A JIE uzi kẹ Ileleikristi inọ a hai ru Ekareghẹhọ uwhu Kristi. A re je se ekareghẹhọ nana “emu-owọwọ Ọnowo na.” (1 Ahwo Kọrint 11:20) Eme ọ lẹliẹ e riẹ wuzou tere? Oke vẹ gbe oghẹrẹ vẹ a re ro ru ei?

Jesu Kristi ọ to Emu Owọwọ Olori na họ evaọ aso ehaa Ọnyavrẹ ahwo Ju ọrọ ukpe ọ 33 C.E. Ọnyavrẹ na ọ jọ ehaa ẹsiẹvo  ẹgbukpe nọ a jẹ hai ru evaọ ẹdẹ avọ 14 ọrọ amara ahwo Ju nọ a re se Nisan. Re a ruẹsi kele edẹ na, ahwo Ju a jẹ hae hẹrẹ ezi nọ aso gbe uvo e rẹ rọ jọ ẹrẹrẹ. Onana họ oke nọ elo uvo na ọ rẹ rọ jariẹ euwa 12, ebi ọ vẹ jẹ jọ euwa 12. Ọvẹre ọsosuọ nọ ọ va via kẹle ẹdẹ nana o re kpokahọ emuhọ amara Nisan. Edẹ 14 nọ i lele i rie u re kiefihọ ehaa Ọnyavrẹ na, nọ ọre o te kie diwi no.

Jesu o ru ehaa Ọnyavrẹ na kugbe ilele riẹ, vi Judas Iskariọt vrẹ, kẹsena ọ tẹ to Emu Owọwọ Olori na họ. Emu ọnana o nwene ehaa Ọnyavrẹ ahwo Ju na, fikiere a re ru ei ẹsiẹvo ẹgbukpe.

Usiuwoma Matiu o ta nọ: “Jesu ọ tẹ rehọ ebrẹdi o te guọvunu họ iẹ, ọ jẹ bẹrẹ iẹ, ọ tẹ rehọ iẹ kẹ ilele na, a nọ, ‘Wha rehọ, wha re; onana họ oma mẹ.’ Ọ tẹ rehọ egho, nọ o yere Ọghẹnẹ [no] ọ tẹ rehọ iẹ kẹ ae, a nọ, ‘Whai kpobi wha da e; keme onana họ azẹ mẹ orọ ọvọ na, nọ o hwẹ kẹ ibuobu fiki erọvrẹ izieraha.’”—Matiu 26:26-28.

Ahwo jọ a re roro nnọ Jesu o zihe ebrẹdi na ruọ ugboma riẹ je zihe udi na ruọ azẹ riẹ. Dede na, oware ovo u ru ugboma Jesu hu okenọ ọ rehọ ebrẹdi nana kẹ ilele riẹ. Kọ ikọ Jesu a jẹ ginẹ re ugboma riẹ jẹ da azẹ riẹ? Ijo, a te ru ere kiyọ ohwo a be re na, yọ uzi Ọghẹnẹ o ghọ oyena. (Emuhọ 9:3, 4; Iruo-Izerẹ 17:10) Wọhọ epanọ o rrọ Luk 22:20, Jesu ọ ta nọ: “Egho ọnana họ ọvọ ọkpokpọ azẹ mẹ ọ nọ o hwẹ fiki rai.” Kọ egho na dẹẹ ọ jọ “ọvọ ọkpokpọ” na? O sae jọ ere he keme ọvọ yọ ọtamuo, orọnikọ okwakwa jọ nọ a rẹ ruẹ je kru họ obọ họ.

Fikiere, ebrẹdi gbe udi na e jọ oware ẹwoho. Ebrẹdi na o dikihẹ kẹ ugboma ogbagba Kristi. Ebrẹdi nọ a  ro ru ehaa Ọnyavrẹ na kiọkọ Jesu o ro ru Emu Owọwọ Olori na. A gua ẹvi kugbe ro there ebrẹdi na ha. (Ọnyano 12:8) Ebaibol na ọ rehọ ẹvi dhesẹ oka uzioraha hayo egbogbo. Fikiere ebrẹdi na o dikihẹ kẹ ugboma ogbagba Jesu nọ o ro dheidhe. O kare uzioraha.—Matiu 16:11, 12; 1 Ahwo Kọrint 5:6, 7; 1 Pita 2:22; 1 Jọn 2:1, 2.

Udi owawae na u dikihẹ kẹ azẹ Jesu. Azẹ yena o ru nọ ọvọ ọkpokpọ na o ro wo ẹgba. Jesu ọ ta nọ azẹ riẹ o hwẹ “fiki erọvrẹ izieraha.” Fikiere ahwo-akpọ a sae jọ fuafo evaọ aro Ọghẹnẹ jẹ sae ruọ ọvọ ọkpokpọ na kugbe Jihova. (Ahwo Hibru 9:14; 10:16, 17) Ọvọ nana o ru rie lọhọ nọ Ileleikristi 144,000 a ti ro kpohọ obọ odhiwu. A te jọ obei su wọhọ ivie gbe izerẹ rọkẹ erere ahwo-akpọ kpobi.—Emuhọ 22:18; Jerimaya 31:31-33; 1 Pita 2:9; Eviavia 5:9, 10; 14:1-3.

Amono a rẹ re ebrẹdi jẹ da udi Ekareghẹhọ nana? O rrọ oware iroro re ma ta nọ enọ e rẹ re ebrẹdi na jẹ da udi na họ ahwo nọ a rrọ ọvọ ọkpokpọ na ọvo—enọ i wo ẹruore ekpohọ obọ odhiwu. Ẹzi ọfuafo Ọghẹnẹ o re se isẹri kẹ ahwo yena inọ a salọ e rai re a su eva obọ odhiwu wọhọ ivie. (Ahwo Rom 8:16) A rrọ ọvọ Uvie na kugbe Jesu re.—Luk 22:29.

Kọ ẹvẹ kpahe otu nọ o wo ẹruore ẹria bẹdẹ bẹdẹ evaọ Aparadase otọakpọ? A re yo ẹme Jesu je kpohọ Emu Owọwọ Olori na, rekọ a rẹ jariẹ wọhọ iriughe, orọnikọ a rẹ re emu na ha. Isẹri Jihova a re ru Emu Owọwọ Olori na ẹsiẹvo ẹgbukpe evaọ Nisan 14 nọ ọre o te kie diwi no. Dede nọ umutho idu ahwo jọ ọvo wariẹ akpọ na họ a wo ẹruore obọ odhiwu, ekareghẹhọ nana i wuzou gaga kẹ Ileleikristi kpobi. O rrọ etoke nọ ahwo kpobi a sai ro roro didi kpahe uyoyou ulogbo Jihova Ọghẹnẹ avọ Jesu Kristi.—Jọn 3:16.