ẸKPẸTI UWUHRẸ 1B
Eware nọ E Rrọ Obe Izikiẹl
A rẹ sae ghale obe Izikiẹl fihọ abọ sa-sa wọhọ epanọ o rrọ obotọ na:
UZOU 1 RITE 3
Evaọ ukpe 613 B.C.E., nọ Izikiẹl ọ jẹ rria udevie ahwo nọ a jọ igbo evaọ Babilọn, o te mu eruẹaruẹ Ọghẹnẹ họ ẹruẹ, a tẹ jẹ rehọ iẹe mu re ọ ruẹaro kẹ ahwo Ju nọ a jẹ rria akotọ ethẹ Kiba.
UZOU AVỌ 4 RITE 24
Evaọ etoke ukpe 613 rite 609 B.C.E., Izikiẹl o whowho ovuẹ nọ ọ jọ eruẹaruẹ ruẹ, yọ ugogo ovuẹ nọ o je whowho họ oziẹ nọ a brukpe Jerusalẹm avọ ahwo ọwọsuọ riẹ nọ e jẹ gọ edhọ.
UZOU AVỌ 25 RITE 32
Muhọ evaọ ukpe 609 B.C.E., koyehọ ukpe nọ ahwo Babilọn a rọ nyaze ti ko Jerusalẹm họ evaọ orọ urere, Izikiẹl o gbe je whowho oziẹ nọ a brukpe Jerusalẹm ho, ukpoye, kọ oziẹ nọ a brukpe erẹwho ewegrẹ nọ e wariẹ Jerusalẹm họ—Ammọn, Edọm, Ijipti, Moab, Filistia, Saedọn, gbe Taya.
UZOU AVỌ 33 RITE 48
Evaọ ukpe 606 B.C.E., yọ a raha Jerusalẹm avọ etẹmpol riẹ kuotọ no. Evaọ oke nana oria nọ Izikiẹl ọ jọ o rehọ emaele buobu gaga thabọ no Jerusalẹm avọ etẹmpol na. Ghele na, muhọ no ukpe yena vrẹ, ovuẹ Izikiẹl o jọ orọ ẹruore, koyehọ ovuẹ kpahe egagọ efuafo Jihova Ọghẹnẹ nọ a ti zihe ze.
A ruẹrẹ obe Izikiẹl na họ othotha lele okenọ eware na e rọ via gbe oware nọ o be ta kpahe. Eruẹaruẹ kpahe ọraha Jerusalẹm avọ etẹmpol riẹ a kake ta kpahe, kẹsena eruẹaruẹ buobu kpahe egagọ efuafo nọ a ti zihe ze i te lele iei. Onana u kiehọ keme, eruẹaruẹ kpahe ezihe ze egagọ efuafo na i dhesẹ nọ a gbẹ jẹ jọ etẹmpol na gọ họ.
Ofariẹ, eruẹaruẹ Izikiẹl kpahe oziẹ nọ Ọghẹnẹ o brukpe erẹwho ewegrẹ nọ e wariẹ Jerusalẹm họ na (uzou avọ 25 rite 32) i lele eruẹaruẹ riẹ kpahe oziẹ nọ a brukpe Jerusalẹm, kẹsena u te te eruẹaruẹ riẹ kpahe ezihe ze egagọ efuafo. Ọgba-eriariẹ jọ ọ ta kpahe evuẹ nọ Izikiẹl o whowho kpahe oziẹ nọ a brukpe erẹwho na nọ: “Whọ rẹ jarae ruẹ oghẹrẹ nọ ẹme na o ro nwene no ovuẹ kpahe ofu Ọghẹnẹ kpohọ ovuẹ kpahe ohrọ nọ O wo kẹ ahwo Riẹ, keme uye nọ a rọ kẹ ewegrẹ rai yọ oware nọ o wha esiwi se ahwo riẹ.”
