1. Didi irere ma ti wo otẹrọnọ ma gọ Ọghẹnẹ evaọ emamọ edhere?

JIHOVA ỌGHẸNẸ ọ be daezọ mai gaga, ọ tẹ jẹ gwọlọ nọ ma wo erere no ọkpọvio oyoyou riẹ ze. Ma tẹ gọe evaọ emamọ edhere, ma ti wo evawere jẹ whaha ebẹbẹ buobu evaọ uzuazọ. Ma ti je wo eghale gbe obufihọ riẹ. (Aizaya 48:17) Dede na, egagọ buobu e riẹ nọ e ta inọ a bi wuhrẹ uzẹme kpahe Ọghẹnẹ. Ghele na, ohẹriẹ ulogbo o rrọ iwuhrẹ rai kpahe oghẹrẹ ohwo nọ Ọghẹnẹ ọ rrọ gbe oware nọ ọ gwọlọ mi omai.

2. Ẹvẹ ma sae rọ riẹ emamọ edhere nọ a rẹ rọ gọ Jihova, kọ oriruo vẹ o re fi obọ họ kẹ omai wo otoriẹ onana?

² Ẹvẹ whọ sae rọ riẹ emamọ edhere nọ whọ rẹ rọ gọ Jihova? U du gwọlọ nọ who wuhrẹ kpahe iwuhrẹ egagọ na kpobi hi, re whọ ruẹse rehọ ae wawọ ohwohwo. Oware ovo nọ u fo nọ who re ru họ, wuhrẹ oware nọ Ebaibol na e ginẹ ta kpahe egagọ uzẹme. Wọhọ oriruo: Igho iwhayo e vọ oria kpobi evaọ erẹwho buobu. Otẹrọnọ a kẹ owhẹ iruo nnọ whọ gwọlọ igho iwhayo na via, ẹvẹ who ti ro ru iruo na? Kọ whọ rẹ lahiẹ oma gwọlọ riẹ igho kpobi nọ e rrọ erọ iwhayo tao? Ijo. Oware nọ o mai woma họ whọ rẹ raha oke ro wuhrẹ epanọ who re ro vuhu ugho nọ o rrọ emamọ. Whọ tẹ riẹ oghẹrẹ nọ emamọ ugho o rẹ jọ no, whọ te sai vuhu ugho iwhayo. Epọvo na re, ma tẹ riẹ  oghẹrẹ nọ ma re ro vuhu egagọ uzẹme, ma te sai vuhu egagọ erue re.

3. Wọhọ epanọ Jesu ọ ta, eme ma re ru hrọ ma tẹ gwọlọ ọjẹrehọ Ọghẹnẹ?

³ U wuzou re ma gọ Jihova evaọ edhere nọ ọ jẹrehọ. Ahwo buobu a roro nọ egagọ kpobi e rẹ were Ọghẹnẹ, rekọ Ebaibol na o wuhrẹ ere he. U te he re ohwo ọ ta ọvo nọ ọye Oleleikristi. Jesu ọ ta nọ: “Orọnọ kohwo kohwo nọ ọ ta kẹ omẹ nọ, ‘Olori, Olori’, ọ rẹ sae ruọ eva uvie odhiwu hu, rekọ ọnọ o ru oreva Ọsẹ mẹ nọ ọ rọ obọ odhiwu.” Fikiere, re ma ruẹsi wo ọjẹrehọ Ọghẹnẹ, ma re wuhrẹ je ru oware nọ Ọghẹnẹ ọ gwọlọ mi omai. Jesu o se ahwo nọ a bi ru oreva Ọghẹnẹ hẹ “irumuomu.” (Matiu 7:21-23) Wọhọ igho iwhayo, egagọ erue i fioka ha. Tube yoma na, egagọ itieye na e vọ avọ enwoma.

