Abọ 2

Ẹvẹ Whọ Sae rọ Riẹ Uzẹme na Kpahe Ọghẹnẹ?

1, 2. Didi oriruo o dhesẹ ẹgwọlọ nọ a re ro wo ugogo oware nọ a rẹ rọ jiroro kpahe eme egagọ?

ẸVẸ ma sae rọ riẹ Ọghẹnẹ? Kọ o gwọlọ nọ ma rẹ kiẹ iwuhrẹ egagọ na kpobi riwi? Oyena o te lọhọ họ. O tẹ make rọnọ ma sai ru ere dede, ẹvẹ ma rẹ rọ riẹ iwuhrẹ nọ e gba?

² Evaọ uzẹme, fiki eriwo sa-sa nọ e r’otọ kpahe Ọghẹnẹ na, ma gwọlọ edhere nọ ma rẹ rọ riẹ oware nọ u kiehọ, ute nọ ahwo a rẹ jẹrehọ. Re ma dhesẹ iẹe: Dae rehọ iẹe nọ a be vro avro kpahe uthethei ẹga-ohọ jọ evaọ obọ eki. Ọnọ ọ be zẹ ohọ na nnọ ohọ na u theri te esabọ esa, rekọ ọnọ ọ be dẹ na nọ u te ere he. Ẹvẹ a sai ro ku ẹme na họ? A rẹ rehọ oware ma ohọ na.

3. Fikieme a ro kere Ebaibol na?

³ Kọ ute jọ o riẹ nọ a rẹ rọ jiroro eme egagọ? E, Ebaibol na. Ọghẹnẹ o ru re a kere Ebaibol na re ahwo evaọ eria kpobi a sai wuhrẹ uzẹme na kpahe iẹe. A kporo ima-idu buobu no. A fa oma riẹ kpobi hayo abọ riẹ jọ fihọ evẹrẹ 2,100 no. Enwenọ ohwo kpobi ọ rẹ sai se uzẹme na kpahe Ọghẹnẹ evaọ ẹvẹrẹ riẹ.

4. Didi ovuẹ o rrọ Ebaibol na?

⁴ Ebaibol na yọ okẹ oghaghae nọ u no obọ Ọghẹnẹ ze. U dhesẹ eware nọ e rrọ didi vẹ k’omai. O ta kpahe ahwo nọ a be rria akpọ izi na. U dhesẹ iroro Ọghẹnẹ k’omai, uruemu riẹ, gbe ẹjiroro  riẹ. O ta kpahe epanọ o yeri kugbe ahwo evaọ etoke ikpe idu buobu. O ta kpahe eware nọ e te via evaọ obaro. Yọ u dhesẹ oghẹrẹ nọ ma sai ro duku edhere nọ o re su kpohọ uzuazọ ibẹdẹ bẹdẹ.

Oware nọ Whọ Jẹ Sae Rọwo Ebaibol Na

5. Didi oriruo o dhesẹ nọ Ebaibol na ọ rọwo kugbe otọkiẹ-eriariẹ?

⁵ Ẹjiroro buobu e riẹ nọ ma jẹ sae rọwo nnọ Ebaibol na ghinọ Ẹme Ọghẹnẹ. Ẹjiroro jọ họ Ebaibol na ọ rọwokugbe otọkiẹ-eriariẹ. Evaọ oke anwae ahwo wariẹ akpọ na kpobi họ a roro nnọ otọakpọ na o rrọ ehru oware jọ. Wọhọ oriruo, evaọ West Africa, okejọ o jariẹ nọ ahwo a rọwo nnọ otọakpọ na o rrọ ehru araomuomu jọ nọ o kpiri ku, inọ o kpiri asia 3,500 fihọ ehru otọakpọ na, asia 3,500 fihọ obotọ riẹ. Ghele na, rọwo kugbe otọkiẹ-eriariẹ, bu vi ikpe 3,500 nọ e vrẹ no okere Ebaibol jọ o kere nnọ Ọghẹnẹ ọ rọ “akpọ hwa oware ovo ho.”—Job 26:7.

6. Ovẹ họ imuẹro nọ e mae rro inọ obọ Ọghẹnẹ Ebaibol na o no ze?

⁶ Imuẹro nọ e mae rro inọ obọ Ọghẹnẹ Ebaibol na o ghine no ze họ ẹgbagba riẹ evaọ ẹta kpahe obaro na. Wo ohẹriẹ no ebuẹva ahwo-akpọ, Ọghẹnẹ ọ ghinẹ riẹ obaro na; ẹme nọ ọ ta kpobi o re rugba.

