Uzou Avọ 45

Eme Họ Uvie Ọghẹnẹ Epanọ Ma Re Ro Dhesẹ Nnọ Ma Gwọlọ E Riẹ

KỌ WHỌ riẹ olẹ nọ Jesu o wuhrẹ ilele riẹ na?— Whọ gbẹ riẹ e he, ma rẹ sai sei kugbe no Ebaibol na ze, eva Matiu 6:9-13. Olẹ na, onọ ibuobu i re se Olẹ Olori na, u wo eme enana: “Uvie ra oze.” Kọ whọ riẹ oware nọ Uvie Ọghẹnẹ o rrọ?—

Whaọ, ovie yọ osu orẹwho hayo ẹkwotọ. A re se esuo riẹ nnọ uvie. Evaọ erẹwho jọ a re se osu na prẹsidẹnte. Ẹvẹ a re se Osu ọ egọmeti Ọghẹnẹ?— Ovie. Oye jabọ nọ a ro se egọmeti Ọghẹnẹ Uvie na.

Kọ whọ riẹ ohwo nọ Jihova Ọghẹnẹ ọ salọ re ọ jọ Ovie egọmeti Riẹ?— Ọmọ riẹ, Jesu Kristi. Fikieme o ro woma vi osu ọfa kpobi nọ ahwo a rẹ salọ?— Fikinọ Jesu o ghine you Ọsẹ riẹ, Jihova. Fikiere o re ru oware uwoma ẹsikpobi.

 Oke krẹkri taure a te ti yẹ Jesu evaọ Bẹtlẹhẹm, Ebaibol na e ta kpahe eyẹ riẹ jẹ ta nnọ ọ te jọ Osu nọ Ọghẹnẹ ọ salọ. Joma se kpahe onana, eva Aizaya 9:6, 7 no Ebaibol ọ King James Version ze. O ta nọ: “Keme a yẹ ọmọ jọ kẹ omai, mai a rọ ọmọ na kẹ: egọmeti na e te jọ ẹkoko riẹ: a ve ti se ei . . . Ọmọ-Ovie Udhedhẹ. Egọmeti riẹ ọ te jọ ruaro, udhedhẹ riẹ u ti wo umuo ho.”—Ẹjẹlẹ ibieme na ọmai.

Kọ whọ riẹ oware nọ a rọ jọ etenẹ se Osu ọ Uvie Ọghẹnẹ “Ọmọ-Ovie”?— Whaọ, ovie họ ohwo nọ o yẹ ọmọ-ovie nana. Jesu yọ Ọmọ Ovie Ologbo na, Jihova. Rekọ Jihova o ru Jesu họ Ovie egọmeti Riẹ no re, onọ u ti su otọakpọ na evaọ odu ikpe. (Eviavia 20:6) Nọ a họ Jesu ame no, “o te mu ovuẹ họ ẹvuẹ, be ta nọ, ‘Wha kuevarẹriẹ, keme uvie odhiwu o kẹle ino.’ ”—Matiu 4:17.

Eme who roro nọ o lẹliẹ Jesu ta nnọ Uvie na o kẹle ino?— Fikinọ Ovie na, ọnọ o bi ti su evaọ obọ odhiwu, ọ jọ etẹe kugbe ae! Oye jabọ nọ Jesu ọ rọ ta kẹ ahwo nọ: “Uvie Ọghẹnẹ o rọ udevie rai.” (Luk 17:21) Kọ o gbẹ were owhẹ re Ovie Jihova ọ kẹle owhẹ te epanọ whọ rẹ sae rọ rehọ obọ tei?—

Whaọ ta kẹ omẹ, obọdẹ iruo vẹ Jesu ọ ziọ otọakpọ ti ru?— Jesu ọ kẹ uyo na, inọ: ‘Mẹ rẹ vuẹ ovuẹ usiuwoma uvie Ọghẹnẹ kẹ ewho efa re; keme fiki onana a je vi omẹ ze.’ (Luk 4:43) Jesu ọ riẹ nnọ ọye ọvo ọ sai ru iruo usiuwoma ota na ha. Fikiere, eme who roro nọ o ru?—

Jesu ọ rehọ ahwo gboma o te dhesẹ kẹ ae epanọ a re ru iruo usiuwoma ota na. Ahwo ọsosuọ nọ o  wuhrẹ họ ahwo 12 nọ ọ salọ wọhọ ikọ. (Matiu 10:5, 7) Kọ ikọ riẹ ọvo Jesu o wuhrẹ re a ru iruo nana? Ijo, Ebaibol na e ta nnọ Jesu o wuhrẹ amọfa buobu re a ta usiuwoma. Uwhremu na, o te vi ilele 70 efa haro, ghale ae fihọ itu ọ imimava. Kọ eme a wuhrẹ ahwo?— Jesu ọ ta nnọ: “Wha ta kẹ ae nọ, ‘Uvie Ọghẹnẹ o ze kẹle owhai no.’ ” (Luk 10:9) Enẹ ahwo na a ro wuhrẹ kpahe egọmeti Ọghẹnẹ.

