Uzou Avọ 42

Oware Nọ U Je Fo Re Ma Ru Iruo

OVẸ o rẹ mae were owhẹ, re who ru iruo manikọ re whọ zaro?— Re a zaro o thọ họ. Ebaibol na e ta kpahe Jerusalẹm inọ “emezae avọ emetẹ a te vọ iyẹrẹ okpẹwho na te zaharo.”—Zekaraya 8:5.

O rẹ were Owuhrẹ Ologbo na oma re o rri emaha nọ e be zaharo. Taure ọ tẹ te ziọ otọakpọ, ọ ta nọ: “Mẹ [jọ] abotọ [Ọghẹnẹ], wọhọ osu iruo, . . . jẹ hae ghọghọ eva aro riẹ kẹse kẹse.” Mu ẹro họ nnọ Jesu ọ jọ oruiruo kugbe Jihova evaọ obọ odhiwu. Yọ okenọ ọ jọ obei, ọ ta nọ: “[Mẹ] jẹ were eva kẹ emọ ahwo.” Ẹhẹ, wọhọ epanọ ma wuhrẹ no  vẹre, Owuhrẹ Ologbo na o wo uvi isiuru kẹ ohwo kpobi, kugbe emaha.—Itẹ 8:30, 31.

Kọ who roro nọ Jesu ọ zaro okenọ ọ jọ ọmaha?— Ẹsejọhọ o ru ere. Rekọ nọ ọ jọ “osu iruo” vẹre evaọ obọ odhiwu na, kọ o ru iruo evaọ otọakpọ re?— A je se Jesu “ọmọ ọwena na.” Rekọ a se riei “ọwena na” re. Eme onana u dhesẹ?— Josẹf, ọnọ ọ yọrọ Jesu wọhọ ọmọ riẹ, o wuhrẹ i rie. Jesu omariẹ o te zihe ruọ ọwena.—Matiu 13:55; Mak 6:3.

Didi oghẹrẹ ọwena Jesu ọ jọ?— Nọ ọ jọ osu iruo evaọ obọ odhiwu na, kọ who gbe roro nọ ọ jọ ọwena nọ ọ riẹ iruo ziezi evaọ otọakpọ?— Roro epanọ iruo ọwena e  ga te evaọ oke yena. O wọhọ nnọ Jesu ọ rẹ nya i ko ure, bru ure na ibribro, wọ ure na kpobọ uwou, ọ vẹ jẹ kare ure na ro ku emẹjẹ, ebẹnche, gbe eware efa.

Kọ who roro nnọ iruo nana e jẹ were Jesu?— Kọ o rẹ were owhẹ otẹrọnọ whọ rẹ sai ku emamọ emẹjẹ gbe egbara gbe eware efa kẹ ahwo?— Ebaibol na e ta nọ u woma re ohwo ọ re “awere iruo riẹ.” U wo oghẹrẹ awere jọ nọ o re no iruo ze nọ a rẹ jọ arozaha ruẹ hẹ.—Ọtausiwoma Na 3:22.

Iruo i ghine woma kẹ iroro gbe ugboma mai. Emaha jọ e rẹ keria rri etẹlivisiọno hayo zaro ọvo. A ve fu fihọ gbẹkẹ jẹ jọ yẹyẹlẹ, yọ eva e rẹ ghinẹ were ae hi. Yọ a bi ru amọfa were eva gbe he. Eme u fo nọ ma re ru re ma were eva?

Ma jọ Uzou avọ 17 orọ obe nana wuhrẹ inọ okẹ nọ a rẹ kẹ gbe eware nọ a re ru ro fi obọ họ kẹ amọfa o rẹ wha evawere ze. (Iruẹru 20:35) Ebaibol na i se Jihova ‘Ọghẹnẹ evawere.’ (1 Timoti 1:11) Yọ wọhọ epanọ ma se evaọ obe Itẹ na, Jesu ọ “jẹ hae ghọghọ eva aro riẹ kẹse kẹse.” Fikieme Jesu ọ jẹ rọ were eva?— Ọ fodẹ oware jọ nọ o wha riẹ ze nọ ọ ta nọ: “Ọsẹ mẹ o gbe bi ru iruo rite enẹna, me te je bi ru re.”—Jọn 5:17.

Okenọ Jesu ọ jọ otọakpọ, orọnikọ iruo ọwena o ru evaọ uzuazọ riẹ kpobi hi. Jihova Ọghẹnẹ ọ ruẹrẹ obọdẹ iruo fihọ kẹe nọ o re ru evaọ otọakpọ. Kọ whọ riẹ iruo na?— Jesu ọ ta nọ: “Mẹ rẹ vuẹovuẹ usiuwoma uvie Ọghẹnẹ [kẹ] ewho efa re; keme fiki onana a je vi omẹ ze.” (Luk 4:43) Ẹsejọ nọ Jesu ọ tẹ ta usiuwoma kẹ ahwo, a rẹ rọwo ẹme riẹ jẹ ta eme nọ ọ ta kẹ amọfa, wọhọ epanọ aye Sameria nọ ọ rrọ etenẹ na o ru.—Luk 4:43; Jọn 4:7-15, 27-30.

Ẹvẹ iruo nana e jọ Jesu oma? Kọ who roro nnọ o jẹ were iẹe re o ru ei?— Jesu ọ ta nọ: “Emu mẹ họ oreva Ọnọ O vi omẹ ze,  jegbe re me ru iruo riẹ.” (Jọn 4:34) Ẹvẹ o rẹ were owhẹ te re whọ re emu nọ ọ rẹ mae were owhẹ?— Onana o sae lẹliẹ owhẹ riẹ epanọ o were Jesu te re o ru iruo nọ Ọghẹnẹ ọ kẹ riẹ nọ o ru.

