Uzou Avọ 11

Obufihọ No Obọ Enjẹle Ọghẹnẹ Ze

AHWO jọ a rẹ ta nọ oware nọ a rẹ sae ruẹ ọvo a rẹ rọwo. Rekọ oyena yọ iroro igheghẹ. Eware buobu e riẹ nọ ma sae ruẹ hẹ. Kọ whọ sae fodẹ ovo jọ?—

Kọ ẹvẹ kpahe ofou nọ ma bi se rehọ na? Kọ whọ sai kru riei?— Riẹ obọ ra re who vovo iei. Kọ oware jọ u te owhẹ oma?— E, rekọ whọ sae ruẹ ofou na ha, manikọ ere he?—

Ma ta ẹme kpahe ahwo ẹzi no vẹre, enọ ma rẹ sae ruẹ hẹ. Ma wuhrẹ nnọ ejọ i woma rekọ efa jọ i yoma. Fodẹ ahwo ẹzi iwoma jọ nọ ma rẹ sae ruẹ hẹ.— Ọjọ họ Jihova Ọghẹnẹ, ọfa Jesu, gbe enjẹle iwoma. Kọ enjẹle iyoma e riẹ re?— Ebaibol na e ta nọ e riẹ. Ta kẹ omẹ oware nọ who wuhrẹ kpahe ae no.—

Oware jọ nọ ma riẹ họ enjẹle iwoma gbe iyoma na e ga vi omai. Owuhrẹ Ologbo na ọ riẹ kpahe enjẹle na gaga. O rrọ ere keme ọ jọ ẹnjẹle vẹre taure a te ti yẹi wọhọ ọmọ evaọ otọakpọ. Ọ rria kugbe enjẹle efa no evaọ obọ odhiwu. Ọ riẹ ima buobu rai. Kọ enjẹle enana kpobi i wo edẹ?—

Ma wuhrẹ nọ Ọghẹnẹ o mu edẹ kẹ isi na. Fikiere o rẹ sai mu omai ẹro inọ enjẹle na kpobi i wo edẹ re. Yọ ma riẹ nọ a rẹ sae ta ẹme kẹ ohwohwo keme Ebaibol na e ta kpahe ‘ẹvẹrẹ enjẹle na.’ (1 Ahwo Kọrint 13:1) Eme who roro nọ enjẹle e rẹ ta kpahe? Kọ a be ta ẹme kpahe omai?—

Ma riẹ nọ enjẹle Setan, idhivẹri na, a be dao oma ru omai ghẹmeeyo kẹ Jihova. Fikiere a rẹ ta kpahe epanọ a re ro ru onana.  A gwọlọ re ma raro kele ai re Jihova o mukpahe omai re. Kọ ẹvẹ kpahe enjẹle iwoma Ọghẹnẹ? Kọ who roro nọ a be ta ẹme kpahe omai re?— E. A gwọlọ fi obọ họ kẹ omai. Jomẹ ta kẹ owhẹ epanọ enjẹle Ọghẹnẹ jọ i ro fi obọ họ kẹ ahwo nọ i you Jihova nọ e jẹ gọ e.

Wọhọ oriruo, ọzae jọ ọ jariẹ, odẹ riẹ Daniẹl, ọ jẹ rria Babilọn. Ahwo buobu evaọ ẹwho na a you Jihova ha. A tube fi uzi họ nnọ a rẹ rọ uye kẹ ohwo kpobi nọ ọ lẹ se Jihova Ọghẹnẹ. Rekọ Daniẹl ọ gbẹ jẹ lẹ se Jihova ẹsikpobi. Kọ whọ riẹ oware nọ a ru Daniẹl?—

Ahwo yoma na a ru re a gbolo Daniẹl fihọ ọgọdọ ikpohrokpo. Daniẹl ọvo ọ jọ ọgọdọ na kugbe ikpohrokpo nọ ohọwo u bi kpe. Kọ whọ riẹ oware nọ o via?— Daniẹl ọ ta nọ: ‘Ọghẹnẹ o vi enjẹle riẹ a te ruru  unu ikpohrokpo na.’ Uvumọ oware u te rie oma ha! Enjẹle e sai ru eware igbunu kẹ enọ e be gọ Jihova.—Daniẹl 6:18-22.

Okejọ o jariẹ nọ Pita ọ rọ jọ uwou-odi. Whọ kareghẹhọ nọ Pita yọ ogbẹnyusu Owuhrẹ Ologbo na, Jesu Kristi. O dha ahwo jọ eva okenọ Pita ọ ta kẹ ae nọ Jesu yọ Ọmọ Ọghẹnẹ. Fikiere a te fi Pita họ uwou-odi. Isoja i je roi Pita re ọ seba ẹdhẹ. Kọ ohwo jọ ọ riẹ nọ ọ rẹ sai fi obọ họ kẹe?—

Pita ọ jẹ wezẹ evaọ udevie isoja ivẹ, yọ a rọ egbregba kare abọ riẹ. Rekọ Ebaibol na e ta nọ: ‘Rri! Ẹnjẹle Jihova ọ tẹ nya ze, elo  o te lo mu uwou-odi na. Nọ ọ kaobọ te Pita, ẹnjẹle na ọ tẹ rrọo riẹ no owezẹ ze, ta nọ, “Kpama vẹrẹ!” ’

Koyehọ egbregba nọ a rọ kare Pita na i te kie noi abọ! Ẹnjẹle na ọ tẹ ta kẹe nọ: ‘Ku iwu ra họ, ku eviẹ ra họ, re who lele omẹ.’ Isoja na a sae da ae ji hi keme ẹnjẹle na o je fi obọ họ kẹ Pita. Nọ a nya te unuẹthẹ ayọno jọ, oware igbunu jọ o tẹ via. Ẹthẹ na ọvo o te rovie! Ẹnjẹle na o si Pita no uwou-udi no re ọ sae ruabọhọ usiuwoma ota.—Iruẹru 12:3-11.

