Uzou Avọ 12

Jesu O Wuhrẹ Omai Epanọ Ma Rẹ Lẹ

KỌ WHỌ be hae ta ẹme kẹ Jihova Ọghẹnẹ?— Ọ gwọlọ nọ whọ ta ẹme kẹe. Whọ tẹ be ta ẹme kẹ Ọghẹnẹ, a re se i olẹ. Jesu ọ jẹ ta ẹme kẹ Ọsẹ obọ odhiwu riẹ ẹsikpobi. Ẹsejọ o re kpohọ oria idhere re ọ ta ẹme kẹ Ọghẹnẹ. Okejọ, Ebaibol na e ta nọ, ‘Ọye ọvo o kpobọ ehru ugbehru nyae lẹ. Dede nọ owọwọ u te no, ọye ọvo ọ jọ etẹe.’—Matiu 14:23.

Diẹse whọ rẹ sai kpohọ re whẹ ọvo ọ lẹ se Jihova?— Whẹ ọvo ọ sae ta ẹme kẹ Jihova taure who te ti kiẹzẹ. Jesu ọ ta nọ: “Nọ whọ te [lẹ], who kpo eva ukpẹ ra, no who wuhu ẹthẹ ra no, lẹ kẹ Ọsẹ ra.” (Matiu 6:6) Kọ whọ be lẹ se Jihova kaso kaso taure who te ti kiẹzẹ?— Ere who re ru.

 Jesu ọ lẹ evaọ okenọ amọfa a jọ kugbe i re. Okenọ Lazarọs ogbẹnyusu riẹ o whu, Jesu ọ lẹ kugbe amọfa eva oria nọ a ki Lazarọs fihọ. (Jọn 11:41, 42) Yọ Jesu ọ jẹ hae lẹ re okenọ o te kokohọ kugbe ilele riẹ. Kọ who bi kpohọ iwuhrẹ nọ a rẹ jọ lẹ?— Ohwo nọ ọ kpako ọ rẹ jọ obei lẹ. Gaviezọ ziezi kẹ eme nọ ọ be ta keme ọ be ta ẹme kẹ Ọghẹnẹ fiki ra. Whọ vẹ sae ta nnọ “Ami” kẹ olẹ na. Kọ whọ riẹ oware nọ u dhesẹ re a ta nọ “Ami” eva ekuhọ olẹ?— U dhesẹ nọ olẹ na o were owhẹ. U dhesẹ nọ whọ rọwo kugbe olẹ na gbe nnọ whọ gwọlọ nọ oyena o jọ olẹ ra re.

Jesu ọ jẹ hae lẹ eva etoke emuọriọ re. O re yere Jihova kẹ emu na. Kọ whọ rẹ lẹ ẹsikpobi taure whọ tẹ te re emu ra?— U re woma re ma yere Jihova kẹ emu na taure ma te ti muhọ ẹre. Omọfa ọ sae lẹ wha tẹ be re emu kugbe. Rekọ ẹvẹ otẹrọnọ whẹ ọvo ọ be re emu? Hayo ẹvẹ otẹrọnọ whọ be re emu kugbe ahwo nọ a re yere Jihova ha?— O tẹ rrọ ere koyehọ whọ rẹ lẹ kẹ omobọ ra.

Kọ o gwọlọ nọ whọ rẹ lẹ do via ẹsikpobi? Hayo kọ Jihova ọ sai yo olẹ ra whọ tẹ make lẹ họ eva?— Ma sae ruẹ uyo  na no oware nọ o via kẹ Nehemaya ze. Ọ jọ ohwo nọ ọ jẹ gọ Jihova ọnọ o je ru iruo evaọ uwou Atagzazis Ovie Pasia. Ẹdẹjọ Nehemaya ọ jọ ọkọkora keme o yo nọ igbẹhẹ Jerusalẹm, okpẹwho ahwo riẹ, i kporo fihọ otọ no.

Okenọ ovie na ọ nọ Nehemaya oware nọ ọ jẹ rrọ ọkora, Nehemaya ọ tẹ kake lẹ họ eva. Nehemaya ọ tẹ ta oware nọ ọ jẹ rrọ ọkọkora kẹ ovie na, ọ tẹ yare iẹe sọ ọ sai kpohọ Jerusalẹm re ọ wariẹ bọ igbẹhẹ na. Eme ọ via?—

Ẹhẹ, Ọghẹnẹ o yo olẹ Nehemaya na. Ovie na ọ tẹ kẹe uvẹ nọ ọ sae nya! Ovie na ọ tẹ tubẹ kẹ Nehemaya ire buobu nọ a rẹ rọ bọ igbẹhẹ na. Fikiere Ọghẹnẹ ọ sae ghinẹ kiyo elẹ mai, ma tẹ make lẹ họ eva.—Nehemaya 1:2, 3; 2:4-8.

 Whaọ roro kpahe onana. Kọ okenọ whọ tẹ be lẹ who re go uzou kpotọ? Kọ who re kiguẹ? Ẹvẹ who roro?— Ẹsejọ Jesu o kiguẹ evaọ okenọ ọ jẹ lẹ. Oke ofa o dikihẹ. Yọ ẹsejọ ọ kpare uzou rri obehru nọ ọ jẹ lẹ, wọhọ epanọ o ru evaọ okenọ ọ lẹ fiki Lazarọs.

