1, 2. Diẹse ma sai jo duku oria adhẹzọ nẹnẹ?

DAE rehọ iẹe nọ whọ rrọ edhere nya eva ẹdẹ nọ ehru o mu ovao họ yọ ofou o bi fou. Ehru na o bi dhe ebiebi ọvo, yọ o bi rienẹ. Egbrara i te muhọ ẹva, kẹsena okposo o te muhọ ẹrọ. Who bi siawọ gaga, be gwọlọ oria nọ whọ rẹ dhẹ ro. O raha oke he, whọ tẹ kparo ruẹ oria jọ evaọ akotọ edhere na nọ whọ rẹ wẹriẹ. Okpofou ọ rẹ sai nuhu oria na ha, o tẹ jẹ rrọ yaya je siuru. Eva e rẹ were owhẹ gaga nọ whọ ruẹ oria utionana dhẹ ro!

² Ma be rria etoke ẹvohẹ. Uyero akpọ u bi dhe eyeyoma. Rekọ oria ufuoma jọ o riẹ, oria adhẹzọ nọ o rẹ sai ruru omai no enwoma ebẹdẹ bẹdẹ. Oria adhẹzọ vẹ oye? Muẹrohọ oware nọ Ebaibol na ọ ta: “[Mẹ] rẹ te ta kẹ ỌNOWO nọ, ‘Whẹ họ oria adhẹzọ gbe uwou ogaga mẹ; Ọghẹnẹ mẹ, ọnọ me re fievahọ.’”—Olezi 91:2.

3. Ẹvẹ ma sai ro ru Jihova họ adhẹzọ mai?

³ Dai roro iei! Jihova, Ọnọma gbe Osu ehrugbakpọ na, ọ rẹ sae jọ oria adhẹzọ mai. Ọ rẹ sae thọ omai, keme o wo ẹgba nọ o  vi orọ ohwo hayo oware kpobi nọ o rẹ sae wọso omai. Edada jọ e tẹ maki te omai, Jihova ọ rẹ sae kpọ eware vi. Ẹvẹ ma sai ro ru Jihova họ adhẹzọ mai? O gwọlọ nọ ma re fi eva họ iẹe. Ofariẹ, Ẹme Ọghẹnẹ ọ ta udu họ omai awọ nọ: “[Wha] yọre oma rai eva uyoyou Ọghẹnẹ.” (Jud 21) Ẹhẹ, u fo nọ ma rẹ daji uyoyou Ọghẹnẹ, yọrọ usu uyoyou okpekpe kugbe Ọsẹ obọ odhiwu mai. Kẹsena ma vẹ sai wo evaifihọ inọ ọye họ adhẹzọ mai. Rekọ ẹvẹ ma sai ro wo oghẹrẹ usu utioye kugbei?

4, 5. Idhere jọ vẹ Jihova o ro dhesẹ uyoyou kẹ omai no?

⁴ Re ma sae daji uyoyou Ọghẹnẹ, u fo re ma kake riẹ oghẹrẹ nọ Jihova o ro dhesẹ uyoyou kẹ omai no. Roro kpahe iwuhrẹ Ebaibol jọ nọ whọ rehọ ẹkwoma obe onana wuhrẹ no. Wọhọ Ọnọma, Jihova ọ kẹ omai otọakpọ na no wọhọ emamọ uwou. Ọ ma emuore gbe ame vọe, eware eghaghae nọ e rrọ otọ na, koghẹrẹ koghẹrẹ erao isiuru, gbe emama nọ ughe rai u re siuru. Wọhọ Ọnọ o wo eme Ebaibol na, Ọghẹnẹ o dhesẹ odẹ gbe ekwakwa-aghae riẹ kẹ omai. Ofariẹ, Ẹme riẹ ọ vuẹ omai nọ o vi Ọmọ oyoyou riẹ ziọ otọakpọ, kuvẹ re Jesu ọ ruẹ uye je whu fiki mai. (Jọn 3:16) Kọ eme okẹ yena o rẹ sai ru kẹ omai? O kẹ omai ẹruore obaro ọrọ akpọ evawere.

