Uzou Avọ 17

Edhere Nọ A Rẹ Rọ Were Eva

MAI kpobi ma rẹ gwọlọ were eva, ogbẹrọ ere?— Rekọ ahwo nọ a be were eva a bu hu. Kọ whọ riẹ oware nọ o soriẹ ze?— Fikinọ a te riẹ usiavẹ ọ evawere he. A roro nnọ ekwakwa buobu nọ a re wo họ edhere nọ a rẹ rọ were eva. Rekọ a te wo eware enana no, evawere rai i re kri hi.

Usiavẹ nọ u wo uzou ona. Owuhrẹ Ologbo na ọ ta nọ: ‘Ẹkẹ evawere e mae rrọ vi emio.’ (Iruẹru 20:35) Fikiere, edhere vẹ a rẹ rọ were eva?— Oye họ eware nọ ma rẹ kẹ amọfa je ru kẹ ae. Kọ whọ riẹ ere?—

Joma gbẹ dina roro kpahe ẹme nana viere. Kọ Jesu ọ be ta nnọ ohwo nọ a kẹ okẹ ọ rẹ were eva ha?— Ijo, ọ ta ere he. A tẹ kẹ owhẹ  oware o rẹ were owhẹ, ogbẹrọ ere?— O rẹ were ohwo kpobi. A tẹ kẹ omai eware iwoma, eva e rẹ were omai.

Rekọ Jesu ọ ta nọ ma tẹ kẹ amọfa okẹ ma rẹ were eva viere. Fikiere ono whọ rẹ sae ta nọ ọ mae kẹ ahwo eware no?— Jihova Ọghẹnẹ.

Ebaibol e ta nọ Ọghẹnẹ “ọ rẹ kẹ ahwo kpobi uzuazọ, gbe ẹwẹ, jegbe eware kpobi.” Ọ rẹ kẹ omai oso no obọ ehru ze gbe ọre, re ekakọ e sae rro re ma wo emu nọ ma rẹ re. (Iruẹru 14:17; 17:25) Agbẹta nọ Ebaibol i ro se Jihova ‘Ọghẹnẹ evawere na’! (1 Timoti 1:11) Ẹkẹ nọ ọ be kẹ amọfa họ oware jọ nọ o lẹliẹ Ọghẹnẹ be were eva. Yọ ma tẹ kẹ okẹ, o sae lẹliẹ eva were omai re.

Kọ eme ma rẹ sae kẹ amọfa? Eme whọ rẹ fodẹ?— Ẹsejọ re a kẹ okẹ o rẹ gwọlọ ugho. O tẹ rrọ okẹ nọ whọ jọ uwou-eki ruẹ, whọ rẹ hwa ugho fihọ iẹe. Fikiere whọ tẹ gwọlọ kẹ oghẹrẹ okẹ utioye na, who re koko ugho họ bẹsenọ u re te okẹ na dẹ.

Rekọ orọnikọ uwou-eki ọvo ekẹ kpobi i re no ze he. Wọhọ oriruo, ẹdẹ nọ uvo o be rro gaga, egho ame odhedhẹ o re ru oma ohwo dhẹ. Fikiere whọ tẹ rọ okẹ oyena kẹ ohwo nọ uruame u bi kpe, whọ rẹ sai wo evawere nọ i re no ẹkẹ ze.

Ẹdẹjọ te owhẹ te oni ra wha sae frae akara. Oma o rẹ were owhẹ gaga ẹdẹ ọyena. Rekọ eme whọ rẹ sae rọ akara na jọ ru nọ o rẹ sae lẹliẹ eva were owhẹ vi okenọ whẹ ọvo ọ hae  ria ae kpobi?— Ẹhẹ, whọ sae rehọ ejọ ru ogbẹnyusu ra jọ ọghọ. Kọ o te were owhẹ re who ru ere ẹdẹjọ?—

Owuhrẹ Ologbo na avọ ikọ riẹ kpobi a riẹ evawere ọ ẹkẹ. Kọ whọ riẹ oware nọ a kẹ amọfa?— Oware nọ a kẹ rae họ oware nọ o mai woma kpobi evaọ akpọ na! A riẹ uzẹme na kpahe Ọghẹnẹ, yọ a rọ evawere ghale emamọ usi nana kugbe amọfa. A ru onana ababọ ugho nọ a re mi ahwo na.

Ẹdẹjọ Pọl ukọ na gbe emamọ ogbẹnyusu riẹ Luk olele na a nya ku aye jọ nọ ọ gwọlọ wo evawere ọ ẹkẹ. A nya ku ei evaọ akotọ ethẹ. Pọl avọ Luk a kpohọ akotọ ethẹ na keme a yo nọ etẹe yọ oria olẹ. Yọ nọ a ghine te etẹe, a tẹ ruẹ eyae jọ nọ e be lẹ.

