Uzou Avọ 34

Eme Ọ Rẹ Via Nọ Ma Te Whu?

WỌHỌ epanọ whọ riẹ, nẹnẹ ahwo a rẹ who, mọ, je whu. Emaha jọ dede a re whu. Kọ u fo re whọ dhẹ ozọ uwhu hayo dhẹ ozọ ohwo nọ o whu no?— Kọ whọ riẹ oware nọ o rẹ via ma te whu?—

Whaọ, uvumọ ohwo nọ ọ be rria nẹnẹ nọ o whu no vẹre je zihe ziọ uzuazọ re ọ ta kẹ omai kpahe iẹe ọ riẹ hẹ. Rekọ okenọ Jesu, Owuhrẹ Ologbo na, ọ jọ otọakpọ, ohwo jọ ọ jariẹ nọ o whu jẹ kpare oma. Ma rẹ sai wuhrẹ kpahe oware nọ o rẹ via kẹ enọ i whu nọ ma te se ikuigbe ohwo nana. Ọzae na yọ ogbẹnyusu Jesu yọ ọ jẹ rria Bẹtani, ẹwho ọsese nọ ọ kẹle Jerusalẹm. Odẹ riẹ Lazarọs, yọ o wo inievo-emetẹ ivẹ, Mata avọ Meri. Joma ruẹ oware nọ Ebaibol na e ta nọ o via.

Ẹdẹjọ Lazarọs ọ jẹ mọ gaga. Oke oyena yọ Jesu ọ jọ ẹwho ugbothabọ jọ. Fikiere Mata avọ Meri a te vi ohwo re ọ ta kẹ Jesu inọ oniọvo rai, Lazarọs, ọ be mọ. A ru onana keme a riẹ nọ Jesu ọ sae nya ze je ru oma ga oniọvo rai. Jesu yọ edọkita ha, rekọ Ọghẹnẹ ọ kẹ riẹ ogaga re ọ sai siwi eyao kpobi.—Matiu 15:30, 31.

Taure Jesu ọ tẹ te nya e ruẹ Lazarọs, ẹyao Lazarọs ọ tẹ ga te epanọ o ro whu. Rekọ Jesu ọ tẹ ta kẹ ilele riẹ nnọ Lazarọs ọ be wezẹ gbe nnọ Ọ be nya re ọ rọwo iẹe. Ilele na i wo otoriẹ ẹme Jesu na ha. Fikiere Jesu ọ tẹ ta vevẹ nnọ: “Lazarọs o whu no.” Eme onana u dhesẹ kpahe uwhu?— Ẹhẹ, inọ uwhu o wọhọ owezẹ udidi. U di te epanọ ohwo na ọ rẹ rọ tubẹ wezẹ ewezẹ dede he.

 Jesu ọ be nya ze te ruẹ Mata avọ Meri. Egbẹnyusu uviuwou na buobu a kokohọ no. A nya ze ti whrehe eyae ivẹ na fiki uwhu oniọvo rai. Nọ Mata o yo nọ Jesu ọ be nya ze, ọ tẹ nya i zere iei. Meri ọ tẹ ruọ otafe nya e ruẹ Jesu re. Ọ rrọ ọkora gaga jẹ be viẹ, o te kie fihọ aro riẹ. Egbẹnyusu efa nọ i lele Meri a be viẹ re.

Owuhrẹ Ologbo na ọ tẹ nọ kpahe oria nọ a ki Lazarọs fihọ. Koyehọ ahwo na a su Jesu kpohọ oria nọ a ki Lazarọs fihọ. Nọ Jesu ọ ruẹ ahwo na kpobi nọ a be viẹ, o te muhọ ẹviẹ re. Ọ riẹ epanọ o rẹ da te re ohwo nọ ma you o whu ku omai.

