Uzou Avọ 31

Oria Nọ A Rẹ Jọ Ruẹ Omosasọ

KỌ OMA u re ru owhẹ ọkọkora ẹsejọ?— Kọ who roro no ẹdẹjọ sọ ohwo jọ o you owhẹ?— Emọ jọ i re roro ere. Rekọ Ọghẹnẹ ọ yaa eyaa nnọ: “Wha sae thọ omẹ ẹro ho.” (Aizaya 49:15) Kọ eme eyena e gbẹ sasa owhẹ udu?— E, Jihova Ọghẹnẹ o ghine you omai!

Okere Ebaibol jọ ọ ta nọ: “Kemena ọsẹ gbe oni mẹ a [tẹ] se omẹ, Ọnowahwo o re ti kru omẹ rehọ.” (Olezi 27:10) Ma tẹ riẹ ere o sae sasa omai oma gaga, ogbẹrọ ere?— E, Jihova ọ ta kẹ omai nọ: ‘Ozọ u mu owhẹ hẹ, keme mẹ rrọ kugbe owhẹ. . . . Me ti fi obọ họ kẹ owhẹ.’—Aizaya 41:10.

Rekọ ẹsejọ Jihova ọ rẹ kuvẹ re Setan ọ wha ẹbẹbẹ se omai. Jihova ọ rẹ kẹ Setan uvẹ dede re ọ dawo idibo Riẹ. Okejọ o jariẹ nọ Ẹdhọ ọ rọ uye bẹ Jesu te epanọ Jesu o ro bo se Jihova nọ: “Ọghẹnẹ mẹ, Ọghẹnẹ mẹ, eme whọ jẹ se omẹ ba?” (Matiu 27:46) Dede nọ Jesu ọ jẹ ruẹ uye, ọ riẹ ghele inọ Jihova o you rie. (Jọn 10:17) Rekọ Jesu ọ riẹ re nnọ Ọghẹnẹ ọ rẹ kẹ Setan uvẹ dawo idibo Riẹ jẹ kẹ Setan uvẹ rọ uye bẹ ae. Ma te jọ uzou ofa ta kpahe oware nọ Ọghẹnẹ ọ be rọ kẹ Setan uvẹ ru onana.

Nọ ma tẹ rrọ emaha, ozọ u re mu omai ẹsejọ. Wọhọ oriruo, kọ who vru no ẹdẹjọ?— Kọ ozọ u mu owhẹ?— Ozọ u re mu emọ buobu. Owuhrẹ Ologbo na o gbiku jọ kpahe uvru ẹdẹjọ. Orọnikọ ọmọ o vru na ha. Ogodẹ o vru.

Evaọ idhere jọ whọ wọhọ ogodẹ. Evaọ oghẹrẹ vẹ? Whaọ, igodẹ  e rẹ rro hayo ga oma te ere he. Yọ a gwọlọ ohwo nọ ọ rẹ sẹro rai jẹ thọ ae. A re se ohwo nọ ọ rẹ sẹro igodẹ othuru-igodẹ.

Evaọ ikuigbe riẹ na Jesu ọ ta kpahe othuru-igodẹ jọ nọ o wo igodẹ udhusoi. Rekọ ogodẹ jọ o te vru. Ẹsejọhọ ogodẹ na ọ gwọlọ ruẹ oware nọ o rrọ abọdekọ ugbehru na. Rekọ igodẹ edekọ e tẹ nya siẹ e ba. Kọ whọ sai roro epanọ o jọ kẹ ogodẹ na nọ o rri wariẹ ọ jẹ ruẹ nọ ọye ọvo o kiọkọ?—

Eme othuru-igodẹ na o re ru nọ ọ te ruẹ nnọ ogodẹ jọ o vru? Kọ ọ rẹ ta nọ oyena yọ ẹdhọ ogodẹ na fikiere ọ rẹ daezọ riẹ hẹ? Hayo kọ ọ rẹ nya siọ igodẹ 99 edekọ na ba emamọ oria jọ re ọ nya e gwọlọ ọvo na? Kọ a rẹ lahiẹ oma yena kpobi fiki ogodẹ ọvo?— Whọ tẹ rrọ ogodẹ nọ o vru na, kọ whọ hẹ gwọlọ re othuru-igodẹ na ọ nya e gwọlọ owhẹ?—

Othuru-igodẹ na o you igodẹ riẹ kpobi gaga, makọ ọnọ o vru na. Fikiere ọ tẹ nya e gwọlọ ọnọ o vru na. Dai roro epanọ eva e were ogodẹ nọ o vru na te nọ ọ ruẹ othuru-igodẹ na nọ ọ be nya ze! Yọ Jesu ọ ta nọ othuru-igodẹ na ọ ghọghọ inọ ọ ruẹ ogodẹ riẹ no. Ọ ghọghọ fiki riẹ vi  igodẹ 99 nọ i vru hu na. Kọ, ono ọ wọhọ othuru-igodẹ yena evaọ ikuigbe Jesu na? Ono ọ be daezọ mai wọhọ epanọ othuru-igodẹ na ọ daezọ igodẹ riẹ na?— Jesu ọ ta nọ Ọsẹ obọ odhiwu riẹ ọ be daezọ mai. Yọ Ọsẹ riẹ họ Jihova.

