Uzou Avọ 44

U Fo Re Egbẹnyusu Mai A You Ọghẹnẹ

EGBẸNYUSU yọ ahwo nọ ma rẹ gwọlọ ta ẹme kẹ jẹ jọ kugbe. Rekọ u wo uzou re ma wo emamọ egbẹnyusu. Ono who roro nọ ọ rrọ ogbẹnyusu nọ ọ mai woma nọ ma rẹ sai wo?— Jihova Ọghẹnẹ.

Kọ ma sae ghinẹ jọ egbẹnyusu Ọghẹnẹ?— Ebaibol na e ta nọ Abraham, ọzae nọ ọ rria oke krẹkri nọ u kpemu, ọ jọ ‘ogbẹnyusu Jihova.’ (Jemis 2:23) Kọ whọ riẹ oware nọ ọ rọ jọ ogbẹnyusu Jihova?— Ebaibol na e kẹ uyo nọ Abraham o yo ẹme kẹ Ọghẹnẹ. O yo ẹme makọ okenọ oware nọ a ta kẹe nnọ o ru na o jọ bẹbẹ. Fikiere re ma jọ ogbẹnyusu Jihova, ma re ru oware nọ o rẹ were iẹe, wọhọ epanọ Abraham gbe Owuhrẹ Ologbo na  a ru ẹsikpobi.—Emuhọ 22:1-14; Jọn 8:28, 29; Ahwo Hibru 11:8, 17-19.

Jesu ọ ta kẹ ikọ riẹ nọ: ‘Whai yọ egbẹnyusu mẹ wha te ru eware nọ mẹ ta kẹ owhai.’ (Jọn 15:14) Nọ o rọnọ obọ Jihova eme kpobi nọ Jesu ọ ta kẹ ahwo i no ze na, koyehọ Jesu ọ be ta nnọ egbẹnyusu riẹ họ ahwo nọ a ru oware nọ Ọghẹnẹ ọ ta nọ a ru. Ẹhẹ, egbẹnyusu riẹ kpobi a you Ọghẹnẹ.

Egbẹnyusu ekpekpe jọ nọ Owuhrẹ Ologbo na o wo họ ikọ riẹ, enọ whọ rẹ ruẹ uwoho rai evaọ ẹwẹ-obe avọ 75 ọrọ obe nana. A lele i rie kperẹ je fi obọ họ kẹe evaọ iruo usiuwoma ota na. Jesu ọ raha oke riẹ buobu kugbe ezae enana. A re emu kugbe. A ta ẹme kpahe Ọghẹnẹ kugbe. Yọ a ru eware efa kugbe. Rekọ Jesu o wo egbẹnyusu efa buobu. Ọ jẹ hae jọ kugbe ae, jẹ reawere kugbe.

Uviuwou jọ nọ Jesu ọ jẹ hae kpahe a jẹ rria ẹwho ọsese nọ a re se Bẹtani, kẹle okpẹwho ologbo ọ Jerusalẹm na. Kọ whọ kareghẹhọ  uviuwou na?— Uviuwou ọ Meri avọ Mata gbe oniọvo rai, Lazarọs. Jesu o se Lazarọs ogbẹnyusu riẹ. (Jọn 11:1, 5, 11) Oware nọ o lẹliẹ Jesu you uviuwou nana nọ o jẹ hae rọ were iẹe re ọ jọ kugbe ai na họ a you Jihova jẹ be gọ E.

Orọnikọ onana u dhesẹ nnọ Jesu o dhesẹ ẹwo kẹ ahwo nọ a gọ Ọghẹnẹ hẹ hẹ. O je dhesẹ ẹwo kẹ ae. O tube kpohọ iwou rai je lele ae re emu dede. Onana o lẹliẹ ahwo jọ ta nọ Jesu yọ “ogbẹnyusu imiazọhọ gbe erahaizi!” (Matiu 11:19) Uzẹme na họ orọnikọ Jesu o kpohọ iwou ahwo yena fikinọ eyero uzuazọ rai o were riẹ hẹ. O kpohọ iwou rai re ọ ta kẹ ae kpahe Jihova. Ọ jẹ dao oma fi obọ họ kẹ ae nwene idhere iyoma rai re a gọ Ọghẹnẹ.

Onana o via ẹdẹjọ evaọ okpẹwho Jẹriko. Jesu ọ jẹ nya ẹwho na vrẹ evaọ okenọ o je kpohọ Jerusalẹm. Ogbotu ahwo a jariẹ, yọ ọzae jọ nọ a re se Zakiọs ọ jọ udevie rai. Ọ gwọlọ ruẹ Jesu. Rekọ Zakiọs ọ jọ kpẹkpẹe, fikiere ọ gbẹ jẹ sae rue riẹ hẹ fiki ogbotu na. Fikiere ọ tẹ dhẹ kpohọ obaro evaọ edhere na, ọ tẹ gadiẹ ure jọ re okenọ Jesu o te te etẹe, ọ vẹ sae rue riẹ ziezi.

