Uzou Avọ 32

Epanọ A Rọ Thọ Jesu

ẸSEJỌ Jihova o re ru eware evaọ edhere igbunu re ọ thọ enọ e rrọ emaha gbe enọ e rẹ sae thọ omobọ rai hi. Whọ tẹ kọ kpohọ akotọ ẹwọ, whọ rẹ sae ruẹ edhere jọ nọ Jihova o bi ro ru onana. Rekọ eva oke ọsosuọ, whọ rẹ sai wo otoriẹ oware nọ o be via na ha.

Whọ rẹ ruẹ ọmọvra nọ o kiemu otọ kẹle owhẹ. O wọhọ nọ oma o ga riẹ hẹ. Nọ whọ tẹ gwọlọ kẹle iẹe, ọ vẹ rọ ibekpe riẹ jọ si otọ o ve go họ emu. Nọ who bi lele iei na, yọ ọvra na o bi go họ emu siọ owhẹ ba. Idudhe na, ọvra na ọ vẹ ra vrẹ. Uvumọ oware u ru ibekpe riẹ hẹ! Kọ whọ riẹ oware nọ ọvra na o je ru na?—

Whaọ, kẹle oria nọ ọvra na o kiemu na, emọ riẹ i dhere họ itẹwọ na. Ozọ u je mu oni na inọ whọ te ruẹ emọ na jẹ nwae oma. Fikiere ọ tẹ faki ru epaọ ẹsenọ oma o ga riẹ hẹ re ọ kpọ ovao ra no etẹe no. Kọ whọ riẹ ohwo nọ ọ rẹ sae thọ omai wọhọ epanọ oni emevra ọ rẹ thọ emọ riẹ na?— Evaọ Ebaibol na, a rehọ Jihova dhesẹ ọvra nọ a re se ugo, ọnọ o re fi obọ họ kẹ emọ riẹ.—Iziewariẹ 32:11, 12.

 Ọmọ Jihova nọ ọ mae ghare kpobi họ Jesu, Ọmọ oyoyou riẹ na. Okenọ Jesu ọ jọ obọ odhiwu, ọ jọ ohwo ẹzi ọgaga wọhọ Ọsẹ riẹ. Ọ rẹ sae sẹro omobọ riẹ. Rekọ okenọ a yẹ Jesu wọhọ ọmọ evaọ otọakpọ, o wo ogaga ha. Ọ gwọlọ ẹruọsa.

Re o ru oreva Ọghẹnẹ nọ o ro vi ei ziọ otọakpọ gba, Jesu ọ rẹ rro te ohwo je zihe ruọ ọzae ọgbagba. Rekọ Setan ọ dao oma re o kpe Jesu evaọ okenọ ọ gbẹ jọ ọmaha. Iku epanọ a rọ dao oma re a kpe Jesu evaọ okenọ ọ jọ ọmaha gbe idhere nọ Jihova ọ rọ thọe e were gaga. Kọ whọ gwọlọ yo i?—

Nọ a nwani yẹ Jesu no, Setan o te ru re oware jọ nọ o wọhọ esi ọ roma via evaọ ehru evaọ ofẹ obọ Ovatha-Ọre. Ezae nọ e rẹ rọ isi gbẹva, a lele esi na ikilomita buobu ziọ Jerusalẹm. A tẹ jọ obei nọ kpahe oria nọ a ti jo yẹ ọnọ ọ te jọ ovie ahwo Ju na. Okenọ a nọ ahwo nọ a riẹ oware nọ Ebaibol na e ta kpahe onana, a te yo nọ: ‘Evaọ Bẹtlẹhẹm.’—Matiu 2:1-6.

 Okenọ Herọd, ovie ọgeva nọ ọ jọ Jerusalẹm na, o yo kpahe ovie ọkpokpọ ọnana nọ a yẹ kẹle na evaọ ẹwho Bẹtlẹhẹm nọ o the abọ họ na, ọ tẹ ta kẹ ebuẹva-isi na nọ: ‘Wha gwọlọ re wha ruẹ ọmọ na, re wha zihe ze te vuẹ omẹ.’ Kọ whọ riẹ oware nọ Herọd ọ rọ gwọlọ riẹ oria nọ ọ rẹ jọ ruẹ Jesu?— Keme Herọd ọ be re-ihri, ọ gwọlọ kpe ei!