Jihova Ọghẹnẹ họ Othuru-Igodẹ Ologbo ọrọ ahwo riẹ. O you enọ e be gọ e kpobi, kugbe emaha wọhọ owhẹ. Ọ gwọlọ re omọvo mai jọ ọ nwoma hayo whu hu. U ghine gbunu gaga inọ Ọghẹnẹ ọ daezọ mai te enẹ!—Matiu 18:12-14.

Kọ whọ ghinẹ rọwo nnọ Jihova Ọghẹnẹ ọ rrọ?— Kọ u mu owhẹ ẹro nọ ọ be rria?— Uzẹme o rrọ inọ ma sae ruẹ Jihova ha. O rrọ ere keme Ẹzi ọ rrọ. O wo ugboma nọ ma sae rọ ibiaro mai ruẹ hẹ. Rekọ ohwo dẹẹ ọ rrọ, yọ ọ sae ruẹ omai. Ọ riẹ okenọ ma gwọlọ obufihọ. Yọ ma rẹ sae ta ẹme kẹe evaọ olẹ wọhọ epanọ ma re lele ohwohwo ta ẹme evaọ otọakpọ na. Jihova ọ gwọlọ re ma ta ẹme kẹe evaọ olẹ.

 Fikiere otẹrọnọ oma u bi ru owhẹ ọkọkora, eme who re ru?— Ta ẹme kẹ Jihova. Si kẹle iẹe, ọ rẹ te sasa owhẹ oma je fi obọ họ kẹ owhẹ. Kareghẹhọ nọ Jihova o you owhẹ, makọ evaọ oke nọ o rrọ owhẹ oma epaọ ẹsenọ whẹ ọvo ọ rrọ. Joma rovie Ebaibol mai. Enẹ a ta kẹ omai evaọ Olezi avọ 23, muhọ eva owọ 1: ‘Jihova họ Othuru mẹ. Oware ovo o rẹ kare omẹ hẹ. Ọ rẹ te rehọ ẹbe ọrọrọ kuọ omẹ, o ve je su omẹ kpohọ akotọ ame omosasọ.’

Mu ẹro họ oware nọ okere na o fibae, evaọ owọ avọ 4: “Mẹ tẹ make be nya evaọ ukpotọ uwoho uwhu, mẹ rẹ dhẹozọ oware uyoma ovo ho; keme who lele omẹ rọ; ọkpọ gbe umure ra, e rẹ sasa omẹ oma.” Ere oma o rẹ jọ ahwo otẹrọnọ Jihova họ Ọghẹnẹ rai. A tẹ rrọ ẹbẹbẹ a rẹ ruẹ omosasọ. Kọ ere o rrọ kẹ owhẹ?—

Wọhọ epanọ othuru-igodẹ oyoyou ọ rẹ sẹro igodẹ riẹ na, ere Jihova ọ rẹ sẹro ahwo riẹ ziezi. O re dhesẹ emamọ edhere nọ a rẹ nya kẹ ae, a vẹ rọ evawere lele iei. Ebẹbẹ e tẹ make wariẹ ae họ, a re du dhozọ họ. Othuru-igodẹ ọ rẹ rehọ ọkpọ hayo umure riẹ thọ igodẹ riẹ no obọ erao nọ e rẹ sae nwae oma. Ebaibol na e ta kpahe epanọ othuru-igodẹ ọmoha na, Devidi, ọ rọ thọ igodẹ riẹ no obọ okpohrokpo gbe adaka.  (1 Samuẹle 17:34-36) Yọ ahwo Ọghẹnẹ a riẹ nnọ Jihova ọ te thọ ae re. Udu u re kie ai vi keme a riẹ nọ Ọghẹnẹ ọ rrọ kugbe ai.

Jihova o ghine you igodẹ riẹ, yọ ọ be sẹro rai ziezi. Ebaibol na e ta nọ: ‘O ti su igodẹ riẹ wọhọ othuru-igodẹ. O re ti koko imigodẹ na họ obọ riẹ.’—Aizaya 40:11.

Kọ oma o gbẹ be were owhẹ inọ Jihova ọ rrọ ere?— Kọ whọ gwọlọ jọ ogodẹ riẹ jọ?— Igodẹ e rẹ gaviezọ kẹ urru othuru rai. A rẹ jọ kẹle iẹe. Kọ whọ be gaviezọ kẹ Jihova?— Kọ whọ be jọ kẹle iẹe?— O tẹ rrọ ere, koyehọ ozọ u re du mu owhẹ hẹ. Jihova ọ te jọ gba owhẹ.

Jihova ọ be rọ uyoyou sẹro enọ e be gọ e. Joma se oware nọ Ebaibol na e ta kpahe onana kugbe eva Olezi 37:25; 55:22; gbe Luk 12:29-31.

[Uwoho nọ o rrọ ẹwẹ-obe avọ 163]

Ẹvẹ who roro nọ oma u ru ọmọ-ogodẹ ọnana nọ o vru na?

[Uwoho nọ o rrọ ẹwẹ-obe avọ 164]

Ono ọ wọhọ othuru-igodẹ nọ o siwi ogodẹ riẹ na?

[Uwoho nọ o rrọ ẹwẹ-obe avọ 165]

Kọ u mu owhẹ ẹro inọ Jihova ọ rrọ wọhọ epanọ ọsẹ ra gbe amọfa a rrọ na?

[Uwoho nọ o rrọ ẹwẹ-obe avọ 166]

Wọhọ othuru-igodẹ nọ ọ be sẹro igodẹ riẹ, ono ọ rẹ sai fi obọ họ kẹ omai evaọ okenọ ma tẹ rrọ ẹbẹbẹ?