Uzou Avọ 40

Epanọ A Re Ro Ru Ọghẹnẹ Eva Were

EME ma sai ru ro ru Ọghẹnẹ eva were? Kọ ma sae kẹe oware jọ?— Jihova ọ ta nọ: “Karao karao kpobi nọ ọrọ o bọ ẹwọ na ọ mẹ.” Ọ tẹ jẹ ta nọ: “Isiliva gbe igoru na e mẹ.” (Olezi 24:1; 50:10; Hagai 2:8) Ghele na, oware jọ o riẹ nọ ma rẹ sae kẹ Ọghẹnẹ. Didi oware oye?—

Jihova ọ kẹ omai uvẹ re ma salọ sọ ma rẹ gọe hayo ma rẹ gọe he. Ọ rẹ gba omai họ ru oware nọ ọ gwọlọ nọ ma ru hu. Ma dae ruẹ oware nọ Ọghẹnẹ ọ rọ ma omai re ma sae salọ sọ ma rẹ gọe hayo ma rẹ gọe he.

Ẹsejọhọ whọ riẹ oware nọ a re se erọbọto. Erọbọto yọ emashini nọ a ru re o ru oware kpobi nọ ọnọ o ru riẹ na ọ gwọlọ nọ o ru. Fikiere erọbọto o wo udu nọ o re ro ru onọ u je rie he. Jihova ọ hẹ sae ma omai kpobi re ma jọ wọhọ erọbọto. Ọ hẹ sae ma omai re ma ru onọ ọ gwọlọ nọ ma ru ọvo. Rekọ Ọghẹnẹ o ru ere he. Kọ whọ riẹ oware nọ o so riẹ ze?—

Eware aroza emaha jọ e wọhọ erọbọto. Whọ tẹ nẹ opoto jọ, o ve ru oware nọ ọnọ o ku rie na ọ gwọlọ nọ o ru.  Kọ whọ ruẹ oware aroza utioye no ẹdẹjọ?— Oware aroza nọ u re ru oware nọ a ru rie nọ o ru ọvo o re kri ahwo ẹbẹ hẹ. Ọghẹnẹ ọ gwọlọ nọ ma yo ẹme kẹe fikinọ ma rrọ erọbọto nọ a ma re a gọe he. Jihova ọ gwọlọ re ma gọe fikinọ ma you rie gbe fiki nnọ ma gwọlọ yo ẹme kẹe.

Ẹvẹ who roro nọ o rẹ jọ Ọsẹ obọ odhiwu mai oma nọ ma te yo ẹme riẹ fikinọ ma gwọlọ ru ere?— Whaọ, ta kẹ omẹ, ẹvẹ uruemu ra u re kpe oma họ ọsẹgboni ra?— Ebaibol na e ta nọ ọmọ owareghẹ o re ru “eva were ọsẹ riẹ, rekọ ọmọ ogheghẹ ọ rẹ wha enuobro se oni riẹ.” (Itẹ 10:1) Kọ who mu ẹro họ no inọ okenọ who te ru oware nọ ọsẹ gbe oni ra a gwọlọ mi owhẹ, u re ru ai eva were?— Rekọ ẹvẹ o rẹ jọ rae oma nọ whọ tẹ ghẹmeeyo kẹ ae?—

Whaọ joma roro kpahe Ọsẹ obọ odhiwu mai, Jihova. Ọ ta kẹ omai kpahe epanọ ma re ro ru eva were iẹe. Ivie tọlọ Ebaibol ra re who rovie kpohọ Itẹ 27:11. Ọghẹnẹ ọ be jọ etẹe ta ẹme kẹ omai nọ: ‘Ọmọ mẹ, wo areghẹ, re who ru omẹ eva were, re mẹ sae kẹ ọnọ ọ be poviẹ omẹ uyo.’ Kọ whọ riẹ epanọ a rẹ poviẹ ohwo?— Ohwo ọ rẹ sae poviẹ owhẹ ọ tẹ be hwẹ owhẹ jẹ ta nọ whọ rẹ sai ru oware nọ whọ ta nọ whọ sai ru hu. Ẹvẹ Setan ọ be rọ poviẹ Jihova?— Joma ruẹ.

Kareghẹhọ, ma wuhrẹ evaọ Uzou avọ 8 orọ obe nana inọ Setan  ọ gwọlọ jọ Ohwo Ọsosuọ gbe nnọ ọ gwọlọ re ohwo kpobi ọ gọe. Setan ọ ta nnọ ahwo a be gọ Jihova fiki uzuazọ ebẹdẹ bẹdẹ nọ ọ te kẹ ae ọvo otẹrọnọ a gọ riẹ. Nọ Setan o gele Adamu avọ Ivi ghẹmeeyo kẹ Jihova no, Setan o te se Ọghẹnẹ abọ. Ọ ta kẹ Ọghẹnẹ nọ: ‘Ahwo a be gọ owhẹ fiki oware nọ a bi wo mi owhẹ ọvo. Whọ tẹ kẹ omẹ uvẹ, me ti ku ahwo kpobi rẹriẹ siọ owhẹ ba.’

Uzẹme o ghinẹ rrọ inọ a rẹ jọ Ebaibol na ruẹ eme eyena dẹẹ hẹ. Rekọ ma te se ikuigbe Job, ma rẹ ruẹ vevẹ inọ Setan ọ ta oghẹrẹ eme itieye na kẹ Ọghẹnẹ. U ghine wo uzou gaga kẹ Setan gbe Jihova sọ Job o ti kru edikihẹga riẹ kẹ Ọghẹnẹ hayo o re kru ga ha. Joma rovie Ebaibol mai kpohọ Job uzou 1 gbe 2 re ma ruẹ oware nọ o via.