Fikiere, eme onana u dhesẹ?— Onana u dhesẹ nọ makọ who dikihẹ hayo who kiguẹ họ oware nọ u wuzou hu. Ẹsejọ u re woma re who go uzou kpotọ jẹ fae aro. Oke ofa o sae were owhẹ re who kiguẹ, wọhọ epanọ Jesu o ru na. Rekọ, kareghẹhọ, ma sae lẹ se Ọghẹnẹ evaọ oke kpobi evaọ uvo hayo aso, yọ o re yo kẹ omai. Oware nọ o jọ olẹ wuzou họ ma rẹ ghinẹ rọwo nnọ Jihova ọ be gaviezọ. Kọ whọ rọwo nnọ Jihova o bi yo elẹ ra?—

Eme ma rẹ ta evaọ olẹ mai se Jihova?— Ta kẹ omẹ: Whọ tẹ be lẹ, eme whọ rẹ ta kẹ Ọghẹnẹ?— Jihova ọ kẹ omai eware iwoma buobu, yọ u fo nọ ma re yere iei kẹ eware nana, ogbẹrọ ere?— Ma sai yere iei kẹ emu nọ ma be re. Kọ who yere i rie no ẹdẹjọ rọ kẹ uvo nọ o be rro, ire, gbe idodo iwowoma na?— Ọye ọ ma rai re.

Okejọ o jariẹ nọ ilele Jesu a rọ ta kẹe re o wuhrẹ ai epanọ a rẹ lẹ. Owuhrẹ Ologbo na o te ru ere, yọ o dhesẹ kẹ ai eware nọ e mae rrọ oja nọ a rẹ lẹ kẹ. Kọ whọ riẹ eware na?— Tọlọ Ebaibol ra re who rovie kpohọ Matiu  uzou avọ 6. Evaọ owọ avọ 9 rite 13, ma rẹ ruẹ oware nọ ahwo buobu a re se Ọsẹ Mai nọ Ọ Rrọ Obọ Odhiwu hayo Olẹ Olori na. Joma se i kugbe.

Ma jọ etenẹ wuhrẹ nọ Jesu ọ ta nọ ma rẹ lẹ kpahe odẹ Ọghẹnẹ. Ọ ta nọ ma lẹ nnọ a ru odẹ Ọghẹnẹ fo. Didi odẹ Ọghẹnẹ?— Odẹ riẹ họ Jihova, yọ u re woma re ma you odẹ na.

Orọ avivẹ, Jesu o wuhrẹ omai nnọ ma lẹ re Uvie Ọghẹnẹ o ze. Uvie nana u wuzou keme o te rọ udhedhẹ ziọ otọakpọ na je ru ei fihọ aparadase.

Orọ avesa, Owuhrẹ Ologbo na ọ ta nọ ma lẹ re a jọ otọakpọ na ru oreva Ọghẹnẹ wọhọ epanọ a rrọ obọ odhiwu ruẹ na. Ma tẹ be lẹ kẹ onana, koyehọ ma re ru oware nọ Ọghẹnẹ ọ gwọlọ.

Ofa, Jesu o wuhrẹ nọ ma lẹ kẹ emuore okpẹdẹ mai. Ọ tẹ jẹ ta nọ ma re wou unu kẹ Ọghẹnẹ evaọ okenọ ma te ru eware nọ e thọ. Ma vẹ yare Ọghẹnẹ nnọ ọ rọ vrẹ omai. Rekọ taure ọ tẹ te rọ vrẹ omai, ma rẹ rọ vrẹ amọfa nọ a ru omai thọ. Kọ oyena o lọhọ kẹ owhẹ eruo?—

Orọ urere, Jesu ọ ta nọ ma rẹ lẹ re Jihova Ọghẹnẹ ọ thọ omai no obọ omuomu na, Setan Ẹdhọ na. Enana kpobi e rrọ eware iwoma nọ ma rẹ lẹ Ọghẹnẹ kpahe.

Ma rẹ rọwo nnọ Jihova o bi yo elẹ mai. Taure ma tẹ te ta kẹe re o fi obọ họ kẹ omai, ma re yere iei. Eva e rẹ were iẹe ma te wo orọwọ kpahe eware nọ ma be lẹ kẹ na gbe okenọ ma tẹ yare iẹe kẹ emamọ eware. Ọ te kẹ omai eware eyena. Kọ whọ rọwo ere?—

A rẹ ruẹ ehrẹ iwoma efa kpahe olẹ eva Ahwo Rom 12:12; 1 Pita 3:12; gbe 1 Jọn 5:14.

[Uwoho nọ o rrọ ẹwẹ-obe avọ 67]

Jesu ọ lẹ okenọ ọye ọvo ọ jọ oria . . . gbe okenọ ọ jọ kugbe amọfa

[Uwoho nọ o rrọ ẹwẹ-obe avọ 68]

Fikieme whọ jẹ gaviezọ ziezi kẹ elẹ nọ a be jọ iwuhrẹ lẹ?

[Uwoho nọ o rrọ ẹwẹ-obe avọ 69]

Okevẹ whọ sae rọ lẹ olẹ họ eva, wọhọ epanọ Nehemaya o ru na?

[Uwoho nọ o rrọ ẹwẹ-obe avọ 70]

Eme whọ rẹ sae ta kẹ Ọghẹnẹ kpahe evaọ olẹ?