Uzou Avọ 30

Obufihọ Nọ Ma Re Ro Fi Ozodhẹ Mai Kparobọ

KỌ O rrọ lọlọhọ kẹ owhẹ re whọ gọ Jihova?— Owuhrẹ Ologbo na ọ ta nọ o te lọhọ họ. Evaọ aso taure a te ti kpe ei, Jesu ọ ta kẹ ilele riẹ nọ: “Re akpọ na o te mukpahe owhai, wha riẹ nọ o mukpahe omẹ no re o te mukpahe owhai.”—Jọn 15:18.

Pita ọ rọ obọ sa udu inọ ọ te nya siọ Jesu ba ha, rekọ Jesu ọ ta nọ evaọ aso ọyena Pita ọ te se isiasa inọ ọ riẹ riẹ e he. Yọ nwanọ ere Pita o ru! (Matiu 26:31-35, 69-75) Ẹvẹ oware utioye na o sae rọ via?— O via fikinọ ozọ u mu Pita, yọ ere ozọ u mu ikọ edekọ na re.

Kọ whọ riẹ oware nọ o lẹliẹ ozọ mu ikọ na?— Oware jọ o riẹ nọ u wo uzou gaga nọ a ru hu. Ma te wuhrẹ kpahe onana, u ti fi obọ họ kẹ omai gọ Jihova, makọ oware nọ ohwo jọ ọ ta hayo ru omai kpobi. Rekọ ma gwọlọ kake kiẹ oware nọ o via evaọ aso urere nọ Jesu ọ raha kugbe ikọ riẹ na.

A kaki ru ehaa Ọnyavrẹ na kugbe. Onana yọ emuore obọdẹ nọ a re ru kukpe kukpe re o kareghẹhọ ahwo Ọghẹnẹ kpahe usiwo rai no igbo Ijipti. Kẹsena Jesu o te muọ emu obọdẹ ọfa họ kugbe ai. Ma te ta ẹme kpahe iẹe evaọ uzou jọ evaọ obaro je dhesẹ epanọ emu ọyena o re ro fi obọ họ kẹ omai kareghẹhọ Jesu. Nọ a re emu ọyena no jẹ ta udu họ ikọ riẹ awọ no, Jesu ọ tẹ rehọ ai kpohọ ọgbọ Getsemane. Onana yọ oria nọ a kpohọ unuẹse buobu no.

 Jesu ọvo o te kpohọ ọgbọ na nya e lẹ. Ọ tẹ jẹ ta kẹ Pita, Jemis, gbe Jọn inọ a lẹ. Rekọ a te kie ruọ owezẹ. Isiasa Jesu ọvo ọ nya e lẹ, yọ isiasa na o zihe ze te ruẹ Pita gbe ikọ edekọ na nọ a be wezẹ! (Matiu 26:36-47) Kọ whọ riẹ oware nọ u je fo nọ a rẹ jaja aro vi jẹ lẹ?— Joma ta ẹme kpahe onana.

Judas Iskariọt ọ jọ ehaa Ọnyavrẹ na kugbe Jesu gbe ikọ edekọ na evaọ owọwọ oyena. Whọ tẹ kareghẹhọ, Judas o mu uji họ etho no. Whaọ o zihe ruọ ovivie no. Ọ riẹ oria nọ Jesu avọ ikọ riẹ a kokohọ unuẹse buobu no evaọ ọgbọ Getsemane na. Fikiere Judas ọ tẹ rọ isoja ziọ etẹe ti mu Jesu. Nọ a te etẹe, Jesu ọ tẹ nọ ae nnọ: ‘Ono wha be gwọlọ?’

Isoja na a te yo nọ: “Jesu.” Ozọ u mu Jesu hu, fikiere o te yo nnọ: “Mẹ họ ọye.” Aruọwha Jesu o gbe isoja na unu te epanọ a ro go họ emu a te kie fihọ otọ. Jesu ọ tẹ ta nọ: ‘Otẹrọnọ mẹ wha be gwọlọ, wha ru re ikọ mẹ a nya vrẹ.’—Jọn 18:1-9.