Ẹvẹ Ọghẹnẹ ọ rọ thọ Ọmọ riẹ?— Whaọ, okenọ ebuẹva-isi na a ruẹ Jesu, a tẹ kẹ e ekẹ. Uwhremu na, Ọghẹnẹ ọ tẹ vẹvẹ ebuẹva-isi na unu evaọ ewezẹ inọ a zihe bru Herọd ho. Fikiere a tẹ rọ edhere ọfa kpo ababọ Jerusalẹm nọ a zihe kpohọ. Nọ Herọd ọ ruẹ nọ ebuẹva-isi na a zihe no, eva e tẹ dhae gaga. Evaọ omodawọ re o kpe Jesu, Herọd o te ru nọ a ro kpe emezae nọ e rrọ Bẹtlẹhẹm kpobi no ikpe ivẹ kpotọ! Rekọ evaọ oke yena yọ a wọ Jesu no ẹwho na no.

Kọ whọ riẹ epanọ Jesu ọ rọ dhẹ vabọ?— Okenọ ebuẹva-isi na a kpo no, Jihova ọ tẹ vẹvẹ Josẹf, ọzae Meri, unu inọ ọ kpare oma re ọ dhẹ kpohọ obọ Ijipti. Obei oma o jọ fọ Jesu no obọ Herọd. Ikpe jọ e vrẹ no, okenọ Meri avọ Josẹf a rehọ Jesu zihe no Ijipti ze, Ọghẹnẹ ọ tẹ wariẹ vẹvẹ Josẹf unu. Ọ jọ ewezẹ ta kẹe nnọ ọ kwa kpohọ Nazarẹt, oria nọ oma o te jọ fọ Jesu.—Matiu 2:7-23.

Kọ whọ ruẹ epanọ Jihova ọ rọ thọ Ọmọ riẹ?— Ono whọ rẹ sae ta nọ ọ wọhọ emevra nọ oni rai o sino họ itẹwọ hayo wọhọ  Jesu okenọ ọ gbẹ jọ ọmaha? Kọ whọ gbẹ rrọ wọhọ ai?— Ahwo nọ a gwọlọ nwa owhẹ oma a riẹ re. Kọ whọ riẹ ahwo na?—

Ebaibol na e ta nọ Setan ọ wọhọ okpohrokpo nọ o bi do enu nọ ọ be gwọlọ omai kpe. Yọ wọhọ epanọ okpohrokpo o re fi ẹro họ erao esese na, ere Setan avọ idhivẹri riẹ a bi fi ẹro họ emaha na re. (1 Pita 5:8) Rekọ Jihova ọ ga oma vi Setan. Jihova ọ rẹ sae thọ emọ riẹ hayo vahe ẹta nọ Setan ọ kpahe fihọ kẹ ae.

Kọ whọ kareghẹhọ oware nọ Ẹdhọ avọ idhivẹri riẹ a be gwọlọ gele omai ru wọhọ epanọ ma wuhrẹ evaọ Uzou avọ 10 orọ obe nana?— E, a bi ru re ma lele emetẹ hayo emezae wezẹ, oware nọ Ọghẹnẹ ọ ta nọ o thọ. Rekọ amono ọvo a rẹ wezẹ kugbe?— Ezae avọ eyae nọ e kpako no nọ e rọo no.

Dede na, u yoma gaga inọ ekpako jọ a rẹ gwọlọ lele emaha kiẹzẹ. A te ru ere no, emezae gbe emetẹ na a ve ru eware iyoma nọ a wuhrẹ mi ekpako enana. A rẹ jẹ rehọ oma rai zaro. Oye họ oware nọ o via oke krẹkri nọ u kpemu evaọ okpẹwho Sodọm. Ebaibol na e ta nọ ahwo ẹwho na, ‘te emaha te ekpako,’ a jẹ gwọlọ lele ezae nọ e kpahe Lọt wezẹ.—Emuhọ 19:4, 5.

