Uzou Avọ 16

Eme O Ghine Wo Uzou?

ỌZAE jọ ọ jariẹ nọ ọ nya ze te ruẹ Jesu ẹdẹjọ. Ọ riẹ nnọ Jesu o wo areghẹ gaga, fikiere ọ tẹ ta kẹe nọ: ‘Owuhrẹ, ta kẹ oniọvo mẹ re ọ ghale eware riẹ jọ te omẹ.’ Ọzae na o roro nnọ u fo re o wo eware na jọ.

O hae jọ nọ whẹ họ Jesu, ẹvẹ whọ hae ta?— Jesu ọ ruẹ nọ ọzae na o wo ẹbẹbẹ. Rekọ ẹbẹbẹ na orọnikọ fikinọ ọ gwọlọ oware nọ oniọvo riẹ o wo ho. Ẹbẹbẹ ọzae na họ ọ riẹ oware nọ u ghine wo uzou evaọ uzuazọ họ.

Dina roro kpahe ẹme na. Eme ọ rẹ mai wo uzou kẹ omai? Kọ emamọ eware aroza nọ ma re wo, iwu ekpokpọ, hayo eware itieye na?— Ijo, oware jọ o riẹ nọ u wo uzou viere gaga. Yọ oye họ oware nọ Jesu ọ gwọlọ wuhrẹ na. Fikiere o te gbiku ọzae jọ nọ ọ kareghẹhọ Ọghẹnẹ hẹ. Kọ whọ gwọlọ yo iku na?—

Ọzae nana o fe gaga. O wo idhu gbe eria nọ o re fi ekakọ nọ o vu ze fihọ. Eware nọ ọ kọ i woma gaga. Ekakọ na i ti bu vi oria nọ o re fi ai họ no. Kọ eme o bi ti ru? Ọ tẹ ta kẹ omobọ riẹ nọ: ‘Mẹ te fariẹ eria nọ me re fi ekakọ mẹ họ no mẹ vẹ bọ eria ilogbo. Me ve koko ekakọ mẹ kpobi họ gbe eware iwoma mẹ kpobi fihọ eria ekpokpọ na.’

Ọdafe na o roro nnọ onana họ  oware areghẹ nọ o re ru. O roro nnọ o wo areghẹ gaga nọ o ro koko eware buobu họ. Ọ ta kẹ oma riẹ nọ: ‘Me koko eware iwoma buobu họ no. I ti te omẹ yeri akpọ ikpe buobu. Fikiere mẹ rẹ sai se oma họ. Mẹ te re, da, jẹ riakpọ ku oma.’ Rekọ oware jọ o jọ iroro ọdafe na thọ. Kọ whọ riẹ oware na?— O je roro kpahe omobọ riẹ gbe omawere riẹ ọvo. Ọ kareghẹhọ Ọghẹnẹ hẹ.

Fikiere Ọghẹnẹ ọ tẹ ta ẹme kẹ ọdafe na. Ọ ta nọ: ‘Whẹ ọzae ogheghẹ. Who bi ti whu aso ọnana. Kọ ono o bi ti wo eware nọ who kokohọ na?’ Kọ ọdafe na ọ sae rehọ eware eyena ru iruo evaọ okenọ o te whu no?— Ijo, amọfa a ti wo ai. Jesu ọ ta nọ: ‘Ere o rẹ jọ kẹ ohwo nọ o koko efe họ kẹ oma riẹ rekọ ọnọ ọ jọ obọ Ọghẹnẹ fe he.’—Luk 12:13-21.

Kọ whọ gwọlọ jọ wọhọ ọdafe ọyena?— Oware nọ o rrọ oja kẹe evaọ uzuazọ kpobi họ ewo ekwakwa efe. Ọdafe na o  roro thọ. Eware e rẹ dae ẹro ho. Rekọ “o fe [evaọ] obọ Ọghẹnẹ hẹ.”

Ahwo buobu a wọhọ ọdafe ọyena. Oware o rẹ dae ẹro ho. Rekọ onana o sae wha ebẹbẹ ilogbo ze. Wọhọ oriruo, who wo eware arozaha, ogbẹrọ ere?— Didi eware jọ who wo? Ta kẹ omẹ.— Kọ ẹvẹ otẹrọnọ ogbẹnyusu ra jọ o wo obọro hayo ọmọ ibebi hayo oware aroza ofa jọ nọ who wo ho? Kọ u woma re whọ viẹ kẹ ọsẹgboni ra re a dẹ e kẹ owhẹ re?—

Okejọ o sae jariẹ nọ o rẹ wọhọ nọ oware arozaha o rrọ oja gaga. Rekọ eme ọ rẹ via kẹe evaọ omoke jọ?— O rẹ who no. O sae raha no, u gbe tube si owhẹ urru dede he. Uzẹme, who wo oware jọ nọ o ghare vi oware arozaha gaga. Kọ whọ riẹ oware yena?—

Uzuazọ ra. Uzuazọ ra u wo uzou gaga keme ababọ riẹ whọ sai ru uvumọ oware he. Rekọ uzuazọ ra o roma hwa eruo oware nọ o rẹ were Ọghẹnẹ, ogbẹrọ ere?— Fikiere ma rẹ jọ wọhọ ọdafe ogheghẹ na ha ọnọ ọ kareghẹhọ Ọghẹnẹ hẹ na.