4. Eme ẹme nọ Jesu ọ ta kpahe idhere ivẹ na u dhesẹ, kọ bovẹ idhere na ọvuọvo o bi su kpohọ?

⁴ Jihova ọ kẹ ohwo kpobi nọ ọ rrọ otọakpọ uvẹ nọ o re ro wo uzuazọ ebẹdẹ bẹdẹ. Dede na, re ma ruẹsi wo uzuazọ ebẹdẹ bẹdẹ evaọ Aparadase, ma rẹ gọ Ọghẹnẹ evaọ emamọ edhere je yeri uzuazọ nọ o rẹ were iẹe enẹna. U yoma kẹhẹ, ahwo buobu a se nọ a re ru ere. Oyejabọ nọ Jesu ọ rọ ta nọ: “Wha rehọ unu ohwahwa ruọ eva; keme edhere ọraha ọ rẹ kẹkẹe o riama fihọ, enọ e rehọ e riẹ ruọ eva a re buobu. Keme edhere nọ a re ro kpohọ uzuazọ ọ rẹ kekeke, unu riẹ ọ rẹ hwahwa, enọ e ro riẹ e rẹ kakao.” (Matiu 7:13, 14) Egagọ uzẹme i re su kpohọ uzuazọ ebẹdẹ bẹdẹ. Egagọ erue i re su kpohọ ọraha kufiẹ. Jihova ọ gwọlọ nọ ohwo-akpọ ọvuọvo o whu hu, oyejabọ nọ ọ be rọ kẹ ahwo kpobi uvẹ nọ a re ro wuhrẹ kpahe iẹe evaọ oria kpobi nọ a rrọ. (2 Pita 3:9) Ginọ uzẹme, oghẹrẹ nọ ma rọ gọ Ọghẹnẹ u re dhesẹ sọ ma te zọ hayo ma te zọ họ.

5. Ẹvẹ ma sai ro vuhu ahwo nọ a rrọ egagọ uzẹme?

⁵ Ẹvẹ a sai ro duku “edhere nọ a re ro kpohọ uzuazọ” na? Jesu ọ ta nọ egagọ uzẹme i ti dhesẹ oma via evaọ uzuazọ ahwo nọ a rrọ eva riẹ. Ọ ta nọ: “Ibi rai wha re ro vuhu ai. . . . Kure kure nọ u woma o rẹ mọ ibi iwoma.” (Matiu 7:16, 17) Koyehọ, a te rehọ orọwọ gbe uruemu ahwo nọ a rrọ egagọ uzẹme vuhu ai. Dede nọ a gba ha yọ a re ru thọ ẹsejọ, eg’Ọghẹnẹ uzẹme wọhọ ẹko a be daoma ru oreva Ọghẹnẹ. Joma ta ẹme kpahe idhere ezeza nọ a re ro vuhu ahwo nọ a rrọ egagọ uzẹme.

6, 7. Ẹvẹ idibo Ọghẹnẹ a rri Ebaibol na, kọ ẹvẹ Jesu o ro fi oriruo hotọ evaọ abọ nana?

⁶ Idibo Ọghẹnẹ a rẹ rehọ iwuhrẹ rai no Ebaibol ze. Ebaibol na e ta nọ: “Ọghẹnẹ o gie ẹwolo ku ikereakere na kpobi, re e jọ erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie. Re ohwo Ọghẹnẹ na ọ ruẹse gba kiete, ọ vẹ jẹ thomavẹre kẹ iruo iwoma i ruo kpobi.” (2 Timoti 3:16, 17) Pọl ukọ na o kere se ibe Ileleikristi riẹ nọ: “Okenọ wha rọ rehọ ẹme Ọghẹnẹ nọ owha jọ unu mai yo na; wha rehọ e riẹ wọhọ ẹme ahwo ho, rekọ wọhọ epanọ o ghinẹ rọ, ẹme Ọghẹnẹ.” (1 Ahwo Tẹsalonika 2:13) Fikiere egagọ uzẹme e rẹ rehọ orọwọ gbe iruẹru riẹ no eriwo ahwo-akpọ hayo uruemu nọ u notọ ze he. I re no Ẹme Ọghẹnẹ nọ a rehọ ẹgba ẹzi kere na ze, Ebaibol na.

