ẸKPẸTI UWUHRẸ 19B
Ame nọ O Bi Su Omomoto O Zihe Ruọ Ẹkẹre!
Izikiẹl ọ be nya oko-ame nọ o bi su no aruẹri Jihova ze, onọ o rọ edhere igbunu zihe ruọ ame okokodo nọ o je kporo ẹkẹre evaọ oria nọ o dina theri vrẹ emaele ọvo! Ọ jọ akotọ ethẹ na ruẹ ire ilogbo nọ e rrọ kẹ emuore gbe usiwo. Eme enana kpobi i dhesẹ?
Ethẹ na Ọ be Wha Eghale Ze
OKE ANWAE: Nọ ahwo na a no igbo ze no, eghale buobu i te rai obọ fikinọ a romakẹ egagọ efuafo evaọ etẹmpol na
OKE MAI NA: Evaọ 1919 a zihe egagọ efuafo ze, onọ o wha riẹ ze nọ eghale buobu i ro te idibo Ọghẹnẹ evaọ egagọ rai
OBARO: Nọ Amagidọn ọ tẹ vrẹ no, Jihova ọ te kẹ omai eghale nọ i re fiobọhọ kẹ omai evaọ abọ ugboma gbe usu mai kugbei
Ame nọ Ọ rẹ Kẹ Uzuazọ
OKE ANWAE: Jihova o ku eghale ku ahwo riẹ nọ a bi yoẹme kẹe, yọ dede nọ a je dhe ebuebu, Jihova o ru ọruẹrẹfihotọ nọ o je fiobọhọ kẹ ae gọe ziezi
OKE MAI NA: Evaọ ukoko Ọghẹnẹ nọ o wọhọ aparadase na, ahwo nọ a bi dhe ebuebu na a bi wo erere no idhere sa-sa nọ Jihova o bi ro wuhrẹ ai ze, onana u te bi ru ai wo emamọ usu kugbe Ọghẹnẹ
OBARO: Ahwo nọ a kpare no uwhu ze a ti kuomagbe enọ e zọ evaọ Amagidọn, yọ Jihova ọ te kẹ aikpobi eghale buobu
Ire nọ E Rrọ Kẹ Emuore gbe Usiwo
OKE ANWAE: Jihova ọ jẹ rehọ ẹme riẹ kuọ ahwo riẹ nọ a yoẹme kẹe nọ a zihe no igbo ze no; o te je siwi ai no uzuazọ uzioraha nọ a duomahọ evaọ ikpe buobu na
OKE MAI NA: Ẹme Ọghẹnẹ nọ ma bi wuhrẹ da oma fia u bi ru nọ ma be sae rọ whaha uzuazọ uzioraha nọ ahwo buobu a bi duomahọ evaọ akpọ na, ma te je bi wo otoriẹ Ẹme Ọghẹnẹ
OBARO: Kristi avọ ahwo idu udhuhrẹ-gbene (144,000) nọ a ti lele iei su na a ti fiobọhọ kẹ ahwo-akpọ zihe ruọ ahwo ọgbagba je wo omokpokpọ bẹdẹ bẹdẹ!
