EVAỌ ẹvẹrẹ ọsosuọ nọ a ro kere Ebaibol na, a rehọ ẹme Hibru na sheʼohlʹ nọ a re se haiʹdes evaọ ẹvẹrẹ Griki ro ruiruo vrẹ asia 70. Eme ivẹ nana i wobọ kpahe uwhu. Efafa Ebaibol jọ i se rai “ọgọdọ,” “ehẹle,” hayo “utori.” Dede na, evẹrẹ jọ buobu a wo eme nọ i wo otofa ovona dẹẹ wọhọ eme Hibru avọ Griki nana ha. A jọ Ebaibol Ẹri Na se ai “Ẹri.” Eme họ otofa ẹme nana? Joma muẹrohọ oghẹrẹ nọ a rọ rehọ iẹe ruiruo evaọ eria sa-sa ọrọ Ebaibol na.

Ọtausiwoma Na 9:10 o ta nọ: “Iruo hayo iroro hayo eriariẹ hayo areghẹ e rọ eva ẹri hi, obonọ who bi kpohọ na.” Kọ onana u dhesẹ nọ ẹri yọ ọgọdọ jọ dẹẹ, onọ ma ki oyoyou mai nọ o whu fihọ? Ijo. Evaọ oria nọ Ebaibol na e jọ ta kpahe ọgọdọ jọ dẹẹ hayo oria jọ nọ a re ki ohwo fihọ, ẹme Hibru gbe Griki ọfa a ro sei orọnikọ sheʼohlʹ hayo haiʹdes hi. (Emuhọ 23:7-9; Matiu 28:1) Ofariẹ, Ebaibol na e rehọ “Ẹri” dhesẹ ọgọdọ nọ a ki ahwo buobu fihọ ẹsiẹvo ho, wọhọ oria nọ a re ki ahwo uviuwou ovo hayo ahwo buobu nọ a whu fihọ.—Emuhọ 49:30, 31.

Kọ oghẹrẹ oria vẹ “Ẹri” o dikihẹ kẹ? Ẹme Ọghẹnẹ o dhesẹ nọ otofa ẹme na “Ẹri” o kẹre vi oria nọ a ki ahwo buobu fihọ ẹsiẹvo. Wọhọ oriruo, Aizaya 5:14 o ta nọ Ẹri o “rovie unu urusio riẹ kẹkẹe fihọ.” Dede nọ Ẹri ọ lọ ahwo buobu no, wọhọ odẹme, o wọhọ nọ ẹsikpobi o gbe bi siuru amọfa nọ ọ rẹ lọ. Wo ohẹriẹ no oria jọ dẹẹ nọ a re ki ahwo nọ a whu no fihọ, nọ o rẹ gba umutho iri jọ ọvo, ‘o rẹ bẹ Ẹri hi.’ (Itẹ 27:20) Ẹri ọ rẹ vọ vievie he. Fikiere Ẹri ọ rrọ ugogo oria jọ nọ a re ki ahwo fihọ họ. Ukpoye kọ u dikihẹ kẹ oria nọ ahwo nọ a whu no a rrọ, wọhọ ẹsenọ a rrọ owezẹ.

Uwuhrẹ Ebaibol orọ ẹkparomatha na o kẹ omai otoriẹ uvevẹ orọ oware nọ “Ẹri” o dikihẹ kẹ. Oria nọ Ebaibol na e jọ ta ẹme kpahe Ẹri, u wobọ kpahe oghẹrẹ uwhu nọ  a te jọ wo ẹkparomatha. * (Job 14:13; Iruẹru 2:31; Eviavia 20:13) Ẹme Ọghẹnẹ o te je dhesẹ nọ orọnikọ ahwo nọ a gọ Jihova no ọvo a rrọ evaọ Ẹri hi rekọ te ahwo nọ a gọ riẹ hẹ. (Olezi 55:15) Fikiere Ebaibol na i wuhrẹ nọ “ẹkparomatha enọ ikiete avọ enọ ikiete he e rẹ te jarọ.”—Iruẹru 24:15.