⁷ Jesu Kristi o fi emamọ oriruo hotọ ẹkwoma iwuhrẹ riẹ nọ ọ rehọ no Ẹme Ọghẹnẹ ze. Evaọ olẹ se Ọsẹ obọ odhiwu riẹ, ọ ta nọ: “Ẹme ra uzẹme.” (Jọn 17:17) Jesu ọ rọwo Ẹme Ọghẹnẹ, yọ eware kpobi nọ o wuhrẹ e rọwo kugbe Ikereakere na. Ẹsikpobi Jesu ọ jẹ hae ta nọ: “A kere nọ.” (Matiu 4:4, 7, 10) Kẹsena ọ vẹ wariẹ eme nọ e rrọ oria ikereakere jọ. Epọvo na re, ahwo Ọghẹnẹ nẹnẹ a re wuhrẹ  ahwo eme obọ rai hi. A rọwo nọ Ebaibol na yọ Ẹme Ọghẹnẹ, yọ ẹme riẹ họ otọhotọ iwuhrẹ rai.

8. Re a gọ Jihova eme o kẹre te?

⁸ Jihova ọvo ahwo nọ a rrọ egagọ uzẹme a rẹ gọ, a ve je whowho odẹ riẹ. Jesu ọ ta nọ: “Whọ rẹ gọ Ọnowo na Ọghẹnẹ ra, iruo riẹ eye evo who re ruẹ.” (Matiu 4:10) Fikiere, idibo Ọghẹnẹ a rẹ gọ omọfa ha u te no Jihova no. Ọghẹnẹ nọ a rẹ gọ o kẹre te amọfa nọ a re ru riẹ odẹ Ọghẹnẹ uzẹme na gbe oghẹrẹ ohwo nọ ọ rrọ. Olezi 83:18 (NW) o ta nọ: “Whẹ, ọnọ odẹ riẹ o rrọ Jihova, whẹ ọvo họ Ọnọ Ọ Mai Kpehru vi otọakpọ na kpobi.” Jesu o fi oriruo họ otọ evaọ obọ ufihọ kẹ amọfa re a riẹ Ọghẹnẹ, wọhọ epanọ ọ ta evaọ olẹ inọ: “[Me] dhesẹ odẹ ra kẹ ahwo nọ whọ kẹ omẹ evaọ akpọ na no.” (Jọn 17:6) Epọvo na re, eg’Ọghẹnẹ uzẹme nẹnẹ a bi wuhrẹ amọfa kpahe odẹ Ọghẹnẹ, ẹjiroro riẹ, gbe ekwakwa-aghae riẹ.

9, 10. Idhere vẹ Ileleikristi uzẹme a re ro dhesẹ uyoyou kẹ ohwohwo?

⁹ Ahwo Ọghẹnẹ a re dhesẹ obọdẹ uyoyou nọ o kare oriobọ kẹ ohwohwo. Jesu ọ ta nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Ileleikristi ọsosuọ na a wo oghẹrẹ uyoyou yena kẹ ohwohwo. Uyoyou nana nọ Ọghẹnẹ ọ ta nnọ ma wo na o rẹ gbẹroma fiki uyẹ nọ ohwo o no ze he, fiki epanọ o fe te hayo yogbe te, hayo fiki orẹwho riẹ, o rẹ gba ahwo kugbe evaọ okugbe inievo uzẹme nọ o rẹ hẹriẹ hẹ. (Se Ahwo Kọlọsi 3:14.) Ahwo egagọ erue a wo okugbe uyoyou inievo otiọye na ha. Ẹvẹ ma rọ riẹ ere? A re kpe omoma rai fikinọ a rrọ ahwo orẹwho hayo uyẹ ofa. Ileleikristi uzẹme a rẹ wọ okwakwa-ẹmo re a ruẹsi kpe inievo Ileleikristi rai hayo amọfa ha. Ebaibol e ta nọ: “Fiki onana a te rọ ruẹ enọ e rọ emọ Ọghẹnẹ gbe enọ e rọ ukumuomu na: kohwo kohwo nọ o bi ruẹ oware nọ u kiẹrẹe he, ọ rọ ọmọ  Ọghẹnẹ hẹ; ọnọ o you omoni riẹ hẹ, ọ rọ ọmọ Ọghẹnẹ gbe he. . . . Ufore mai ohwo o you ohwo, ma jọ wọhọ Keni hi, ọnọ ọ jọ ọ rọ oyoma na, nọ o je kpe oniọvo riẹ.”—1 Jọn 3:10-12; 4:20, 21.