Utho o rrọ unu uki na, fikiere Jesu ọ tẹ ta nọ: “Wha ghelie utho na no.” Whọ hai ghelie utho na no?— Mata o roro nọ u kiehọ họ re a ghelie utho na no. Ọ ta nọ: “Olori, oke u tite enẹ na, o re muhọ egbo no, keme anwọ edẹ ene o ro whu na.”

Rekọ Jesu ọ tẹ ta kẹe nnọ: “Kọ omẹ gbẹ ta kẹ owhẹ nọ, whọ tẹ rọwo whọ rẹ te ruẹ oruaro Ọghẹnẹ?” Jesu ọ be ta nọ Mata ọ te ruẹ oware nọ o te kẹ Ọghẹnẹ orro. Eme Jesu o bi ti ru? Nọ a ghelie utho na no, Jesu ọ tẹ lẹ do via se Jihova. Jesu ọ tẹ rọ urru ukpehru ta nọ: “Lazarọs, nya via.” Kọ ọ te nya via? Kọ ọ sae nya via?—

Kọ whọ sae rọwo ohwo nọ ọ be wezẹ?— E, whọ tẹ rehọ urru ogaga se i, ọ rẹ kpare oma. Kọ whọ sae rọwo ohwo nọ o whu no?— Ijo. Epanọ whọ va te kẹhẹ, ohwo nọ o whu no o re yo ho. Oware ovo o riẹ hẹ nọ mẹ hayo owhẹ hayo ohwo jọ evaọ otọakpọ na nẹnẹ o re ru re ọ rọwo ohwo nọ o whu no ze.

Rekọ Jesu o wo ohẹriẹ. O wo obọdẹ ogaga no obọ Ọghẹnẹ ze. Fikiere, okenọ Jesu o se Lazarọs, oware igbunu jọ o tẹ via. Ohwo nọ o whu te edẹ ene no na ọ tẹ nya no uki na ze! Ọ wariẹ ziọ  uzuazọ no! Ọ rẹ sae wẹ jẹ nya jẹ wariẹ ta ẹme! Ẹhẹ, Jesu ọ kpare Lazarọs no uwhu ze.—Jọn 11:1-44.

Whaọ, roro kpahe iẹe: Eme ọ via kẹ Lazarọs okenọ o whu na? Kọ abọ riẹ jọ—ẹwẹ hayo ẹzi—o no oma riẹ jẹ nya e rria oria jọ? Kọ ẹwẹ Lazarọs o kpohọ obọ odhiwu? Kọ ọ jọ uzuazọ edẹ ene evaọ obọ odhiwu kugbe Ọghẹnẹ gbe enjẹle efuafo na?—

Ijo, ọ jọ oria ovuovo ho. Kareghẹhọ, Jesu ọ ta nọ Lazarọs ọ jọ owezẹ. Ẹvẹ o rẹ jọ whọ tẹ rrọ owezẹ? Whọ tẹ rrọ owezẹ udidi, kọ whọ rẹ riẹ oware nọ o be via wariẹ owhẹ họ?— Yọ nọ whọ tẹ kpama no, whọ rẹ riẹ epanọ whọ wezẹ kri te he bẹsenọ who re rri ughọjọ.

Ere o rrọ kẹ ahwo nọ a whu no re. A rẹ riẹ oware ovo ho. Oware ovo o rẹ dae he. Yọ a rẹ sai ru oware ovo ho. Ere o jọ kẹ  Lazarọs evaọ okenọ o whu. Uwhu o wọhọ owezẹ udidi nọ ohwo ọ rẹ jọ kareghẹhọ uvumọ oware he. Ebaibol na e ta nọ: “Iwhuowhu e riẹ oware ovo ho.”—Ọtausiwoma Na 9:5, 10.

Roro kpahe onana re: Otẹrọnọ Lazarọs ọ jọ obọ odhiwu evaọ edẹ ene eyena, kọ ọ gbẹ hae ta ẹme jọ kpahe iẹe?— Yọ o hae jọ nnọ ọ jọ obọ odhiwu, kọ Jesu ọ hae kpare iẹe zihe no oria uwoma oyena ze?— Ijo!

