Uzou Avọ 18

Kọ Whọ Rẹ Kareghẹhọ Ta Nnọ Whẹ Kobọ Iruo?

KỌ WHỌ re emu no nẹnẹ?— Kọ whọ riẹ ohwo nọ o there emu na?— Ẹsejọhọ oni ra hayo omọfa o there emu na, rekọ fikieme ma je yere Ọghẹnẹ kẹ emu na?— Keme Ọghẹnẹ họ ọnọ o ru emu na rro. Rekọ, ma re je yere ohwo nọ o there emu na hayo ọnọ ọ wọ riẹ kẹ omai.

Ẹsejọ o rẹ thọrọ omai ẹro re ma yere ohwo nọ o ru oware ezi kẹ omai, ogbẹrọ ere? Okenọ Owuhrẹ Ologbo na ọ jọ otọakpọ, emoti jọ e jariẹ nọ e kẹ riẹ uyere he.

Kọ whọ riẹ oware nọ ọmoti ọ rrọ?— Ọmoti yọ ohwo nọ o wo ẹyao nọ a re se oti. Ẹyao na ọ sai ru abọjọ oma ohwo na bru no. Okenọ Jesu ọ jọ otọakpọ, emoti e rẹ rria thabọ no ahwo. Yọ ọmoti ọ tẹ ruẹ ohwo nọ ọ be nya ze, o re bo via re ọ vẹvẹ ohwo na unu nnọ a dikihẹ ugbo. A je ru ere re amọfa a se ae ba ẹkẹle re a siọ ẹyao ọmoti na ba ewo.

Jesu ọ jọ wowou gaga kẹ emoti. Ẹdẹjọ, nọ o je kpohọ Jerusalẹm, Jesu ọ gwọlọ nya udevie ẹwho ọsese jọ vrẹ. Nọ ọ kẹle ẹwho na no, emoti ikpe e tẹ lahwe te rue riẹ. A yo no inọ Jesu o wo ogaga no obọ Ọghẹnẹ ze nọ o re ro siwi oghẹrẹ ẹyao kpobi.

Emoti na e nya kẹle Jesu hu. A dikihẹ ugbo. Rekọ a rọwo nnọ Jesu ọ sai si oti rai no. Fikiere nọ emoti na e ruẹ  Owuhrẹ Ologbo na, a te bo se i nnọ: ‘Jesu, Owuhrẹ, fi obọ họ kẹ omai!’

Kọ ohrọ ahwo nọ a be mọ o rẹ re owhẹ?— O rẹ re Jesu. Ọ riẹ epanọ o rẹ da te re a jọ ọmoti. Fikiere o te yo kẹ ae nnọ: ‘Wha nyai dhesẹ oma rai kẹ izerẹ na.’—Luk 17:11-14.

Fikieme Jesu ọ rọ ta kẹ ae nnọ a nya re a dhesẹ oma kẹ izerẹ na? O ru ere fiki uzi nọ Jihova ọ rọ kẹ ahwo Riẹ kpahe emoti. Uzi nana o ta nọ ozerẹ Ọghẹnẹ o re rri oma ọmoti na. Ozerẹ na họ ọnọ ọ rẹ ta kẹ ọmoti na nnọ ẹyao riẹ o kpo no. Okenọ oma o tẹ gae no, ọ sae wariẹ lele ahwo nọ oma rai o ga rria.—Iruo-Izerẹ 13:16, 17.

 Rekọ ẹyao emoti enana o ti kpo ho. Kọ a nya bru ozerẹ na wọhọ epanọ Jesu ọ ta kẹ ae na?— E, ere a nwani ru. U muẹro nọ ezae enana a rọwo nnọ Jesu o ti siwi ẹyao rai no. Eme ọ via?

Okenọ a jọ edhere bi bru ozerẹ na, ẹyao rai o te kpo. Ovioma rai o tẹ ruẹhọ. Oma rai o ga no! Ẹyao rai o kpo fikinọ a rọwo ogaga Jesu. Dai roro oghọghọ rai! Rekọ eme a hai ru ro dhesẹ uyere rai? Eme whọ hai ru?—

Omọvo rai jọ o te zihe bru Jesu. Ọ tẹ be kẹ Jihova oruaro, be ta eme iwoma kpahe Ọghẹnẹ. Oware ezi o ru na keme obọ Ọghẹnẹ ogaga nọ a ro siwi iei na u no ze. Ọzae na o te je kie fihọ aro Owuhrẹ Ologbo na je yere iei. Oware nọ Jesu o ru o da riẹ ẹro fia.

