Uzou Avọ 10

Jesu O Wo Ogaga Vi Idhivẹri Na

KỌ WHỌ kareghẹhọ oware nọ o lẹliẹ ẹnjẹle Ọghẹnẹ jọ zihe ruọ Setan Ẹdhọ na?— Isiuru oriobọ nọ ọ rọ gwọlọ nọ a gọ e o wọ riẹ wọso Ọghẹnẹ. Kọ enjẹle efa i zihe ruọ ilele Setan?— E. Ebaibol na i se rai ‘enjẹle Setan,’ hayo idhivẹri.—Eviavia 12:9.

Kọ enjẹle iyoma enana, hayo idhivẹri na, a rọwo nnọ Ọghẹnẹ ọ rrọ?— Ebaibol na e ta nọ ‘idhivẹri na a rọwo nnọ Ọghẹnẹ ọ rrọ.’ (Jemis 2:19) Rekọ enẹna ozọ u bi mu ai. Ozọ u bi mu ai keme a riẹ nọ Ọghẹnẹ ọ te kẹ ae uye fiki eware iyoma nọ a ru no. Eware iyoma vẹ a ru no?—

Ebaibol na e ta nọ enjẹle na e nya siọ uwou ọsosuọ rai ba evaọ obọ odhiwu ziọ otọakpọ te rria wọhọ ahwo. A ru onana fikinọ a gwọlọ lele eyae iwowoma ọ otọakpọ na wezẹ. (Emuhọ 6:1, 2; Jud 6) Eme họ owezẹ ezaveyae?—

Owezẹ ezaveyae yọ ọzae avọ aye nọ a rẹ kẹle oma  gaga evaọ edhere obọdẹ jọ. Uwhremu na, ọmọ o ve muhọ ẹrro evaọ eva oni na. Rekọ re enjẹle i lele eyae wezẹ o thọ. Ọghẹnẹ ọ gwọlọ nọ ọzae gbe aye nọ a rọo no ọvo a rẹ wezẹ kugbe. Okenọ a je yẹ ọmọ na, ọzae avọ aye na a vẹ sae sẹro ọmọ na.

Okenọ enjẹle na i nwene fihọ oma ahwo-akpọ je lele eyae otọakpọ wezẹ, emọ rai e tẹ rro zihe ruọ egwara. A geva gaga, yọ a jẹ nwa ahwo oma. Fikiere Ọghẹnẹ ọ tẹ rehọ ẹvo ologbo ze te raha egwara na gbe ahwo oyoma na. Rekọ ọ ta kẹ Noa re o ku okọ ulogbo jọ, re o siwi umutho ahwo nọ a ru oware uwoma. Owuhrẹ Ologbo na ọ ta nọ u re woma re ma kareghẹhọ oware nọ o via evaọ oke Ẹvo na.—Emuhọ 6:3, 4, 13, 14; Luk 17:26, 27.

Okenọ Ẹvo na o ku ze, kọ whọ riẹ oware nọ o via kẹ enjẹle iyoma na?— A si obọ no ugboma ahwo-akpọ rai a te zihe kpohọ odhiwu. Rekọ a gbẹ sae jọ enjẹle Ọghẹnẹ hẹ, fikiere a te zihe ruọ enjẹle Setan, hayo idhivẹri. Kọ eme ọ via kẹ emọ rai, egwara na?— A whu evaọ  Ẹvo na. Ahwo dekọ na kpobi enọ i yo ẹme kẹ Ọghẹnẹ hẹ a whu re.

No anwọ oke Ẹvo na ze, Ọghẹnẹ ọ gbẹ re kuvẹ kẹ idhivẹri na re a nwene oma ohwo-akpọ fihọ họ. Rekọ dede nọ ma sae rue rae he, idhivẹri na e gbẹ be dao oma gele ahwo ru eware iyoma. A be wha ebẹbẹ ze enẹna vi epaọ anwẹdẹ. Onana o rrọ ere keme a gele i rai no odhiwu ziọ otọakpọ no.

Kọ whọ riẹ oware nọ ma gbẹ sae ruẹ idhivẹri na ha?— Keme a wo ugboma iwo ho. Rekọ ma riẹ nọ a rrọ uzuazọ. Ebaibol na e ta nọ Setan o bi ‘su ahwo akpọ na kpobi thọ,’ yọ idhivẹri riẹ i bi fi obọ họ kẹe ru onana.—Eviavia 12:9, 12.

Kọ Ẹdhọ avọ idhivẹri riẹ a sae viẹ omai họ re?— E, a sae viẹ omai họ re ma gbẹ yọrọ oma ha. Rekọ ma re du dhozọ họ. Owuhrẹ Ologbo na ọ ta nọ: ‘Ẹdhọ o wo ogaga vi omẹ hẹ.’ Ma tẹ rrọ kẹle Ọghẹnẹ, ọ te thọ omai no obọ Ẹdhọ gbe idhivẹri riẹ.—Jọn 14:30.

U wuzou re ma riẹ eware iyoma nọ idhivẹri na e rẹ gwọlọ gele omai ru. Fikiere dai roro. Didi eware iyoma idhivẹri na i ru evaọ okenọ a ziọ otọakpọ?— Taure Ẹvo na o te ti ku, a lele eyae wezẹ, oware nọ u fo nọ enjẹle i re ru hu. Nẹnẹ na eva e rẹ were idhivẹri na otẹrọnọ ahwo a ghẹmeeyo kẹ uzi Ọghẹnẹ kpahe owezẹ ezaveyae. Jomẹ nọ owhẹ, Amono ọvo a rẹ wezẹ kugbe?— Whọ ta gba, ahwo nọ a rọo no ọvo.

