Uzou Avọ 6

Owuhrẹ Ologbo Na Ọ Gbodibo Kẹ Amọfa

KỌ OHWO jọ o te ru oware uwoma kẹ owhẹ, o rẹ were owhẹ?— Ẹhẹ, o rẹ were amọfa re otẹrọnọ ohwo o ru emamọ oware kẹ ae. Ere o rrọ kẹ omai kpobi. Owuhrẹ Ologbo na ọ riẹ ere, yọ o je ru eware kẹ ahwo ẹsikpobi. Ọ ta nọ: ‘Mẹ nya ze, orọnikọ re a gbodibo kẹ omẹ hẹ, rekọ re mẹ gbodibo.’—Matiu 20:28.

Fikiere ma tẹ gwọlọ jọ wọhọ Owuhrẹ Ologbo na, eme ma re ru hrọ?— Ma rẹ gbodibo kẹ amọfa. Ma re ru eware ezi kẹ ae. Uzẹme o rrọ inọ ahwo buobu a bi ru onana ha. Evaọ uzẹme, ahwo buobu a gwọlọ re amọfa a gbodibo kẹ ae ọvo. Ilele Jesu a tube roro ere okejọ. Aikpobi a gwọlọ jọ ohwo nọ ọ mae rro hayo ọnọ ọ mai wuzou.

Ẹdẹjọ Jesu avọ ilele riẹ a je kperẹ. Nọ a ruọ ẹwho Kapaniọm no, kẹle Abade Galili, aikpobi a tẹ ruọ uwou jọ. Etẹe Jesu ọ jẹ rehọ onọ na zere ai: “Eme wha jẹ ta eva obọ edhere?” A te fibo keme evaọ edhere a je lele ohwohwo vravro kpahe ohwo nọ ọ mae rro.—Mak 9:33, 34.

 Jesu ọ riẹ nọ o thọ re ọjọ evaọ usu ilele riẹ na o roro nọ ọye ọ mae rro. Fikiere, wọhọ epanọ ma wuhrẹ evaọ uzou ọsosuọ orọ obe nana, ọ tẹ rehọ ọmaha jọ dikihẹ udevie rai ọ tẹ ta kẹ ae nọ a rẹ roma kpotọ wọhọ ọmọ na. Rekọ oyena u wuhrẹ i rai ghele he. Fikiere taure o te ti whu, Jesu o te wuhrẹ ae oware jọ nọ o rẹ thọrọ ae ẹro ho. Eme o ru?—

Okenọ aikpobi a jẹ re emu kugbe, Jesu ọ tẹ kparoma no emẹjẹ na ọ tẹ ba ewu ehru riẹ no. Nọ ọ tọlọ omokpa, ọ tẹ rehọ iẹe variẹ eku riẹ. Ọ tẹ jẹ ame fihọ odhe. Ma riẹ nọ akpọ o gbe ilele riẹ unu bi roro oware nọ ọ gwọlọ ru na.

Nọ a bi rri na, Jesu ọ tẹ nya ae kpobi wariẹ, ruwẹ, ọ tẹ wozẹ awọ rai. Ọ tẹ rehọ omokpa na ririe awọ rai. Dai roro iei! O hae jọ nọ whọ jọ etẹe, ẹvẹ o hae jọ? Ẹvẹ o hae jọ owhẹ oma?—

Ilele riẹ a roro nọ u kiehọ họ re Owuhrẹ Ologbo na ọ gbodibo kẹ ae enẹ. U kiehọ ae oma ha. Evaọ uzẹme, Pita ọ se nnọ Jesu ọ wozẹ awọ riẹ. Rekọ Jesu ọ ta nnọ u kiehọ kẹe re ọ wozẹ awọ rai.

Ma rẹ wozẹ awọ ahwo nẹnẹ hẹ. Rekọ ere a je ru evaọ okenọ Jesu ọ jọ otọakpọ. Kọ whọ riẹ oware nọ o soriẹ ze?— Evaọ ẹkwotọ nọ Jesu avọ ilele riẹ a jẹ rria, eviẹ nọ i re ruru awọ họ ahwo a jẹ wha. Fikiere nọ a tẹ be nya edhere ovu na, ovu ọ vẹ vọ awọ rai. O jọ oware uwoma re a wozẹ awọ ọrara.

Rekọ oke nana uvumọ olele Jesu ọ fialoma lahwe re ọ wozẹ awọ edekọ na ha. Fikiere Jesu ọvo o te ru ei. Jesu ọ rehọ onana wuhrẹ ilele riẹ okpoware jọ. U fo re a wuhrẹ oware nana. Yọ o rrọ oware nọ u fo nọ ma re wuhrẹ nẹnẹ re.

