Uzou Avọ 20

Kọ Whọ Rẹ Gwọlọ Karo Ẹsikpobi?

KỌ WHỌ riẹ ohwo jọ nọ ọ rẹ gwọlọ karo ẹsikpobi?— Ọ sai gele ohwo jọ no re ọ jọ obaro evaọ uhie. Kọ whọ ruẹ oyena no ẹdẹjọ?— Owuhrẹ Ologbo na ọ tubẹ ruẹ ekpako nọ e be dao oma re a jọ obaro, hayo eria nọ e mai wo uzou dede. Yọ o were riẹ hẹ. Joma ruẹ oware nọ o via.

Ebaibol na e ta kẹ omai nnọ a zizie Jesu kpohọ ehaa-emuore ologbo jọ eva uwou ohwo Farisi jọ, ọnọ ọ jọ osu ologbo egagọ. Nọ Jesu o te etẹe no, o te bi rri erara efa nọ e be rueva a vẹ keria emamọ eria. O te gbiku jọ kẹ enọ a zizie na. Kọ whọ gwọlọ yo iku na?—

 Jesu ọ ta nọ: ‘Okenọ ohwo jọ o te zizie owhẹ kpohọ ehaa orọo, whọ keria oria nọ o mai woma ha.’ Kọ whọ riẹ oware nọ Jesu ọ rọ ta ere?— Ọ ta nnọ o sae jọ nọ a zizie ohwo jọ nọ ọ rro vi owhẹ. Fikiere, wọhọ epanọ whọ be jọ uwoho na ruẹ na, ohwo nọ o se ehaa na ọ vẹ nya ze jẹ ta nọ: ‘Kpama kẹ ohwo nana, re who kpohọ obei.’ Ẹvẹ oma o rẹ jọ ọrara na?— Oma o te vo ẹe keme erara edekọ e te rue riẹ nọ o bi kpohọ oria nọ u kpotọ na.

Jesu o bi dhesẹ nọ u kiehọ họ re ma hae gwọlọ oria nọ o mai kpehru. Fikiere ọ tẹ ta nọ: ‘A te zizie owhẹ kpohọ ehaa orọo, nyae keria oria nọ o mai kpotọ. Re ọnọ o zizie owhẹ ọ nya ze ọ vẹ te ta nọ, “Ogbẹnyusu, kpohọ oria nọ o mai kpehru.” Who ve ti wo ọghọ evaọ aro erara edekọ nọ who bi kpohọ oria uwoma na.’—Luk 14:1, 7-11.

Kọ who wo otoriẹ iku Jesu na?— Joma kẹ oriruo jọ re ma riẹ sọ who wo otoriẹ riẹ. Rehọ iẹe nọ whọ be ruọ omoto jọ nọ ahwo a vọ. Kọ who re hrou oma re whọ keria re ohwo nọ ọ kpako vi owhẹ o dikihẹ?— Kọ who te ru ere o rẹ were Jesu?—

Ohwo jọ ọ rẹ sae ta nọ oware nọ ma ru u muẹme kẹ Jesu hu. Rekọ ere who roro?— Okenọ Jesu ọ jọ ehaa ilogbo yena eva uwou ohwo Farisi na, o je rri ahwo na nọ a je kpohọ oria ẹkeria rai. Kọ who gbe roro nọ epọvo na re o wo isiuru kpahe oware nọ ma bi ru nẹnẹ?— Enẹna nọ Jesu ọ rrọ obọ odhiwu na, ọ ghinẹ rrọ emamọ oria nọ ọ rẹ jọ rri omai.

 Ohwo ọ tẹ gwọlọ karo, o sae wha ẹbẹbẹ ze. Ẹsibuobu a re sikẹ, eva e vẹ dha ahwo. Onana o sae via ẹsejọ evaọ okenọ emaha ọvo e tẹ ruọ omoto. A tẹ nwani rovie ethẹ omoto na no, emọ na i ve hrowo oma re a jọ ohwo ọsosuọ. A gwọlọ egbara nọ e mai woma, enọ e kẹle inwido. O tẹ via ere, eme ọ sai no i ze?— Ẹhẹ, a sae dheva kẹ ohwohwo.

Re a gwọlọ jọ ohwo ọsosuọ o sae wha ebẹbẹ ilogbo ze. O tubẹ wha ẹbẹbẹ ze evaọ udevie ikọ Jesu dede. Wọhọ epanọ ma jọ Uzou avọ 6 obe nana wuhrẹ, a jẹ vro-avro kpahe ohwo nọ ọ mae rro. Kọ eme Jesu o ru?— Ọ kpọ rai vi. Rekọ uwhremu na a te mu avro ọfa họ. Joma ruẹ epanọ u ro muhọ.