Okenọ isoja na a kru Jesu jẹ rọ ifi gba abọ riẹ, ozọ u te mu ikọ na a tẹ dhẹ. Rekọ Pita avọ Jọn a gwọlọ riẹ oware nọ o te via, fikiere a te je lele ai eva ugbo. Uwhremu na, a tẹ rehọ Jesu ziọ uwou Kayafas, ozerẹ okpehru na. Fikinọ ozerẹ okpehru na ọ riẹ Jọn, ohwo nọ ọ be sẹro unuẹthẹ na ọ tẹ kẹ e avọ Pita uvẹ ruọ eva ighẹ na.

Izerẹ na a kokohọ uwou Kayafas no re a gu Jesu ẹdhọ. A gwọlọ re a kpe Jesu. Fikiere a tẹ rọ isẹri ze re a ta erue fihọ iẹe uzou. Ahwo na a tẹ jẹ rọ abọ fa Jesu jẹ tehe iẹe. Enana kpobi e be via na, yọ Pita o thabọ no etẹe he.

Odibo ọmọtẹ jọ, ọnọ o rovie ẹthẹ kẹ Pita avọ Jọn ruọ eva na, o vuhu Pita. Ọ tẹ ta nọ: ‘Whọ jọ kugbe Jesu re.’ Rekọ Pita ọ tẹ vro nnọ ọ tubẹ riẹ Jesu hu. Nọ oke o dina nyaharo no, ọmọtẹ  ọfa o te vuhu Pita jẹ ta kẹ enọ i dikihẹ kẹle etẹe nnọ: ‘Ohwo ọnana avọ Jesu a gbẹ jọ.’ Pita ọ tẹ wariẹ vro inọ ọ riẹ riẹ e he. U kri hi ẹko ahwo jọ a tẹ ruẹ Pita jẹ ta kẹe nọ: ‘U muẹro nọ whẹ omọvo rai jọ re.’ Evaọ orọ avọ isiasa, Pita ọ tẹ vro riẹ, ta nnọ: “Mẹ riẹ ohwo na ha.” Pita ọ tubẹ bọwo ehao dede inọ uzẹme na ọ be ta na, Jesu o te ku oma rẹriẹ rri rie.—Matiu 26:57-75; Luk 22:54-62; Jọn 18:15-27.

Kọ whọ riẹ oware nọ o lẹliẹ Pita gu ọrue na?— E, keme ozọ u mu rie. Rekọ eme o lẹliẹ ozọ mu ei? Eme o ru hu re ọ bọ aruọwha riẹ ga? Roro kpahe iẹe. Eme Jesu o ru nọ o kẹ riẹ udu?— Ọ lẹ se Ọghẹnẹ, Ọghẹnẹ o te fi obọ họ kẹe wo udu. Yọ kareghẹhọ, Jesu ọ ta kẹ Pita isiasa re ọ lẹ jẹ jaja aro vi je mu ẹro họ otọ. Rekọ eme ọ via?—

Unuẹse na kpobi, Pita ọ jẹ wezẹ. Ọ lẹ hẹ, yọ o mu ẹro họ otọ họ. Fikiere o jọ oware nọ o rẹro riẹ hẹ evaọ okenọ a mu Jesu. Eva oke ẹdhọ na, okenọ a jẹ tehe Jesu jẹ maa omaa nọ a re kpe i,  ozọ u te mu Pita. Ghele na, euwa kakao ọvo nọ e vrẹ no, eme Jesu ọ ta kẹ ikọ riẹ nọ a re rẹro riẹ?— Jesu ọ ta kẹ ae nnọ epanọ akpọ na o mukpahe iẹe na, o ti mukpahe ai re.