Nẹnẹ na emezae gbe emetẹ eboba jọ a rẹ wezẹ kugbe, rekọ onana o thọ. Ebaibol na e ta kpahe ‘ẹba ọzae,’ hayo oyọ. (Iruo-Izerẹ 15:1-3) A re se ẹba aye uvio. Jihova ọ ma abọ oma enana kẹ obọdẹ ẹjiroro jọ nọ ahwo nọ a rọo no ọvo a rẹ reawere riẹ. Ahwo a te ru eware nọ Jihova ọ ghọ eva e rẹ were idhivẹri na. Wọhọ  oriruo, o rẹ were idhivẹri na otẹrọnọ ọmọzae avọ ọmọtẹ a be rọ oyọ gbe uvio ohwohwo zaro. Ma gwọlọ ru eva were idhivẹri na ha, manikọ ere he?—

Oware ofa jọ o riẹ nọ o rẹ were idhivẹri na rekọ nọ Jihova o mukpahe. Kọ whọ riẹ oware oyena?— Ozighi. (Olezi 11:5) Ahwo a tẹ be geva jẹ be nwa amọfa oma oye a re se ozighi. Kareghẹhọ, oye họ oware nọ egwara na, emọ idhivẹri na, a ru.

O rẹ jẹ were idhivẹri na re a guegue ahwo. Ẹsejọ a re ru wọhọ nọ ae yọ ahwo nọ a whu no na. A re tube nwene urru rai re u do wọhọ irru ahwo nọ i whu no dede. Idhivẹri na e be rọ enẹ viẹ ahwo họ re a rọwo nnọ ahwo nọ a whu no na a gbẹ rrọ uzuazọ, inọ a rẹ sae ta ẹme kẹ enọ e rrọ uzuazọ. Ẹhẹ, idhivẹri na a bi ru ahwo buobu rọwo nnọ izi ahwo nọ a whu no na e rrọ oria jọ.

Fikiere ma rẹ yọrọ oma re Setan gbe idhivẹri riẹ a se omai ba ẹviẹhọ. Ebaibol  na e vẹvẹ omai unu nọ: ‘Setan ọ be gwọlọ nwene oma riẹ fihọ ẹnjẹle owoma, yọ ere idibo riẹ a bi ru re.’ (2 Ahwo Kọrint 11:14, 15) Rekọ uzẹme riẹ họ idhivẹri na e rrọ yoyoma. Joma ruẹ epanọ a be rọ dao oma ru re ma jọ wọhọ ae omarai.

Diẹse ahwo a be mae jọ wuhrẹ kpahe ozighi gbe owezẹ othọthọ gbe emama izi gbe izi ahwo nọ a whu no?— Kọ o gbẹ rọnọ evaọ ighe etẹlivisiọne jọ gbe isinima nọ a re rri hayo ekpehre usu eva obọ isukulu je no obọ ekpehre egbẹnyusu ze? Kọ eruo eware enana o rẹ lẹliẹ omai kẹle Ọghẹnẹ vi ere manikọ kẹle Ẹdhọ gbe idhivẹri riẹ vi ere? Ẹvẹ who roro?—

Ono who roro nnọ ọ gwọlọ re ma gaviezọ kẹ, je riwi eware iyoma?— Avro ọ riẹ hẹ, Setan gbe idhivẹri riẹ. Fikiere, eme u fo nọ tomẹ towhẹ a re ru?— U re fo re ma se, gaviezọ kẹ, je riwi eware nọ e rrọ ziezi kẹ omai gbe enọ i re fi obọ họ kẹ omai gọ Jihova. Kọ whọ sai roro kpahe eware iwoma enana jọ nọ u fo nọ ma re ru na?—

Ma te bi ru oware nọ u woma, ma re du dhozọ idhivẹri na ha. Jesu ọ ga vi ai, yọ a rẹ dhozọ riẹ. Ẹdẹjọ idhivẹri na a bo via kẹ Jesu nọ: “Whọ nyaze te raha omai?” (Mak 1:24) Nọ oke nọ Jesu ọ te rọ raha Setan gbe idhivẹri riẹ u te te no, eva e gbẹ te were omai?— Bọwo oke yena, o rẹ sai mu omai ẹro inọ Jesu ọ te thọ omai no obọ idhivẹri na otẹrọnọ ma si kẹle iẹe gbe Ọsẹ obọ odhiwu riẹ.

Joma se kpahe oware nọ u fo nọ ma re ru, eva 1 Pita 5:8, 9 gbe Jemis 4:7, 8.

[Uwoho nọ o rrọ ẹwẹ-obe avọ 57]

Oware uyoma vẹ enjẹle nana a ru?

[Uwoho nọ o rrọ ẹwẹ-obe avọ 58]

Fikieme ẹbẹbẹ ọ rọ rrọ otọakpọ enẹna vi epaọ anwẹdẹ?

[Uwoho nọ o rrọ ẹwẹ-obe avọ 60]

Eme ọ rẹ sae via nọ ma te bi riwi ughe ozighi?

[Uwoho nọ o rrọ ẹwẹ-obe avọ 61]

Eme u fo nọ ma re ru?