Uzou Avọ 19

Kọ U Kiehọ Re A Họre?

KỌ WHỌ riẹ emezae hayo emetẹ jọ nọ i re fu igabọ je dhesẹ ogaga?— Kọ o rẹ were owhẹ re whọ jọ kugbe ai? Hayo kọ o rẹ mae were owhẹ re whọ jọ kugbe ohwo nọ ọ rrọ wowou gbe ọnọ ọ rẹ gwọlọ udhedhẹ?— Owuhrẹ Ologbo na ọ ta nọ: ‘Eva e were enọ i re ru udhedhẹ, keme a re ti se ai “emọ Ọghẹnẹ.” ’—Matiu 5:9.

Rekọ ẹsejọ ahwo jọ a re ru eware nọ e rẹ dha omai eva, ogbẹrọ ere?— Ma rẹ sae gwọlọ ru ai kele. Onana o via kẹ ilele Jesu evaọ okejọ nọ a jọ kugbe Jesu je kpohọ Jerusalẹm. Jomẹ ta kpahe iẹe kẹ owhẹ.

Nọ a te oria jọ no, Jesu o te vi ilele riẹ jọ haro kpohọ iwhre Sameria jọ re a gwọlọ oria nọ a ti wohọ. Rekọ ahwo iwhre na a gwọlọ e rae he, keme ahwo Sameria a wo egagọ efa. Yọ ohwo nọ o re kpohọ Jerusalẹm nyae gọ kpobi e rẹ dhae eva.

 Otẹrọnọ whẹ a ru ere na, eme whọ hai ru? Kọ eva e hae dha owhẹ? Kọ whọ hae gwọlọ ru ai kele?— Ere Jemis gbe Jọn ilele na a gwọlọ ru. A ta kẹ Jesu nọ: ‘Kọ whọ gwọlọ re ma lẹ kẹ erae no odhiwu ze re i kpe ai?’ Agbẹta nọ Jesu o ro se ai Emọ Egbrara na! Rekọ Jesu ọ ta kẹ ae nnọ u fo re a ru amọfa ere he.—Luk 9:51-56; Mak 3:17.

Uzẹme o rrọ inọ ẹsejọ ahwo a re ru omai eva dha. Emaha efa e sae ta nnọ ma jọ aroza rai hi. A sae tubẹ ta nọ: “Ma gwọlọ owhẹ evaọ etenẹ hẹ.” O tẹ via ere, eva e rẹ dha omai, ogbẹrọ ere? O rẹ wọhọ nọ ma dhesẹ oware kẹ ai. Kọ u kiehọ ere?—

Kọ whọ gbẹ tọlọ Ebaibol ra? Joma rovie kpohọ Itẹ uzou avọ 24, owọ avọ 29. Etẹe o se nnọ: ‘Whọ ta nọ: “Me re ru ei epanọ o ru omẹ hẹ. Me re ru ei kele wọhọ epanọ iruo riẹ e rrọ.” ’

Eme oria nana o be ta kẹ owhẹ na?— O be ta nnọ ma ru ahwo kele he. Ma re ru ohwo gaga ha fikinọ o ru omai gaga. Kọ ẹvẹ otẹrọnọ ohwo jọ o bi se owhẹ abọ ohọre? Ọ sae tubẹ la owhẹ eka dede re eva e dha owhẹ. Ọ sae hwẹ owhẹ jẹ ta nọ whọ be dhozọ. Kọ o te se owhẹ ọyẹlẹ? Eme who re ru? Kọ u fo re whọ ghinẹ họre?—

Joma wariẹ rri ẹme nọ Ebaibol na e ta. Rovie kpohọ Matiu uzou avọ 5, owọ avọ 39. Jesu ọ jọ etẹe ta nnọ: ‘Who mudhe kẹ ọnọ o yoma ha, rekọ ohwo ọ tẹ tehe owhẹ abova obọze, kẹe abova ọdekọ.’ Eme who roro nnọ Jesu ọ be jọ etenẹ ta na? Kọ ọ be ta nnọ otẹrọnọ ohwo jọ ọ tehe owhẹ abova jọ, whọ rẹ kẹe uvẹ re ọ tehe owhẹ abova ọdekọ?—

 Ijo, ere Jesu ọ be ta na vievie he. Ẹtehabọ o wọhọ ọgo nọ a bọo ohwo ho. O wọhọ ẹsenọ a re gele ohwo. Ohwo ọ rẹ sae tehe omai re ma muhọ ẹhọre. Ọ gwọlọ ru omai eva dha. Yọ otẹrọnọ eva e dha omai je gele ohwo na, eme ọ rẹ via?— Ẹsejọhọ ohọre u ti muhọ.

