Ẹme Nọ Ọ Karo

ỌGHẸNẸ ERUMERU họ Osu ehrugbakpọ na. Izuazọ mai, enẹna gbe evaọ obaro, e rrọ obọ riẹ. O wo ogaga nọ ọ rẹ rọ hwosa gbe ogaga nọ ọ rẹ rọ kẹ uye. O wo ogaga nọ ọ rẹ rọ kẹ uzuazọ gbe ogaga nọ ọ rẹ rọ rehọ uzuazọ. Ma te wo ọjẹrehọ riẹ, u re woma k’omai; ma gbe wo ọjẹrehọ riẹ hẹ, ma rẹ rẹriẹ ovao ku okpẹtu. Fikiere o roja gaga re egagọ mai e jọ enọ ọ jẹrehọ!

Ahwo a be gọ evaọ idhere buobu. Otẹrọnọ egagọ e wọhọ edhere, kọ idhere egagọ kpobi Ọghẹnẹ ọ jẹ rehọ? Ijo, ere o rrọ họ. Jesu, ọruẹaro Ọghẹnẹ, o dhesẹ nọ idhere ivẹ ọvo e riẹ. Ọ ta nọ: “Edhere ọraha ọ rẹ kẹkẹe o riama fihọ, enọ e rehọ e riẹ ruọ eva a re buobu. Keme edhere nọ a re ro kpohọ uzuazọ ọ rẹ kekeke, unu riẹ ọ rẹ hwahwa, enọ e ro riẹ e rẹ kakao.”—Matiu 7:13, 14.

Oghẹrẹ egagọ ivẹ ọvo e riẹ: onọ u re su kpohọ uzuazọ gbe onọ u re su kpohọ ọraha. Ẹjiroro ibroshọ nana họ re u fiobọhọ k’owhẹ duku edhere nọ o re su kpohọ uzuazọ ebẹdẹ bẹdẹ.