Uzou 1

Oware Nọ Jesu Ọ Rọ Jọ Owuhrẹ Ologbo

BU VIỌ ikpe idu ivẹ nọ i kpemu, a yẹ obọdẹ ọmọ jọ nọ ọ rro zihe ruọ ọzae nọ ọ mae rro nọ ọ rria no. Evaọ oke yena, uvumọ ohwo o wo arupre hayo omoto ho. Irediyo hayo etẹlivisiọno e jariẹ gbe he.

A se odẹ ọmọ na Jesu. O zihe ruọ ọzae nọ ọ mai wo areghẹ kpobi nọ ọ rria otọakpọ na no. Jesu o te je zihe ruọ owuhrẹ nọ ọ mai woma kpaobọ. O je dhesẹ eware egaga re ahwo a riẹ otọ rai lọlọhọ.

Jesu o je wuhrẹ ahwo evaọ oria kpobi nọ ọ jọ nya ku ai. O je wuhrẹ ahwo eva unueri gbe evaọ ekọ. O wuhrẹ ahwo evaọ iwou rai gbe okenọ o je kpohọ erẹ. Jesu o wo omoto ho, yọ ọ jẹ hae ruọ omoto hayo itreni nọ o te bi kpohọ erẹ hẹ. Owọ Jesu ọ jẹ rọ nya no oria ruọ oria, bi wuhrẹ ahwo.

Ma re wuhrẹ eware buobu mi amọfa. Rekọ ma sai wuhrẹ eware nọ e mai wuzou mi Owuhrẹ Ologbo na, Jesu. Evaọ Ebaibol na a rẹ jọ ruẹ eme Jesu. Ma te bi yo eme nana no Ebaibol na ze, o rẹ wọhọ ẹsenọ Jesu ọ be ta ẹme kẹ omai na.

Fikieme Jesu ọ rọ jọ Owuhrẹ Ologbo otiọye? Oware jọ nọ o wha riẹ ze họ Jesu omariẹ o wo owuhrẹ re. Yọ ọ riẹ epanọ u wuzou te re a gaviezọ. Rekọ ono Jesu ọ gaviezọ kẹ? Ono o wuhrẹ i rie?— Ọsẹ riẹ o wuhrẹ i rie. Yọ Ọsẹ Jesu họ Ọghẹnẹ.

Taure ọ tẹ te ziọ otọakpọ wọhọ ohwo, Jesu ọ jẹ rria obọ odhiwu  kugbe Ọghẹnẹ. Fikiere Jesu o wo ohẹriẹ no amọfa keme uvumọ ohwo ọfa ọ rria obọ odhiwu taure a te ti yẹi evaọ otọakpọ họ. Jesu ọ jọ emamọ Ọmọ evaọ obọ odhiwu, ọnọ ọ gaviezọ kẹ Ọsẹ riẹ. Fikiere Jesu ọ sai wuhrẹ ahwo eware nọ o wuhrẹ mi Ọghẹnẹ. Whọ tẹ be gaviezọ kẹ ọsẹ gbe oni ra yọ Jesu whọ be raro kele na.

Oware ofa nọ u ru Jesu fihọ Owuhrẹ Ologbo họ fikinọ o you ahwo. Ọ gwọlọ fi obọ họ kẹ ahwo wuhrẹ kpahe Ọghẹnẹ. Jesu o you ahwo nọ a kpako no, yọ o you emaha re. Yọ o jẹ were emaha na re a jọ kugbe Jesu keme o re lele ai ta ẹme jẹ gaviezọ kẹ ae.

Ẹdẹjọ esẹgbini jọ a tẹ rehọ emọ rai bru Jesu ze. Rekọ egbẹnyusu riẹ i je roro nọ Owuhrẹ Ologbo na o wo uvẹ nọ o ti ro lele emaha na ta ẹme he. Fikiere a tẹ ta kẹ ae nnọ a kpo. Rekọ ẹvẹ Jesu ọ ta?— Jesu ọ ta nnọ: ‘Wha kẹ emaha na uvẹ re a nya bru omẹ ze; wha le ai hi.’ Ẹhẹ, Jesu ọ gwọlọ nnọ emaha na a nya bru ei ze. Fikiere dede nọ ọ jọ ohwo nọ o wo  areghẹ gaga gbe ohwo ologbo, Jesu ọ jẹ raha oke ro wuhrẹ emaha na.—Mak 10:13, 14.