Pọl o te muọ emamọ usi kpahe Jihova Ọghẹnẹ gbe Uvie riẹ họ ẹta kẹ eyae enana. Odẹ omọvo rai jọ họ Lidia, yọ ọ gaviezọ gaga. Uwhremu na, Lidia ọ tẹ gwọlọ ru oware nọ u re dhesẹ nọ emamọ usi nọ o yo na o ghinẹ were iẹe. Ọ tẹ lẹ Pọl avọ Luk inọ: “Otẹrọnọ wha ruẹ nọ me te ẹrọwọ kẹ Ọnowo na, wha nyaze obọ uwou mẹ te ria.” O te ru ai ruọ uwou riẹ.—Iruẹru 16:13-15.

O were Lidia eva re idibo Ọghẹnẹ enana e ziọ uwou riẹ. O you rai keme a fi obọ họ kẹ e wuhrẹ kpahe Jihova gbe Jesu gbe epanọ ahwo a sae rọ rria bẹdẹ bẹdẹ. O were riẹ re ọ kẹ Pọl gbe Luk emu gbe oria nọ a rẹ wezẹ. Fikiere okẹ nọ Lidia ọ kẹ o kẹ riẹ evawere keme u no rie eva ze. Onana yọ oware jọ nọ u fo nọ ma rẹ kareghẹhọ. Ohwo jọ ọ sae ta kẹ omai nnọ u fo re ma kẹ okẹ. Rekọ u gbe ghine no omai eva ze he, ẹkẹ na o ti ru omai were eva ha.

Wọhọ oriruo, who te wo ibiskiti jọ nọ whọ gwọlọ re, mẹ jẹ ta kẹ owhẹ nnọ kẹ ọmọ ọfa omojọ, whọ te rọ evawere kẹ e?— Rekọ ẹvẹ o rẹ jọ who te wo ibisikiti evaọ okenọ whọ nya  ku ogbẹnyusu ra jọ nọ ọ were owhẹ gaga? Whọ tẹ rọ iroro eva ra kẹ ogbẹnyusu ra na ibisikiti jọ, kọ u gbe ru eva were owhẹ?—

Ẹsejọ ma re you ohwo te epanọ ma rẹ rọ rehọ oware nọ ma wo kpobi kẹe no. Nọ ma be rro evaọ uyoyou mai kẹ Ọghẹnẹ na, uruemu utioye na ma re wo kẹ E.

Owuhrẹ Ologbo na ọ riẹ aye oyegbere jọ nọ o wo uruemu utioye na. Ọ rue riẹ evaọ etẹmpol na evaọ Jerusalẹm. Anini ivẹ ọvo o wo; ugho nọ o wo kpobi oye. Rekọ o fi ivẹ na họ etehe wọhọ unevaze, hayo okẹ, rọ kẹ etẹmpol na. Orọnikọ ohwo jọ ọ gba riẹ họ họ. Ahwo buobu nọ a jọ etẹe a tubẹ riẹ oware nọ o ru hu. O ru rie keme u no rie eva ze gbe fikinọ o ghine you Jihova. Eva e were riẹ inọ ọ sae kẹ okẹ oyena.—Luk 21:1-4.

Idhere buobu e riẹ nọ ma sae rọ kẹ. Kọ whọ sai roro ku idhere jọ?— Ma tẹ kẹ fikinọ u no omai eva ze, eva e te were omai. Oye jabọ nọ Owuhrẹ Ologbo na ọ rọ ta kẹ omai nọ: ‘hae kẹ.’ (Luk 6:38) Ma te ru ere, ma ti ru eva were amọfa. Yọ mai eva e te mae were!

Joma se viere kpahe epanọ ẹkẹ o rẹ rọ wha evawere ze, eva Matiu 6:1-4; Luk 14:12-14; gbe 2 Ahwo Kọrint 9:7.

[Uwoho nọ o rrọ ẹwẹ-obe avọ 92]

Fikieme Jihova ọ rọ ‘rrọ Ọghẹnẹ evawere’?

[Uwoho nọ o rrọ ẹwẹ-obe avọ 93]

Eme o re ru owhẹ were eva vi akara ra nọ whẹ ọvo ọ rẹ re?

 [Uwoho nọ o rrọ ẹwẹ-obe avọ 94]

Eme Lidia ọ be ta kẹ Pọl gbe Luk na?

[Uwoho nọ o rrọ ẹwẹ-obe avọ 94]

Fikieme eva e rọ were Lidia inọ ọ ghọ Pọl gbe Luk?

[Uwoho nọ o rrọ ẹwẹ-obe avọ 96]

Fikieme eva e rọ were aye oyegbere nana inọ ọ kẹ onọ o wo kpobi?