Uzou Avọ 9

U Ro Re Ma Dada Mu Wọso Edawọ

KỌ OHWO jọ ọ ta kẹ owhẹ nọ who ru oware nọ o thọ no ẹdẹjọ?— Kọ ọ ya obọ kẹ owhẹ nọ whọ sai ru ei? Hayo kọ ọ ta nọ who te ru ei o te were owhẹ gbe nnọ o ghinẹ thọ họ re a ru ei?— Ohwo jọ o te ru omai enẹ, yọ ọ be gwọlọ dawo omai.

Eme ma re ru a tẹ dawo omai? Kọ ma re kie kẹ ohwo na re ma ru oware nọ o thọ?— Oyena u re ru eva were Jihova Ọghẹnẹ hẹ. Kọ whọ riẹ ohwo nọ o te were eva?— E, Setan Ẹdhọ na.

Setan yọ ọwegrẹ Ọghẹnẹ, yọ ọwegrẹ mai Setan ọ rrọ re. Ma rẹ sae rue riẹ hẹ keme ẹzi ọ rrọ. Rekọ ọ rẹ sae ruẹ omai. Ẹdẹjọ Ẹdhọ ọ ta ẹme kẹ Jesu, Owuhrẹ Ologbo na, ọ tẹ gwọlọ dawo iẹe. Joma ruẹ oware nọ Jesu o ru. Ma vẹ riẹ oware nọ u fo nọ ma re ru evaọ okenọ a tẹ dawo omai re.

Jesu ọ gwọlọ ru oreva Ọghẹnẹ ẹsikpobi. Ọ jọ ẹgbede dhesẹ onana via ẹkwoma ame-ọhọ evaọ Ethẹ Jọdan. Okenọ Jesu ọ nwane họ-ame no Setan ọ jẹ rọ gwọlọ dawo Iẹe na. Ebaibol na e ta nọ ‘odhiwu o te rovie’ kẹ Jesu. (Matiu 3:16) Onana o sai dhesẹ nọ Jesu o te muọ uzuazọ ọsosuọ riẹ evaọ obọ odhiwu kugbe Ọghẹnẹ họ ẹkareghẹhọ.

 Nọ ọ họ-ame no Jesu o te kpohọ igbrẹwọ jọ re o roro kpahe eware nọ ọ be kareghẹhọ na. Ọ jọ obei edẹ udhuvẹ gbe aso udhuvẹ. Oke nana kpobi Jesu ọ riọ emu ọvo ho, o tẹ lẹliẹ ohọwo kpe ei gaga no. Nwanọ oke nana Setan ọ rọ nya ze te dawo Jesu.

Ẹdhọ ọ ta nọ: ‘Whọ tẹ rrọ Ọmọ Ọghẹnẹ, ta kẹ itho enana re i zihe ruọ ebrẹdi.’ Ebrẹdi na e hae te were gaga! Kọ Jesu o wo ogaga nọ ọ sai ro zihe itho ruọ ebrẹdi?— E. Fikieme? Fikinọ Jesu, Ọmọ Ọghẹnẹ, o wo ogaga obọdẹ.

Kọ whọ hai zihe utho ruọ ebrẹdi otẹrọnọ Ẹdhọ ọ ta nọ who ru ere?— Ohọwo u je kpe Jesu. Kọ o gbẹ hai woma re o ru ere ẹsiẹvo ọyena ọvo?— Jesu ọ riẹ nọ o thọ re ọ rehọ ogaga riẹ ru iruo oghẹrẹ utioye na. Jihova ọ kẹ riẹ ogaga oyena re ọ rehọ iẹe si ahwo bru Ọghẹnẹ, orọnikọ re ọ rehọ ogaga na kẹ omobọ riẹ erere he.

Fikiere, ukpenọ o zihe itho na ruọ ebrẹdi, Jesu ọ tẹ ta oware nọ a kere fihọ Ebaibol na kẹ Ẹdhọ, anọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.” Jesu ọ riẹ nnọ eruo oware nọ o rẹ were Jihova u wo uzou vi emu nọ a rẹ re.

Rekọ Ẹdhọ o zihe ze. Ọ rehọ Jesu  kpohọ Jerusalẹm, ọ tẹ rehọ iẹe dikihẹ abọ okpehru ọ etẹmpol na. Setan ọ tẹ ta nọ: ‘Whọ tẹ rrọ ọmọ Ọghẹnẹ, fia kie no etenẹ kpohọ otọ. Keme a kere nọ a te ta kẹ enjẹle Ọghẹnẹ re a ja owhẹ re whọ siọ oma ba ẹnwa.’

Fikieme Setan ọ jẹ ta ere?— Ọ ta ere rọ dawo Jesu re o ru oware ugheghẹ. Rekọ Jesu ọ gaviezọ kẹ Setan he. Ọ ta kẹ Setan nọ: ‘A kere nọ, “Whọ rẹ dawo Jihova Ọghẹnẹ ra ha.” ’ Jesu ọ riẹ nọ o thọ re o fi uzuazọ riẹ họ ọza rọ dawo Jihova.

Ghele na, o bẹ Setan he. Ọ tẹ rehọ Jesu kpohọ ugbehru jọ nọ u kpehru gaga. Ọ tẹ jọ obei dhesẹ ivie hayo egọmeti akpọ na kpobi gbe oruaro rai kẹe. Setan ọ tẹ ta kẹ Jesu nọ: “Who te diguẹ gọ omẹ, mẹ rẹ kẹ owhẹ eware nana kpobi.”

