Uzou Avọ 26

Oware Nọ O Jẹ Rrọ Bẹbẹ Re A Ru Ewoma

OKENỌ Sọl o je ru eware iyoma, ono eva e jẹ were?— Setan Ẹdhọ na. Rekọ eva e jẹ were isu egagọ ahwo Ju na re. Kẹsena nọ Sọl o zihe ruọ olele ọ Owuhrẹ Ologbo na no nọ a je se i Pọl, isu egagọ eyena a te mu ei họ emukpahe. Kọ whọ gbẹ ruẹ oware nọ o jẹ rrọ bẹbẹ kẹ olele Jesu re o ru oware uwoma na?—

Okejọ ozerẹ okpehru nọ a re se Ananias na ọ ta kẹ ahwo re a tehe Pọl. Ananias ọ jẹ tubẹ dao oma re a fi Pọl họ uwou-odi dede. Uye o bẹ Pọl gaga nọ o zihe ruọ olele Jesu no. Wọhọ oriruo, ahwo yoma a họre Pọl a tẹ gwọlọ rọ itho ilogbo fi ei kpe.—Iruẹru 23:1, 2; 2 Ahwo Kọrint 11:24, 25.

Ahwo buobu a te gwọlọ bẹbẹ omai họ ru eware nọ e rẹ dha Ọghẹnẹ eva. Fikiere, onọ na họ, Ẹvẹ who you oware uwoma te? Kọ who you oware uwoma te  epanọ who re ro ru oware nọ u woma makinọ amọfa a rọ fiki riẹ mukpahe owhẹ? O gwọlọ aruọwha re a ru ere, ogbẹrọ ere?—

Whọ sai roro nnọ, ‘Fikieme ahwo a je mukpahe omai fikinọ ma ru oware uwoma? Kọ o gbẹ rọnọ eva e hae were ai?’ Ere ohwo o re ghine roro. Jesu ọ were ahwo fiki eware iwoma nọ o ru. Okejọ o jariẹ nọ ahwo okpẹwho jọ a ro su wariẹ uwou nọ o wohọ. A nya ze fikinọ Jesu o je siwi enọ e be mọ.—Mak 1:33.

Rekọ ẹsejọ eware nọ Jesu o wuhrẹ e were ahwo ho. Dede nọ eware iwoma ọvo o je wuhrẹ, ahwo jọ a mu kpahe iẹe gaga fikinọ ọ jẹ ta uzẹme na. Onana o via ẹdẹjọ evaọ Nazarẹt, ẹwho nọ  Jesu ọ jọ whẹro. O kpohọ uwou-egagọ na, oria nọ ahwo Ju a re kokohọ jọ gọ Ọghẹnẹ.

Jesu ọ tẹ jọ etẹe kẹ emamọ ovuẹ jọ no Ikereakere na ze. Oke ọsosuọ eme nọ ọ ta e were ahwo na. Emamọ eme nọ i no unu riẹ ze e were rae. U gbe rai unu nnọ ọnana yọ ohwo nọ a jọ ẹwho rai yọrọ.

Rekọ Jesu ọ tẹ ta ẹme ọfa jọ. Ọ ta kpahe okejọ nọ Ọghẹnẹ o ro dhesẹ obọdẹ aruoriwo kẹ enọ e rrọ ahwo Ju hu. Nọ Jesu ọ ta onana, eva e tẹ dha enọ e jọ uwou-egagọ na. Kọ whọ riẹ oware nọ o soriẹ ze?— A roro nọ ae ọvo họ enọ i wo obọdẹ aruoriwo Ọghẹnẹ. A roro nnọ a woma vi amọfa. Fikiere a te mu kpahe Jesu fiki ẹme nọ ọ ta na. Kọ whọ riẹ oware nọ a jẹ te gwọlọ ru ei?—

Ebaibol na e ta nọ: ‘A te kru Jesu si rie kpohọ otafe ẹwho na. A tẹ rehọ iẹe kpohọ ẹroro ugbehru jọ a tẹ gwọlọ gele iei kie re o whu! Rekọ Jesu ọ va rai abọ.’—Luk 4:16-30.

Oyena o tẹ via kẹ owhẹ, kọ who re gbe zihe nya e ta kẹ ahwo yena kpahe Ọghẹnẹ?— Oyena o rẹ gwọlọ aruọwha, ogbẹrọ ere?— Whaọ, ukpe ovo o ruọ emu no, Jesu o zihe kpohọ Nazarẹt. Ebaibol na e ta nọ: “O te wuhrẹ ae eva uwou-egagọ rai.” Jesu ọ siọ uzẹme na ba ẹta ha fiki ozọ enọ i you Ọghẹnẹ hẹ.—Matiu 13:54.

Evaọ ẹdẹ ọfa, evaọ ẹdijala, Jesu ọ jọ oria nọ ọzae jọ nọ obọ riẹ o ko ọ rrọ. Jesu ọ sae rehọ ogaga nọ Ọghẹnẹ ọ kẹ riẹ ro siwi ọzae ọyena. Rekọ ahwo jọ nọ a jọ etẹe a jẹ gwọlọ Jesu ẹme. Eme Owuhrẹ Ologbo na o re ru?— Ọ kake nọ inọ: ‘Kọ wha te wo ogodẹ nọ o kie fihọ ọgọdọ ologbo evaọ Ẹdijala, kọ wha rẹ wọ e lahwe?’