⁵ Ẹruore nọ ma wo kpahe obaro na o roma hwa oware ofa nọ Ọghẹnẹ o ru no re. Jihova ọ rehọ egọmeti obọ odhiwu mu no, Uvie Mesaya na. O te rehọ uye-oruẹ te oba kẹle, u ve ti zihe otọakpọ na ruọ aparadase. Dai roro epanọ u ti woma te! Ma te rria akpọ na evaọ udhedhẹ gbe evawere bẹdẹ bẹdẹ. (Olezi 37:29) Bọe oke yena, Ọghẹnẹ ọ kẹ omai ọkpọvio no kpahe epanọ ma rẹ rọ rria oghẹrẹ uzuazọ nọ o mai woma kpaobọ enẹna. Ọ tẹ jẹ kẹ omai okẹ olẹ, uvẹ nọ ma rẹ rọ ta ẹme kẹe ẹsikpobi. Enana yọ umutho idhere jọ nọ Jihova o ro dhesẹ uyoyou kẹ ahwo-akpọ kpobi no, jẹ rọkẹ owhẹ oma ra.

6. Eme whọ rẹ sai ru ro dhesẹ nnọ uyoyou nọ Jihova o dhesẹ kẹ owhẹ no o da owhẹ ẹro?

 ⁶ Onọ nọ u wuzou nọ u fo inọ who re roro kpahe ona: Eme me ti ru ro dhesẹ nọ uyoyou Jihova o da omẹ ẹro? Ahwo buobu a rẹ ta nọ, “Ẹhẹ, u fo nọ me re you Jihova re.” Kọ ere o rrọ owhẹ oma? Jesu ọ ta nọ ujaje nana họ onọ o mae rro eva udevie izi na kpobi: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” (Matiu 22:37) Ababọ avro, who wo ẹjiroro buobu nọ who re ro you Jihova Ọghẹnẹ. Kọ whọ tẹ jọ iroro ra rọwo ọvo inọ who wo uyoyou utioye kẹe u dhesẹ nọ whọ ginẹ rehọ eva, ẹzi, gbe iroro ra kpobi you Jihova no?

7. Kọ whọ tẹ jọ eva ra rọwo nọ who you i rie ọvo u re dhesẹ nọ who gine you Ọghẹnẹ? Ru ei vẹ.

⁷ Wọhọ epanọ a dhesẹ i rie evaọ Ebaibol na, uyoyou nọ a re wo kẹ Ọghẹnẹ o kẹre gaga vi iroro gheghe. Evaọ uzẹme, dede nọ u wuzou re ohwo ọ jọ iroro rọwo inọ o you Jihova, iroro yena yọ emuhọ gheghe ọrọ uvi uyoyou nọ ohwo o re wo kẹe. Ubi apo u wuzou gaga keme oye a rẹ rọ kọ ure apo. Dede na, kọ o te were owhẹ re a kẹ owhẹ ubi apo gheghe nọ whọ tẹ gwọlọ apo re? Vievie! Epọvo na re, re ohwo ọ jọ iroro rọwo nọ o you Jihova Ọghẹnẹ yọ emuhọ gheghe. Ebaibol na o wuhrẹ omai nọ: “Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.” (1 Jọn 5:3) Re o ruẹse jọ obọdẹ, uyoyou nọ a re wo kẹ Ọghẹnẹ o rẹ mọ emamọ ubi hrọ. A rẹ rehọ uruemu dhesẹ iẹe via.​—Se Matiu 7:16-20.

8, 9. Ẹvẹ ma sai ro dhesẹ uyoyou gbe edẹro mai kẹ Ọghẹnẹ?

⁸ Ma re dhesẹ uyoyou nọ ma wo kẹ Ọghẹnẹ via nọ ma te bi koko ijaje riẹ je fi ehri-izi riẹ họ iruo. Oyena o rẹ bẹ eruo ho. Ukpenọ e jọ owha ulogbo, Jihova o ru izi riẹ re  i fi obọ họ kẹ omai yeri emamọ uzuazọ evawere nọ o rẹ wha evevọwẹ ze. (Aizaya 48:17, 18) Ma te bi yeri uzuazọ lele ọkpọvio Jihova, yọ ma bi dhesẹ kẹ Ọsẹ obọ odhiwu mai nọ eware kpobi nọ o ru kẹ omai e ginẹ da omai ẹro fia. U yoma gaga, umutho ahwo jọ gheghe ọvo a bi dhesẹ oghẹrẹ edẹro itieye. Ma gwọlọ jọ ahwo nọ a kare uyere he, wọhọ epanọ ahwo jọ a ru okenọ Jesu ọ jọ otọakpọ. Jesu o siwi emoti ikpe, rekọ omọvo rai jọ ọvo o zihe ze ti yere iei. (Luk 17:12-17) Evaọ uzẹme, ma gwọlọ jọ wọhọ omọvo yena nọ o wo edẹro na orọnikọ izii nọ i kiọkọ nọ e kare uyere na ha!

