-obe avọ 241]

Fikieme ma gbe ro roro kpahe omawere ọvo ho?

[Uwoho nọ o rrọ ẹwẹ-obe avọ 243]

Jesu Kristi, Ovie nọ Ọghẹnẹ ọ salọ na, ọ te raha akpọ nana eva Amagẹdọn