 Orọnikọ emaha ọvo họ enọ e rẹ sai ru eware igheghẹ wọhọ ọdafe na ha. Ahwo buobu nọ e kpako no a rrọ ere. Ejọ rai a rẹ gwọlọ wo bu vi epanọ a wo na ẹsikpobi. A sai wo emuore okpẹdẹ na, iwu nọ a rẹ wha, gbe uwou nọ a rẹ rria. Rekọ a gwọlọ wo efa. A gwọlọ iwu buobu. A gwọlọ iwou ilogbo re. Eware enana e rẹ gwọlọ igho. Fikiere a ve ru iruo gaga re a wo igho buobu. Yọ makọ epanọ a wo igho bu te kẹhẹ, a rẹ gbẹ gwọlọ wo efa.

Ekpako jọ e rẹ dhẹ kiti kiti gwọlọ igho te epanọ a gbe ro wo oke kẹ uviuwou rai hi. Yọ a wo oke kẹ Ọghẹnẹ gbe he. Kọ igho rai o sae kẹ ae uzuazọ?— Ijo. Kọ a sae rọ igho rai dẹ oware evaọ okenọ a te whu no?— Ijo. O rrọ ere keme ahwo nọ a whu no a rẹ sai ru uvumọ oware he.—Ọtausiwoma Na 9:5, 10.

Kọ onana u dhesẹ nọ o thọ re a wo ugho?— Ijo. Ma sae rọ ugho dẹ emu gbe iwu. Ebaibol na e ta nọ ugho o rẹ thọ ohwo. (Ọtausiwoma Na 7:12) Rekọ ma te you ugho, koyehọ ma te ruọ ẹbẹbẹ. Ma te jọ wọhọ ọdafe ogheghẹ ọyena ọnọ o koko efe họ kẹ oma riẹ rekọ o fe evaọ obọ Ọghẹnẹ hẹ na.

Eme u dhesẹ re a fe evaọ obọ Ọghẹnẹ?— U dhesẹ nọ ma re fi Ọghẹnẹ họ oria ọsosuọ evaọ izuazọ mai. Ahwo jọ a rẹ ta nọ a rọwo Ọghẹnẹ. A roro nọ ẹrọwo ọvo o te. Kọ a ghine fe evaọ obọ Ọghẹnẹ?— Ijo, a wọhọ ọdafe na ọnọ ọ kareghẹhọ Ọghẹnẹ hẹ na.

Ọsẹ obọ odhiwu riẹ ọ thọrọ Jesu ẹro okeovo ho. Ọ dao oma re o le igho buobu hu. Yọ o wo eware iwo buobu hu. Jesu ọ riẹ oware nọ o ghinẹ rrọ oja evaọ uzuazọ. Kọ whọ riẹ oware nọ o rrọ oja?— Oye họ re a fe evaọ obọ Ọghẹnẹ.

Ta kẹ omẹ, ẹvẹ ma sai ro fe evaọ obọ Ọghẹnẹ?— Ma rẹ sai fe evaọ obọ Ọghẹnẹ ẹkwoma eru oware nọ o rẹ were iẹe. Jesu ọ ta  nọ: “Me bi ru eware nọ e be were iẹe kẹse kẹse.” (Jọn 8:29) O rẹ were Ọghẹnẹ ma te ru oware nọ ọ gwọlọ nọ ma ru. Ta kẹ omẹ, eme whọ rẹ sai ru nọ o rẹ were Ọghẹnẹ?— Whọ rẹ sai se Ebaibol na, kpohọ iwuhrẹ Ileleikristi, lẹ se Ọghẹnẹ, je fi obọ họ kẹ amọfa wuhrẹ kpahe iẹe. Eyena họ eware nọ e mae ghine wo uzou evaọ uzuazọ.

Fikinọ Jesu o fe evaọ obọ Ọghẹnẹ, Jihova ọ sẹro riẹ. Ọ kẹ Jesu osa uzuazọ ebẹdẹ bẹdẹ. Ma tẹ rrọ wọhọ Jesu, Jihova o ti you omai jẹ sẹro mai re. Fikiere joma jọ wọhọ Jesu orọnikọ ọdafe nọ ọ kareghẹhọ Ọghẹnẹ hẹ na ha.

Ikere Ebaibol jọ nọ i dhesẹ epanọ ma re ro wo emamọ eriwo ekwakwa efe ena: Itẹ 23:4; 28:20; 1 Timoti 6:6-10; gbe Ahwo Hibru 13:5.

[Uwoho nọ o rrọ ẹwẹ-obe avọ 87]

Didi ẹbẹbẹ ọzae nana o wo?

[Uwoho nọ o rrọ ẹwẹ-obe avọ 88]

Eme ọdafe nana o bi roro kpahe?

[Uwoho nọ o rrọ ẹwẹ-obe avọ 89]

Eme who wo nọ o ghare vi eware arozaha?

[Iwoho nọ e rrọ ẹwẹ-obe avọ 91]

Eme ọmọ ọnana o bi ru nọ u ghine wo uzou?