¹⁰ Uzẹme, uvi uyoyou o kẹre vi ahwo nọ a re kpe he ọvo. Ileleikristi uzẹme a rẹ rọ ababọ oriobọ rehọ oke rai, ẹgba, gbe efe rai fi obọ họ kẹ jẹ ta udu họ ohwohwo awọ. (Ahwo Hibru 10:24, 25) A re fi obọ họ kẹ ohwohwo evaọ oke uye, jẹ rehọ oruọzewọ lele amọfa yeri. Evaọ uzẹme, a re fi ohrẹ Ebaibol nana họ iruo evaọ uzuazọ rai inọ a “ru iruo ezi kẹ ahwo kpobi.”—Ahwo Galesha 6:10.

11. Fikieme u je wuzou re ma jẹ Jesu Kristi rehọ wọhọ ohwo nọ Ọghẹnẹ ọ rọ ẹkwoma riẹ kẹ omai esiwo?

¹¹ Ileleikristi uzẹme a rẹ jẹ Jesu Kristi rehọ wọhọ ohwo nọ Ọghẹnẹ rọ ẹkwoma riẹ kẹ omai esiwo. Ebaibol e ta nọ: “Usiwo o rọ obọ omọfa ha, odẹ ofa o gbẹrọ otọ akpọ na nọ a rẹ sai ro siwi omai hi.” (Iruẹru 4:12) Wọhọ epanọ ma ruẹ evaọ Uzou avọ 5 na, Jesu ọ rehọ uzuazọ riẹ kẹ wọhọ ẹtanigbo rọkẹ ahwo-akpọ ẹmeoyo. (Matiu 20:28) U te no ere no, Jesu họ Ovie nọ Ọghẹnẹ o ro mu Uvie obọ odhiwu nọ u ti su otọakpọ na soso. Yọ Ọghẹnẹ ọ gwọlọ nọ ma yo ẹme kẹ Jesu re ma je fi iwuhrẹ riẹ họ iruo otẹrọnọ ma gwọlọ uzuazọ ebẹdẹ bẹdẹ. Oyejabọ nọ Ebaibol na e rọ ta nọ: “Ọnọ ọ rọwo Ọmọ na o wo uzuazọ ebẹdẹ bẹdẹ; rekọ ọnọ o yo ẹme Ọmọ na ha ọ rẹ sae ruẹ uzuazọ họ.”—Jọn 3:36.

12. Re a se erọ akpọ na ba ẹjọ eme o kẹre te?

¹² Eg’Ọghẹnẹ uzẹme a rrọ erọ akpọ na ha. Eva okenọ a je gu ei ẹdhọ evaọ aro osu Rom na Pailet, Jesu ọ ta nọ: “Uvie mẹ [o rrọ] orọ akpọ na ha.” (Jọn 18:36) Orẹwho nọ a be rria kpobi kẹhẹ, Ileleikristi uzẹme a rrọ otọ Uvie Jesu Kristi nọ o rrọ obọ odhiwu, fikiere a re dhoma họ abọ ọvuọvo ho evaọ eme nọ i kpomahọ isuẹsu akpọ na. A re dhoma họ ozighi hayo ohọre akpọ na ha. Dede na, idibo  Jihova a rẹ whaha amọfa ha nọ a te bi dhomahọ abọjọ evaọ esuo-ohrowo, a tẹ be wọ etehe hayo ru ivotu. Yọ dedenọ eg’Ọghẹnẹ uzẹme a bi dhoma họ abọ ọvuọvo evaọ esuo-ohrowo ho, a re koko izi ẹkwotọ nọ a rrọ. Fikieme? Fikinọ Ẹme Ọghẹnẹ ọ kẹ rai uzi nọ a ‘yo ẹme’ egọmeti nọ “a kẹ udu na.” (Ahwo Rom 13:1) Okenọ oware nọ Ọghẹnẹ ọ gwọlọ gbe onọ esuo egọmeti ọ gwọlọ e tẹ wọso ohwohwo, eg’Ọghẹnẹ uzẹme a re lele oriruo ikọ na, enọ e ta  nọ: “Ma re yo ẹme Ọghẹnẹ vi o rọ ahwo.”—Iruẹru 5:29; Mak 12:17.

