Uzou Avọ 22

Oware Nọ O Rọ Thọ Re Ma Ta Erue

DAE rehọ iẹe nnọ ọmọtẹ jọ ọ ta kẹ oni riẹ nọ: “Isukulu e tẹ nwane fa no me ti kpozi.” Rekọ ọ tẹ jọ obei je lele egbẹnyusu riẹ zaro, nọ o te uwou no ọ tẹ ta kẹ oni riẹ nọ: “Nọ isukulu e fa no, iticha mẹ ọ tẹ ta kẹ omẹ nọ mẹ hẹrẹ omojọ.” Kọ u woma re ọ ta ere?—

Hayo ọmọzae jọ ọ sae ta kẹ ọsẹ riẹ nọ: “Ijo, mẹ jọ evaọ uwou na fa obọro ho.” Rekọ ẹvẹ o rẹ jọ otẹrọnọ ọ ghinẹ fa obọro evaọ uwou na? Kọ o thọ re ọ ta nọ o ru ere he?—

Owuhrẹ Ologbo na o dhesẹ oware nọ u fo nọ ma re ru kẹ omai. Ọ ta nọ: ‘Ru re ẹme ra E ọ jọ E, Ijo ra Ijo; onọ o hẹriẹ oma no onana obọ oyoma na u no ze.’ (Matiu 5:37) Eme Jesu ọ be rọ eme riẹ na dhesẹ?— O dhesẹ nọ ma re ru oware nọ ma ta.

Iku jọ e rrọ Ebaibol na nọ i dhesẹ epanọ u wo uzou te re ma  ta uzẹme. Iku na e rrọ kpahe imava jọ nọ i se oma rai ilele Jesu. Joma ruẹ oware nọ o via.

Kawo vi emerae ivẹ nọ Jesu o ro whu no, ahwo buobu no eria ugbothabọ ze a tẹ ziọ Jerusalẹm ti ru ehaa ilogbo erọ ahwo Ju nọ a re se Pẹntikọst. Pita ukọ na ọ kẹ ovuẹ igbunu jọ, onọ ọ ta kẹ ahwo na kpahe Jesu, ọnọ Jihova ọ kpare no uwhu ze na. Onana họ orọ ọsosuọ nọ ahwo buobu nọ a ziọ Jerusalẹm na a bi ro yo kpahe Jesu. Whaọ a gwọlọ riẹ viere. Fikiere, eme a ru?—

A rria kri vrẹ epanọ a roro. Rekọ nọ omoke jọ o vrẹ no, ugho otujọ u te re no, fikiere a tẹ gwọlọ obufihọ re a sae dẹ emuore. Ilele nọ e rrọ Jerusalẹm a gwọlọ fi obọ họ kẹ erara na. Fikiere, ibuobu rai a tẹ zẹ eware rai jẹ rọ ugho na bru ikọ Jesu ze. Ikọ na a vẹ rọ ugho na kẹ enọ ugho rai u re no na.

Ananias avọ aye riẹ, Safira, enọ e rrọ ahwo ukoko Ileleikristi na evaọ Jerusalẹm, a zẹ otọ rai jọ. Uvumọ ohwo ọ ta kẹ ae nnọ a zẹ e he. Iroro obọ rai a rọ zẹ e. Rekọ orọnọ fiki epanọ a you ilele  ekpokpọ Jesu a rọ zẹ otọ na ha. Uzẹme riẹ họ, Ananias avọ Safira a gwọlọ ru re ahwo a roro nọ a woma vi epanọ a ghinẹ rrọ. Fikiere a tẹ gbae mu re a ta nnọ a be rehọ ugho otọ na kpobi fi obọ họ kẹ amọfa. Abọjọ ugho na ọvo a be te ghinẹ rọ kẹ, rekọ a ta nọ oma riẹ kpobi a be rọ ze. Ẹvẹ who rri oware na?—

Ananias ọ tẹ nya ze te ruẹ ikọ na. Ọ tẹ kẹ ae ugho na. Whaọ, Ọghẹnẹ ọ riẹ inọ ugho na kpobi ọ be rọ kẹ ai na ha. Fikiere Ọghẹnẹ ọ tẹ jẹ Pita ukọ na riẹ nnọ Ananias ọ be ta uzẹme ẹme na ha.

Pita ọ tẹ ta nọ: ‘Ananias, eme whọ rọ kẹ Setan uvẹ gele owhẹ ru onana? Otọ na otọ ra. A gba owhẹ họ nọ whọ zẹ e he. Yọ nọ whọ make zẹ otọ na no, oware nọ u je owhẹ whọ rẹ rọ ugho na ru. Rekọ eme who bi ro ru ẹghẹ inọ ugho na kpobi ona kpakiyọ abọ riẹ jọ ọvo whọ rọ ze? Ọrue whọ be ta na, orọnikọ rọ kẹ omai ọvo ho, rekọ rọ kẹ Ọghẹnẹ.’

Ẹhẹ, ẹme na ọ rro te ere. Ananias ọ be ta ọrue! Oware nọ ọ ta oye o bi ru na ha. Ẹghẹ o bi ru na. Ebaibol na e ta kẹ omai oware nọ o via lele iei. O ta nọ: ‘Nọ o yo eme ọ Pita, Ananias o te kie fihọ otọ, o te whu.’ Ọghẹnẹ o kpe Ananias no! A tẹ wọ e nya i kie.

