Siọ Egagọ Erue; Gọ Egagọ Uzẹme
Abọ 8
Siọ Egagọ Erue; Gọ Egagọ Uzẹme
1. Kpahe egagọ, didi ẹsalọ ahwo a rẹriẹ ovao ku nẹnẹ?
JESU ọ ta nọ: “Ọnọ o kuomagbe omẹ hẹ, ọ rọ suọ omẹ.” (Matiu 12:30) Ma gbẹ rrọ abọ Jihova ha yọ ma rrọ abọ Setan. Ahwo buobu a roro nọ a be gọ Ọghẹnẹ evaọ edhere nọ ọ jẹrehọ, rekọ Ebaibol na ọ ta nọ Setan ọ be “viẹ akpọ kpobi họ.” (Eviavia 12:9) Ima ahwo buobu a roro nọ a be gọ Ọghẹnẹ, rekọ Setan Ẹdhọ họ ọnọ a be ghinẹ gọ! Ahwo nẹnẹ a rẹriẹ ovao ku ẹsalọ jọ: A rẹ gọ Jihova, “Ọghẹnẹ ọtẹruo” na, hayo Setan, ‘ọsẹ erue na.’—Olezi 31:5; Jọn 8:44.
Si Oma no Egagọ Erue
2. Edhere jọ vẹ Setan ọ be rọ daoma whaha ahwo re a siọ Jihova ba ẹgọ?
2 Ẹjẹ iroro na re a gọ Jihova họ ẹsalọ areghẹ, ẹsalọ nọ ọ rẹ wha ọjẹrehọ Ọghẹnẹ ze. Rekọ eva ohwo kpobi nọ ọ be gọ Ọghẹnẹ e rẹ were Setan he; ọ rẹ wha ẹbẹbẹ se enọ e be gọ Ọghẹnẹ. Edhere jọ nọ o re ro ru onana họ ẹkoko gbe ọwọsuọ no obọ amọfa ze, tube no obọ egbẹnyusu gbe ahwo uviuwou ze. Jesu ọ vẹvẹ unu nọ: “Ahwo uwou obọ ohwo a rẹ te jọ ewegrẹ riẹ.”—Matiu 10:36.
3. Otẹrọnọ uviuwou hayo egbẹnyusu ra a wọso Ọghẹnẹ ọgọ ra, eme who re ru?
3 Oyena o tẹ via k’owhẹ, didi owọ whọ rẹ jẹ? Ahwo buobu a riẹ nnọ edhere egagọ rai ọ thọ, ghele na a wo ehoo nọ a re ro sioma noi. A re roro nọ a te ru ere yọ a wha omovuọ se uviuwou rai no. Kọ onana yọ oware areghẹ? Whọ tẹ ruẹ nọ ahwo ọkpekpe uviuwou ra a be lọ imu iyoma, kọ whọ gbẹ vẹvẹ ae unu inọ imu na e te nwa ae oma? Kọ who re kuomagbe ai lọ imu na?
4. Eme Joshua ọ ta kẹ emọ Izrẹl kpahe egagọ evaọ edẹ riẹ?
4 Joshua ọ tuduhọ emọ Izrẹl awọ re a siobọno iruemu gbe iruẹru egagọ ethọthọ erọ esẹ-ode rai. Ọ ta nọ: “Enẹna wha dhozọ ỌNOWO na, wha gọ e uvi ẹgọ eva orọwọ, wha siọ edhọ nọ esẹ rai e jẹ gọ abọdekọ Ethẹ gbe obọ Ijipiti, re wha gọ ỌNOWO na.” (Joshua 24:14) Joshua ọ rehọ oma kpotọ kẹ Ọghẹnẹ, Jihova ọ tẹ ghale iẹe. Ma tẹ roma kpotọ kẹ Jihova, ọ te ghale omai re.—2 Samuẹle 22:26.
Gbolo Eware Egagọ Erue Kufiẹ
5. Fikieme ma je gbolo ekwakwa emajiki kufiẹ?
5 Omasino egagọ erue u te je dhesẹ nnọ ma rẹ raha ekwakwa emajiki nọ ma wo kpobi, wọhọ ekwakwa-ẹbo, igbelẹ, ẹmẹro gbe ifiare emajiki, gbe eware itieye na. Onana o r’oja keme u re dhesẹ nọ ma fi eva mai kpobi họ Jihova.