Kọ enjẹle Ọghẹnẹ e sai fi obọ họ kẹ omai re?— E. Kọ onana u dhesẹ nọ a rẹ kẹ omai uvẹ re ma nwoma vievie he?— Ijo, enjẹle e rẹ whaha omai omonwa ha ma te ru eware igheghẹ. Rekọ ma gbẹ maki ru eware igheghẹ dede he, ma sae nwoma ghele. A ta kẹ enjẹle na nnọ a thọ omai no omonwa kpobi hi. Ukpoye, Ọghẹnẹ ọ kẹ rai iruo obọdẹ jọ.

Ebaibol na e ta kpahe ẹnjẹle jọ ọnọ ọ be ta kẹ ahwo evaọ oria kpobi re a gọ Ọghẹnẹ. (Eviavia 14:6, 7) Ẹvẹ ẹnjẹle na o bi ro ru onana? Kọ o bi bo no obọ odhiwu ze kẹ ahwo kpobi re a yo?— Ijo, ukpoye ilele Jesu nọ e rrọ otọakpọ họ enọ e be ta kẹ amọfa kpahe Ọghẹnẹ, yọ enjẹle na i bi fi obọ họ kẹ ae evaọ iruo rai. Enjẹle na i bi ru ei lọhọ re ahwo nọ a ghinẹ gwọlọ riẹ kpahe Ọghẹnẹ a wo uvẹ nọ a re ro yo. Ma rẹ sai wo obọ evaọ iruo usiuwoma ota oyena, yọ enjẹle na a ti fi obọ họ kẹ omai.

Rekọ ẹvẹ otẹrọnọ ahwo nọ a you Ọghẹnẹ hẹ a bi kpokpo omai? Kọ a te fi omai họ uwou-odi? Kọ enjẹle na i re si omai no uwou-odi?— A rẹ sai ru ere. Rekọ orọnikọ ẹsikpobi a re ru ere he.

A mu Pọl olele Jesu na okejọ. Ọ jọ okọ je kperẹ yọ ẹkporo o bi fi. Enjẹle na i fi obọ họ kẹe evaọ oke oyena ha. O jọ ere keme  amọfa a jariẹ nọ u fo nọ a re yo kpahe Ọghẹnẹ. Ẹnjẹle jọ ọ ta kẹe nọ: “Ozọ u mu owhẹ hẹ, Pọl; who re ti dikihẹ aro Siza.” Ẹhẹ, a te rehọ Pọl bru Siza osu nọ o je su akpọ na re Pọl ọ ta usiuwoma kẹe. Enjẹle na i je fi ẹro họ Pọl, yọ a je fi obọ họ kẹe re. A ti fi obọ họ kẹ omai re otẹrọnọ ma be ghinẹ gọ Ọghẹnẹ.—Iruẹru 27:23-25.

Iruo ilogbo efa e riẹ nọ enjẹle na i ti ru, yọ a ti ru ei kẹle. Oke Ọghẹnẹ nọ ọ rẹ rọ raha irumuomu na o kẹle gaga no. A ti kpe ahwo nọ a be gọ Ọghẹnẹ uzẹme na ha kpobi no. Enọ e ta nọ a rọwo enjẹle he fikinọ a sae rue rae he a te ruẹ nọ a roro thọ gaga.—2 Ahwo Tẹsalonika 1:6-8.

Didi oware oyena u ti dhesẹ kẹ omai?— Ma tẹ rrọ abọ ọvona kugbe enjẹle Ọghẹnẹ, a ti fi obọ họ kẹ omai re. Kọ abọ rai ma rrọ?— Ma tẹ be gọ Jihova yọ ma rrọ abọ rai. Yọ otẹrọnọ ma be gọ Jihova, ma rẹ ta kẹ amọfa re a gọe re.

Re who wuhrẹ viere kpahe oware nọ enjẹle na a bi ru evaọ izuazọ ahwo, se Olezi 34:7; Matiu 4:11; 18:10; Luk 22:43; gbe Iruẹru 8:26-31.

[Uwoho nọ o rrọ ẹwẹ-obe avọ 63]

Eme Ọghẹnẹ o ru ro siwi Daniẹl?

[Uwoho nọ o rrọ ẹwẹ-obe avọ 64]

Ẹvẹ ẹnjẹle jọ o ro fi obọ họ kẹ Pita no uwou-odi?

[Uwoho nọ o rrọ ẹwẹ-obe avọ 66]

Eme ẹnjẹle na ọ be ta kẹ Pọl na?