 Oware wọhọ euwa esa e ruọ emu no, Safira ọ tẹ rueva. O ri yo oware nọ o via kẹ ọzae riẹ hẹ. Pita ọ tẹ nọ e nnọ: ‘Kọ unuigho nọ wha rọ kẹ omai na wha zẹ otọ na?’

Safira o te yo nọ: ‘E, ere ma zẹ otọ na.’ Rekọ ọrue ọ ta na. A fi ugho otọ na jọ họ ẹkpa rai. Fikiere Ọghẹnẹ o te je kpe Safira.—Iruẹru 5:1-11.

Eme ma re wuhrẹ no oware nọ o via kẹ Ananias avọ Safira na ze?— U wuhrẹ omai nnọ eterue e rẹ were Ọghẹnẹ hẹ. Ọ gwọlọ re ma ta uzẹme ẹsikpobi. Rekọ ahwo buobu a rẹ ta nọ u kiehọ re a ta erue. Kọ who roro nọ ahwo na a ta gba?— Kọ whọ riẹ nọ ọrue jọ nọ a ta ọye ọ wha ẹyao, edada, gbe uwhu nọ e rrọ otọakpọ na ze na?—

Kareghẹhọ, Ẹdhọ ọ ta ọrue kẹ aye ọsosuọ na, Ivi. Ọ ta kẹe nọ o ti whu hu ọ tẹ ghẹmeeyo kẹ Ọghẹnẹ jẹ re ubi-ure nọ Ọghẹnẹ ọ ta nọ ọ re he na. Ivi ọ rọwo ẹme Ẹdhọ na ọ tẹ re ubi-ure na. Ọ tẹ bẹbẹ Adamu họ re ubi-ure na re. A te zihe ruọ erahaizi, fikiere a yẹ emọ rai kpobi wọhọ erahaizi. Yọ fikinọ a rrọ erahaizi, emọ Adamu kpobi a be ruẹ uye je whu. Ẹvẹ ebẹbẹ na kpobi i ro muhọ?— Ọrue o mu rai họ.

Agbẹta nọ Jesu ọ rọ ta nnọ Ẹdhọ yọ “ọterue gbe ọsẹ riẹ” na! Ọye họ ohwo ọsosuọ nọ ọ ta ọrue. Okenọ ohwo jọ ọ tẹ ta ọrue, yọ o bi ru oware nọ Ẹdhọ ọ kaki ru no vẹre. Ma re roro kpahe onana otẹrọnọ iroro ọrueta e ruọ omai eva ẹdẹjọ.—Jọn 8:44.

 Okevẹ iroro ọrueta e rẹ sae rọ ruọ owhẹ eva?— Kọ ogbẹrọ okenọ who te ru oware jọ thọ?— Oware jọ o sae vo owhẹ abọ kie whu. Kọ a tẹ nọ owhẹ kpahe iẹe, kọ u woma re whọ ta nọ oniọvo ra jọ o ru rie? Hayo kọ who re ru epaọ ẹsenọ whọ riẹ epanọ o via ha?—

Kọ a tẹ jọ obọ isukulu kẹ owhẹ iruo nọ whọ jọ obọ uwou ru, rekọ who te ru abọ riẹ jọ ọvo? Kọ whọ rẹ ta nọ whẹ ọvo o ru rie, o tẹ make rọnọ ohwo jọ o fi obọ họ kẹ owhẹ?— Ma rẹ kareghẹhọ Ananias avọ Safira. A ta uzẹme na kpobi hi. Ọghẹnẹ o te kpe ai ro dhesẹ epanọ ọrue o yoma te.

Fikiere makọ oware kpobi nọ ma ru kẹhẹ, eware i re yoma viere ma tẹ ta ọrue, yọ o tubẹ thọ re ma ta ubro uzẹme. Ebaibol e ta nọ: “Ta uzẹme.” O tẹ jẹ ta nọ: ‘Wha ta ọrue kẹ ohwohwo ho.’ Jihova ọ rẹ ta uzẹme ẹsikpobi, yọ ọ gwọlọ nọ ma re ru epọvo na re.—Ahwo Ẹfẹsọs 4:25; Ahwo Kọlọsi 3:9.

Ma rẹ ta uzẹme ẹsikpobi. Oye họ ẹme nọ o rrọ Ọnyano 20:16; Itẹ 6:16-19; 12:19; 14:5; 16:6; gbe Ahwo Hibru 4:13.

[Uwoho nọ o rrọ ẹwẹ-obe avọ 117]

Eme ọmọzae ọnana o ru thọ?

[Uwoho nọ o rrọ ẹwẹ-obe avọ 118]

Didi ọrue Ananias ọ be ta kẹ Pita na?

[Uwoho nọ o rrọ ẹwẹ-obe avọ 119]

Eme ọ via kẹ Ananias fikinọ ọ ta ọrue?

[Uwoho nọ o rrọ ẹwẹ-obe avọ 120]

Ono Jesu ọ ta nọ ọ ta ọrue ọsosuọ, kọ eme o no rie ze?

[Uwoho nọ o rrọ ẹwẹ-obe avọ 121]

Okevẹ iroro ọrueta e rẹ rọ nya ze?