⁹ Nọ o rrọ ere na, evẹ họ ijaje Jihova nọ u fo nọ ma re koko na? Ma ta kpahe ibuobu rai jọ no evaọ obe nana, rekọ joma kiẹ umutho rai jọ riwi. Ijaje Ọghẹnẹ nọ ma re koko u ti fi obọ họ kẹ omai daji uyoyou Ọghẹnẹ.

10. Dhesẹ epanọ u ro wuzou re ma ruabọhọ ewuhrẹ kpahe Jihova Ọghẹnẹ.

¹⁰ Ewuhrẹ kpahe Jihova yọ obọdẹ owọ nọ  ma rẹ jẹ ro si kẹle iẹe ziezi. O rrọ oware nọ a rẹ ruabọhọ. Whọ tẹ rrọ otafe be rria-erae evaọ aso nọ oria kpobi u re dhedhẹ gaga, kọ whọ te kuvẹ re erae na i fu no? Ijo. Whọ te hai fi ire esasa họ erae na re e ware ziezi. Who gbe ru ere he, ekpahe e rẹ sai kpe owhẹ whu! Wọhọ epanọ ire e rẹ lẹliẹ erae ware na, ere “eriariẹ Ọghẹnẹ” i re ru uyoyou nọ ma wo kẹ Jihova ga.—Itẹ 2:1-5.

11. Ẹvẹ iwuhrẹ Jesu e jọ ilele riẹ oma?

¹¹ Jesu ọ gwọlọ nọ ilele riẹ a yọrọ uyoyou nọ a wo kẹ Jihova gbe Ẹme ọghaghae Riẹ nọ ọ rrọ uzẹme na whawha. Nọ ọ kparoma ze no, Jesu ọ ta kẹ ilele ivẹ riẹ kpahe eruẹaruẹ jọ nọ e rrọ Ikereakere Hibru nọ i rugba evaọ oma riẹ. Eme o no rie ze? A ta uwhremu na nọ: “Kọ eva mai egbẹ ghariẹ okenọ ọ jẹ ta eme ko mai eva edhere, nọ o dhesẹ ikerakere na kẹ omai?”—Luk 24:32.

12, 13. (a) Evaọ udevie ahwo-akpọ buobu nẹnẹ, eme ọ be via kẹ uyoyou nọ a wo kẹ Ọghẹnẹ gbe Ebaibol na? (b) Ẹvẹ ma sai ro ru nọ uyoyou mai na u gbe kie kpo ho?

¹² Oke ọsosuọ nọ whọ rọ riẹ oware nọ Ebaibol na o gine wuhrẹ, kọ udu ra o gbẹ ghariẹ avọ oghọghọ, ajọwha, gbe uyoyou kẹ Ọghẹnẹ? Ababọ avro, ere o jọ kẹ owhẹ. O jọ ere kẹ ahwo buobu re. Use-abọ nọ o rrọ otọ na họ epanọ whọ rẹ rọ yọrọ uyoyou osasa yena je ru ei rro haro. Ma gwọlọ lele oghẹrẹ uzuazọ nọ ahwo a bi yeri evaọ akpọ inẹnẹ hẹ. Jesu ọ ruẹaro nọ: “Uyoyou ahwo buobu u re ti kiekpo.” (Matiu 24:12) Ẹvẹ whọ sai ro ru nọ uyoyou nọ who wo kẹ Jihova gbe uzẹme Ebaibol na u gbe kie kpo ho?