Kọ whọ riẹ oware nọ o lẹliẹ Jesu je wuhrẹ emaha jẹ gaviezọ kẹ ae? Oware jọ nọ o soriẹ ze họ ọ gwọlọ ru eva were ae ẹkwoma iku nọ o re gbe kẹ ae kpahe Ọghẹnẹ, Ọsẹ obọ odhiwu riẹ. Ẹvẹ whọ sai ro ru eva were ahwo?— Ẹkwoma iku nọ who re gbe kẹ ae kpahe eware nọ who wuhrẹ kpahe Ọghẹnẹ no.

Ẹdẹjọ, Jesu ọ rehọ ọmaha jọ ro wuhrẹ egbẹnyusu Riẹ oware ulogbo jọ. Ọ rehọ ọmọ na dikihẹ udevie ilele Riẹ. Jesu ọ tẹ ta nnọ ekpako enana a re nwene uruemu rai re a jọ wọhọ ọmọ nana.

Eme Jesu ọ rehọ eme riẹ na dhesẹ? Kọ whọ riẹ epanọ ohwo nọ ọ kpako no, hayo ọmọ nọ ọ dina rro no, ọ sai ro zihe ruọ ọmaha?— Whaọ, ọmaha ọ riẹ te ọkpako ho yọ ọ rẹ gwọlọ wuhrẹ. Fikiere Jesu ọ jẹ ta nnọ ilele riẹ a rẹ rọ oma kpotọ wọhọ emaha. Ẹhẹ, mai kpobi ma rẹ sai wuhrẹ eware buobu mi amọfa. Yọ mai kpobi ma re vuhumu nnọ iwuhrẹ Jesu i wo uzou vi iroro obọ mai gaga.—Matiu 18:1-5.

Ẹjiroro ọfa jọ nọ Jesu ọ rọ jọ Owuhrẹ Ologbo otiọye na họ fikinọ ọ riẹ epanọ o re ro ru eware si ahwo urru. Ọ rẹ rọ edhere ọlọlọhọ dhesẹ eware vevẹ. Ọ jẹ ta kpahe evra gbe idodo gbe eware efa ro fi obọ họ kẹ ahwo riẹ kpahe Ọghẹnẹ.

Ẹdẹjọ nọ Jesu ọ jọ akotọ ugbehru  jọ, ahwo buobu a tẹ nya bru ei ze. Jesu ọ tẹ keria ọ tẹ kẹ ae ovuẹ jọ, wọhọ epanọ whọ rẹ sae ruẹ evaọ uwoho na. A re sei Ovuẹ obọ Ugbehru na. Ọ ta nnọ: ‘Rri evra nọ e rrọ obehru na. A rẹ kọ ibi hi. A rẹ kwa emuore fihọ iwou hu. Rekọ Ọghẹnẹ obọ odhiwu ọ be ko ae. Kọ wha gbẹ ghare vi ai?’

Jesu ọ tẹ jẹ ta nnọ: ‘Wuhrẹ mi idodo obọ ẹwọ na. I re ru iruo re e tẹ rro ho. Who rri epanọ i wo erru te! Makọ Solomọn Ovie nọ o fe gaga na ọ gọ ẹgọ woma te idodo obọ ẹwọ na ha. Fikiere otẹrọnọ Ọghẹnẹ ọ rẹ rọ ẹro te idodo nọ e rẹ rro na, kọ ọ gbẹ rọ ẹro te owhai re?’—Matiu 6:25-33.

Kọ whọ riẹ oware nọ Jesu ọ be jọ etenẹ wuhrẹ na?— Ọ gwọlọ nnọ ma ruawa kpahe epanọ ma te rọ ruẹ emu nọ ma rẹ ria hayo iwu nọ ma rẹ wha ha. Ọghẹnẹ ọ riẹ nnọ ma gwọlọ eware eyena kpobi. Orọnikọ Jesu ọ be ta nnọ ma re ru iruo re ma ruẹ  emu hayo iwu hu hu. Rekọ ọ ta nnọ ma rehọ Ọghẹnẹ karo. Ma te ru ere, Ọghẹnẹ o ti ru re ma wo emu nọ ma rẹ ria gbe iwu nọ ma re fihọ. Kọ whọ rọwo ere?—

Okenọ Jesu ọ ta ẹme riẹ re no, eme ahwo na a roro?— Ebaibol na e ta nnọ oghẹrẹ nọ o re ro wuhrẹ u gbe rai unu. Oma o rẹ were ohwo nọ ọ be gaviezọ kẹe. Eme nọ ọ ta i fi obọ họ kẹ ahwo ru oware nọ u kiete.—Matiu 7:28.

