A rẹ sae fa otọ egagọ wọhọ, “oware nọ ohwo o re ru ro dhesẹ adhẹẹ gbe uyoyou kẹ ọghẹnẹ.” Ẹme nọ a jọ Ebaibol na fa “egagọ” o rẹ sai dhesẹ epanọ ohwo o re wo adhẹẹ odidi kẹ omama ofa hayo yoẹme kẹe. (Mat. 28:9) Eme yena e rẹ sai je dhesẹ oware nọ ohwo o ru kẹ Ọghẹnẹ hayo edhọ. (Jọn 4:23, 24) Eme nọ e wariẹ ẹme na họ i re dhesẹ otofa ẹme na.

Jihova, ọnọ ọ rrọ Ọmemama gbe Osu ehrugbakpọ na ọvo o te ọnọ ma rẹ rọ egagọ mai kpobi kẹ. (Evia. 4:10, 11) Ma tẹ be rọ adhẹẹ kẹ udu-esuo okpehru Jihova jẹ be kẹ odẹ riẹ orro, yọ ẹgọ ma be gọe na. (Ol. 86:9; Mat. 6:9, 10) Eware ivẹ nana​—udu-esuo okpehru Jihova gbe odẹ riẹ​—yọ eware nọ a jọ obe Izikiẹl ta kpahe gaga. Ẹme na, “Jihova Olori nọ Ọ Mai Kpehru” o romavia isia egba ivẹ gbe ikpegbihrẹ (217) evaọ obe Izikiẹl ọvo, yọ ẹme na “riẹ nọ mẹ họ Jihova” ọ romavia isia udhosa.​—Izik. 2:4; 6:7.

Rekọ egagọ mai yọ oware nọ o rẹ jọ ohwo udu ọvo ho; ukpoye, a rẹ rọ iruo dhesẹ iẹe via. (Jem. 2:26) Nọ ma rọ uzuazọ mai mudhe kẹ Jihova, ma ya eyaa nọ evaọ kabọ kabọ uzuazọ mai, ma ti yoẹme kẹ Jihova wọhọ Osu mai nọ Ọ Mai Kpehru je wo adhẹẹ odidi kẹ odẹ riẹ. Kareghẹhọ nọ Jesu ọ jọ uyo nọ ọ kpahe kẹ Ẹdhọ evaọ odawọ avesa na ta ẹme nọ u dhesẹ nọ “iruo ọrẹri” avọ egagọ e jẹhọ ohwohwo. (Mat. 4:10) Nọ ma rrọ idibo Jihova na, ma rẹ rọ ọwhọ gọe. * (Izie. 10:12) U re dhesẹ nọ ma bi ru iruo ọrẹri kẹ Ọghẹnẹ nọ ma te bi wobọ evaọ iruẹru nọ i kpomahọ egagọ mai gbe enọ e gwọlọ oma-urodheidhe. Iruẹru vẹ ma be ta kpahe na?

Oghẹrẹ iruo ọrẹri sa-sa e riẹ, yọ aikpobi e rrọ ghaghae evaọ aro Jihova. Ma tẹ be ta usi uwoma kẹ amọfa, ma te kpohọ iwuhrẹ jẹ be jarai wobọ, ma tẹ be rẹrote Egwa Uvie gbe Egwa Okokohọ je bi wobọ evaọ ebabọ rai, yọ iruo ọrẹri ma bi ru na. U re je dhesẹ nọ ma bi ru iruo ọrẹri nọ ma te bi wobọ evaọ egagọ uviuwou, wobọ evaọ iruo ogbodhẹ nọ a re ro fiobọhọ kẹ inievo nọ e gwọlọ obufihọ, ma tẹ fialoma via kẹ iruo evaọ okokohọ, hayo nọ ma tẹ be jọ Ebẹtẹle ru iruo. (Hib. 13:16; Jem. 1:27) Nọ egagọ efuafo e tẹ rọ oware ọsosuọ evaọ iroro gbe udu mai, u ti ru omai ru “iruo ọrẹri . . . te aso te uvo.” O rẹ were omai oma re ma gọ Ọghẹnẹ mai, Jihova!​—Evia. 7:15.