Kọ ẹvẹ kpahe ezae izii edekọ na? Jesu ọ nọ inọ: ‘Kọ ogbẹrọnọ emoti ikpe ẹyao rai o kpo? Kọ izii edekọ e rrọ? Kọ ọvuọvo o zihe ze te kẹ Ọghẹnẹ orro?’

Ẹhẹ, omọvo evaọ udevie ikpe na ọ kẹ Ọghẹnẹ orro, hayo ujiro, je zihe ze ti yere Jesu. Yọ ohwo nana yọ ohwo Sameria, ohwo  orẹwho ofa. Ezae izii edekọ a yere Ọghẹnẹ hẹ, yọ a yere Jesu gbe he.—Luk 17:15-19.

Ono evaọ usu ezae na who tho? Ma gwọlọ jọ wọhọ ohwo Sameria na, ogbẹrọ ere?— Fikiere okenọ ohwo o te ru oware ezi kẹ omai, eme ma rẹ kareghẹhọ ru?— U fo nọ ma re yere iei. O rẹ thọrọ ahwo ẹro re a ta nọ whẹ kobọ iruo. Rekọ u woma re ma ta nọ whẹ kobọ iruo. Ma te ru ere, eva e rẹ were Jihova Ọghẹnẹ gbe Ọmọ riẹ, Jesu.

Who te roro kpahe iẹe, whọ te kareghẹhọ nọ ahwo a ru eware buobu kẹ owhẹ no. Wọhọ oriruo, whọ mọ no ẹdẹjọ?— Ẹsejọhọ whọ re mọ te emoti ikpe na ha, rekọ ẹsejọhọ ekpahe i kpe owhẹ gaga no ẹdẹjọ hayo eva e jẹ da owhẹ. Kọ ohwo jọ ọ rọ ẹro te owhẹ?— Ẹsejọhọ a kẹ owhẹ imu hayo a ru eware efa kẹ owhẹ. Kọ eva e were owhẹ inọ a fi obọ họ ru oma ga owhẹ?—

Ọzae Sameria na o yere Jesu fikinọ o ru oma gae, yọ onana o lẹliẹ eva were Jesu. Kọ who roro nọ eva e te were ọsẹ hayo oni ra who te digwẹ kẹ ae evaọ okenọ a te ru eware kẹ owhẹ?— E, eva e te were ae.

Ahwo jọ a re ru eware kẹ owhẹ kẹdẹ kẹdẹ hayo koka koka. O sae jọnọ re a ru eware enana yọ iruo rai. Eva e rẹ sae tubẹ were ae nnọ a bi ru ai. Rekọ o sae thọrọ owhẹ ẹro re who  yere ai. Iticha isukulu ra ọ sai ru iruo gaga re o fi obọ họ kẹ owhẹ wuhrẹ. Iruo riẹ o bi ru na. Rekọ eva e te were iẹe who te yere iei fiki obọ nọ o bi fihọ kẹ owhẹ wuhrẹ.

Ẹsejọ ahwo a re ru eware esese kẹ owhẹ. Kọ ohwo jọ o rovie ẹthẹ kẹ owhẹ ro eva uwou no ẹdẹjọ? Hayo kọ ohwo jọ ọ wọ emu fihọ emẹjẹ kẹ owhẹ no? U re woma re ma ta nọ whẹ kobọ iruo rọ kẹ eware esese eyena.

Ma tẹ kareghẹhọ yere ahwo evaọ otọakpọ, ma te kareghẹhọ vi ere re ma yere Ọsẹ obọ odhiwu mai. Yọ dai roro epanọ eware nọ ma re ro yere Jihova i bu te! Ọ kẹ omai uzuazọ gbe eware iwoma kpobi nọ i bi ru uzuazọ were na. Fikiere ma wo ẹjiroro kpobi nọ ma rẹ rọ kẹ Ọghẹnẹ oruaro ẹkwoma ẹme ezi nọ ma rẹ ta kpahe iẹe kẹdẹ kẹdẹ.

Kpahe ẹme uyere okẹ, se Olezi 92:1; Ahwo Ẹfẹsọs 5:20; Ahwo Kọlọsi 3:17; gbe 1 Ahwo Tẹsalonika 5:18.

[Uwoho nọ o rrọ ẹwẹ-obe avọ 98]

Eme Jesu ọ be ta kẹ emoti nana nọ a ru?

[Uwoho nọ o rrọ ẹwẹ-obe avọ 99]

Eme ọmoti nana ọ kareghẹhọ ru?

[Uwoho nọ o rrọ ẹwẹ-obe avọ 100]

Ẹvẹ whọ sae rọ raro kele ọmoti nọ o zihe bru Jesu ze na?

[Iwoho nọ e rrọ ẹwẹ-obe avọ 101]

Fikieme u je wo uzou re ma kareghẹhọ ta nọ whẹ kobọ iruo?