Uwuhrẹ Kpahe Edhesẹ Ẹwo
Uzou Avọ 15
Uwuhrẹ Kpahe Edhesẹ Ẹwo
KỌ WHỌ riẹ oware nọ a re se oziẹobro-emu?— Oziẹobro-emu họ re who wo eva iyoma kpahe ohwo fikinọ ọ rrọ oghẹrẹ ohwo sa hayo ọ be ta ẹvẹrẹ ọfa. Koyehọ iroro hayo eriwo oyoma nọ who re wo kpahe ohwo taure whọ tẹ te riẹ ohwo na dede.
Kọ who roro nnọ u woma re who mukpahe ohwo nọ whọ ghinẹ riẹ ziezi hi hayo fikinọ o wo ohẹriẹ ọvo?— Ijo, oziẹobro-emu o woma ha, yọ o rrọ oware uwowou hu. Ma re gbolo ovao kẹ ohwo ho fikinọ o wo ohẹriẹ no omai ọvo.
Roro kpahe ẹme na. Kọ whọ riẹ ohwo jọ nọ ovioma riẹ u wo ohẹriẹ no ovioma ra hayo ọnọ ọ rẹ jẹ ẹvẹrẹ nọ o hẹriẹ oma no ẹvẹrẹ ra?— Ẹsejọhọ whọ tubẹ riẹ ahwo jọ nọ i wo ohẹriẹ no owhẹ fiki oma nọ a nwa hayo fiki ẹyao. Kọ whọ rrọ wowou je bi dhesẹ uyoyou kẹ enọ i wo ohẹriẹ no owhẹ?—
Ma tẹ be gaviezọ kẹ Owuhrẹ Ologbo na, Jesu Kristi, ma rẹ jọ wowou kẹ ahwo kpobi. Ma re du nọ orẹwho nọ ohwo jọ o no ze hayo ekọlọ ovioma riẹ hẹ. Ma rẹ jọ wowou kẹe. Dede nọ ahwo kpobi a rọwo onana ha, ere Jesu o wuhrẹ. Joma ta ẹme kpahe iẹe.
Ohwo Ju jọ nọ o wo oziẹobro-emu kpahe amọfa ọ nya bru Jesu ze jẹ nọ nnọ, ‘Eme me re ru hrọ re mẹ rria bẹdẹ beḍẹ?’ Jesu ọ riẹ nọ ọzae na ọ be gwọlọ gele iei re ọ ta nnọ ma re dhesẹ ẹwo kẹ ahwo uyẹ hayo orẹwho mai ọvo. Fikiere, ukpenọ ọye ọvo ọ za onọ na, Jesu ọ tẹ nọ ọzae na nọ: ‘Eme Uzi Ọghẹnẹ o ta nọ ma re ru?’
Ọzae na o te yo nọ: ‘Whọ rẹ rọ udu ra kpobi you Jihova Ọghẹnẹ ra, who ve je you ọrivẹ ra wọhọ oma ra.’ Jesu ọ tẹ ta nọ: ‘Whọ riẹ yo. Hai ru enẹ who re ti wo uzuazọ ebẹdẹ bẹdẹ.’
Rekọ ọzae na ọ gwọlọ jọ wowou hayo yoyou kẹ ahwo ẹwho ọfa ha. Fikiere ọ tẹ be gwọlọ unoma. Ọ nọ Jesu nọ: ‘Ghinọ ono họ ọrivẹ mẹ?’ Ẹsejọhọ ọ gwọlọ re Jesu ọ ta nọ: “Erivẹ ra họ egbẹnyusu ra” hayo, “Ahwo nọ a wọhọ owhẹ.” Re ọ za onọ na, Jesu o te gbiku jọ kpahe ohwo Ju gbe ohwo Sameria jọ. Gaviezọ kẹ iku na.
Ọzae jọ o je no okpẹwho Jerusalẹm kpohọ Jẹriko. Ọzae nana ohwo Ju. Nọ ọ rrọ edhere na, igbulegbu e tẹ họrọ mu ei. A tẹ tehe iẹe fihọ otọ a tẹ tọlọ igho riẹ jẹ ba iwu noi oma. Igbulegbu na a te kpe i kẹle uwhu, nya siẹe ba akotọ edhere na.
U kri hi, ozerẹ jọ ọ tẹ be nya edhere na ze. Ọ ruẹ ọzae nọ a kpe kẹle uwhu na. Eme whọ hai ru?— Whaọ ozerẹ na ọ nya abọ obei edhere na vrẹ ọvo. O tube dikihẹ dede he. O ru uvumọ oware ro fi obọ họ kẹ ọzae na ha.
Ọzae ọfa nọ ọ rrọ ọgba egagọ ọ tẹ nya ze. Ọzae na yọ ohwo Livai nọ o bi ru iruo eva etẹmpol na evaọ Jerusalẹm. Kọ ọ te daji re o fi obọ họ?— Ijo. O ru epọvo na nọ ozerẹ na o ru na.
