ẸKPẸTI UWUHRẸ 19A
Ithẹ Eghale nọ I No Obọ Jihova Ze
Roro kpahe eria Ebaibol sa-sa nọ a jọ rehọ eme na, “ethẹ” gbe “ame” ro dhesẹ eghale nọ i bi no obọ Jihova ze. Ma te se eria nana kpobi, e rẹ tuduhọ omai awọ keme ma rẹ jarai ruẹ idhere sa-sa nọ Jihova ọ be rọ ghale omai. Evaọ oghẹrẹ vẹ?
JOẸL 3:18 Eruẹaruẹ nana e ta kpahe eyeri-ame nọ o bi su no oria aruẹri etẹmpol na ze. O te su nyai ru “Ukiekpotọ Ire Akasha” fihọ vuavo. Fikiere, eruẹaruẹ Joẹl avọ erọ Izikiẹl na e be ta kpahe ethẹ nọ o ru nọ uzuazọ o rọ ziọ eria nọ uzuazọ o rrọ vẹre he. Yọ evaọ eruẹaruẹ ivẹ na, uwou Jihova, koyehọ, etẹmpol riẹ ethẹ na o su no ze.
ZẸKARAYA 14:8 Zẹkaraya ọruẹaro na ọ ruẹ “ame uzuazọ” nọ o bi su no okpẹwho Jerusalẹm ze. Abọvo ame na o su rri ofẹ abade ovatha-ọre na, hayo Abade Owhuowhu na, abọ nọ o kiọkọ o te su rri ofẹ abade ukiediwo-ọre na, hayo Abade Mediterenia. Jerusalẹm ọ jọ “okpẹwho Ovie ologbo na,” Jihova Ọghẹnẹ. (Mat. 5:35) Okpẹwho yena nọ Zẹkaraya ọ fodẹ na o rẹ kareghẹhọ omai okenọ Jihova o ti su otọakpọ na soso evaọ obaro. Otoriẹ nọ ma wo anwẹdẹ họ, ame nọ a fodẹ evaọ eruẹaruẹ nana u dhesẹ nọ Jihova ọ te ghale eko ahwo ivẹ jọ nọ i yoẹme kẹe evaọ Aparadase, koyehọ, enọ e zọ evaọ etoke uye ulogbo na avọ enọ a te kpare no uwhu ze.
EVIAVIA 22:1, 2 Jọn ukọ na ọ ruẹ ethẹ nọ ọ wọhọ ọnọ Izikiẹl ọ ruẹ na. Rekọ agbara-uvie Jihova o je su no ze, orọnikọ etẹmpol ho. Fikiere, o wọhọ nọ eruẹaruẹ nana e be ta kpahe eghale nọ Esuo Odu-Ikpe na ọ te wha ze wọhọ epanọ eruẹaruẹ Zẹkaraya i dhesẹ re na.
Ma riẹ nọ ohẹriẹ o dina rrọ eghale nọ i ti no esuo Jihova ze avọ eghale nọ ethẹ nọ Izikiẹl ọ ruẹ na o dikihẹ kẹ. Rekọ obọ Jihova eghale na kpobi i no ze, yọ i ti te ahwo kpobi nọ a yoẹme obọ.
OLEZI 46:4 Muẹrohọ nọ owọ Ebaibol nana o ta kpahe eware ivẹ, egagọ gbe esuo. Ma jọ etenẹ se kpahe ethẹ nọ ọ be wha oghọghọ se “okpẹwho Ọghẹnẹ,” onọ o rẹ sai dikihẹ kẹ Uvie na gbe isuẹsu. O tẹ jẹ be wha oghọghọ se “uwou-udhu ulogbo ọrẹri orọ Ọnọ Ọ Mai Kpehru na,” onọ o rẹ sai dikihẹ kẹ egagọ efuafo.
Ma te rri eria ikere nana kpobi, e rẹ kẹ omai imuẹro nọ Jihova o wo idhere ivẹ jọ nọ ọ te rọ ghale ahwo-akpọ nọ a yoẹme. Orọ ọsosuọ, ma ti wo erere no isuẹsu riẹ ze. Orọ avivẹ, ma ti wo erere no ọruẹrẹfihotọ egagọ efuafo riẹ ze. Yọ irere nana kpobi e te jọ bẹdẹ bẹdẹ. Fikiere, joma gbaemu enẹna inọ ma rẹ da “ame uzuazọ” nọ o bi no obọ Jihova Ọghẹnẹ avọ Ọmọ riẹ ze na, koyehọ, ma rẹ jẹ eware nọ a bi ro fiobọhọ kẹ omai rehọ re ma wo uzuazọ ebẹdẹ bẹdẹ!—Jeri. 2:13; Jọn 4:10.