7. Didi eruẹaruẹ Ebaibol jọ i rugba evaọ oke anwae?

⁷ Eruẹaruẹ Ebaibol udhusoi buobu i rugba evaọ oke anwae. Wọhọ oriruo, ikpe 700 taure o tẹ te via, Ebaibol na ọ ta gbagba inọ a ti yẹ Jesu evaọ ẹwho Bẹtlẹhẹm, yọ ere o ghinẹ via. (Maeka 5:2; Matiu 2:3-9) Fiba eruẹaruẹ buobu efa kpahe Jesu, Ebaibol na ọ tẹ jẹ ruẹaro nnọ ọmọtẹ-kọkọ o ti yẹi gbe nnọ a ti vivi iei avọ ewẹ isiliva 30. Eruẹaruẹ eyena i rugba re. Evaọ uzẹme, uvumọ ohwo-akpọ ọ riẹ hẹ nọ ọ rẹ sae ruẹaro eware eyena!—Aizaya 7:14; Zekaraya 11:12, 13; Matiu 1:22, 23; 27:3-5.

8. Didi eruẹaruẹ Ebaibol jọ i bi rugba nẹnẹ, kọ eme i dhesẹ?

 ⁸ Eruẹaruẹ Ebaibol buobu i bi rugba evaọ oke mai na. Ejọ rai ena:

● “Orẹwho o rẹte kpare bru orẹwho [evaọ ẹmo-ofio], uvie o rẹte kpare bru uvie; etọ i reti nuhẹ gaga jegbọ ohọwo.”—Luk 21:10, 11.

● “Umuomu o rẹ te jọ buobu.”—Matiu 24:12.

● “Eva edẹ urere . . . ahwo a re ti you oma-obọrai, je you igho, . . . a re ti yo ẹme e nọ i yẹ rai hi, . . . a wo oma-onyẹ hẹ, avọ ofu-ọkpoo, a re mukpahe ahwo ezi, . . . otu okpiro, enọ i yowọ enu-awere siọ Ọghẹnẹ ba.”—2 Timoti 3:1-5.

Kọ whọ rọwo nnọ eware enana e be via nẹnẹ? Ẹgbagba eruẹaruẹ Ebaibol i dhesẹ nnọ Ebaibol na ọ rrọ obe gheghe he. Ẹme Ọghẹnẹ nọ ọ kẹ ẹgba!—2 Timoti 3:16.

Kọ A Nwene Ebaibol na No?

9, 10. Eme o dhesẹ nọ Ọghẹnẹ ọ re kẹ ahwo uvẹ re a nwene Ebaibol na ha?

⁹ Dae rehọ iẹe nọ who wo uwou-eware-ikuo jọ, who te kere izi jọ fihọ oria kẹ iruiruo ra. Otẹrọnọ ọwegrẹ jọ o nwene izi nọ who kere na, eme who re ru? Kọ whọ gbẹ kpọ oware nọ a nwene na vi? Evaọ edhere ọvona, Ọghẹnẹ ọ rẹ kuvẹ kẹ ahwo ho re a nwene uzẹme Ẹme riẹ, Ebaibol na.

¹⁰ Ahwo nọ a daoma re a nwene iwuhrẹ Ẹme Ọghẹnẹ a re kparobọ họ. Ma tẹ rehọ Ebaibol nọ ma wo nẹnẹ na wawo Ebaibol anwae, epọvo na e rrọ. Onana u dhesẹ nọ a ri nwene Ebaibol na ha evaọ ikpe na kpobi na.

[Enọ Uwuhrẹ]

[Ẹkpẹti nọ o rrọ ẹwẹ-obe avọ 7]

Uruemu Anwae nọ A Rọ Unu Kpeze—Kọ A re Fievahọ Iẹe

Egagọ anwae ọ Africa i wo ebe ẹri anwae he. Unu a re ro kpeze iruemu anwae, iruẹru, gbe eriwo rai kpahe Ọghẹnẹ n’oge t’oge. Obe na West African Traditional Religion o ta nọ: “A sae rọ ovuẹ unu kpeze eme gbagba ha. Ẹsibuobu, a re fihọ hayo sino ovuẹ nọ a rọ unu kpeze, a sai nwene eme na jẹ rẹriẹ ae, a re gb’uwhei họ ae i ve je reghe ahwo aro, uwhremu na o vẹ jọ bẹbẹ re a sae hẹriẹ uzẹme no erue.”

[Enọ Uwuhrẹ]

Ẹkpẹti: Eme obe jọ o ta kpahe eva nọ a re fihọ uruemu anwae nọ a rọ unu kpeze?

[Ọnọ o wo uwoho nọ o rrọ ẹwẹ-obe avọ 6]

Ahwo nọ ivo-egaga i kpomahọ: UN PHOTO 164671/JOHN ISAAC; alakpa-ẹmo: United Nations/Photo by Yutaka Nagata