6. Ẹvẹ Ileleikristi ọsosuọ a ru ebe emajiki rai?
6 Roro kpahe oware nọ Ileleikristi ọsosuọ jọ a ru evaọ okenọ a gwọlọ kurẹriẹ ruọ egagọ uzẹme. Ebaibol na ọ ta nọ: “Enọ e rehọ ebe nọ a je ro ru iruo-ewhariọ zikuku a jẹ kakao ho; a tẹ jọ iraro ahwo kpobi mahe ae.”—Iruẹru 19:19.
7. Eme ma rẹ sai ru otẹrọnọ idhivẹri i bi kpokpo omai?
7 Idhivẹri e rẹ sai kpokpo ahwo jọ nọ i w’abọ evaọ eda, ẹva-ọgba, hayo iruẹru emajiki vẹre nọ i bi mu Jihova họ ẹgọ enẹna. Oyena o tẹ via k’owhẹ, bo via se Jihova evaọ olẹ, se odẹ riẹ. O ti fiobọhọ k’owhẹ.—Itẹ 18:10; Jemis 4:7.
8. Ẹvẹ Ileleikristi a re rri emedhọ, emema, gbe iwoho nọ a re ro ruiruo evaọ egagọ erue?
8 Enọ e gwọlọ gọ Jihova a re wo emedhọ, ẹmema, hayo iwoho nọ e rrọ abọ egagọ erue he hayo rehọ ae ruiruo ho. “Orọwọ [Ileleikristi uzẹme e] be rọ nya, orọnikọ udeoruẹ hẹ.” (2 Ahwo Kọrint 5:7) A rẹ rọ adhẹẹ kẹ uzi Ọghẹnẹ nọ o ghọ eroruiruo ẹmema kpobi evaọ egagọ.—Ọnyano 20:4, 5.
Nyusu Kugbe Ahwo Jihova
9. Didi ohrẹ Ebaibol na ọ kẹ kpahe epanọ a re ro wo areghẹ?
9 Ebaibol na ọ ta nọ: “Ọnọ ọ nya lele ahwo iwareghẹ o re wo areghẹ.” (Itẹ 13:20) Ma tẹ gwọlọ wo areghẹ, u re fo re ma nya, hayo nyusu, kugbe Isẹri Jihova. Ae họ ahwo nọ e be nya evaọ edhere nọ o re su kpohọ uzuazọ.—Matiu 7:14.
10. Ẹvẹ Isẹri Jihova a sai ro fiobọhọ k’owhẹ gọ Ọghẹnẹ?
10 Isẹri na a be ghinẹ daezọ ahwo. Iruo rai họ re a fiobọhọ kẹ ahwo udu oruọzewọ wo otoriẹ izẹme Ebaibol nọ i re su kpohọ uzuazọ ebẹdẹ bẹdẹ. A rẹ sai fiobọhọ k’owhẹ ẹkwoma Ebaibol nọ a re wuhrẹ kugbe owhẹ, ọvọvẹ. A te za enọ ra je dhesẹ k’owhẹ epanọ who re ro fi eriariẹ Ebaibol h’iruo evaọ uzuazọ ra.—Jọn 17:3.
11. Ẹvẹ iwuhrẹ Ileleikristi e sai ro fiobọhọ k’owhẹ?
11 Eva iwuhrẹ rai, enọ a rẹ jọ Ọgwa Uvie ru, who ti wuhrẹ viere kpahe idhere Jihova. Isiuru ra re whọ gọ egagọ uzẹme na o te ga viere. Yọ who ti je wo ewuhrẹ ọrọ epanọ who re ro fiobọhọ kẹ amọfa wuhrẹ izẹme Ebaibol.—Ahwo Hibru 10:24, 25.
12. Ẹvẹ olẹ o sai ro fiobọhọ k’owhẹ gọ Ọghẹnẹ?
12 Nọ who bi wuhrẹ viere kpahe oreva gbe ẹjiroro Jihova na, ababọ avro ovuhumuo ra kẹ idhere iyoyou riẹ o ti diwi viere. Whọ te jẹ rro viere evaọ isiuru ra re who ru oware nọ o rẹ were iẹe jẹ whaha onọ o rẹ dhae eva. Kareghẹhọ nọ whọ rẹ sae nyabru Jihova evaọ olẹ re whọ yare iẹe re o fiobọhọ k’owhẹ ru oware nọ u kiete jẹ whaha onọ o thọ.—1 Ahwo Kọrint 6:9, 10; Ahwo Filipai 4:6.