Fikiere wọhọ epanọ Jesu ọ gwọlọ ethathọ na, ere ọvo na o gwọlọ nọ a thọ owhẹ no obọ ekpako na re—tube no obọ emaha efa dede—enọ e gwọlọ lele owhẹ wezẹ. Ahwo nana a re ru epaọ ẹsenọ a rrọ egbẹnyusu ra. A rẹ tubẹ ta nọ a te kẹ owhẹ oware jọ whọ tẹ yaa eyaa nọ whọ rẹ ta oware nọ a gwọlọ lele owhẹ ru na kẹ uvumọ ohwo ho. Rekọ ahwo nana yọ ahwo oriobọ, wọhọ Setan gbe idhivẹri riẹ, a gwọlọ omawere kẹ omobọ rai ọvo. Yọ a rẹ gwọlọ wo omawere nana ẹkwoma emaha nọ a re lele wezẹ. Onana o thọ gaga!

Kọ whọ riẹ oware nọ a rẹ sai ru re a wo omawere jọ kẹ omobọ  rai?— Whaọ, a rẹ sae rọ obọ thoviẹ oyọ hayo uvio ra. Hayo a rẹ tubẹ rọ oyọ hayo uvio rai thoviẹ ora. Rekọ whọ kuvẹ re ohwo jọ ọ rehọ oyọ hayo uvio ra zaro vievie he. Whọ rẹ tubẹ kuvẹ kẹ oniọvo ra hayo oni ra hayo ọsẹ ra dede he.

Ẹvẹ whọ sae rọ thọ oma ra no obọ ahwo nọ a re ru eware iyoma itieye?— Orọ ọsosuọ, whọ kuvẹ re ohwo jọ ọ rọ oma ra zaro ho. Ohwo jọ ọ tẹ be gwọlọ ru ere, bo via nnọ: “Seba whẹ! Me ti gu owhẹ!” Yọ ohwo na ọ tẹ ta nọ whẹ ọ wha riẹ ze, whọ rọwo ho. Ọrue ọ be ta na. Nya re who gu ẹme na, makọ oghẹrẹ ohwo nọ ọ rrọ kpobi! Who re gu ọ tẹ make ta nnọ uvumọ ohwo ọ rẹ riẹ kpahe oware nọ wha bi ru na ha. Ohwo na ọ tẹ make ta nnọ ọ te dẹ eware buobu kẹ owhẹ hayo ọ tẹ ta nọ o ti kpe owhẹ, dhẹ se iẹe ba re whọ nya i gu.

U du gwọlọ nọ whọ rẹ dhozọ họ, rekọ u fo re whọ yọrọ oma. Otẹrọnọ ọsẹgboni ra a vẹvẹ owhẹ unu kpahe ahwo jọ hayo eria jọ nọ i woma ha, whọ rẹ gaviezọ kẹ ai. Who te ru ere, who re kie ro obọ ahwo oyoma ha.

Se kpahe epanọ whọ rẹ rọ thọ oma ra no ekpehre owezẹ ọzae avọ aye, eva Emuhọ 39:7-12; Itẹ 4:14-16; 14:15, 16; 1 Ahwo Kọrint 6:18; gbe 2 Pita 2:14.

[Uwoho nọ o rrọ ẹwẹ-obe avọ 167]

Ẹvẹ ọvra nana ọ be rọ thọ emọ riẹ?

[Uwoho nọ o rrọ ẹwẹ-obe avọ 168]

Nọ ebuẹva-isi na a weze bru Jesu no, didi unuovẹvẹ Ọghẹnẹ ọ kẹ rai nọ u siwi Jesu?

[Uwoho nọ o rrọ ẹwẹ-obe avọ 169]

Ẹvẹ a rọ wariẹ siwi Jesu ọmaha na?

[Uwoho nọ o rrọ ẹwẹ-obe avọ 171]

Eme whọ rẹ ta hayo ru otẹrọnọ ohwo jọ ọ gwọlọ rọ obọ te owhẹ evaọ oghẹrẹ nọ u fo ho?