Fikiere u wuzou gaga re ma wuhrẹ mi Jesu. Kọ whọ riẹ oghẹrẹ  nọ ma sai ro ru ere?— Whaọ, a kere eme riẹ fihọ obe jọ. Kọ whọ riẹ odẹ obe na?— Ebaibol Ẹri na. Onana u dhesẹ nnọ ma tẹ be gaviezọ kẹ eware nọ ma re se evaọ Ebaibol na yọ Jesu ma be gaviezọ kẹ na. Iku ewewere jọ kpahe epanọ Ọghẹnẹ omariẹ ọ rọ ta kẹ omai nọ ma gaviezọ kẹ Jesu e rrọ Ebaibol na. Joma ruẹ oware nọ o via na.

Ẹdẹjọ Jesu ọ rehọ egbẹnyusu esa riẹ kpohọ obọ ehru ugbehru jọ. Edẹ rai họ Jemis, Jọn, gbe Pita. Ma ti wuhrẹ eware efa buobu kpahe ezae enana okiofa, keme aimasa na a jọ egbẹnyusu ekpekpe ọ Jesu. Rekọ evaọ ehru ugbehru na, ovao Jesu u te je lo nwra nwra nwra. Iwu riẹ i te je lo wọhọ ukpẹ, wọhọ epanọ whọ be jọ uwoho na ruẹ na.

Kẹsena, Jesu avọ egbẹnyusu riẹ a te yo urru jọ nọ u no obọ odhiwu ze. Urru na o ta nnọ: “Ọnana họ Ọmọ oyoyou mẹ, ọnọ ọ were omẹ hrọ; wha yo ẹme riẹ.” (Matiu 17:1-5) Kọ whọ riẹ ohwo nọ o wo urru na?— Ọghẹnẹ! Ọghẹnẹ họ ọnọ ọ be ta kẹ ae nnọ a gaviezọ kẹ Ọmọ riẹ na.

Kọ ẹvẹ kpahe omai nẹnẹ? Kọ ma ti yo ẹme kẹ Ọghẹnẹ re ma gaviezọ kẹ Ọmọ riẹ, Owuhrẹ Ologbo na?— Ere u fo nọ mai kpobi ma re ru. Kọ whọ kareghẹhọ oghẹrẹ nọ ma sai ro ru ere?—

E, ma rẹ sae gaviezọ kẹ Ọmọ Ọghẹnẹ nọ ma te bi se ikuigbe Ebaibol nọ e ta kpahe uzuazọ riẹ. Eware iwoma buobu e riẹ nọ Owuhrẹ Ologbo na ọ te ta kẹ omai. Oma o te were owhẹ nọ who te bi wuhrẹ eware enana nọ a kere fihọ Ebaibol na. Yọ otẹrọnọ whọ ta emamọ eware nọ who bi wuhrẹ na kẹ egbẹnyusu ra o te jẹ kẹ owhẹ evawere re.

Whọ tẹ gwọlọ riẹ viere kpahe eware iwoma nọ i re te omai otẹrọnọ ma gaviezọ kẹ Jesu, rovie Ebaibol ra re who se Jọn 3:16; 8:28-30; gbe Iruẹru 4:12.

[Uwoho nọ o rrọ ẹwẹ-obe avọ 11]

Fikieme emaha na e jẹ rọ gwọlọ jọ kugbe Jesu?

[Uwoho nọ o rrọ ẹwẹ-obe avọ 12]

Eme emọ nọ e dina rro no gbe ekpako a rẹ sai wuhrẹ mi emaha?

[Uwoho nọ o rrọ ẹwẹ-obe avọ 13]

Didi oware Jesu o je wuhrẹ evaọ okenọ ọ ta kpahe evra gbe idodo?

[Uwoho nọ o rrọ ẹwẹ-obe avọ 14]

‘Ọnana họ Ọmọ mẹ, wha yo ẹme riẹ’