Roro oware nọ Ẹdhọ ọ be rọ kẹ Jesu na. Kọ uzẹme o ghinẹ rrọ inọ ivie hayo egọmeti ahwo-akpọ kpobi na erọ Setan?— Whaọ, Jesu ọ vro ho inọ Setan o wo rai. Ọ hae vro o gbẹ rọnọ erọ Setan he. E, Setan họ osu erẹwho akpọ na kpobi. Ebaibol na i tube sei ‘osu akpọ nana’ dede.—Jọn 12:31.

Eme who re ru otẹrọnọ Ẹdhọ ọ yaa eyaa oware jọ kẹ owhẹ otẹrọnọ whọ gọ riẹ e?— Jesu ọ riẹ nọ o thọ re a gọ Ẹdhọ makọ oware nọ O ti wo noi ze kẹhẹ. Fikiere Jesu ọ ta nọ: ‘Nyavrẹ, Setan! Keme Ebaibol na e ta nnọ Jihova Ọghẹnẹ ra whọ rẹ gọ yọ iruo riẹ ọvo who re ru.’—Matiu 4:1-10; Luk 4:1-13.

Ma rẹriẹ ovao ku edawọ re. Kọ whọ riẹ ejọ rai?— Oriruo jọ ọna. Oni ra o there emamọ emu jọ. Ọ rẹ sae ta kẹ owhẹ nọ whọ kaobọ te emu na ha bẹsenọ oke emuọriọ u re te no. Rekọ ohọwo u bi kpe owhẹ gaga, yọ urru emu na u bi si owhẹ. Kọ who ti yo ẹme kẹ oni ra?— Setan ọ gwọlọ nọ whọ ghẹmeeyo kẹe.

 Kareghẹhọ Jesu. Ohọo u je kpe i gaga re. Rekọ ọ riẹ nọ re o ru Ọghẹnẹ eva were u wuzou vi emuọriọ. Who re dhesẹ nọ whọ wọhọ Jesu who te ru oware nọ oni ra ọ ta.

Ẹsejọhọ emọ efa e rẹ ta kẹ owhẹ nnọ whọ lọ oghẹrẹ imu jọ. A sae ta kẹ owhẹ nnọ imu na e te lẹliẹ oma sasa owhẹ ziezi. Rekọ e sae jọ imu iyoma. E sai ru owhẹ mọ gaga hayo tube kpe owhẹ no dede. Hayo ohwo jọ ọ sae kẹ  owhẹ isigareti, ọ vẹ ya obọ kẹ owhẹ sọ whọ sai vovo iei. Eme who ti ru?—

Kareghẹhọ Jesu. Setan ọ dao oma re o ru Jesu fi uzuazọ riẹ họ ọza evaọ okenọ ọ ta kẹe nọ ọ la no etẹmpol na ze. Rekọ Jesu ọ se. Eme who re ru otẹrọnọ ohwo jọ ọ tẹ ya owhẹ obọ nnọ who ru oware imuozọ jọ?— Jesu ọ gaviezọ kẹ Setan he. Fikiere, u fo ho re whọ gaviezọ kẹ ohwo nọ ọ gwọlọ ru re who ru eware iyoma.

Ẹdẹjọ a sae ta kẹ owhẹ nnọ whọ gọ ẹmema, oware nọ Ebaibol na e ta nọ ma re ru hu. (Ọnyano 20:4, 5) O sae jọ abọjọ iruẹru obọ isukulu. A sae ta kẹ owhẹ nọ who gbe ru ei hi a ti le owhẹ no isukulu. Eme who ti ru?—

O rẹ jọ lọlọhọ re ma ru oware nọ u woma evaọ okenọ amọfa kpobi a te bi ru ei. Rekọ re a ru oware nọ u woma o sae jọ bẹbẹ gaga okenọ amọfa a te bi gele omai ru oware uyoma. A sae ta kẹ owhẹ nọ oware nọ a bi ru na o nwani yoma tere he. Rekọ onọ ulogbo na họ, Eme Ọghẹnẹ ọ ta kpahe iẹe? Ọye ọ riẹ vi omai.

Fikiere, makọ ẹme nọ amọfa a ta kẹhẹ, ma rẹ whaha eware nọ Ọghẹnẹ ọ ta nọ e thọ. Ere ma ti ro ru Ọghẹnẹ eva were, ma vẹ siọ eva ba eru were Ẹdhọ.

Whọ rẹ sae ruẹ evuẹ efa kpahe epanọ ma rẹ rọ whaha ẹdawọ eyoma oruo eva Olezi 1:1, 2; Itẹ 1:10, 11; Matiu 26:41, gbe 2 Timoti 2:22.

[Uwoho nọ o rrọ ẹwẹ-obe avọ 52]

Ẹsejọhọ eme Jesu ọ kareghẹhọ okenọ ọ jẹ họ-ame?

[Uwoho nọ o rrọ ẹwẹ-obe avọ 53]

Ẹvẹ Ẹdhọ ọ rọ rehọ itho dawo Jesu?

[Uwoho nọ o rrọ ẹwẹ-obe avọ 55]

Fikieme Setan ọ sae rọ rehọ ivie na kpobi kẹ Jesu?

[Uwoho nọ o rrọ ẹwẹ-obe avọ 55]

Eme who re ru okenọ a tẹ dawo owhẹ?

[Uwoho nọ o rrọ ẹwẹ-obe avọ 56]

Fikieme o jẹ thọ re a rọ emema gọ egagọ?