¹³ Gbẹ hai wuhrẹ kpahe Jihova Ọghẹnẹ gbe Jesu Kristi. (Jọn 17:3) Roro didi kpahe eware nọ who wuhrẹ no Ẹme Ọghẹnẹ ze re whọ jẹ nọ oma ra nọ: ‘Eme onana u wuhrẹ omẹ kpahe Jihova Ọghẹnẹ? Ẹjiroro ọfa vẹ onana o kẹ omẹ nọ mẹ rẹ rọ rehọ iroro, eva, gbe ẹwẹ mẹ kpobi you rie?’ (Se 1 Timoti 4:15.) Eroro odidi otiọye u ti ru nọ uyoyou nọ who wo kẹ Jihova u ti ro dhe ẹgẹga.

14. Ẹvẹ olẹ o sai ro fi obọ họ kẹ omai ru uyoyou nọ ma wo kẹ Jihova ga?

 ¹⁴ Olẹ nọ whọ rẹ lẹ ẹsikpobi yọ edhere ọfa nọ who re ro ru uyoyou nọ who wo kẹ Jihova ga. (1 Ahwo Tẹsalonika 5:17) Ma jọ Uzou avọ 17 ọrọ obe nana wuhrẹ inọ olẹ yọ okẹ oghaghae nọ u no obọ Ọghẹnẹ ze. Wọhọ epanọ usu imava o rẹ ga ziezi nọ a tẹ be ta ẹme kugbe ẹsikpobi na, ere usu mai kugbe Jihova o rẹ jọ sasasa ziezi nọ ma tẹ be lẹ sei ẹsikpobi. U wuzou gaga re elẹ mai e se eme-ero ba ẹjọ—eme nọ a re dhe ẹwẹwariẹ kẹse kẹse nọ i wo uvi otofa ha. U fo nọ ma rẹ ta ẹme kẹ Jihova wọhọ epanọ ọmọ ọ rẹ ta ẹme kẹ ọsẹ oyoyou riẹ na. Uzẹme, u fo nọ ma rẹ ta ẹme no udu mai ze rekọ avọ adhẹẹ, eva efuafo gbe omurokpotọ. (Olezi 62:8) Ẹhẹ, uwuhrẹ Ebaibol omobọ ohwo gbe olẹ nọ u no eva ze yọ abọjọ nọ i wuzou gaga evaọ egagọ mai, yọ i re fi obọ họ kẹ omai daji uyoyou Ọghẹnẹ.

15, 16. Fikieme ma je rri iruo usiuwoma ota Uvie na wọhọ uvẹ-ọghọ gbe efe?

¹⁵ Uwuhrẹ Ebaibol omobọ ohwo gbe olẹ yọ abọjọ iruẹru egagọ mai nọ ma rẹ sai ru kẹ omobọ mai. Dede na, joma ta ẹme kpahe abọjọ egagọ mai nọ i wo obọ kpahe iruẹru nọ ma re ru evaọ ẹgbede: ẹtakẹ amọfa kpahe eware nọ ma rọwo. Kọ whọ ta uzẹme Ebaibol na jọ kẹ amọfa no ẹdẹjọ? Otẹrọ ere kiyọ who wo uvẹ-ọghọ igbunu no. (Luk 1:74) Nọ ma tẹ be vuẹ amọfa uzẹme nọ ma wuhrẹ kpahe Jihova Ọghẹnẹ, yọ iruo nọ i wuzou gaga nọ a kẹ Ileleikristi uzẹme kpobi ma bi ru na—usiuwoma ota Uvie Ọghẹnẹ.​—Se Matiu 24:14; 28:19, 20.

¹⁶ Pọl ukọ na o rri odibọgba riẹ ghare gaga, o se rie efe. (2 Ahwo Kọrint 4:7) Re whọ ta kẹ amọfa kpahe Jihova Ọghẹnẹ avọ ẹjiroro riẹ yọ iruo nọ e mai woma kpaobọ nọ whọ rẹ sai ru. E rrọ iruo rọkẹ Olori nọ ọ mai woma, e tẹ jẹ  rrọ iruo nọ e rẹ mae kẹ erere. Who te bi wo obọ evaọ iruo nana, kiyọ who bi fi obọ họ kẹ ahwo udu oruọzewọ si kẹle Ọsẹ obọ odhiwu mai, je fi obọ họ kẹ ae ruọ edhere nọ o bi su kpohọ uzuazọ ebẹdẹ bẹdẹ! Iruo efa vẹ i re gbe woma vi onana? Ofariẹ, isẹri nọ who re se kpahe Jihova gbe Ẹme riẹ  u re ru ẹrọwọ ra rro haro je ru uyoyou nọ who wo kẹe ga ziezi. Iruo ra e be da Jihova ẹro fia. (Ahwo Hibru 6:10) Iruo yena nọ who re ru ẹsikpobi avọ ajọwha u ti fi obọ họ kẹ owhẹ daji uyoyou Ọghẹnẹ.​—Se 1 Ahwo Kọrint 15:58.

