EDẸ-EHAA egagọ gbe erọ orẹwho buobu nọ a bi koko evaọ abọ sa-sa akpọ na nẹnẹ i no Ebaibol ze he. Kọ bovẹ ehaa itieye na i muhọ noze? Otẹrọnọ whọ rẹ sai kpohọ uwou-ebe re who se, whọ te ruẹ eme nọ ebe ikuigbe sa-sa e ta kpahe ehaa nọ e viodẹ evaọ okegbe ra. Roro kpahe umutho iriruo jọ.

 Isita. Obe ofeme ulogbo na The Encyclopædia Britannica o ta nọ: “A rẹ jọ oria ovuovo evaọ Ọvọ Ọkpokpọ na ruẹ oware ovo nọ u wobọ kpahe ekoko ehaa Isita ha.” Kọ ẹvẹ Isita i ro muhọ? U muhọ no obọ egedhọ ze. Dede nọ a ta inọ a bi ru ehaa nana rọ kareghẹhọ ẹkparomatha Jesu, iruemu nọ e wariẹ Isita họ i wobọ kugbe iruẹru egedhọ.

Ehaa Ukpe Okpokpọ. Ẹdẹ nọ a re ru ehaa Ukpe Okpokpọ gbe iruemu nọ a rẹ ja riẹ ru i wo ohẹriẹ no orẹwho ruọ orẹwho. Obe ofeme-ulogbo na The World Book Encyclopedia o ta kpahe emuhọ ehaa nana nọ: “Osu ahwo Rom na, Julius Caesar o fi January 1 họ wọhọ Ẹdẹ Ukpe Okpokpọ evaọ 46 B.C. Ahwo Rom a rehọ ẹdẹ nana mudhe kẹ Janus, ọghẹnẹ inu-ighẹ, inuethẹ, gbe ọrọ emuhọ. A se amara January na kpahe odẹ Janus, ọnọ o wo evao ivẹ—ovao jọ o rri aro, ofa o te rri emu.” Fikiere ehaa Ukpe Okpokpọ i muhọ no uruemu egedhọ ze.

Halloween. Rọ kpahe ehaa nana nọ o tho ehaa esemọ na, obe ofeme-ulogbo na The Encyclopedia Americana o ta nọ: “Nọ a kiotọ iruemu ehaa Halloween na, a ruẹ inọ a rehọ e rai no ehaa nọ a re se Druid ze [ehaa izerẹ oke anwae jọ nọ abọ rai jọ o no India gbe Europe ze] nọ a jẹ hai ru taure Egagọ-Ileleikristi i te ti muhọ. Otu izerẹ na a jẹ hai ru ehaa kẹ eghẹnẹ ivẹ jọ—ọghẹnẹ ọre gbe ọghẹnẹ iwhuowhu na . . . , ọnọ a jẹ hai ru ehaa riẹ eva November 1, nọ o rrọ emuhọ Ukpe Okpokpọ orọ ahwo unuakpọ yena. Ehaa nana nọ a re ru kẹ iwhuowhu na o tẹ rehọ ẹmẹrera zihe ruọ uruemu Egagọ-Ileleikristi.”

Edẹ-Ehaa Efa. O lọhọ họ re ma ta ẹme kpahe ehaa kpobi nọ a be jọ akpọ na soso ru nẹnẹ. Dede na, Jihova ọ rẹ jẹ ekoko edẹ-ehaa nọ a rẹ jọ dẹ orro họ ahwo gbe ikoko ahwo-akpọ oma rehọ họ. (Jerimaya 17:5-7; Iruẹru 10:25, 26) Kareghẹhọ re inọ oria nọ ehaa egagọ i muhọ no ze u re dhesẹ sọ Ọghẹnẹ ọ rẹ jẹ ehaa na rehọ hayo ọ rẹ jae rehọ họ. (Aizaya 52:11; Eviavia 18:4) Ehri-izi Ebaibol nọ a ta ẹme kpahe evaọ Uzou avọ 16 orọ obe nana i ti fi obọ họ kẹ owhẹ riẹ oghẹrẹ nọ Ọghẹnẹ o rri ekoko edẹ-ehaa efa nọ i no Ebaibol ze he.