13. Ẹvẹ whọ sai ro ru udu Jihova ghọghọ?
13 Oke o be nyaharo na, nọ whọ be rro evaọ edikihẹ abọ-ẹzi na, whọ te ruẹ ẹgwọlọ nọ who re ro zihe ro Osẹri Jihova nọ ọ roma mudhe jẹ họ-ame no. Ẹkwoma omukugbe ahwo Jihova, who ti ru udu Jihova ghọghọ. (Itẹ 27:11) Whọ te jọ udevie ahwo evawere enọ Ọghẹnẹ ọ ta kpahe nọ: “Mẹ rẹ te jọ eva rai, jẹ nya eva udevie rai, mẹ rẹ te jọ Ọghẹnẹ rai, a vẹ te jọ ahwo mẹ.”—2 Ahwo Kọrint 6:16.
[Enọ Uwuhrẹ]
[Ẹkpẹti/Uwoho nọ e rrọ ẹwẹ-obe avọ 25]
Iwuhrẹ Egagọ —Erọ Uzẹme gbe erọ Erue
● Esanerọvo: Egagọ buobu a bi wuhrẹ nnọ Ọghẹnẹ yọ Esanerọvo. A rẹ ta nọ “Ọsẹ na yọ Ọghẹnẹ, Ọmọ na [Jesu] yọ Ọghẹnẹ, Ẹzi Ọfuafo na yọ Ọghẹnẹ, yọ orọnikọ Eghẹnẹ esa e riẹ hẹ rekọ Ọghẹnẹ ọvo.”
Ebaibol na ọ tubẹ fodẹ ubiẹme “Esanerọvo” na ha, yọ o wuhrẹ hẹ inọ Jihova yọ imasa nọ e rrọ ọvo. Jihova ọvo họ Ọghẹnẹ. Obe 1 Ahwo Kọrint 8:6 o ta nọ: ‘Ọghẹnẹ ọvo ọ rrọ, Ọsẹ na.’ Jihova họ Erumeru na. Jesu orọnikọ Ọghẹnẹ hẹ rekọ “Ọmọ Ọghẹnẹ.” (1 Jọn 4:15) Epọvo na, ẹzi ọfuafo na orọnikọ Ọghẹnẹ hẹ. Ẹzi ọfuafo na ọ tubẹ rrọ ohwo dede he. Ogaga iruo Ọghẹnẹ o rrọ.—Iruẹru 1:8; Ahwo Ẹfẹsọs 5:18.
● Ẹwẹ Na: Egagọ buobu i re wuhrẹ nnọ ẹwẹ na yọ oware jọ nọ o rrọ eva ohwo nọ o rẹ sai whu hu. Ebaibol na o wuhrẹ nnọ ẹwẹ na họ ohwo na, yọ ma riẹ nọ ohwo ọ rẹ sai whu.—Emuhọ 2:7; Izikiẹl 18:4.
● Erae Ehẹle: Egagọ erue i re wuhrẹ nnọ a rẹ lahiẹ ewẹ irumuomu bẹdẹ bẹdẹ evaọ erae ehẹle. Ebaibol na ọ ta nnọ iwhuowhu “e riẹ oware ovo ho.” (Ọtausiwoma Na 9:5) Ebaibol na o te je wuhrẹ nnọ “Ọghẹnẹ họ uyoyou.” (1 Jọn 4:8) Jihova, Ọghẹnẹ oyoyou na, ọ rẹ rọ erae lahiẹ ahwo vievie he.
[Enọ Uwuhrẹ]
Ẹkpẹti: Eme Ebaibol na o wuhrẹ kpahe Esanerọvo, ẹwẹ, gbe erae ehẹle?
[Ẹkpẹti/Uwoho nọ e rrọ ẹwẹ-obe avọ 28]
Me Si Oma no Idhivẹri Na
Aso ẹdẹjọ nọ mẹ jọ owezẹ evaọ ehwa kugbe ọzae mẹ, me te yo urru nọ u se odẹ mẹ isiasa. Mẹ tẹ ruẹ isilini na nọ e bẹre abava, mẹ tẹ ruẹ oware owawae jọ nọ o wọhọ obọro nọ u kie fihọ omẹ eva. Ọzae mẹ ọ ruẹ eware nana ọvuọvo ho. Ghele na, ẹroro jọ ọ tẹ ruọ omẹ oma nọ o rehọ etoke emerae buobu.