Ọghẹnẹ ọ ma omai re ma were eva evaọ okenọ ma te bi wuhrẹ epanọ a re ru iruo. Ọghẹnẹ ọ ta nọ okẹ nọ Ọ kẹ ohwo-akpọ họ re o “wo evawere evaọ [iruo] riẹ.” Fikiere who te wuhrẹ epanọ who re ru iruo evaọ okenọ whọ gbẹ rrọ ọmaha, uzuazọ ra kpobi u ti wo omawere vi ere.—Ọtausiwoma Na 5:19.

Orọnikọ onana u dhesẹ nnọ ọmaha ọ rẹ sai ru iruo ọkpako ho, rekọ mai kpobi ma rẹ sai ru oghẹrẹ iruo jọ. Ọsẹgboni ra a sai kpohọ otafe kẹdẹ kẹdẹ nyae gwọlọ ugho re uviuwou rai o sae ruẹ emu nọ a rẹ re gbe uwou nọ a rẹ rria. Yọ wọhọ epanọ whọ riẹ, iruo buobu e sae jariẹ nọ u fo nọ a rẹ jọ uwou na ru re uwou na o jọ kpatiẹ.

Didi iruo whọ rẹ sai ru nọ e rẹ sae jọ erere kẹ uviuwou na soso?— Whọ rẹ sae ruẹrẹ emẹjẹ na họ, wozẹ imidhe, ku erara fiẹ, hwere uwou, jẹ kwa eware aroza ra koko. Ẹsejọhọ whọ be hai ru eware enana jọ. Iruo yena e ghinẹ rrọ erere kẹ uviuwou na.

Joma ruẹ epanọ iruo itieye e rọ rrọ erere. Whọ rẹ tọlọ eware aroza fihọ obei okenọ whọ tẹ zaro no. Fikieme whọ jẹ ta nọ onana o rrọ oja?— U re fi obọ họ ru uwou na kpatiẹ, yọ o rẹ sae jẹ whaha omonwa. Whọ gbẹ tọlọ eware aroza ra no ho, ẹdẹjọ oni ra ọ sae nya ze avọ eware nọ e vọ riẹ abọ o ve kpe owọ họ ai. Ọ sai kie jẹ nwa oma. O sae tubẹ gwọlọ nọ o kpohọ ẹsipito dede. Kọ oyena u gbe yoma?— Fikiere okenọ whọ tẹ tọlọ eware aroza ra fihọ obei, o rrọ erere kẹ ahwo kpobi.

Iruo efa e riẹ nọ emaha e rẹ sai ru re. Wọhọ oriruo, iruo isukulu. Whọ rẹ jọ isukulu wuhrẹ epanọ who re se obe. Obe-use o  rẹ were emọ jọ oma, rekọ o rẹ jọ emọ efa obọ gaga. Rekọ o tẹ make rrọ bẹbẹ eva oke ọsosuọ, o te were owhẹ who te wuhrẹ epanọ a re se ziezi. Whọ tẹ riẹ epanọ a re se ziezi, eware isiuru buobu e riẹ nọ whọ rẹ sai wuhrẹ. Whọ rẹ sai tube se obe Ọghẹnẹ, Ebaibol na, kẹ oma ra. Fikiere who te ru iruo isukulu ra ziezi, yọ erere o ghinẹ rrọ, ogbẹrọ ere?—

Ahwo jọ a riẹ nọ a rẹ dhẹ ozọ iruo. Ẹsejọhọ whọ riẹ ohwo jọ nọ ọ rrọ ere. Rekọ nọ Ọghẹnẹ ọ ma omai re ma ru iruo na, u fo re ma wuhrẹ epanọ ma rẹ rọ reawere iruo. Ẹvẹ Owuhrẹ Ologbo na ọ reawere iruo riẹ te?— O jọ wọhọ ẹre emamọ emu riẹ. Kọ didi iruo ọ jẹ ta kpahe na?— Ẹta kẹ amọfa kpahe Jihova Ọghẹnẹ gbe epanọ a sai ro wo uzuazọ ebẹdẹ bẹdẹ.

Fikiere oware jọ nọ o rẹ sai fi obọ họ kẹ omai reawere iruo ona. Nọ oma ra nọ, ‘Fikieme u je fo nọ a ru iruo nana?’ Whọ tẹ riẹ oware nọ o lẹliẹ oware jọ rrọ oja, o rẹ lọhọ vi ere re a ru ei. Yọ iruo na e tẹ make rro hayo kao, ru ei ziezi. Who te ru ere, whọ rẹ sae ghọghọ evaọ iruo abọ ra, wọhọ epanọ Owuhrẹ Ologbo mai o ru na.

Ebaibol na e rẹ sai fi obọ họ kẹ ohwo jọ emamọ oruiruo. Se oware nọ e ta eva Itẹ 10:4; 22:29; Ọtausiwoma Na 3:12, 13; gbe Ahwo Kọlọsi 3:23.

[Uwoho nọ o rrọ ẹwẹ-obe avọ 217]

Eme Owuhrẹ Ologbo na ọ jẹ reawere riẹ taure ọ tẹ te ze otọakpọ?

[Iwoho nọ e rrọ ẹwẹ-obe avọ 218]

Oghẹrẹ iruo ivẹ vẹ Jesu o ru okenọ ọ jọ otọakpọ?

[Uwoho nọ o rrọ ẹwẹ-obe avọ 221]

Fikieme u je wo uzou re whọ tọlọ eware aroza ra fihọ obei okenọ whọ tẹ rehọ ae zaro no?