 E, a rẹ sai fi obọ họ kẹ ogodẹ, makọ evaọ Ẹdijala, ẹdẹ nọ u fo nọ a re serihọ. Fikiere Jesu ọ tẹ ta nnọ: ‘O tubẹ mai woma re a fi obọ họ kẹ ohwo evaọ Ẹdijala, keme ohwo ọ ghare vi ogodẹ!’ Dai rri epanọ u vẹ te inọ u woma re Jesu o siwi ọzae nana!

Jesu ọ tẹ ta kẹ ọzae na re ọ riẹ obọ riẹ. Obọ na o tẹ nwane ruẹrẹ họ. Dai roro epanọ eva e were ọzae na te! Kọ ẹvẹ ahwo dekọ na a rehọ oware nọ o via na? Kọ eva e were rae?— Ijo. A te mu kpahe Jesu viere. A tẹ gbẹgwae epanọ a re ro kpei!—Matiu 12:9-14.

Epọvo na o rrọ nẹnẹ re. Makọ oware nọ ma ru kpobi kẹhẹ, ma rẹ sai ru ahwo kpobi eva were he. Fikiere ma rẹ jiroro ohwo nọ ma re ru eva were. Otẹrọnọ Jihova Ọghẹnẹ gbe Ọmọ riẹ, Jesu Kristi, ma gwọlọ ru eva were, koyehọ ma re ru oware nọ a wuhrẹ omai ẹsikpobi. Ma te ru ere, ono o ti mu kpahe omai? Ono o ti ru ei bẹbẹ kẹ omai re ma ru oware uwoma?—

Setan Ẹdhọ na. Rekọ amono ọfa a ti mu kpahe omai?— Ahwo nọ Ẹdhọ ọ viẹhọ no re a rọwo erue. Jesu ọ ta kẹ isu egagọ edẹ riẹ nọ: “Whai e rọ ọsẹ rai ukumuomu na, o tẹ were owhai nọ wha re ru ẹguọlọ ọsẹ rai.”—Jọn 8:44.

Ahwo buobu a riẹ nọ a be were Ẹdhọ. Jesu o se rai “akpọ na.” Eme họ “akpọ na” nọ Jesu ọ ta ẹme kpahe na?— Re ma ruẹ uyo na, joma rovie kpohọ Jọn uzou avọ 15, owọ avọ 19. Ma jọ etẹe se eme ọ Jesu enana: “Orọ nọ whai hẹ jọ erọ akpọ na, akpọ na o he you erọ obọ riẹ; rekọ fiki epanọ wha rọ erọ akpọ na ha, rekọ mẹ sanọ owhai no akpọ na no, fiki ere akpọ na oje mu kpahe owhai.”

Fikiere akpọ nọ o mu kpahe ilele Jesu na họ ahwo nọ a rrọ ilele riẹ hẹ. Fikieme akpọ na o ro mukpahe ilele Jesu?— Roro  kpahe iẹe. Ono họ osu akpọ na?— Ebaibol na e ta nọ: “Akpọ na ọsoso ọ rrọ obọ ogaga oyoma na.” Oyoma ọyena họ Setan Ẹdhọ na.—1 Jọn 5:19.

Kọ whọ ruẹ oware nọ o jẹ rrọ bẹbẹ re a ru oware nọ u woma?— Setan avọ akpọ riẹ a bi ru ei bẹbẹ. Rekọ oware ofa o be whae ze re. Kọ whọ kareghẹhọ iẹe?— Evaọ Uzou avọ 23 ọ obe nana, ma wuhrẹ nnọ a yẹ omai kpobi fihọ uzioraha. Kọ u gbe ti kiehọ gaga okenọ a te si uzioraha, Ẹdhọ, gbe akpọ riẹ no?—

Ebaibol na e yaa eyaa nọ: ‘Akpọ na ọ be vrẹ.’ Onana u dhesẹ nọ enọ e rrọ ilele ọ Owuhrẹ Ologbo na kpobi hi a rẹ te vrẹ re. A te kẹ ae uvẹ re a rria bẹdẹ bẹdẹ hẹ. Kọ whọ riẹ ahwo nọ a te rria bẹdẹ bẹdẹ?— Ebaibol na e nya họ aro ta nọ: “Ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:17) E, enọ i ru ewoma ọvo, enọ i “ru oreva Ọghẹnẹ,” a rẹ te rria bẹdẹ bẹdẹ evaọ akpọ ọkpokpọ Ọghẹnẹ. Fikiere o tẹ make rrọ bẹbẹ, ma gwọlọ ru oware nọ u woma, ogbẹrọ ere?—

Joma se ikereakere enana nọ i dhesẹ oware nọ o gbẹ rọ lọhọ re a ru oware nọ u woma ha kugbe: Matiu 7:13, 14; Luk 13:23, 24; gbe Iruẹru 14:21, 22.

[Uwoho nọ o rrọ ẹwẹ-obe avọ 137]

Didi uye o bẹ Pọl evaọ okenọ o ru oware nọ u woma?

[Uwoho nọ o rrọ ẹwẹ-obe avọ 138]

Fikieme ahwo nana a be rọ gwọlọ kpe Jesu?

[Uwoho nọ o rrọ ẹwẹ-obe avọ 141]

Okenọ akpọ nana ọ tẹ vrẹ no, eme ọ te via kẹ enọ i ru oware uwoma?