Kọ whọ riẹ uwuhrẹ na?— Okenọ Jesu o ku ewu ehru riẹ họ  jẹ keria no, ọ tẹ ta nọ: “Wha riẹ epanọ me ru kẹ owhai na? Wha bi se omẹ owuhrẹ gbe Olori; wha riẹ se, keme ere mẹ rrọ. Kọ otẹrọnọ mẹ [nọ ọ rrọ] Olori gbe owuhrẹ ọ wozẹ awọ rai, ufore whai ohwo ọ wozẹ awọ ohwo re.” —Jọn 13:2-14.

Owuhrẹ Ologbo na ọ jọ etenẹ dhesẹ nọ ọ gwọlọ re ilele riẹ a gbodibo kẹ ohwohwo. Ọ gwọlọ re a roro kpahe omobọ rai ọvo ho. Ọ gwọlọ họ re a roro nnọ a wuzou te epanọ amọfa a rẹ rọ gbodibo kẹ ae ẹsikpobi. Ọ gwọlọ re a wo unevaze nọ a re ro ru iruo kẹ amọfa.

Kọ oyena o gbẹ rrọ emamọ uwuhrẹ?— Kọ whọ te jọ wọhọ Owuhrẹ Ologbo na re whọ gbodibo kẹ amọfa?— Mai kpobi ma rẹ sai ru eware kẹ amọfa. Onana o te lẹliẹ eva were ae. Rekọ mai woma, o te lẹliẹ eva were Jesu gbe Ọsẹ riẹ.

O bẹ hẹ re a gbodibo kẹ amọfa. Who te mu ẹro họ otọ, whọ te ruẹ eware buobu nọ whọ rẹ sai ru kẹ amọfa. Dina roro: Kọ oware jọ o riẹ nọ whọ rẹ sai ru ro fi obọ họ kẹ oni ra? Whọ riẹ  nọ o bi ru eware buobu kẹ owhẹ gbe uviuwou na soso. Kọ whọ sai fi obọ họ kẹe?— Eme jabọ whọ gbẹ nọ e he?

Whọ sae wọ emu fihọ emẹjẹ evaọ okenọ uviuwou na o tẹ be te re emu. Hayo whọ sae kwa imidhe no evaọ okenọ uviuwou na o tẹ re emu no. Emọ jọ e rẹ wọ errarra nyae kufiẹ kẹdẹ kẹdẹ. Oware nọ whọ rẹ sai ru kpobi, yọ whọ be gbodibo kẹ amọfa, wọhọ epanọ Jesu o ru na.

Kọ who wo inievo emaha nọ whọ rẹ sae gba odibo kẹ? Kareghẹhọ, Jesu, Owuhrẹ Ologbo na, ọ gba odibo kẹ ilele riẹ. Whọ tẹ be gba odibo kẹ inievo emaha ra, yọ whọ be raro kele Jesu. Eme whọ rẹ sai ru kẹ ae?— Whọ rẹ sai fi obọ họ kẹ ae fi eware arozaha rai họ obei evaọ okenọ  a tẹ zaro no. Hayo whọ sai ku ewu họ ae. Hayo whọ sae rọ uto hwa kẹ ae. Kọ whọ sai roro oware ofa nọ whọ rẹ sai ru kẹ ae?— A ti you owhẹ who te ru eware enana, wọhọ epanọ ilele Jesu a you rie na.

Whọ sae gba odibo kẹ amọfa evaọ obọ isukulu. O sae jọ ibe-eklase hayo iticha ra. Who te fi obọ họ tọlọ ebe ohwo nọ i kie kẹe, yọ emamọ oware who ru na. Whọ rẹ sae fialoma nọ who bi ririe ebọdo na hayo ru oware ofa kẹ iticha ra. Ẹthẹ nọ a re tube rovie kẹ ohwo dede yọ oware ezi.

Ẹsejọ, ma te ruẹ nọ ahwo a bi yere omai hi ma tẹ gbodibo kẹ ae. Kọ who roro nọ onana o rẹ whaha omai ewoma oruo?— Ijo! Ahwo buobu a yere Jesu kẹ iruo iwoma riẹ hẹ. Rekọ oyena o whaha e riẹ ewoma oruo ho.

Fikiere joma gbẹ hae gbodibo kẹ amọfa. Joma kareghẹhọ Owuhrẹ Ologbo na, Jesu, jẹ dao oma ẹsikpobi lele oriruo riẹ.

Rọkẹ ikereakere efa kpahe obufihọ kẹ amọfa, se Itẹ 3:27, 28; Ahwo Rom 15:1, 2; gbe Ahwo Galesha 6:2.

[Uwoho nọ o rrọ ẹwẹ-obe avọ 37]

Eme ilele Jesu a jẹ vravro kpahe?

[Uwoho nọ o rrọ ẹwẹ-obe avọ 39]

Didi uwuhrẹ Jesu o je wuhrẹ ilele riẹ?

[Uwoho nọ o rrọ ẹwẹ-obe avọ 40, 41]

Eme whọ rẹ sai ru ro fi obọ họ kẹ amọfa?