Ikọ na, gbe amọfa, a bi lele Jesu kperẹ evaọ obọ okpẹwho Jerusalẹm orọ urere kpobi. Jesu ọ  be hae ta kẹ ae kpahe Uvie riẹ, fikiere Jemis avọ Jọn a te je roro kpahe epanọ a re ro lele iei su wọhọ ivie. A tubẹ ta kpahe iẹe kẹ oni rai no, Salomi. (Matiu 27:56; Mak 15:40) Fikiere nọ a rrọ edhere bi kpohọ Jerusalẹm, Salomi o te bru Jesu ze, rehọ uzou kpotọ kẹe, jẹ yare nọ o ru ọghọ jọ kẹe.

Jesu ọ tẹ nọ e nnọ: ‘Eme whọ gwọlọ?’ O te yo nnọ ọ gwọlọ re Jesu o ru emezae riẹ keria kẹle iẹe evaọ Uvie riẹ, ọjọ evaọ obọze riẹ ọdekọ evaọ ẹkpẹlobọ riẹ. Whaọ, nọ ikọ ikpe edekọ a yo oware nọ Jemis avọ Jọn a ta kẹ oni rai nọ ọ yare, ẹvẹ who roro nọ oma u ru rai?—

A dheva kẹ Jemis avọ Jọn gaga. Fikiere Jesu ọ tẹ kẹ ikọ riẹ kpobi emamọ ohrẹ jọ. Jesu ọ ta kẹ ae nọ isu erẹwho na a rẹ gwọlọ  ru oma ruaro. A rẹ gwọlọ jọ ọkwa okpehru nọ ahwo kpobi a je yo ẹme kẹ ae. Rekọ Jesu ọ ta kẹ ilele riẹ nọ a rẹ jọ ere he. Ukpoye, Jesu ọ ta nọ: ‘Ohwo nọ ọ gwọlọ jọ aro evaọ udevie rai, ọ rẹ jọ ọrigbo rai.’ Roro oyena!—Matiu 20:20-28.

Kọ whọ riẹ oware nọ ọrigbo o re ru?— Ọ rẹ gba odibo kẹ amọfa, orọnikọ o re rẹro nọ amọfa a ru iruo kẹe he. Ọ rẹ jọ oria nọ o mai kpotọ, orọnikọ oria ọsosuọ họ. O re ru wọhọ ọnọ ọ mai kpotọ, orọnikọ ọnọ ọ mai wo uzou hu. Yọ kareghẹhọ, Jesu ọ ta nọ ọnọ ọ gwọlọ jọ aro o re ru wọhọ ọrigbo kẹ amọfa.

Kọ eme who roro nọ oyena u dhesẹ kẹ omai?— Kọ ọrigbo o re lele olori si ikẹ kpahe ohwo nọ ọ rẹ keria agbara nọ ọ mai woma? Hayo kọ o re si ikẹ kpahe ohwo nọ ọ te kake re emu? Ẹvẹ who roro?— Jesu ọ ta nọ ọrigbo o re fi olori riẹ họ aro riẹ.—Luk 17:7-10.

Fikiere ukpenọ ma rẹ gwọlọ jọ oria ọsosuọ, eme ma re ru?— Ma rẹ jọ wọhọ ọrigbo kẹ amọfa. Yọ oyena u dhesẹ nọ ma re fi amọfa họ aro mai. U dhesẹ nọ ma re roro nọ amọfa a wo uzou vi omai. Kọ whọ sai roro idhere nọ whọ rẹ sai ro fi amọfa họ oria ọsosuọ?— Rovie zihe kpohọ ẹwẹ-obe avọ 40 gbe 41 re whọ wariẹ rri idhere jọ nọ who re ro fi amọfa họ oria ọsosuọ ẹkwoma iruo nọ who re ru kẹ ae.

Whọ te kareghẹhọ nnọ Owuhrẹ Ologbo na o fi amọfa họ aro riẹ ẹkwoma iruo nọ o ru kẹ ae. Owọwọ urere nọ ọ raha kugbe ikọ riẹ, o tube ruwẹ jẹ wozẹ awọ ikọ riẹ. Ma te fi amọfa họ aro re ẹkwoma iruo nọ ma re ru kẹ ae, ma re ti ru eva were Owuhrẹ Ologbo na gbe Ọsẹ riẹ, Jihova Ọghẹnẹ.

Joma se eria Ebaibol efa nọ e ta udu họ omai awọ re ma fi amọfa họ aro mai: Luk 9:48; Ahwo Rom 12:3; gbe Ahwo Filipai 2:3, 4.

[Uwoho nọ o rrọ ẹwẹ-obe avọ 107]

Kọ whọ ruẹ ahwo nọ a be gwọlọ jọ oria ọsosuọ no?

[Iwoho nọ e rrọ ẹwẹ-obe avọ 108, 109]

Didi oware Jesu o je wuhrẹ evaọ okenọ o gbiku kpahe enọ e jẹ keria egbara nọ e mai woma, hayo erọ ọsosuọ?

[Uwoho nọ o rrọ ẹwẹ-obe avọ 110]

Didi oware Salomi ọ yare Jesu, kọ eme o no rie ze?