Rekọ Jesu ọ gwọlọ nọ ilele riẹ a họre he. Fikiere ọ tẹ ta nọ otẹrọnọ ohwo jọ ọ tehe omai, ma rẹ tehe iẹe kele he. Ma rẹ dheva re ma mu ohọre họ họ. Ma te ru ere, yọ ma bi dhesẹ nọ ma wo ohẹriẹ no ọnọ o muọ ohọre na họ na ha.

Ẹbẹbẹ ọ tẹ be tha, eme who roro nọ o mai woma nọ ma re ru?— Ma rẹ nya no etẹe. Ohwo ọdekọ na ọ sai gbe gele owhẹ unuẹse jọ. Rekọ etẹe u ti no kuhọ. Whọ tẹ nya siẹe ba, orọnikọ  u dhesẹ nnọ whẹ yọ ọyẹlẹ hẹ. U dhesẹ nọ whọ rrọ gaga kẹ oware nọ u kiehọ.

Kọ ẹvẹ otẹrọnọ who lele i rie ruọ ohọre who je kpe ohwo na? Eme ọ rẹ via?— Ohwo nọ who kpe na ọ sai koko egbẹnyusu riẹ jọ họ bru owhẹ ze. A sae tubẹ rọ ọkpọ fa owhẹ hayo rọ amagha duwu owhẹ dede. Kọ whọ gbẹ ruẹ oware nọ Jesu ọ gbẹ rọ gwọlọ nọ ma họre he na?—

Kọ eme ma re ru ma tẹ ruẹ amọfa nọ a be họre? Kọ ma rẹ jọ abọ jọ?— Ebaibol na e ta oware nọ u kiehọ kẹ omai. Rovie kpohọ Itẹ uzou avọ 26, owọ avọ 17. O ta nọ: “Ohwo nọ ọ rẹ fialoma ruọ ẹwhọ nọ o te rie i hi, ọ wọhọ ohwo nọ o re kru arakọ nọ ọ be nyavrẹ gheghe ezọ.”

Eme ọ rẹ via who te kru arakọ ezọ? Ozọ na o rẹ da arakọ na, yọ ọ sae gbọku owhẹ, ogbẹrọ ere? Epanọ arakọ na ọ be thuẹ te, ere who re kru ezọ na ga te yọ ere eva e rẹ dha arakọ na ga te re. Who te si obọ no i, ẹsejọhọ ọ te rro owhẹ gaga. Rekọ, whọ sai dikihẹ etẹe kru ezọ riẹ bẹdẹ bẹdẹ?—

Whaọ, oghẹrẹ ẹbẹbẹ otiọye na ma rẹ ro otẹrọnọ ma dhunu họ ẹwhọ amọfa. Ma sae riẹ ohwo nọ o mu ohọre na họ hayo oware nọ a be rọ họre he. O sae jọ nọ a bi kpe ohwo na jọ, rekọ ẹsejọhọ fikinọ o tho  oware mi ohwo ọdekọ na. Ma te fi obọ họ kẹe, yọ oji ma bi fi obọ họ kẹ na. Kọ u woma re a fi obọ họ kẹ oji?

Fikiere, eme who re ru whọ tẹ nya ku ohọre?— O tẹ rrọ obọ isukulu, whọ sae dhẹ nyae ta kẹ iticha. O gbẹ rrọ obọ isukulu hu, whọ sai se ọsẹ hayo oni ra hayo iporisi. Ẹhẹ, makọ okenọ amọfa a tẹ be gwọlọ họre, ma re ru udhedhẹ.

Emamọ ilele Jesu a rẹ dawo ẹgba rai kpobi re a whaha ohọre. Enẹ ma re ro dhesẹ nọ ma dikihẹ gaga rọkẹ oware nọ u kiehọ. Ebaibol na e ta nnọ olele Jesu ‘ọ rẹ họre he, rekọ ọ rẹ jọ dhedhẹ kugbe ahwo kpobi.’—2 Timoti 2:24.

Joma rri emamọ ehrẹ efa nọ i ti fi obọ họ kẹ omai whaha ohọre: Ahwo Rom 12:17-21; gbe 1 Pita 3:10, 11.

[Uwoho nọ o rrọ ẹwẹ-obe avọ 102]

Eme Jemis gbe Jọn a gwọlọ ru ro ru ahwo Sameria kele?

[Uwoho nọ o rrọ ẹwẹ-obe avọ 104]

Eme ma re ru otẹrọnọ ohwo jọ ọ gwọlọ se omai abọ ohọre?

[Uwoho nọ o rrọ ẹwẹ-obe avọ 105]

Ẹvẹ ohọre amọfa nọ ma re du oma họ o rọ wọhọ ezọ arakọ nọ a re kru? A rẹ sae nwa owhẹ oma, fikiere who ru ei hi!

[Uwoho nọ o rrọ ẹwẹ-obe avọ 106]

Whọ tẹ ruẹ ahwo nọ a be họre eme who re ru?