13. Ẹvẹ Ileleikristi uzẹme a rri Uvie Ọghẹnẹ, kọ didi owọ a be jẹ?

¹³ Ileleikristi uzẹme a re whowho nọ Uvie Ọghẹnẹ ọvo họ ẹruore ahwo-akpọ. Jesu ọ ruẹaro nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” (Matiu 24:14) Ukpenọ a rẹ ta udu họ ahwo awọ re a rẹro so isu akpọ kẹ esino ebẹbẹ rai, ilele uzẹme erọ Jesu Kristi a re whowho Uvie Ọghẹnẹ nọ o rrọ obọ odhiwu wọhọ ẹruore ọvuọvo nọ ọ rrọ kẹ ahwo-akpọ. (Olezi 146:3) Jesu o wuhrẹ omai nọ ma lẹ kẹ uvi egọmeti yena okenọ ọ ta nọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Matiu 6:10) Ẹme Ọghẹnẹ ọ ruẹaro nọ Uvie odhiwu nana o “rẹte whọlọ ivie na kpobi [nọ i bi su enẹna] ọ vẹte rehọ ai ze oba, ọ vẹte jọ bẹdẹ.”—Daniẹl 2:44.

14. Ẹko egagọ vẹ u mu owhẹ ẹro nọ ọ be nya te ute egagọ uzẹme?

¹⁴ Kpahe eware nọ ma kiẹ riwi no na, nọ oma ra nọ: ‘Ẹko egagọ vẹ ọ be rehọ iwuhrẹ rai kpobi no Ebaibol ze, je bi ru ahwo riẹ odẹ Jihova? Ẹko ahwo vẹ a bi dhesẹ uyoyou nọ Ọghẹnẹ ọ kẹ uzi inọ a wo na, nọ i fi ẹrọwọ họ Jesu, nọ e rrọ erọ akpọ na ha, nọ a bi whowho nọ Uvie Ọghẹnẹ ọvo họ uvi ẹruore kẹ ahwo-akpọ? Eva ẹko egagọ nọ e rrọ otọakpọ na kpobi, ọvẹ o bi ru eware enana kpobi nọ ma fodẹ na?’ Imuẹro i dhesẹ vevẹ nọ Isẹri Jihova.​—Se Aizaya 43:10-12.

15. U te no ẹrọwo inọ Ọghẹnẹ ọ rrọ no, eme ọfa ọ gbẹ gwọlọ mi omai?

¹⁵ Re a rọwo inọ Ọghẹnẹ ọ rrọ ọvo a re ro ru ei eva were he. Whaọ Ebaibol na e ta nọ makọ idhivẹri dede a rọwo nọ Ọghẹnẹ ọ rrọ. (Jemis 2:19) Dede na, u re vevẹ inọ a bi ru oreva Ọghẹnẹ hẹ yọ a wo ọjẹrehọ riẹ hẹ. Re ma ruẹsi wo ọjẹrehọ Ọghẹnẹ, orọnikọ ma rẹ rọwo ọvo nọ ọ rrọ  uzuazọ họ rekọ ma re ru oreva riẹ re. Ma re je si oma no egagọ erue, jẹ dhẹ gbalọ egagọ uzẹme.

16. Eme ohwo o re ru kpahe usu kugbe egagọ erue?

¹⁶ Pọl ukọ na ọ ta nọ ma re wo obọ kugbe egagọ erue he. O kere nọ: “Wha nya no udevie rai no, re wha jẹ hẹriẹ oma no ai no, ere Ọnowo ọ tai, wha rọ obọ te oware u gbegbe ovo ho; kẹsena me ve ti dede owhai rehọ.” (2 Ahwo Kọrint 6:17; Aizaya 52:11) Fikiere Ileleikristi uzẹme a rẹ kẹnoma kẹ oware kpobi nọ u wo obọ kpahe egagọ erue.

17, 18. Eme họ “Babilọn ologbo na,” kọ fikieme a jẹ “nya siẹ e ba” vẹrẹ vẹrẹ?