Ukuhọ riẹ, ohwo Sameria jọ ọ tẹ nya ze. Kọ whọ be rue riẹ nọ o bi no ẹgẹgẹle edhere na ze na?— Ọ ruẹ ohwo Ju na nọ ọ kẹle uwhu no. Whaọ, ahwo Sameria gbe ahwo Ju buobu a you ohwohwo vievie he. (Jọn 4:9) Kọ ohwo Sameria nana o ti vu ọzae na wa ababọ obufihọ? Kọ ọ te ta kẹ oma riẹ nọ: ‘Fikieme me je fi obọ họ kẹ ohwo Ju nana? Kọ ọ hai fi obọ họ kẹ omẹ o hae jọnọ mẹ rrọ otọ na?’
Ohwo Sameria na o rri ọzae nọ ọ rrọ akotọ edhere na, ohrọ riẹ o te riẹ e. Ọ sai vu ei wa re o whu fihọ etẹe he. O te nwrotọ no ehru arao nọ ọ be dhẹ, nya bru ọzae na, o te bi ririe emela riẹ. O ku ewhri gbe udi ku emela na. Onana u re fi obọ họ ru emela na kpo. Ọ tẹ rehọ ohọ variẹ emela na.
Ohwo Sameria na ọ tẹ wọ ọzae na fihọ ehru arao riẹ ẹmẹrera. A tẹ dhẹ ẹrera te ehọtẹle esese jọ. Ohwo Sameria na ọ tẹ jọ etẹe gwọlọ oria jọ kẹ ọzae na, ọ tẹ rọ ẹro te i ziezi.
Jesu ọ tẹ nọ ọzae nọ o bi gbiku na kẹ na nnọ: ‘Ono evaọ usu ezae esa nana who roro nọ ọ jọ emamọ ọrivẹ?’ Ẹvẹ who re yo? Kọ ozerẹ na, ohwo Livai na, manikọ ohwo Sameria na?—
Ọzae na ọ tẹ kuyo nọ: ‘Ọzae nọ ọ daji re o fi obọ họ kẹ ọnọ a kpe na họ emamọ ọrivẹ.’ Jesu ọ tẹ ta nọ: ‘Whọ ta gba. Nya re who ru epọvo na.’—Luk 10:25-37.
Kọ iku na i gbe woma? U dhesẹ ohwo nọ ọ rrọ ọrivẹ mai vevẹ. Orọnikọ egbẹnyusu ekpekpe mai ọvo
ho. Yọ orọnikọ ahwo nọ a wo oghẹrẹ ovioma omai hayo enọ e rẹ ta ẹvẹrẹ mai ọvo ho. Jesu o wuhrẹ omai nọ ma jọ wowou kẹ ahwo kpobi makọ oria kpobi nọ a no ze, oghẹrẹ kpobi nọ oma rai o rrọ, hayo ẹvẹrẹ nọ a be ta.Ere Jihova Ọghẹnẹ ọ rrọ. O re bru oziẹ emu hu. Jesu ọ ta nọ: ‘Ọsẹ rai nọ ọ rrọ obọ odhiwu o re ru ọre riẹ va ze kẹ ahwo oyoma gbe ahwo owoma. Yọ o re ru oso rrọ ku ahwo owoma gbe ahwo oyoma.’ Fikiere, ma rẹ jọ wowou kẹ ahwo kpobi, wọhọ epanọ Ọghẹnẹ ọ rrọ na.—Matiu 5:44-48.
Whọ tẹ ruẹ ohwo nọ oma o rrọ họ, eme who re ru?— Kọ ẹvẹ otẹrọnọ ohwo na yọ ohwo orẹwho ofa hayo ovioma riẹ u wo ohẹriẹ no ora? Ọrivẹ ra ọ gbẹ rrọ ghele, fikiere who re fi obọ họ kẹ e. Whọ tẹ kawo vi ohwo nọ ọ rẹ sai fi obọ họ, whọ rẹ sai se ọkpako jọ re o fi obọ họ. Hayo whọ rẹ sai se iporisi hayo iticha isukulu. Who te ru ere yọ whọ rrọ wowou wọhọ ọzae Sameria na.
Owuhrẹ Ologbo na ọ gwọlọ nọ ma jọ wowou. Ọ gwọlọ re ma fi obọ họ kẹ amọfa, makọ oghẹrẹ ahwo nọ a rrọ kpobi. Fiki oye o ro gbiku kpahe ohwo Sameria owowou na.
Rọkẹ uwuhrẹ kpahe uwowou nọ a re dhesẹ kẹ ahwo makọ uyẹ hayo orẹwho rai, se Itẹ 19:22; Iruẹru 10:34, 35; gbe 17:26.
[Iwoho nọ e rrọ ẹwẹ-obe avọ 83]
Ẹvẹ ma re ru ahwo nọ a wo ohẹriẹ no omai?
[Iwoho nọ e rrọ ẹwẹ-obe avọ 84, 85]
Fikieme ohwo Sameria na ọ rọ jọ emamọ ọrivẹ?
[Uwoho nọ o rrọ ẹwẹ-obe avọ 86]
Ẹvẹ whọ sae rọ jọ emamọ ọrivẹ?