Emerae ezeza e ruemu no, urru na o tẹ wariẹ se omẹ. Ẹsiẹvo na o tẹ wọhọ nọ uwou na soso o rrọ ame odidi. Ogbo ologbo jọ o te si no ame na ze, o te si ziọ ofẹ obọ mẹ. Mẹ daoma bẹ re mẹ frẹ riẹ no. Ozọ u mu omẹ gaga. Ame gbe araomuomu na e tẹ rayẹ, mẹ tẹ fia kie fihọ otọ. Mẹ riẹ onahona ha evaọ euwa buobu. Urru na o tẹ ta k’omẹ nnọ me zihe kpohọ aruẹri usiwo imizi nọ o rrọ iwhre na. Nọ mẹ nọ onọ odẹ ẹzi na, ọ tẹ fodẹ odẹ nọ otofa riẹ o rrọ ‘ọnọ o wo efe rekọ ababọ ọmọ.’ Ọ yeyaa nọ ọ te k’omẹ ogaga usiwo ro ru omẹ fe.
Ahwo nọ a be mọ a je no eghagha avọ eghagha bru omẹ ze. Taure a te ti te uwou mẹ, mẹ rẹ jọ ughẹgbe obọdẹ mẹ rue rai. Nọ ohwo o te te uwou mẹ no, mẹ vẹ rọ evabọ mẹ tehe evabọ riẹ, oghẹrẹ ẹyao hayo ẹbẹbẹ riẹ gbe ifue riẹ i ve rovie kẹ omẹ. Ẹzi na ọ rẹ jẹ ta unuigho nọ ahwo a rẹ hwa kẹ omẹ.
Igho gbe ekẹ i je tunye ze fiki epanọ imu mẹ e jẹ sẹ te. Me te zihe ruọ ‘ọnọ o wo efe,’ rekọ me te je wo otoriẹ oware nọ ẹme na “ababọ ọmọ” u dikihẹ kẹ. Oke kpobi nọ me yẹ ọmọ, ọnọ me yẹ riẹ tu o ve whu. Onana o k’omẹ uye gaga. Evaọ ikpe 12 nọ mẹ jẹ gọ ẹzi ọnana, emọ ezeza mẹ i whu.
Me te muọ Ọghẹnẹ họ ẹlẹ se kẹ obufihọ. Mẹ lẹ gaga. Ẹdẹjọ Isẹri Jihova i te kporo ẹthẹ mẹ. Dede nọ me je le ai vẹre, ẹdẹ ọyena mẹ tẹ ta nọ mẹ rẹ gaviezọ. Evaọ ẹme nọ a ta, mẹ tẹ riẹ nọ idhivẹri mẹ jẹ gọ! Me te ku ei họ nọ me re siobọno iruẹru-imizi.
Nọ mẹ ta ere kẹ idhivẹri na, ọ tẹ vẹvẹ omẹ unu kpahe ẹjiroro mẹ na. Rekọ, mẹ tẹ ta nọ: “Usu mẹ avọ owhẹ u kuhọ no.”
Mẹ tẹ mahe eware nọ mẹ jẹ rọ gbẹva kpobi. Me te wuhrẹ Ebaibol kugbe Isẹri na, zihe ruọ odibo Jihova, mẹ tẹ họ-ame evaọ 1973. Enẹna me wo emọ isoi nọ e rrọ omokpokpọ. Ọzae mẹ o te je zihe ruọ Osẹri nọ ọ họ-ame no.”—Iku nọ Josephine Ikezu o gbe.
[Enọ Uwuhrẹ]
Ẹkpẹti: Ẹvẹ aye jọ o ro siomano idhivẹri na?
[Iwoho nọ e rrọ ẹwẹ-obe avọ 26]
Ẹvẹ whọ sae rọ gọ egagọ uzẹme?
Enana E Sae jẹ Were Owhẹ
KPAHE OMAI
Ẹvẹ A re Ru Obe-Uwuhrẹ Ebaibol?
A jọ akpọ na soso riẹ Isẹri Jihova wọhọ ahwo nọ a re wuhrẹ Ebaibol na kugbe ahwo ọvọvẹ. Rri epanọ a be hai ru iwuhrẹ na.