Evaọ oke anwae evaọ Izrẹl, ivie ekpokpọ e rẹ dhẹ ruọ okpẹwho na evaọ ehru eketekete re a dhesẹ oma rai kẹ ahwo na. Whaọ, ere Jesu o ru nọ o weze kpohọ Jerusalẹm orọ urere. Whọ ruẹ, Jesu ọ be te jọ Osu ọ Uvie Ọghẹnẹ. Kọ o were ahwo na re ọ jọ Ovie rai?—

Nọ ọ be dhẹ vrẹ na, ogbotu na buobu a tẹ rehọ iwu obehru rai hwa edhere nọ ọ be te dhẹ na. Amọfa a bru egha ire fihọ edhere. A rehọ oware nọ a ru na dhesẹ nnọ a gwọlọ Jesu re ọ jọ Ovie rai. A je bo nnọ: “Ovie, nọ ọ be rehọ odẹ Ọnowo tha o wo oghale!” Rekọ orọnọ ahwo kpobi eva e were he. Evaọ uzẹme, isu egagọ jọ a tubẹ ta kẹ Jesu nọ: ‘Ta kẹ ilele ra re a fibo.’—Luk 19:28-40.

Edẹ isoi nọ i lele i rie a te mu Jesu, a tẹ rehọ iẹe kpohọ uwou-ovie bru ọba na, Pọntiọs Pailet. Ewegrẹ Jesu e tẹ ta nnọ Jesu o bi ru oma riẹ fihọ ovie gbe nnọ ọ be rọ so egọmeti ahwo Rom. Fikiere Pailet ọ tẹ nọ Jesu kpahe onana. Jesu o te dhesẹ nnọ ọ be gwọlọ rehọ egọmeti na ha. Ọ ta kẹ Pailet nnọ: “Uvie mẹ [o rrọ] orọ akpọ na ha.”—Jọn 18:36.

Pailet ọ tẹ ruọ otafe ọ tẹ ta kẹ ahwo na nnọ ọ jọ oma Jesu ruẹ oruthọ ọvuọvo ho. Rekọ enẹna ahwo na a gbẹ gwọlọ re Jesu ọ jọ Ovie rai hi. A gwọlọ re a si obọ noi hi. (Jọn 18:37-40) Nọ ọ wariẹ lele Jesu ta ẹme no, u mu Pailet ẹro inọ o ru oware ovo thọ  họ. Fikiere, evaọ orọ urere, Pailet ọ tẹ rọ Jesu ziọ otafe, Pailet ọ tẹ ta nnọ: “Ovie rai ọ na!” Rekọ ahwo na a te bo nọ: “Rehọ iẹ vrẹ, rehọ iẹ vrẹ, kare iẹ veghe!”

Pailet ọ tẹ nọ nnọ: “Mẹ kare Ovie rai veghe?” Ilori izerẹ na a te yo nnọ: “Ma wo ovie ọ fa thọ Siza wa ha.” Whọ ruẹ epanọ ahwo na a yoma te! Izerẹ iyoma na a bẹbẹ ahwo na họ wọso Jesu no!—Jọn 19:1-16.

Ere ọvona o rrọ nẹnẹ re. Ahwo buobu a gwọlọ re Jesu ọ jọ Ovie rai hi. A rẹ sae ta nnọ a rọwo Ọghẹnẹ, rekọ a gwọlọ re Ọghẹnẹ hayo Kristi ọ ta  oware nọ a re ru kẹ ae he. A gwọlọ egọmeti obọ rai evaọ otọakpọ obonẹ.