Obọnana joma roro kpahe oware jọ nọ o rẹ sae via kẹ omai nọ o rẹ wọhọ onọ o via kẹ Pita na. Dae rehọ iẹe nọ whọ rrọ eklase nọ ahwo a be jọ ta ikpehre eme kpahe ahwo nọ a re yere obiala ha hayo enọ i re ru Ikresimesi hi. Kọ eme who re ru otẹrọnọ ohwo jọ ọ rẹriẹ ovao ku owhẹ ọ jẹ nọ nnọ: “Kọ ghinọ uzẹme inọ who re yere obiala ha?” Hayo  amọfa a tẹ ta nnọ: “Ma yo nọ who re tube ru Ikresimesi hi!” Kọ ozọ u ti mu owhẹ re whọ ta uzẹme na?— Kọ whọ te gwọlọ ta ọrue, wọhọ epanọ Pita o ru na?—

Uwhremu na, o da Pita gaga inọ ọ vro nnọ ọ riẹ Jesu hu. Nọ o vuhu oware nọ o ru mu, ọ tẹ ruọ otafe ọ tẹ viẹ. Ẹhẹ, o zihe bru Jesu ze. (Luk 22:32) Whaọ, roro kpahe iẹe. Eme ọ rẹ sai fi obọ họ kẹ omai nọ ma gbẹ rọ dhozọ ga te epanọ ma rẹ rọ ta oghẹrẹ eme nọ Pita ọ ta na ha?— Kareghẹhọ, Pita ọ lẹ hẹ yọ o mu ẹro họ otọ họ. Fikiere, eme whọ rẹ ta nọ u fo nọ ma re ru re ma jọ olele ọ Owuhrẹ Ologbo na?—

Ma rẹ lẹ se Jihova kẹ obufihọ. Okenọ Jesu ọ lẹ, kọ whọ riẹ oware nọ Ọghẹnẹ o ru kẹe?— O vi ẹnjẹle re ọ kẹe ẹgba. (Luk 22:43) Kọ enjẹle Ọghẹnẹ a sai fi obọ họ kẹ omai re?— Ebaibol na e ta nọ: ‘Ẹnjẹle Jihova ọ be rria gba enọ e be dhozọ riẹ, o ve je siwi ai.’ (Olezi 34:7) Rekọ re ma wo obufihọ Ọghẹnẹ, orọnikọ olẹ ọvo o gwọlọ họ. Kọ whọ riẹ oware ofa nọ u fo nọ ma re ru?— Jesu ọ ta kẹ ilele riẹ nọ a jaja aro vi je mu ẹro họ otọ. Ẹvẹ who roro nnọ ma sai ro ru ere?—

U fo re ma kezọ ziezi kẹ eme nọ a be ta eva iwuhrẹ Ileleikristi mai jẹ kezọ kẹ eme nọ a bi se no Ebaibol ze. Rekọ u te je fo re nọ ma rẹ lẹ se Jihova ẹsikpobi jẹ yare iẹe re o fi obọ họ kẹ omai gọ e. Ma te ru ere, ma ti wo obufihọ nọ ma re ro fi ozodhẹ mai kparobọ. Eva e vẹ te were omai evaọ okenọ ma te wo uvẹ nọ ma rẹ rọ ta kẹ amọfa kpahe Owuhrẹ Ologbo na gbe Ọsẹ riẹ.

Ikereakere enana e sai fi obọ họ kẹ omai whaha ozọ amọfa nọ ma rẹ dhẹ rọ ere siọ oware uwoma ba eru: Itẹ 29:25; Jerimaya 26:12-15, 20-24; gbe Jọn 12:42, 43.

[Uwoho nọ o rrọ ẹwẹ-obe avọ 159]

Fikieme u je fo nọ Pita, Jemis, gbe Jọn a rẹ jaja aro vi?

[Uwoho nọ o rrọ ẹwẹ-obe avọ 160]

Fikieme ozọ u ro mu Pita te epanọ o ro gu ọrue nnọ ọ riẹ Jesu hu?

[Uwoho nọ o rrọ ẹwẹ-obe avọ 160]

Ẹvẹ whọ sae rọ ruẹ oma ra evaọ uyero nọ u tho orọ Pita na?