Uzou Avọ 21

Kọ U Fo Re Ma Se Eha Fiki Oware Jọ?

EME u dhesẹ re a se eha? Kọ whọ riẹ?— Oriruo jọ ọna. Kọ whọ dao oma no ẹdẹjọ re who ru oware jọ nọ whọ riẹ eru ziezi hi? Ma rehọ iẹe nọ whọ gwọlọ fa obọro. Hayo whọ gwọlọ wuhrẹ ebasikoro. Kọ ohwo jọ ọ hwẹ owhẹ inọ “Ha! Ha! Ha! Mẹ riẹ vi owhẹ”?— Ohwo ọyena o bi se eha.

Ẹvẹ o rẹ jọ owhẹ oma nọ amọfa a te ru ere? Kọ o rẹ were owhẹ?— Kọ ẹvẹ who roro nọ o rẹ jọ amọfa oma who te bi se eha?— Kọ u woma re whọ ta kẹ omọfa nnọ, “Mẹ riẹ vi owhẹ”?— Kọ ahwo nọ a re ru ere a rẹ were Jihova?—

Owuhrẹ Ologbo na ọ riẹ ahwo jọ nọ a re roro nọ a woma vi amọfa. A re se eha je rri amọfa kpobi vo. Fikiere, ẹdẹjọ Jesu o te gbiku kẹ ae ro dhesẹ kẹ ae epanọ o thọ te re a rọ omobọ rai se eha. Joma gaviezọ kẹ iku na.

Iku na e rrọ kpahe ohwo Farisi gbe omiazọhọ jọ. Ahwo Farisi yọ iwuhrẹ egagọ, enọ i je ru epaọ ẹsenọ a kiẹrẹe jẹ fo vi amọfa. Ohwo Farisi evaọ iku Jesu na o kpohọ etẹmpol Ọghẹnẹ evaọ Jerusalẹm nyae lẹ.

Jesu ọ ta nọ omiazọhọ jọ o kpohọ etẹmpol na nyae lẹ re. Imiazọhọ e rẹ were ahwo buobu hu. A roro nnọ imiazọhọ na e be gwọlọ fi ai iwhayo. Yọ uzẹme o rrọ inọ imiazọhọ buobu a re fi iwhayo.

Eva obọ etẹmpol na, ohwo Farisi na o te mu Ọghẹnẹ họ ẹlẹ  se enẹ: ‘O Ọghẹnẹ, me yere owhẹ inọ mẹ rrọ ọrahauzi wọhọ ahwo edekọ họ. Me re fi ahwo iwhayo hayo ru eware iyoma efa ha. Mẹ wọhọ omiazọhọ nọ ọ rrọ obei na ha. Mẹ ohwo okiẹrẹe. Mẹ rẹ se emu ba isiava ẹkpoka re me wo oke nọ me re ro roro kpahe owhẹ ziezi. Mẹ rẹ rehọ abọvo abakpe eware mẹ kẹ etẹmpol na.’ Ohwo Farisi na o ghine roro nọ o woma vi amọfa, ogbẹrọ ere?— Yọ ọ tubẹ ta ere kẹ Ọghẹnẹ dede.

Rekọ omiazọhọ na ọ rrọ ere he. Ọ tubẹ kpare ovao riẹ rri ehru hu nọ ọ jẹ lẹ. O dikihẹ ugbo avọ uzou riẹ nọ o gbe họ otọ. Izieraha omiazọhọ na e be dae gaga, ọ tẹ be tehe oma riẹ fiki uweri. Ọ dao oma ta kẹ Ọghẹnẹ kpahe epanọ o woma te he. Ukpoye, ọ lẹ nọ: ‘O Ọghẹnẹ, riohrọ mẹ ọrahauzi.’

Ọvẹ evaọ usu ezae ivẹ nana who roro nọ ọ were Ọghẹnẹ? Kọ ohwo Farisi na, ọnọ o roro nọ o woma gaga na? Hayo kọ omiazọhọ na, ọnọ ọ be vioja fiki izieraha riẹ?—

Jesu ọ riẹ nọ omiazọhọ na họ ọnọ ọ were Ọghẹnẹ. Fikieme? Jesu o ru rie i vẹ nọ: ‘Keme ohwo nọ ọ gwọlọ ru oma riẹ woma vi amọfa a ti ru ei oma vo. Rekọ ohwo nọ o wo omarokpotọ a rẹ te kpare iẹe kpehru.’—Luk 18:9-14.

Eme Jesu ọ be rọ iku riẹ na wuhrẹ?— O bi wuhrẹ nọ o thọ re ma roro nọ ma woma vi amọfa.  Ẹsejọhọ ma te rọ unu ta nọ ma woma vi amọfa ha, rekọ ma sae rọ uruemu mai dhesẹ nọ o wọhọ nọ ma woma vi ai. Kọ who dhesẹ oghẹrẹ uruemu utioye no ẹdẹjọ?— Roro kpahe Pita ukọ na.

Okenọ Jesu ọ ta kẹ ikọ na nọ aikpobi a te dhẹ siẹe ba okenọ a te mu ei, Pita o te se eha nọ: ‘Ahwo na kpobi a tẹ make dhẹ siọ owhẹ ba, mẹ rẹ dhẹ siọ owhẹ ba vievie he!’ Rekọ Pita o roro thọ. Ọ rehọ ẹro so oma riẹ hrọ. Ọ dhẹ siọ Jesu ba. Rekọ, o zihe ze, wọhọ epanọ ma ti wuhrẹ evaọ Uzou avọ 30 ọrọ obe nana.—Matiu 26:31-33.