Nọ Jesu o te oria ure na, o te rri ehru, ọ tẹ ta nọ: ‘Ovẹrẹ, nwrotọ, keme  nẹnẹ mẹ be ziọ uwou ra.’ Rekọ Zakiọs yọ ọdafe nọ o ru eware iyoma buobu no. Fikieme Jesu ọ rọ gwọlọ kpohọ uwou ohwo otiọye na?—

Orọnikọ fiki epanọ uzuazọ ọzae na o were Jesu hu. O kpohọ uwou riẹ re ọ ta kẹ Zakiọs kpahe Ọghẹnẹ. Ọ ruẹ epanọ ọzae na ọ lahiẹ oma te no re ọ rue riẹ. Fikiere ọ riẹ nọ o wọhọ nọ Zakiọs ọ te gaviezọ. Onana yọ emamọ oke nọ a rẹ rọ ta kẹe kpahe oghẹrẹ nọ Ọghẹnẹ ọ ta nọ ahwo a rria.

Fikiere, eme ma ruẹ nọ o be jọ etenẹ via enẹna?— Iwuhrẹ Jesu e were Zakiọs. O da riẹ gaga inọ ọ wha ahwo re, yọ ọ be yaa eyaa inọ o ti zihe igho kpobi nọ o gboro mi ahwo kẹ ae. O te ti zihe ruọ olele Jesu. Okioye ọvo Jesu avọ Zakiọs a ro zihe ruọ egbẹnyusu.—Luk 19:1-10.

Ma te bi lele oriruo Owuhrẹ Ologbo na, kọ ma re weze bru ahwo nọ a rrọ egbẹnyusu mai hi?— E. Rekọ ma re kpohọ iwou rai hi fikinọ uzuazọ rai o be were omai. Yọ ma re lele ai ru eware iyoma ha. Ma re kpohọ iwou rai re ma ta kẹ ae kpahe Ọghẹnẹ.

 Rekọ egbẹnyusu ekpekpe mai họ enọ ma mae gwọlọ raha oke kugbe. Re a jọ emamọ ogbẹnyusu, a rẹ jọ ahwo nọ a rẹ were Ọghẹnẹ. Ahwo jọ a tubẹ riẹ ohwo nọ Jihova ọ rrọ họ. Rekọ a tẹ gwọlọ wuhrẹ kpahe iẹe, ma rẹ sai fi obọ họ kẹ ae. O tẹ via evaọ obaro inọ a you Jihova wọhọ epanọ ma you rie na, a rẹ sai zihe ruọ egbẹnyusu ekpekpe mai.

Edhere ọfa jọ ọ riẹ nọ ma rẹ rọ riẹ sọ ohwo ọ te jọ emamọ ogbẹnyusu. Mu ẹro họ eware nọ ohwo na o bi ru. Kọ o re ru ahwo eware iyoma o ve mu ai họ ẹhwẹ? Yọ ekpehre uruemu, ogbẹrọ ere?— Kọ ọ rẹ ro ẹbẹbẹ ẹsikpobi? Kọ ma gwọlọ ro ẹbẹbẹ wọhọ ohwo na?— Hayo kọ o re keke aro fihọ ru eware iyoma o ve roro nọ o wo areghẹ gaga fikinọ a bi mu ei hi? A gbẹ maki mu ohwo na ha, Ọghẹnẹ ọ be ruẹ oware nọ o bi ru, ogbẹrọ ere? Kọ who roro nọ ahwo nọ a re ru eware iyoma itieye na a rẹ jọ emamọ egbẹnyusu nọ ma re wo?—

Kọ whọ gbẹ tọlọ Ebaibol ra? Joma ruẹ ẹme nọ ọ ta kpahe epanọ egbẹnyusu mai a sai ro kpomahọ izuazọ mai. Ikere na họ Ahwo Kọrint ọsosuọ, uzou avọ 15, owọ avọ 33. Kọ whọ rue riẹ no?— O se nọ: “Wha jọ a viẹ owhai họhọ: Usu uyoma o rẹ raha uruemu ezi.” Onana u dhesẹ nọ ma te bi lele ahwo yoma, ma ti yoma re. Yọ uzẹme o rrọ re inọ usu uwoma u re fi obọ họ ru omai woma.

Ajọ o thọ omai ẹro ho inọ Ohwo nọ ọ mai wo uzou evaọ uzuazọ mai họ Jihova. Kọ ma gwọlọ raha usu mai kugbei?— Koyehọ ma rẹ yọrọ oma re ma mu usu kugbe enọ i you Ọghẹnẹ ọvo.

A dhesẹ epanọ emamọ ogbẹnyusu u wo uzou te eva Olezi 119:115; Itẹ 13:20; 2 Timoti 2:22; 1 Jọn 2:15.

[Uwoho nọ o rrọ ẹwẹ-obe avọ 227]

Fikieme Abraham ọ rọ jọ ‘ogbẹnyusu Jihova’?

[Uwoho nọ o rrọ ẹwẹ-obe avọ 228]

Fikieme Jesu ọ jẹ hae rọ jọ kugbe uviuwou nana eva okenọ o te weze kpohọ Jerusalẹm? Kọ whọ riẹ edẹ rai?

[Uwoho nọ o rrọ ẹwẹ-obe avọ 229]

Fikieme Zakiọs ọ rọ gadiẹ ure nana?

[Uwoho nọ o rrọ ẹwẹ-obe avọ 230]

Fikieme Jesu o ro kpohọ uwou Zakiọs, kọ eme Zakiọs ọ be yaa eyaa nọ o ti ru na?