Ghele na, ahwo buobu a rẹ ta nọ ma wo ẹwẹ, yọ a rẹ ta nọ ugboma na u te whu no ẹwẹ na ọ rẹ gbẹ jọ uzuazọ. A rẹ ta nnọ ẹwẹ Lazarọs ọ jọ uzuazọ evaọ oria jọ. Rekọ Ebaibol na e ta ere he. O ta nọ Ọghẹnẹ ọ ma Adamu ọzae ọsosuọ na wọhọ ‘ẹwẹ nọ ọ rrọ uzuazọ.’ Adamu ọ jọ ẹwẹ. Ebaibol na e tẹ jẹ ta nọ okenọ Adamu ọ raha uzi, ẹwẹ nọ a re se Adamu na o te whu. O zihe ruọ “ẹwẹ owhuowhu,” o te zihe kpohọ ovu nọ a rọ mae. Ebaibol na e tẹ jẹ ta nọ emọ Adamu kpobi a re-uku uzioraha gbe uwhu.—Emuhọ 2:7; 3:17-19; Ikelakele 6:6; Ahwo Rom 5:12.

U re vevẹ inọ ma wo ẹwẹ nọ ọ hẹriẹ oma no ugboma mai na  ha. Mai omomọvo yọ ẹwẹ. Yọ fikinọ ahwo a re–uku uzioraha mi ọzae ọsosuọ na, Adamu, Ebaibol na e ta nọ: ‘Ẹwẹ nọ o ruthọ kpobi o re ti whu.’—Izikiẹl 18:4.

Ahwo jọ a rẹ dhozọ iwhuowhu. A rẹ kẹle uki hi keme a roro nọ iwhuowhu na a wo ẹwẹ nọ ọ hẹriẹ oma no ugboma rai nọ ọ rẹ sae nwa enọ e rrọ uzuazọ oma. Kọ ohwo owhuowhu ọ sae nwa ohwo nọ ọ rrọ uzuazọ oma?— Ijo, ọ sae nwae oma ha.

Ahwo jọ a tubẹ rọwo nọ iwhuowhu na a rẹ sai zihe ze wọhọ izi ti weze bru enọ e rrọ uzuazọ. Fikiere a rẹ wọ emuore kẹ iwhuowhu na. Rekọ ahwo nọ a bi ru ere a ghinẹ rọwo oware nọ Ọghẹnẹ ọ ta kpahe iwhuowhu na ha. Ma tẹ rọwo ẹme nọ Ọghẹnẹ ọ ta, ma rẹ dhẹ ozọ iwhuowhu hu. Yọ otẹrọnọ ma ghine wo ovuhumuo kẹ Ọghẹnẹ fiki uzuazọ nọ ọ kẹ omai, ma re dhesẹ iẹe via ẹkwoma eruo eware nọ e rẹ were Ọghẹnẹ.

Rekọ o rẹ sai gbe owhẹ unu nọ: ‘Kọ Ọghẹnẹ ọ te kpare emọ nọ i whu no zihe ziọ uzuazọ? Kọ ọ te gwọlọ ru ere?’ Joma ta kpahe oyena.

Joma se haro vi ere evaọ Ebaibol na kpahe uyero iwhuowhu jegbe inọ ohwo yọ ẹwẹ, eva Olezi 115:17; 146:3, 4; gbe Jerimaya 2:34.

[Uwoho nọ o rrọ ẹwẹ-obe avọ 179]

Eme Jesu o ru kẹ Lazarọs?

[Uwoho nọ o rrọ ẹwẹ-obe avọ 180]

Ẹvẹ Lazarọs ọ jọ okenọ o whu no?

[Uwoho nọ o rrọ ẹwẹ-obe avọ 181]

Fikieme ma gbe du dhẹ ozọ iwhuowhu hu?