Abọ 9

Egagọ Uzẹme E Sae k’Owhẹ Erere Bẹdẹ Bẹdẹ!

1. Eme ọ rẹ via ma te “bigba Ọghẹnẹ”?

JIHOVA o you enọ e be gọe. Whọ tẹ be gọ Jihova, ọ te ghale owhẹ enẹna gbe evaọ obaro. Ebaibol na ọ ta nọ: “Bigba Ọghẹnẹ o re ti bigba owhẹ.”—Jemis 4:8.

2. Ẹvẹ ma rẹ sai ro si kẹle Ọghẹnẹ, kọ ẹvẹ onana o sai ro kpomahọ elẹ mai?

² Re who si kẹle Ọghẹnẹ, who re wuhrẹ je fi Ẹme riẹ h’iruo. Whọ tẹ lẹ rọwokugbe oreva riẹ, Jihova ọ te gaviezọ kẹ elẹ ra jẹ kiyo rai. Jọn ukọ Oleleikristi na o kere nọ: “Onana họ eva-ifihọ nọ oma wo kpahọ [Ọghẹnẹ], nnọ, re ma tẹ yare oware jọ wọhọ [epaọ] oreva riẹ, o re yo kẹ omai. Ma tẹ riẹ nọ oware kpobi nọ oma yare o re yo kẹ omai, ma riẹ nọ ayare riẹ o te omai obọ no.”—1 Jọn 5:14, 15.

3-7. Ẹvẹ ma sai ro wo areghẹ Ọghẹnẹ, kọ ẹvẹ o sai ro fiobọhọ k’omai?

³ Ofariẹ, nọ who bi si kẹle Ọghẹnẹ na, ọ te k’owhẹ areghẹ nọ whọ sae rọ kparobọ evaọ uzuazọ ekẹdẹ kẹdẹ. Ebaibol na ọ ta nọ: “Otẹrọnọ areghẹ ọkare owhai ọjọ, jọ ọ yare Ọghẹnẹ.”—Jemis 1:5.

⁴ Ẹvẹ areghẹ Ọghẹnẹ ọ sai ro fiobọhọ k’owhẹ? Ojọ họ, o rẹ sai fiobọhọ k’owhẹ riẹ eware nọ e rẹ dha Jihova eva. Whọ sai je wuhrẹ oware nọ o soriẹ nọ eware enana e rọ thọ gbe oware nọ whọ rẹ sai ru re whọ whaha eruo rai. Eriariẹ itieye na e sae thọ owhẹ no ebẹbẹ buobu nọ e be lahiẹ ahwo nẹnẹ na. Wọhọ oriruo, ẹmeoyo kẹ ohrẹ Ọghẹnẹ re ma jọ fuafo evaọ uruemu u re fiobọhọ thọ ahwo Ọghẹnẹ no udihọ nọ a gwọlọ họ, eyao igberẹ nọ i re vo, gbe erọo ọkora hayo enọ e tahaku no.

⁵ Eme ọfa areghẹ Ọghẹnẹ ọ rẹ sai ru k’owhẹ? O rẹ sai fiobọhọ k’owhẹ yeri uvi uzuazọ. O rẹ sai fiobọhọ k’owhẹ jẹ emamọ iroro evaọ eme nọ e r’oja, wọhọ oriruo epanọ whọ rẹ raha ugho ra. U re fiobọhọ k’owhẹ le itee nọ i fo jẹ whaha itee nọ e rẹ kẹ erere okrẹkri hi.

⁶ Areghẹ Ọghẹnẹ ọ sai je fiobọhọ k’owhẹ evaọ usu ra kugbe amọfa. Whọ sai wo uzuazọ uviuwou nọ o rẹ wereva viere. Whọ rẹ sai wo emamọ usu ukrẹkri kugbe amọfa, yọ whọ rẹ sai wo adhẹẹ, tube no obọ enọ e be gọ Ọghẹnẹ hẹ ze.

⁷ Ofariẹ, areghẹ Ọghẹnẹ nọ who re wo o ti nwene eriwo ra kpahe uzuazọ. O sai fiobọhọ k’owhẹ yeri kugbe ebẹbẹ gbe idabolo uzuazọ. Ofariẹ, o te lẹliẹ owhẹ wo eriwo owowa, ọrọ abọ-owoma kpahe obaro. Eriwo abọ-owoma otiọye na ọ vẹ lẹliẹ owhẹ wo omokpokpọ iroro gbe ọrọ ugboma viere.—Itẹ 14:30; Aizaya 48:17.

8. Whọ tẹ be gọ Ọghẹnẹ, eme whọ rẹ dhozọ riẹ hẹ?

⁸ Whọ tẹ be gọ Ọghẹnẹ uzẹme na, who re wo ufuoma no ozodhẹ nọ u bi kpokpo enọ e be gọe he. Fikinọ whọ riẹ nọ iwhuowhu na e kare uzuazọ evaọ uki, whọ te dhozọ enọ i whu no ho. Fikinọ who fievahọ eyaa Ọghẹnẹ nọ ọ te rọ kpare iwhuowhu na, whọ te dhozọ uwhu  hu. Yọ nọ whọ riẹ nọ Ọghẹnẹ o wo ogaga kpobi na, whọ te dhozọ erieda ha.—Jọn 8:32.