¹⁷ Ebaibol na i dhesẹ nọ oghẹrẹ egagọ erue kpobi nọ e vọ oria kpobi na yọ abọjọ “Babilọn ologbo na.” * (Eviavia 17:5) Odẹ yena o kareghẹhọ omai okpẹwho Babilọn anwae, oria nọ egagọ erue i muhọ no ze nọ Owhe Ologbo ọrọ edẹ Noa o ku vrẹ no. Iwuhrẹ gbe iruemu buobu nọ e da egagọ erue fia nẹnẹ na i muhọ no Babilọn ze. Wọhọ oriruo, ahwo Babilọn a jẹ hae gọ eghẹnẹ esa nọ e rrọ ọvo. Nẹnẹ, uwuhrẹ Esanerọvo họ ugogo uwuhrẹ egagọ buobu. Rekọ Ebaibol na i wuhrẹ vevẹ inọ Ọghẹnẹ uzẹme ọvo ọ rrọ, Jihova, gbe inọ Jesu Kristi yọ Ọmọ riẹ. (Jọn 17:3) Ahwo Babilọn a tẹ jẹ rọwo nọ ahwo-akpọ a wo ẹwẹ nọ o re whu hu, nọ ọ rẹ gbẹ jọ uzuazọ okenọ ohwo o te whu no, nọ ọ rẹ jẹ sae ruẹ uye evaọ oria olahiẹ. Nẹnẹ, egagọ buobu a bi wuhrẹ nnọ ohwo o wo ẹwẹ hayo ẹzi nọ o re whu hu, nọ ọ rẹ sae ruẹ uye evaọ erae-ehẹle.

¹⁸ Nọ egagọ Babilọn anwae e vaha ruọ otọakpọ soso na, a rẹ sai dhesẹ Babilọn Ologbo ọgbọna wọhọ uvie-ulogbo orọ egagọ erue akpọ soso. Yọ Ọghẹnẹ ọ ta riẹ no inọ ọraha idudhe o ti te uvie-ulogbo egagọ erue nana. (Eviavia  18:8) Kọ whọ gbẹ ruẹ epanọ u ro wuzou re who si oma no abọ egagọ Babilọn Ologbo na kpobi? Jihova Ọghẹnẹ ọ gwọlọ nọ whọ “nya siẹ e ba” vẹrẹ vẹrẹ enẹna nọ oke o gbẹ rrọ na.​—Se Eviavia 18:4.

19. Irere vẹ who ti wo no ẹgọ Jihova ze?

¹⁹ Nọ whọ tẹ jiroro nnọ who re no egagọ erue, ahwo jọ a rẹ sai bru usu no owhẹ. Dede na, whọ tẹ be gọ Jihova evaọ usu kugbe ahwo riẹ, who ti wo irere buobu vi eware nọ e rẹ sai vru mi owhẹ. Wọhọ ilele ọsosuọ Jesu nọ a nya lele iei siọ eware efa ba, who ti wo inievo abọ-ẹzi buobu. Whọ te jọ abọjọ uviuwou ulogbo akpọ soso orọ ima buobu Ileleikristi uzẹme nọ a ti you owhẹ ziezi. Yọ who ti wo ẹruore igbunu ọrọ uzuazọ ebẹdẹ bẹdẹ “eva akpọ nọ ọ be tha” na. (Se Mak 10:28-30.) Ẹsejọhọ nọ oke o be nya haro na, ahwo nọ a siọ owhẹ fiki orọwọ ra vẹre a te kiẹ oware nọ Ebaibol na o wuhrẹ riwi a ve ti zihe ruọ idibo Jihova.

20. Eme ọ rrọ obaro kẹ ahwo nọ a rrọ egagọ uzẹme?

²⁰ Ebaibol i wuhrẹ nọ kẹle na Ọghẹnẹ ọ te raha eyero omuomu nana no, ọ vẹ te rehọ akpọ ọkpokpọ okiẹrẹe eva otọ esuo Uvie riẹ ro nwene iei. (2 Pita 3:9, 13) Akpọ yena o ti woma kẹhẹ! Yọ eva akpọ ọkpokpọ okiẹrẹe yena, egagọ ọvuọvo e te jariẹ, egagọ uzẹme ọvo. Kọ o gbẹ rrọ oware areghẹ re whọ jẹ owọ nọ u fo ro kuomagbe eg’Ọghẹnẹ uzẹme enẹna?