Mu ẹro họ evaọ Job uzou 1 inọ Setan ọ jọ obọ odhiwu okenọ enjẹle na e nya ze te ruẹ Jihova. Jihova ọ tẹ nọ Setan nọ: “Bovẹ who nọze?” Setan o te yo nọ ọ be nya  kpemu kparo evaọ otọakpọ na. Jihova ọ tẹ nọ inọ: ‘Kọ who mu ẹro họ Job no, inọ ọ be gọ omẹ gbe nnọ o bi ru oware uyoma ovo ho?’—Job 1:6-8.

Setan ọ tẹ nwani gu unoma jọ. ‘Fikinọ o wo uvumọ ebẹbẹ hẹ ọvo Job ọ be rọ gọ owhẹ. Whọ gbẹ thae uke jẹ ghale iẹe he, ọ te la owhẹ eka.’ Jihova o te yo nọ: ‘U woma, Setan, ru ei epanọ u je owhẹ, rekọ whọ nwa Job omariẹ oma ha.’—Job 1:9-12.

Eme Setan o ru?— O ru re ahwo a tho iruẹ Job gbe eketekete riẹ je kpe enọ e be sẹro rai. Egbrara e tẹ va, i te kpe igodẹ na gbe enọ i bi su ai. Uwhremu na, ahwo a tẹ nya ze a te tho ekamẹle riẹ je kpe enọ e be sẹro rai no. Ukuhọ riẹ, Setan o te ru re okpofou o nwo uwou nọ emọ ikpe Job a rrọ, aikpobi a te whu. Ghelọ enana kpobi, Job ọ gbẹ be gọ Jihova.—Job 1:13-22.

Nọ Jihova ọ wariẹ ruẹ Setan, Jihova o te dhesẹ kẹe nnọ Job o gbe kru ẹrọwọ riẹ. Setan o te gu unoma, inọ: ‘Whọ tẹ kẹ omẹ uvẹ dhe obọ te ugboma riẹ, ọ te la owhẹ eka.’ Jihova ọ tẹ kẹ Setan uvẹ re o dhe obọ te ugboma Job rekọ ọ vẹvẹ e riẹ unu inọ o kpei no ho.

 Setan o te fi emela họ oma Job soso. Emela na i je gbo te epanọ uvumọ ohwo ọ gbẹ jẹ rọ kẹle iẹe he. Makọ aye Job dede ọ ta kẹe nọ: “La Ọghẹnẹ eka re who whu.” Enọ i ru oma rai wọhọ egbẹnyusu Job a weze bru ei ze a te ru eva dhae be ta kẹe nnọ o wọhọ nọ o ru eware iyoma buobu jabọ nọ eware enana e be rọ via kẹe na. Rekọ, ghelọ okpẹtu gbe edada nọ Setan ọ wha se Job na, Job o gbe kru ẹrọwọ rọ gọ Jihova.—Job 2:1-13; 7:5; 19:13-20.

Ẹvẹ who roro nọ o jọ Jihova oma kpahe ẹrọwọ nọ Job o kru na?— U ru rie eva were keme Jihova ọ sae ta kẹ Setan nọ: ‘Rri Job! Ọ be gọ omẹ fikinọ ọ gwọlọ gọ omẹ.’ Kọ whọ gwọlọ jọ wọhọ Job, ohwo nọ Jihova o re ro se eha wọhọ oriruo nọ o re dhesẹ Setan fihọ ọtọrue?— O ghinẹ rrọ oware ọghọ ologbo re ma dhesẹ ẹme ọ Setan inọ ọ rẹ sai ku ahwo kpobi rẹriẹ no Jihova ọgọ na fihọ ọrue. Jesu o rri rie fihọ oware ọghọ.

Owuhrẹ Ologbo na ọ kẹ Setan uvẹ re o ru Ei ru oware nọ o thọ họ. Dai roro epanọ oriruo riẹ o ru eva were Ọsẹ riẹ te! Jihova ọ sae riẹ obọ họ Jesu jẹ ta kẹ Setan nnọ: ‘Rri Ọmọ mẹ! O kru edikihẹ riẹ kẹ omẹ vọvọ fikinọ o you omẹ!’ Who je roro oghọghọ nọ Jesu o wo fikinọ o ru udu Ọsẹ riẹ ghọghọ. Fiki oghọghọ yena, Jesu o tube thihi akọ uwhu evaọ ure oja.—Ahwo Hibru 12:2.

Kọ whọ gwọlọ jọ wọhọ Owuhrẹ Ologbo mai na re who ru Jihova eva were?— O tẹ rrọ ere, ruẹ abọ họ ewuhrẹ kpahe oware nọ Jihova ọ gwọlọ nọ who ru, who ve ru ei eva were ẹkwoma eru oware nọ ọ gwọlọ na!

Se kpahe oware nọ Jesu o ru ro ru Ọghẹnẹ eva were gbe oware nọ u fo nọ ma re ru re, eva Itẹ 23:22-25; Jọn 5:30; 6:38; 8:28; gbe 2 Jọn 4.

[Uwoho nọ o rrọ ẹwẹ-obe avọ 207]

Fikieme Ọghẹnẹ o gbe ro ru omai wọhọ erọbọto nana ha?

[Uwoho nọ o rrọ ẹwẹ-obe avọ 208]

Ẹvẹ whọ sai ro ru Jihova gbe ọsẹgboni ra were eva?

[Uwoho nọ o rrọ ẹwẹ-obe avọ 209]

Nọ Adamu avọ Ivi a raha uzi no, ẹvẹ Setan o ro se Jihova abọ?

[Uwoho nọ o rrọ ẹwẹ-obe avọ 210]

Eme Job o thihi akọ riẹ, kọ fikieme onana u je ru Ọghẹnẹ eva were?