Ikiẹrẹe na E te Rọ Otọakpọ na Reuku

9-11. Amono a te rria Aparadase, kọ amono a te riae he?

⁹ Who te si kẹle Ọghẹnẹ, whọ rẹ dhozọ obaro na ha. Wọhọ epanọ ma ruẹ no na, Ebaibol na ọ ruẹaro kpahe ebẹbẹ buobu nọ ma be ruẹ evaọ otọakpọ nẹnẹ na. Jihova ọ ta k’omai nnọ eware enana e rrọ ubroke; Uvie Ọghẹnẹ u ti ru otọakpọ na fihọ aparadase kẹle.—Luk 21:10, 11, 31; 23:43.

¹⁰ Enọ i si kẹle Jihova jẹ be gọe ọvo e te rria Aparadase na. Ebaibol na ọ ta nọ: “Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:10, 11.

¹¹ Enọ i veghe uzou siọ ẹme ba eyo kẹ izi ikiẹrẹe Ọghẹnẹ a ti ku izuazọ rai fiẹ bẹdẹ bẹdẹ. (2 Ahwo Tẹsalonika 1:8, 9) A te raha ai no. A ti kuomagbe Setan gbe idhivẹri riẹ evaọ uwhu ebẹdẹ bẹdẹ. (Eviavia 20:10, 14) Rekọ enọ i wuhrẹ kpahe Jihova jẹ be gọe a te ruẹ oghọghọ evaọ Aparadase evaọ otọakpọ.

Obaro Igbunu!

12. Eme Ebaibol na ọ ta kpahe obaro na?

¹² Jihova ọ ruẹrẹ eware igbunu fihọ kẹ enọ i you rie! Dai rri oware nọ Ẹme riẹ ọ ta kpahe uzuazọ evaọ otọakpọ Aparadase:

● Emuore buobu nọ a rẹ re: “Jọ ibi i vihọ eva otọ na; jọ ofou o fou eva ehru igbehru!”—Olezi 72:16.

● Emamọ iwou: “A rẹ te bọ iwou a vẹ ria ae tọ.”—Aizaya 65:21.

● Iruo omawere: “Esanọ mẹ na a rẹ te re erere iruo abọ rai krẹkri. Iruo rai i gbe ti vrẹ hẹ.”—Aizaya 65:22, 23.

● Ẹyao ọ gbẹ te jọ họ: “Ohwo ọvo nọ ọ be ria eva riẹ nọ ọ rẹte ta no, ‘Mẹ be mọ,’ ọ rọ họ.”—Aizaya 33:24.

● Emo e gbẹ te jariẹ hẹ: “Kẹsena aro enọ itu i veti rovie, ezọ enọ i di i veti rovie; kẹsena ọmo o veti duola wọhọ uyo, ẹrọo ọnọ o dienu ọ rẹte so ole oghọghọ.”—Aizaya 35:5, 6.

● Edada, uweri, uwhu e gbẹ te jariẹ hẹ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:4.

● Ẹmo ọ gbẹ te jariẹ hẹ: “[Ọghẹnẹ] o ru akpọ na kpobi nọ ẹmo o je serihọ ri te oka akpọ!”—Olezi 46:9.

● Uzuazọ ebẹdẹ bẹdẹ: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:29.

13. Ono ọvo ọ rẹ sai ru otọakpọ nana fihọ aparadase, kọ fikieme?

¹³ Ahwo-akpọ a sai ru eware itieye na ha, rekọ Jihova o wo ogaga nọ o re ro ru oware nọ ọ ta nọ o ti ru. Uvumọ oware o rẹ whaha iẹe eruo oware nọ ọ gwọlọ ru hu. Ebaibol na ọ ta nọ: “Keme oware ovuovo nọ o rẹ bẹ Ọghẹnẹ eruo orọ họ.”—Luk 1:37.

14. Ẹvẹ whọ rẹ sae rọ ruọ edhere nọ o re su kpohọ uzuazọ ebẹdẹ bẹdẹ na?

¹⁴ Ẹkwoma Isẹri riẹ, Jihova ọ be kẹ ahwo evaọ oria kpobi uvẹ nọ a rẹ rọ “rehọ unu ohwahwa ruọ eva” re a jẹ nya evaọ edhere nọ o re su kpohọ uzuazọ ebẹdẹ bẹdẹ. Ajọ owhẹ jọ usu ahwo evawere nọ a te jẹ uzizie oyena rehọ. Ajọ who dede egagọ uzẹme na rehọ jẹ reawere oghale Jihova bẹdẹ bẹdẹ!—Matiu 7:13, 14.

[Enọ Uwuhrẹ]