Joma roro kpahe oriruo ọgbọna jọ. Ẹsejọhọ a nọ owhẹ avọ ọmọ eklase ra jọ enọ jọ eva obọ isukulu. Kọ ẹvẹ otẹrọnọ whọ sae kẹ iyo na ovavo, rekọ ọmọ ọdekọ na ọ riẹ iyo na ha? Oma o rẹ were owhẹ whọ tẹ riẹ iyo na. Kọ u re woma re whọ rehọ oma ra wawo ọnọ ọ riẹ tere he na?— Kọ u woma re who ru oma were omobọ ra rekọ re who ru oma vo ohwo ọdekọ na?—

Oye họ oware nọ ohwo Farisi na o ru. O se eha nnọ o woma vi omiazọhọ na. Rekọ Owuhrẹ Ologbo na ọ ta nọ ohwo Farisi na o roro thọ. Uzẹme o rrọ inọ ohwo jọ ọ sai ru oware woma vi omọfa. Rekọ oyena o nwani dhesẹ nọ o woma vi ohwo ọdekọ na ha.

Fikiere ma tẹ riẹ vi omọfa, kọ ma rẹ rọ fiki oyena se eha?— Roro kpahe iẹe. Kọ mai ọvo a ma ẹvori mai?— Ijo, Ọghẹnẹ họ ọnọ ọ kẹ omai omomọvo ẹvori. Yọ ohwo jọ o wuhrẹ omai eware buobu nọ ma riẹ na. O sae jọnọ ma se rai no obe ze. Hayo ohwo jọ ọ ta kẹ omai kpahe ae. Ma te tube wuhrẹ oware na kẹ omobọ mai dede, ẹvẹ ma ro ru ei?— Ẹhẹ, ma ru rie fiki ẹvori nọ Ọghẹnẹ ọ rọ kẹ omai.

 Ohwo ọ tẹ dao oma gaga, u re woma re whọ ta ẹme nọ ọ rẹ bọe ga. Ta kẹe nọ oware nọ o ru na o were owhẹ. Whọ sai tube fi obọ họ kẹe dede re o ru oware na woma viere. Ere whọ gwọlọ nọ amọfa a ru kẹ owhẹ, ogbẹrọ ere?—

Ahwo jọ a ga oma vi amọfa. Kọ ẹvẹ otẹrọnọ whọ ga oma vi oniọvo ra jọ? Kọ yọ oware nọ who re ro se eha?— Ijo. Emu nọ ma re họ oware nọ o be kẹ omai ẹgba. Kọ o gbẹ rọnọ Ọghẹnẹ họ ọnọ ọ be kẹ ọre gbe oso gbe eware efa re ekakọ e sae rro?— Fikiere Ọghẹnẹ ma re yere otẹrọnọ ma ga oma.—Iruẹru 14:16, 17.

Kọ o rẹ were omai nọ ma tẹ ruẹ ohwo nọ ọ be rọ oma riẹ se eha?— Joma kareghẹhọ eme Jesu na: ‘Epanọ whọ gwọlọ nọ amọfa a ru kẹ owhẹ, ru epọvo na kẹ ai re.’ Ma te ru ere, ma rẹ jọ wọhọ ohwo Farisi na vievie he ọnọ ọ jẹ rọ oma riẹ se eha evaọ iku nọ Owuhrẹ Ologbo na o gbe na.—Luk 6:31.

 Okejọ o jariẹ nọ ohwo jọ o se Jesu owoma. Kọ Owuhrẹ Ologbo na ọ ta nọ, ‘E, mẹ rrọ wowoma’?— Ijo. Ukpoye, ọ ta nọ: ‘Uvumọ ohwo o woma ha, ajokpa omọvo, Ọghẹnẹ.’ (Mak 10:18) Dede nọ Owuhrẹ Ologbo na ọ rrọ gbagba, ọ rehọ oma riẹ se eha ha. Ukpoye, ọ rehọ ujiro kpobi kẹ Ọsẹ riẹ, Jihova.

Fikiere, kọ ohwo jọ ọ riẹ nọ ma rẹ sai ro se eha?— E. Ma rẹ sae rọ Ọnọma mai se eha, Jihova Ọghẹnẹ. Ma tẹ ruẹ emamọ ọre nọ o bi kie diwi hayo oware igbunu emama ofa jọ, ma sae ta kẹ ohwo jọ nọ, ‘Ọghẹnẹ igbunu mai, Jihova, ọye ọ ma riẹ!’ Joma hae ta kpahe eware ilogbo kpobi nọ Jihova o ru no gbe enọ o bi ti ru evaọ obaro.

Se ẹme nọ Ikereakere na e ta kpahe eha ise, je wuhrẹ epanọ ma rẹ rọ whaha omobọ mai nọ ma re ro se eha: Itẹ 16:5, 18; Jerimaya 9:23, 24; 1 Ahwo Kọrint 4:7; gbe 13:4.

[Uwoho nọ o rrọ ẹwẹ-obe avọ 113]

Fikieme eva omiazọhọ na e rọ were Ọghẹnẹ vi ọrọ ohwo Farisi na?

[Uwoho nọ o rrọ ẹwẹ-obe avọ 115]

Kọ whọ tẹ riẹ vi omọfa yọ who woma vi ei?

[Uwoho nọ o rrọ ẹwẹ-obe avọ 115]

Fikieme o jẹ thọ re ma se eha otẹrọnọ ma ga oma vi omọfa?

[Uwoho nọ o rrọ ẹwẹ-obe avọ 116]

Eme ọmọzae nana o bi ro se eha na?