Kọ ẹvẹ kpahe omai? Nọ ma wuhrẹ kpahe Uvie Ọghẹnẹ gbe eware igbunu kpobi nọ o bi ti ru na, ẹvẹ oyena o be lẹliẹ omai ru kpahe Ọghẹnẹ?— O lẹliẹ omai you rie, ogbẹrọ ere?— Kọ ẹvẹ ma sai ro dhesẹ kẹ Ọghẹnẹ nọ ma you rie gbe nnọ ma gwọlọ re Uvie riẹ u su omai?—

Ma rẹ sai dhesẹ epanọ onana o rrọ omai oma kẹ Ọghẹnẹ ẹkwoma oriruo Jesu nọ ma re lele. Kọ eme Jesu o ru ro dhesẹ nnọ o you Jihova?— Jesu ọ ta nnọ: “Me bi ru eware nọ e be were iẹe kẹse kẹse.” (Jọn 8:29) Ẹhẹ, Jesu ọ ziọ otọakpọ ‘ti ru oreva Ọghẹnẹ’ je “ru iruo riẹ.” (Ahwo Hibru 10:7; Jọn 4:34) Roro oware nọ Jesu o ru taure o te ti mu iruo usiuwoma ota riẹ họ.

Jesu ọ nya bru Jọn Ọhọahwo-Ame na evaọ obọ Ethẹ Jọdan. Nọ a zue ruọ ame na no, Jọn o te duwu Jesu họ ame leno, ọ tẹ wariẹ kpare iẹe no ame ze. Kọ whọ riẹ oware nọ Jọn ọ rọ họ Jesu ame?—

Jesu ọ ta kẹ Jọn nnọ ọ họe ame. Rekọ ẹvẹ ma rọ riẹ nnọ Ọghẹnẹ ọ gwọlọ nnọ Jesu  ọ họ-ame?— Ma riẹ onana keme okenọ Jesu ọ va no ame ze, o yo urru Ọghẹnẹ no odhiwu ze nọ o ta nọ: “Whẹ họ Ọmọ oyoyou mẹ, whọ were omẹ hrọ.” Ọghẹnẹ o tube vi ẹzi ọfuafo riẹ nọ o wọhọ erueruẹ kiemu Jesu. Fikiere ẹkwoma ame-ọhọ riẹ, Jesu o dhesẹ nnọ ọ gwọlọ gọ Jihova evaọ edẹ uzuazọ riẹ kpobi, ẹhẹ, bẹdẹ bẹdẹ.—Mak 1:9-11.

Obọnana whọ gbẹ rrọ ọmaha. Rekọ eme who bi ti ru okenọ whọ tẹ rro ze no?— Kọ whọ te jọ wọhọ Jesu jẹ họ-ame?— Whọ rẹ raro kele iei, keme Ebaibol na e ta nọ o “fi oriruo họ-otọ kẹ owhai re wha rọ kpahe ithihi riẹ.” (1 Pita 2:21) Whọ tẹ họ-ame, yọ who bi dhesẹ nọ whọ ghinẹ gwọlọ re Uvie Ọghẹnẹ u su owhẹ. Rekọ u te he re a họ-ame ọvo.

U fo re ma yo ẹme kẹ eware kpobi nọ Jesu o wuhrẹ. Jesu ọ ta nọ ma rẹ jọ “e rọ akpọ na ha.” Kọ ma sae ta nọ ma bi yo ẹme kẹe otẹrọnọ ma du oma họ eware akpọ na? Jesu avọ ikọ riẹ a kẹnẹ oma no eware akpọ na. (Jọn 17:14) Kọ eme a ru?— A ta kẹ amọfa kpahe Uvie Ọghẹnẹ. Oye họ iruo nọ e mae rro evaọ izuazọ rai. Kọ ma sai ru ere re?— Ẹhẹ, ma ti ru ere ma te bi ghine lele oware nọ ma be ta evaọ okenọ ma be lẹ kẹ Uvie Ọghẹnẹ re o nya ze.

Ivie rri ikereakere nana nọ e ta kẹ omai oware nọ ma rẹ sai ru ro dhesẹ nọ ma gwọlọ re Uvie Ọghẹnẹ o nya ze: Matiu 6:24-33; 24:14; 1 Jọn 2:15-17; gbe 5:3.

[Iwoho nọ e rrọ ẹwẹ-obe avọ 232, 233]

Didi iruo Jesu ọ ziọ otọakpọ ti ru?

[Uwoho nọ o rrọ ẹwẹ-obe avọ 235]

Fikieme ahwo na a ro nwene iroro rai inọ a gbẹ gwọlọ Jesu wọhọ Ovie he?

[Uwoho nọ o rrọ ẹwẹ-obe avọ 236]

Fikieme Jesu ọ rọ họ-ame, kọ ẹvẹ Ọghẹnẹ o ro dhesẹ nọ ọ jẹ riẹ rehọ?

[Iwoho nọ e rrọ ẹwẹ-obe avọ 237]

Diẹse ma sae jọ ta kẹ amọfa kpahe Uvie Ọghẹnẹ?