17. Fikieme odibọgba Ileleikristi na o jẹ kpata nẹnẹ?

¹⁷ U wuzou re ma kareghẹhọ nọ iruo usiuwoma ota Uvie na e rrọ kpata kpata. Ebaibol na e ta nọ: “Vuẹ ovuẹ ẹme na, mu ọwhọ riẹ.” (2 Timoti 4:2) Fikieme ẹta usiuwoma na o jẹ kpata tere nẹnẹ? Ẹme Ọghẹnẹ ọ ta kẹ omai nọ: “Ẹdẹ ologbo ỌNOWO na ọ kẹle i no, o te je te otọ no.” (Zefanaya 1:14) Ẹhẹ, oke nọ Jihova ọ te rọ rehọ eyero nana te oba ọ be tha kpata kpata. U fo re a vẹvẹ ahwo unu! U fo re a riẹ inọ enẹna họ oke nọ a rẹ rọ salọ Jihova wọhọ Osu-Okpehru rai. Urere na o “te raha oke he.”—Habakuk 2:3.

18. Fikieme ma je kuomagbe ibe Ileleikristi uzẹme gọ Jihova?

¹⁸ Jihova ọ gwọlọ nọ ma kuomagbe ibe Ileleikristi uzẹme gọe. Oyejabọ nọ Ẹme riẹ ọ rọ ta nọ: “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, [wha hẹ] se oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ na ọ kẹlino.” (Ahwo Hibru 10:24, 25) Ma re wo obọdẹ uvẹ nọ ma re ro jiri jẹ gọ Ọghẹnẹ oyoyou mai na okenọ ma te kuomagbe ibe eg’Ọghẹnẹ eva iwuhrẹ Ileleikristi na. Ma rẹ jẹ bọ ohwohwo ga jẹ ta udu họ ohwohwo awọ.

19. Ẹvẹ ma sae rọ bọ uyoyou nọ o rrọ udevie ukoko Ileleikristi na ga?

¹⁹ Nọ ma bi kuomagbe amọfa nọ a be gọ Jihova na yọ ma be bọ uyoyou gbe usu mai kugbe ohwohwo evaọ ukoko na ga. U wuzou re ma tẹrovi abọ owoma ọrọ ohwohwo wọhọ epanọ Jihova ọ be tẹrovi abọ owoma mai na. Who rẹro ẹgbagba mi ibe eg’Ọghẹnẹ ra ha. Kareghẹhọ nọ duohwo duọ epanọ ọ nyaharo te no evaọ abọ-ẹzi, yọ mai kpobi ma re ru thọ. (Se Ahwo Kọlọsi 3:13.) Daoma nya usu okpekpe  kugbe ahwo nọ a wo uyoyou ogaga kẹ Jihova, who ti wo ẹnyaharo evaọ abọ-ẹzi. Ẹhẹ, Jihova nọ whọ rẹ gọ evaọ usu kugbe inievo abọ-ẹzi ra u ti fi obọ họ kẹ owhẹ daji uyoyou Ọghẹnẹ. Ẹvẹ Jihova ọ rẹ rọ hwosa kẹ ahwo nọ a be gọe avọ ẹrọwọ, nọ e rehọ ere daji uyoyou riẹ?

20, 21. Eme họ “uvi uzuazọ,” kọ fikieme o jẹ rrọ ẹruore evawere?

²⁰ Jihova ọ rẹ rehọ uzuazọ hwosa kẹ idibo riẹ, rekọ oghẹrẹ uzuazọ vẹ? Kọ whọ sae ta nọ uzuazọ whọ be ginẹ rria enẹna? Ibuobu mai e rẹ sae ta nnọ, ‘ẹhẹ ma rrọ uzuazọ.’ Ma be wẹ, ma be re, ma be jẹ da. Koyehọ ma rrọ uzuazọ. Yọ okenọ eware i te woma kẹ omai ẹsejọ, ma rẹ sae ta nọ, “Akpọ na mẹ ginẹ rrọ na!” Dede na, Ebaibol na e ta inọ who te rri rie totọ, uvumọ ohwo-akpọ ọ be ginẹ rria uzuazọ enẹna ha.

²¹ Ẹme Ọghẹnẹ ọ ta udu họ omai awọ nọ, ma jobọ kru “uzuazọ nọ o [ghinẹ] rọ uvi uzuazọ.” (1 Timoti 6:19) Ẹme yena o dhesẹ nọ obaro “uvi uzuazọ” na u ti jo te omai obọ. Ẹhẹ, nọ ma te te ẹgbagba no, ẹsiẹ ma sae te ta nọ ma rrọ uzuazọ, keme ma be te rria uzuazọ wọhọ epanọ Ọghẹnẹ ọ gwọlọ evaọ oke ọsosuọ nnọ ma rria. Nọ ma te rria uzuazọ evaọ otọakpọ aparadase avọ omokpokpọ, udhedhẹ, gbe evawere, ẹsiẹe ma te reawere “uvi uzuazọ”—uzuazọ ebẹdẹ bẹdẹ. (1 Timoti 6:12) Kọ oyena o gbẹ rrọ ẹruore evawere?

22. Ẹvẹ whọ sae rọ jobọ kru “uzuazọ nọ o [ghinẹ] rọ uvi uzuazọ” na?

²² Ẹvẹ ma sae rọ jobọ kru “uzuazọ nọ o [ghinẹ] rọ uvi uzuazọ”? Pọl ọ jọ ẹme ọvona ta udu họ Ileleikristi awọ nọ “a he ru ewoma” re a je “fe eva iruo iwoma.” (1 Timoti 6:18) Fikiere, u dhesẹ vevẹ inọ oware nọ u wuzou họ epanọ ma fi uzẹme nọ ma wuhrẹ no Ebaibol ze họ iruo te. Dede na, kọ Pọl ọ be ta nọ ma sae wo “uvi uzuazọ” na fiki iruo iwoma nọ ma ru? Ijo, keme ewo uvi uzuazọ utioye o roma hwa  “aruoriwo” nọ ma re wo no obọ Ọghẹnẹ ze. (Ahwo Rom 5:15) Dede na, o rẹ were Jihova re ọ hwosa kẹ ahwo nọ a be gọe avọ ẹrọwọ. Ọ gwọlọ nọ whọ reawere “uvi uzuazọ” na. Uzuazọ udhedhẹ, avọ evawere orọ ebẹdẹ bẹdẹ yena o be hẹrẹ ahwo nọ a daji uyoyou Ọghẹnẹ.

23. Fikieme u ro wuzou re ma daji uyoyou Ọghẹnẹ?

²³ U fo re mai omomọvo ọ nọ oma riẹ nọ, ‘Kọ mẹ be gọ Ọghẹnẹ lele itee riẹ nọ o fihọ Ebaibol na?’ Ma tẹ ruẹ nọ ma rẹ sai kuyo yena inọ Ee ẹsikpobi, kiyọ emamọ edhere ma rrọ na. O rẹ sai mu omai ẹro nọ Jihova họ adhẹzọ mai. O ti siwi idibo riẹ nọ i wo ẹrọwọ vrẹ edẹ urere erọ akpọ anwae nana. Jihova o ti je siwi omai ruọ eyero-akpọ ọkpokpọ owoma nọ ọ kẹle no na. Ẹvẹ evawere riẹ e te rro te re ma jọ akpọ ọkpokpọ yena! Yọ u ti woma kẹhẹ nọ ma te roro kpemu jẹ ruẹ emamọ owọ nọ ma jẹ evaọ edẹ urere nana! Whọ tẹ jowọ utioye enẹna, whọ te reawere “uvi uzuazọ” bẹdẹ bẹdẹ wọhọ epaọ ẹjiroro ọsosuọ Jihova Ọghẹnẹ!